Kapite Lua

Tou Fakavikiviki Kia Sehova, Te ʼAtua Moʼoni Pe e Tahi

1. Ko ai te ʼAtua moʼoni e tahi?

ʼE ʼUI e te Tohi-Tapu logola ʼe lahi te ʼu ʼatua, kae “kia tatou, ʼe ʼi ai moʼoni te ʼAtua e tahi, te Tāmai.” (1 Kolonito 8:​5, 6) Ko “te ʼAtua e tahi” ʼaia ʼe ko Sehova, te Tupuʼaga ʼo meʼa fuli pe. (Teutalonome 6:4; Apokalipesi 4:11) Neʼe higoaʼi e Sesu ʼe ko “toku ʼAtua pea mo tokotou ʼAtua.” (Soane 20:​17) Neʼe manatu tahi mo Moisese, ʼaē neʼe ina ʼui fēnei ki muʼa atu: “Ko Sehova te ʼAtua moʼoni; ʼe mole he tahi age ʼAtua.” (Teutalonome 4:35) ʼE māʼoluga age Sehova ʼi te ʼu meʼa ʼaē ʼe atolasio kiai te hahaʼi, ohage ko te ʼu tamapua, te ʼu ʼatua tagata, pea mo tona fili ko Satana te Tevolo, ʼaē ko “te ʼatua ʼo te tuʼu ʼo te ʼu faʼahiga meʼa ʼaenī.” (2 Kolonito 4:​3, 4) Kae moʼo fakakeheʼi ia ia ʼi te ʼu meʼa fuli ʼaia, ʼe fakahigoaʼi e Sesu ia Sehova ʼe ko “te ʼAtua moʼoni pe ʼaē e tahi.”​—Soane 17:3.

2. ʼI tatatou mahino ki te ʼAtua, ʼe tonu ke malave feafeaʼi ki totatou maʼuli?

² Ko te ʼu hahaʼi ʼaē ʼe loto fakafetaʼi ʼi tanatou mahino ki te ʼu kalitate taulekaleka ʼo te ʼAtua, pea mo te ʼu meʼa ʼaē neʼe ina fai pea ka ina fai anai maʼa nātou, ʼe ina ʼeke nātou ke nātou fakatahi mo ia. ʼI te tuputupu ʼo tonatou ʼofa kia Sehova, ʼe uga ai nātou ke nātou fakavikiviki kia te ia. ʼO feafeaʼi? ʼO nātou palalau ki te hahaʼi ʼo ʼuhiga mo ia. ʼE ʼui fēnei ia Loma 10:​10: “ ʼAki te gutu ʼe kita tala ia muʼa ʼo te kaugamālie ʼo ʼuhiga mo te fakamaʼuli.” Ko te tahi meʼa ʼe feala ke tou fai ʼe ko hatatou faʼifaʼitaki kia te ia ʼi tatatou ʼu palalau pea mo tatatou ʼu aga. ʼE ʼui fēnei ia Efeso 5:1: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina.” Moʼo fakahoko lelei ia te faʼahi ʼaia, ʼe tonu ke tou ʼiloʼi te ʼulugaaga moʼoni ʼo Sehova.

3. Koteā te ʼu kalitate tāfito ʼo te ʼAtua?

³ ʼI te Tohi-Tapu, ʼe lahi ʼaupito te ʼu fakamatala ʼo ʼuhiga mo te ʼu kalitate fakaofoofo ʼo te ʼAtua. Ko tana ʼu kalitate tāfito ʼe ko te poto, te faitotonu, te mālohi pea mo te ʼofa. “ ʼE maʼu ia te ia te poto.” (Sopo 12:13) “Ko tona ʼu ala fuli ʼe faitotonu.” (Teutalonome 32:4) ʼE “ina maʼu te māfimāfi.” (Isaia 40:26) “Ko te ʼAtua ʼe ʼofa.” (1 Soane 4:​8) Kae ʼi te ʼu kalitate tāfito ʼaia e fā ʼo te ʼAtua, ko te kalitate fea ʼaē ʼe makehe, te kalitate tāfito fea ʼaē ʼe ina fakahā lelei te ʼulugaaga ʼo te ʼAtua?

“Ko Te ʼAtua ʼe ʼOfa”

4. Ko te kalitate fea ʼa Sehova ʼaē neʼe ina uga ia ia ke ina fakatupu te ʼatulaulau pea mo te ʼu meʼa maʼuli fuli pe?

⁴ Tou vakaʼi pe koteā ʼaē neʼe ina uga ia Sehova ke ina fakatupu te ʼatulaulau pea mo te ʼu ʼaselo pea mo te tagata. Neʼe ko tona poto koa peʼe ko tona māfimāfi? Kailoa, heʼe logola neʼe fakaʼaogaʼi e te ʼAtua te ʼu kalitate ʼaia, kae neʼe mole ko te tāfito ʼaia ʼo tana gāue. Pea ko tana faitotonu neʼe mole ina fakamaʼua kia te ia ke ina vaevae te meʼa ʼofa ʼaē ko te maʼuli. Kae ko te ʼofa lahi ʼa te ʼAtua ʼaē neʼe ina uga ia ia ke ina vaevae te fiafia ʼo te maʼuli mo te hahaʼi. Ko tana ʼofa ʼaē neʼe ina uga ia ia ke ina fai he fakatuʼutuʼu, ke ʼi ai he ʼu hahaʼi fakalogo ʼe maʼuʼuli ʼo heʼegata ʼi te Palatiso. (Senesi 1:28; 2:15) Ko tana ʼofa ʼaē neʼe tupu ai tana fai he fakatuʼutuʼu ke molehi te tūʼa ʼo te malamanei ʼuhi ko te agahala ʼo Atama.

5. ʼO mulimuli ki te Tohi-Tapu, ko Sehova ʼe ko te faʼifaʼitaki lelei ʼo te kalitate fea, pea koteā tona tupuʼaga?

⁵ Koia ʼi te ʼu kalitate fuli ʼa te ʼAtua, koia ʼaē ʼe makehe ʼe ko tona ʼofa. Ko tona ʼulugaaga moʼoni ʼaia. ʼE mole ʼui e te Tohi-Tapu, ko Sehova ʼe ko te poto, mo te faitotonu, pea mo te māfimāfi, kae ʼe ina ʼui ʼe ko te ʼofa. ʼE moʼoni, ko Sehova ʼe ko te faʼifaʼitaki lelei ʼo te ʼofa. Ko te ʼofa ʼaia ʼe takitaki e te ʼu pelesepeto kae mole mulimuli ki te ʼu meʼa ʼaē ʼi te loto. ʼE mulimuli te ʼofa ʼa te ʼAtua ki te ʼu pelesepeto ʼo te moʼoni pea mo te faitotonu. ʼE ko te agaaga māʼoluga ʼaia ʼo te ʼofa, ohage ko tona fakahā e Sehova ʼAtua totonu. Ko te ʼofa ʼaia ʼe ko he fakahā ʼo he ʼofa faka sakilifisio katoa, ʼe pipiki tuʼumaʼu kiai he ʼu gāue ʼe fakahā ʼaki tona ʼofa.

6. Koteā ʼaē ka ina faka fealagia ke tou faʼifaʼitakiʼi te ʼAtua, tatau aipe peʼe māʼoluga age ia tatou?

⁶ ʼE feala ke tou faʼifaʼitakiʼi te ʼAtua ʼuhi ko te kalitate fakaofoofo ʼaē ko te ʼofa. ʼUhi ko tatou ko he ʼu hahaʼi mālalo, mo heʼe haohaoa, pea mo agahala, koia ʼe lagi tou manatu ai ʼe mole tou lava faʼifaʼitakiʼi te ʼAtua. Kae ʼe ko te tahi faʼifaʼitaki ʼaenī ʼo te ʼofa lahi ʼa Sehova: ʼe Ina ʼiloʼi totatou ʼu tuʼakoi pea ʼe mole ina fakamaʼua mai ke tou haohaoa. ʼE ina ʼiloʼi ʼe tou mamaʼo nei mai te maʼuli haohaoa. (Pesalemo 51:5) Ko tona tupuʼaga la ʼaia ʼo te ʼui fēnei ia Pesalemo 130:​3, 4: “Kanapaula neʼe ke lamalama te ʼu hala, Ê Sah, Ê Sehova, ko ai koa ʼaē ʼe feala anai ke tuʼu? Heʼe maʼu ia te koe te fakamolemole moʼoni.” Ei, ko Sehova ʼe ko he “ ʼAtua agaʼofa pea mo manavaʼofa, tuai ʼi te ʼita pea mo mahu ʼi te lotoʼofa pea mo te moʼoni.” (Ekesote 34:6) “Ko koe, Ê Sehova, ʼe ke agalelei pea mo fakamolemole gafua.” (Pesalemo 86:5) ʼI meʼa fakaloto fīmālie! ʼE ko he meʼa fakafiafia te tauhi ki te ʼAtua fakatalakitupua ʼaia pea mo hatatou sio ki tona ʼofa pea mo tona agaʼofa!

7. ʼE hā feafeaʼi te ʼofa ʼo Sehova ʼi te ʼu meʼa ʼaē neʼe ina fakatupu?

⁷ ʼE hā te ʼofa ʼo Sehova ʼi te ʼu meʼa ʼaē neʼe ina fakatupu. Koutou fakakaukauʼi age muʼa te ʼu tuʼuga meʼa lelei ʼaē neʼe foaki mai e Sehova ke tou fiafia ai, ohage ko te ʼu moʼuga matalelei, te ʼu vao matuʼa, te ʼu vaitafe pea mo te ʼu moana. Neʼe ina foaki mai kia tatou he ʼu tuʼuga meʼa kai kehekehe, ke tou fiafia ai ʼi tatatou kai pea mo maʼu ai hatatou mālohi. Pea neʼe toe foaki mai e Sehova he ʼu fisiʼi teu kehekehe matalelei mo magoni, pea mo te ʼu manu fakaofoofo. Neʼe ina fakatupu ia meʼa fuli ke fiafia ai te tagata, kae neʼe mole ko he fakamaʼua ia kia te ia. ʼE moʼoni, ʼuhi ko tatatou maʼuli ʼi te mālama agakovi ʼaenī ʼi totatou ʼuhiga heʼe haohaoa, ʼe mole feala ke tou fiafia katoa ʼi te ʼu meʼa ʼaē neʼe ina fakatupu. (Loma 8:22) Kae koutou fakakaukauʼi age te meʼa ʼaē ka fai anai e Sehova maʼa tatou ʼi te Palatiso! ʼE fakapapau fēnei mai e te tagata fai pesalemo: “ ʼE ke folahi tou nima pea ʼe ke fakahoko te loto ʼo te meʼa maʼuli fuape.”​—Pesalemo 145:16.

8. Koteā te faʼifaʼitaki fakaofoofo ʼo te ʼofa ʼo Sehova kia tatou?

⁸ Koteā te faʼifaʼitaki fakaofoofo ʼo te ʼofa ʼo Sehova ki te malamanei? ʼE fakamahino fēnei mai e te Tohi-Tapu: “Ko te ʼAtua ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” (Soane 3:16) Neʼe fai koa e Sehova te meʼa ʼaia ʼuhi ko te agalelei ʼa te tagata? ʼE tali fēnei ia Loma 5:8: “Kae ko te ʼAtua ʼe ina fakahā totonu mai kia tatou tona ʼofa ʼi te faʼahi ʼaia, ʼi te temi ʼaē neʼe kei tou agahala ai, neʼe mate ia Kilisito maʼa tatou.” Neʼe fekauʼi ifo e te ʼAtua tona ʼAlo ki te kele ke ina foaki tona maʼuli ko he sakilifisio, moʼo totogi tatou mai te tūʼa ʼo te agahala pea mo te mate. (Mateo 20:28) Neʼe foaki ai te fealagia ki te hahaʼi ʼaē ʼe ʼoʼofa ki te ʼAtua ke nātou maʼu te maʼuli heʼegata. ʼI meʼa fakafiafia kia nātou ʼaē ʼe nātou fia fai te finegalo ʼo te ʼAtua, heʼe faka fealagia e te ʼAtua ke nātou maʼu tona ʼofa, heʼe ʼui fēnei mai e te Tohi-Tapu kia tatou: “Ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.”​—Gaue 10:​34, 35.

9. Ko te foaki e Sehova tona ʼAlo ko he totogi maʼa tatou, ʼe tonu ke ina ʼeke tatou ke tou fai teā?

⁹ ʼI tatatou ʼiloʼi ʼaē neʼe foaki e Sehova tona ʼAlo ko he totogi ke feala ke tou maʼuʼuli ʼo heʼegata, ʼe mole tonu koa la ke tou fakakaukauʼi te faʼahi ʼaia ʼo ʼuhiga mo te fakaʼaogaʼi ʼo totatou maʼuli? ʼE fakalogo te faʼahi ʼaia ki tatatou ʼofa ki te ʼAtua moʼoni, ko Sehova. Pea ʼe tonu ke tou fia fakalogo kia Sesu, ʼaē ʼe ina fakafofoga te ʼAtua. Ko Sesu “neʼe mate maʼa te tagata fuape ke feala kia nātou ʼaē ʼe maʼuʼuli, ke mole nātou maʼuʼuli maʼa nātou totonu, kae ke nātou maʼuʼuli maʼa ia ʼaē neʼe mate maʼa nātou pea kua toe fakatuʼuake.” (2 Kolonito 5:15) ʼE ko he meʼa fakafiafia te mulimuli ki te ʼu tafuga vaʼe ʼo Sesu, he neʼe ina faʼifaʼitakiʼi lelei te ʼofa pea mo te manavaʼofa ʼa Sehova! Neʼe mole ina ʼui koa la ki te hahaʼi agavaivai: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau ʼamo pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau ʼamo ʼe mālū pea ko taku kavega ʼe maʼamaʼa.”​—Mateo 11:​28-30.

Tou ʼOfa Ki Te Hahaʼi

10. Koteā te ʼu ʼaluʼaga ʼe feala ke tou fakahā ai te ʼofa ki totatou ʼu kaugā gāue faka Kilisitiano?

¹⁰ ʼE tou lava fakahā feafeaʼi te ʼofa ki totatou ʼu kaugā gāue faka Kilisitiano ohage ko te ʼofa ʼo Sehova pea mo Sesu kia tatou? Koutou tokagaʼi te ʼu ʼaluʼaga kehekehe ʼe feala ke tou fakahā ai te ʼofa ʼaia: “Ko te ʼofa ʼe kātaki fualoa pea mo agalelei. Ko te ʼofa ʼe mole maheka ia, ʼe mole laupisi, ʼe mole fialahi, ʼe mole ina fai he ʼu aga ʼe mole mata feʼauga, ʼe mole ina kumi pe te meʼa ʼaē ʼe ʼaoga kia te ia, ʼe mole ʼita ia. ʼE mole ina tokagaʼi te kovi ʼaē neʼe fai kia te ia. ʼE mole fakafiafia ki te heʼe faitotonu, kae ʼe fakafiafia ʼaki te moʼoni. ʼE ina ʼamo ia meʼa fuli, ʼe tui kia meʼa fuli, ʼe falala kia meʼa fuli, ʼe ina kātakiʼi ia meʼa fuli. Ko te ʼofa ʼe molemo puli ia ʼi he lakaga.”​—1 Kolonito 13:​4-8; 1 Soane 3:​14-18; 4:​7-12.

11. Ko ai te tahi hahaʼi ʼe tonu ke tou fakahā kia nātou te ʼofa, pea ʼe tonu ke feafeaʼi?

¹¹ Ko ai te tahi ʼu hahaʼi ʼaē ʼe tonu ke tou ʼofa ki ai, pea ʼe tonu ke tou fai feafeaʼi? Neʼe ʼui fēnei e Sesu: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.” (Mateo 28:​19, 20) Ko tona faka ʼuhiga, ʼe tonu ke tou tala ki te hahaʼi ʼaē heʼeki kaugā gāue faka Kilisitiano mo tatou, te logo lelei ʼo ʼuhiga mo te mālama foʼou ka hoko mai, ko he kele faka palatiso neʼe fakapapau e te ʼAtua. Neʼe fakahā lelei e Sesu ʼe mole tonu pe ke tou ʼofa kia nātou ʼaē ʼe tou lotu tahi, he neʼe ʼui maʼana: “Heʼe kapau ʼe koutou ʼoʼofa pe kia nātou ʼaē ʼe ʼoʼofa kia koutou, koteā te fakapale ʼe koutou maʼu ai? ʼE mole koa la toe fai feiā pe e te kau tānaki tukuhau? Pea kapau ʼe koutou fakaʼalofa pe ki ʼokotou tēhina, koteā te meʼa ʼaē ʼe koutou fai ʼe koutou makehe ai? ʼE mole koa la toe fai feiā pe e te hahaʼi ʼo te ʼu puleʼaga?”​—Mateo 5:​46, 47; 24:14; Kalate 6:10.

‘Tou Haʼele ʼi Te Huafa ʼo Sehova’

12. He koʼe ko te huafa ʼo te ʼAtua ʼe ko ia totonu pe ʼe feala ke ina toʼo?

¹² Ko te tahi faʼahi maʼuhiga moʼo fakavikiviki ki te ʼAtua moʼoni, ʼe ko te ʼiloʼi ʼo tona huafa makehe ko Sehova, mo tona fakaʼaogaʼi, pea mo tona akoʼi ki te hahaʼi. Neʼe fakahā e te tagata fai pesalemo tana holi lahi ki te faʼahi ʼaia ʼo ina ʼui fēnei: “Ke nātou ʼiloʼi ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele katoa.” (Pesalemo 83:18) Ko te huafa ʼo Sehova ko tona faka ʼuhiga “ ʼE Ina Fakahoko.” Ko Sehova ʼe ko te ʼAtua Lahi ʼaē ʼe ina fai te ʼu fakatuʼutuʼu, pea mo ina fakaliliu tuʼumaʼu tana ʼu fakatuʼutuʼu ke hoko moʼoni. Pea ʼe gata pe ki te ʼAtua moʼoni te fealagia ʼaē ke ina toʼo te huafa ʼaia, heʼe mole feala ki te tagata ke ina ʼiloʼi papau peʼe hoko moʼoni anai tana ʼu fakatuʼutuʼu. (Sakopo 4:​13, 14) Ko Sehova tokotahi pe ʼe feala ke ina ʼui “ ʼe lava lelei anai” te meʼa ʼaē neʼe ina fekauʼi ke hoko. (Isaia 55:11) ʼE punamaʼuli te tokolahi ʼi tanatou ʼuluaki sio ki te huafa ʼo te ʼAtua ʼi tanatou Tohi-Tapu pea mo ʼiloʼi tona faka ʼuhiga. (Ekesote 6:3) Kae ʼe nātou maʼu anai te ʼu lelei ʼo te ʼatamai mālama ʼaia mo kapau ʼe nātou “haʼele . . . ʼi te huafa ʼo Sehova . . . ʼo talu ai.”​—Mikea 4:5.

13. Koteā te faka ʼuhiga ʼo te ʼiloʼi ʼo te huafa ʼo Sehova pea mo haʼele ʼi tona huafa?

¹³ ʼO ʼuhiga mo te huafa ʼo te ʼAtua, ʼe ʼui fēnei ia Pesalemo 9:10: “Ko nātou ʼaē ʼe nātou ʼiloʼi tou huafa ʼe nātou falala anai kia te koe.” ʼE fakahā e te faʼahi ʼaia ʼe mole feʼauga pe hatatou ʼiloʼi te huafa ʼo Sehova, heʼe mole faka ʼuhiga ai ʼe tou falala kia te ia. Ko te ʼiloʼi ia te huafa ʼo te ʼAtua, ko tona faka ʼuhiga ke tou ʼiloʼi tona ʼuhiga ʼAtua ʼaē ko Sehova, mo fakaʼapaʼapa ki tona pule, mo fakalogo ki tana ʼu fakatotonu, pea mo falala kia te ia ia meʼa fuli pe. (Tāʼaga Lea 3:​5, 6) ʼO toe feiā pe, ko te haʼele ʼi te huafa ʼo Sehova ko tona faka ʼuhiga ke tou foaki totatou maʼuli kia te ia pea mo fakafofoga ia ia ohage ko hana kau atolasio, pea mo maʼuli tahi mo tona finegalo. (Luka 10:27) ʼE koutou fai koa te faʼahi ʼaia?

14. Kapau ʼe tou fia tauhi kia Sehova ʼo talu ai, koteā te tahi age ʼu meʼa ʼe ʼaoga ke tou fai ʼo mole gata ʼaki pe tatatou fai ohage ko he fakamaʼua?

¹⁴ Kapau ʼe tou fia tauhi kia Sehova ʼo talu ai, pea ʼe mole tonu ke tou fai te faʼahi ʼaia ʼuhi pe ko he fakamaʼua. Neʼe fakaloto mālohiʼi fēnei e te ʼapositolo ko Paulo ia Timoteo, ʼaē neʼe tauhi kia Sehova lolotoga ni ʼu taʼu: “Faigaʼi ʼaki he fakatuʼutuʼu ke ke pipiki ki te ʼAtua.” (1 Timoteo 4:​7) Ko te pipiki ki he tahi, ʼe tupu mai he loto ʼe fonu ʼi te loto fakafetaʼi. Ko te “pipiki ki te ʼAtua” ʼe ko he fakahā ʼaia ʼo he fakaʼapaʼapa lahi kia Sehova totonu, ʼo he ʼofa lahi ʼe tupu mai he leleiʼia ʼaupito ʼo tona ʼuhiga ʼAtua pea mo tona ʼu ala. Ko te faʼahiga manatu ʼaia ʼe ina ʼeke tatou ke tou loto ke faka maʼuhigaʼi tona huafa e te tagata fuape. ʼE tonu ke tou maʼu te pipiki ʼaia ki te ʼAtua, mo kapau ʼe tou fia haʼele ʼo talu ai, ʼi te huafa ʼo Sehova, te ʼAtua moʼoni pe e tahi.​—Pesalemo 37:4; 2 Petelo 3:11.

15. ʼE tou lava foaki feafeaʼi ki te ʼAtua he pipiki ʼāteaina pe kia te ia?

¹⁵ Ke tali e te ʼAtua tatatou tauhi, ʼe tonu ke tou foaki kia te ia he tauhi ʼe katoa, heʼe ko he ‘ ʼAtua ʼe ina fakamaʼua he pipiki ʼāteaina pe kia te ia.’ (Ekesote 20:5) ʼE mole feala ke tou ʼofa ki te ʼAtua pea mo te mālama agakovi, ʼaē ʼe ko Satana tona ʼatua. (Sakopo 4:4; 1 Soane 2:​15-17) ʼE ʼiloʼi lelei e Sehova te faʼahiga tagata ʼaē ʼe tou faiga ke ʼiloga ia tatou. (Selemia 17:10) Kapau ʼe tou ʼofa moʼoni ki te faitotonu, pea ʼe sio ki te faʼahi ʼaia pea ʼe tokoni mai anai ke tou kātakiʼi tatatou ʼu ʼahiʼahi ʼi te ʼaho fuli pe. ʼI tana tokoni mai kia tatou ʼaki te mālohi ʼo tona laumālie maʼoniʼoni, ʼe ina foaki mai te fealagia ke tou mālo ʼi te agakovi ʼaē ʼe mafola ʼi te malamanei. (2 Kolonito 4:7) ʼE toe tokoni mai anai ke tou taupau mālohi tatatou ʼamanaki ki te maʼuli heʼegata ʼi te palatiso ʼi te kele. ʼE ko he ʼamanaki faka kolōlia lahi ʼaia! ʼE tonu ke tou loto fakafetaʼi lahi kiai, pea mo tou tauhi ʼaki he lotolelei ki te ʼAtua moʼoni ko Sehova, ʼaē neʼe ina faka fealagia mai kia tatou te ʼamanaki ʼaia.

16. Koteā ʼaē ʼe tonu ke koutou fia fai fakatahi mo te tahi ʼu lauʼi miliona hahaʼi?

¹⁶ Ko te lauʼi miliona hahaʼi ʼi te kele neʼe nātou tali fakafiafia te fakaafe ʼa te tagata fai pesalemo ʼaē neʼe ina tohi fēnei: “Koutou faka kolōlia kia Sehova mo ʼau, pea ke tou fakafiafia fakatahi ki tona huafa.” (Pesalemo 34:3) ʼE fakaafe koutou e Sehova ke koutou kau ʼi te hahaʼi tokolahi ʼaē ʼe tuputupu tuʼumaʼu ʼi te ʼu fenua fuli pe ʼaē ʼe nātou fai te meʼa ʼaia.

Fakamanatu

• Koteā te ʼulugaaga ʼo Sehova? Koteā te ʼu lelei ʼe tou maʼu mo kapau ʼe tou mahino lelei ki tona ʼu kalitate?

• Koteā ʼaē ʼe tou lava fai moʼo tokoni ki te hahaʼi ke nātou ako te moʼoni ʼo ʼuhiga mo te ʼAtua?

• Koteā te faka ʼuhiga ʼo te ʼiloʼi ia te huafa ʼo Sehova pea mo haʼele ʼi tona huafa?

[Paki ʼo te pasina 14]

Ko Sehova ʼi tona ʼofa lahi, ‘ ʼe ina folahi anai tona nima pea mo ina fakahoko te loto ʼo te meʼa maʼuli fuli pe’