Te ʼu Fono Moʼo Uga ʼo Te ʼOfa Pea Mo Te ʼu Gāue Lelei
Ko te ʼu ʼuluaki Kilisitiano neʼe nātou fakatahitahi, ʼi te agamāhani ʼi te ʼu loto fale, ke nātou maʼu ai he ako pea ke nātou fakafiafia fakatahi. Ia ʼaho nei, ko te ʼu kokelekasio ʼa te kau Fakamoʼoni ʼa Sehova ʼe nātou fakatahitahi ʼo tuʼa tolu ʼi te vāhaʼa. ʼE fakaafe atu koutou ke koutou kau ki he fono ʼi te ʼu fono ʼaia. Ko ʼanatou ʼu fono ʼe mole fai ohage ko he ʼu toʼotoʼoga, kae ʼe nātou fakatokagaʼi ia tatou ki te ako fakaʼatua. Ko te ʼu fono ʼo te kokelekasio ʼe kamata pea ʼe fakaʼosi ʼaki te katiko pea mo te faikole. Ko te ʼōmai ki te ʼu fono ʼe mole totogi, pea ʼe mole fai he tānaki falā.—Gāue 4:23-31; 14:22; 15:32, 35; Loma 16:5; Kolose 4:15.
E lagi ko te fono ʼaē ʼe koutou ʼuluaki ʼōmai anai kiai, ko te akonaki ki te hahaʼi fuli, ʼaē ʼe minuta 45, ʼe talanoa ai ki te ʼu akonaki faka Tohi-Tapu, te ʼu lea faka polofeta, peʼe ko te ʼu tokoni ʼo ʼuhiga mo te maʼuli faka Kilisitiano. ʼO hoa mai ki te akonaki ʼaia, te ako ʼo te Tohi-Tapu, ʼo fakatafito ki he alatike ʼo Te Tule Leʼo ʼaē neʼe fakatuʼutuʼu tāfito ke ako e te kokelekasio. Ko te ako ʼe fēnei tona fai: ʼE lau te palakalafe ʼo Te Tule Leʼo, pea ko te tēhina ʼaē ʼe ina fai Te Tule Leʼo, ʼe ina fai te ʼu fehuʼi ʼe ʼalutahi mo te palakalafe pea ko nātou ʼaē ʼi te fono ʼaē ʼe nātou fia fai hanatou tali ʼe feala ke hiki ʼonatou nima. ʼI te agamāhani ʼe lahi te ʼu tali ʼe fai ʼi te ʼu palakalafe takitahi. Ko te fono ʼaia ʼe fai ʼi te hola katoa.
Ki muli ʼi te lolotoga ʼo te vāhaʼa, ʼe fai ai te tahi ʼu fono e lua ko tona loaloaga ko te ʼu minuta e 45 takitahi. Ko te ʼuluaki fono ko te Ako ʼo Te Minisitelio Faka Teokalatike. ʼE ina ako mai kia tatou peʼe feafeaʼi tatatou tānaki te ʼu manatu faka Tohi-Tapu pea mo tou poto lelei ʼi tona akoʼi ki niʼihi. ʼI te hili ʼo te akonaki makehe ʼe minuta 21, ko te kau ako ʼaē neʼe hinoʼi fakatomuʼa ʼe nātou fai anai te ʼu kiʼi akonaki nounou. ʼI te ʼosi ʼo te ʼu akonaki takitahi ʼaia, ko te tēhina ʼaē ʼe ina fai te ako ʼe ina foaki he ʼu tokoni ʼo fakahā ai peʼe feafeaʼi te tuputupu ʼo ia ʼaē neʼe fai tana akonaki. ʼE lahi te ʼu tohi neʼe fakatuʼutuʼu ke fakaʼaogaʼi ʼi te ako ʼaia. Ko nātou ʼaē ʼe ʼolo tuʼumaʼu ki te ʼu fono ʼe feala ke nātou kau ki te ako ʼaia, kehe pe ke nātou maʼuli ʼo ʼalutahi mo te ʼu pelesepeto faka Kilisitiano.
ʼE hoa mai kiai te fono ʼaē ʼe higoa ko te Fono Gāue. ʼE vaevae te fono ʼaia ko tona ʼu koga e tolu peʼe fā, ʼo talanoa ki te faka mafola ʼo te logo lelei ʼi te ʼu ʼapi ʼo feiā aipe ki ʼihi koga ʼo te minisitelio. Ko te ʼu koga ʼaia ʼe fai ʼaki te ʼu akonaki, te ʼu fai palalau, peʼe ko te ʼu faʼifaʼitaki, ʼo tautau kau kiai mo nātou ʼaē ʼi te ʼu fono. ʼE lahi ʼaupito te koga ʼo te polokalama ʼe fakatafito ki Te Minisitelio ʼo Te Puleʼaga, ko tona ʼu pasina e fā ʼe fai e te Sosiete Watch Tower ʼi te māhina fuli.
Ko te tahi fono ʼe ko te ako ʼi te vāhaʼa ʼe fai e te kiʼi kūtuga, ʼi te agamāhani ʼe fai ʼi te ʼu ʼapi ʼi te telituale ʼo te kokelekasio. ʼE fakatafito te ako ki te Tohi-Tapu pea mo he tohi foʼou neʼe hoki tā e te Sosiete. ʼI te mole kaugamālie ʼo te kiʼi kūtuga, ʼe faigamālie ai tatatou kau fuli ki te fai palalau, pea ʼe ko he faigamālie lelei ʼaia kia nātou ʼaē ʼi te fono ke nātou feʼiloʼiʼaki lelei.
ʼE lahi te ʼu kokelekasio ʼe fai tanatou ʼu fono ʼi te Fale ʼo te Puleʼaga neʼe laga e te kau Fakamoʼoni ʼa Sehova. Ko te ʼu meʼa ʼaē ʼe tonu ke totogi, ʼe totogi ʼaki te ʼu meʼa ʼofa ʼa te kau Fakamoʼoni ʼa Sehova, pea ʼe lahi te gāue ʼe fai e te hahaʼi ʼe nātou gāue ʼi tonatou lotolelei. ʼI te ʼu fono fuli ʼe ʼi ai te ʼu kesi ʼaiʼaga meʼa ʼofa ʼe fakalogo kia nātou ʼaē ʼe fia foaki meʼa ʼofa.
Ko te ʼu fono ʼo te kokelekasio ʼe tokoni ki te kau Fakamoʼoni ʼa Sehova, ke nātou muliʼi te tokoni ʼaē ia Hepeleo 10:24, 25 ʼaē: “Tou fetokagaʼaki ke tou uga ia tatou ki te ʼofa pea mo te ʼu gāue lelei, ke ʼaua naʼa tou lītuʼa ki te fakatahitahiʼi ʼo tatou totonu, ohage ko te agamāhani ʼa ʼihi, kae ke tou fefakaloto mālohiʼaki, tāfito la ko [tatatou] sio ʼaē ki te fakaōviōvi mai ʼo te ʼaho.”
• Koteā te ʼu agaaga ʼe ʼāteaina pe ki te ʼu fono ʼa te ʼu ʼuluaki Kilisitiano ʼe tou maʼu ʼi te ʼu fono ʼa te kau Fakamoʼoni ʼa Sehova ia ʼaho nei?
• Koutou fakamatalatala te ʼu fono e nima ʼaē ʼe fai tuʼumaʼu ʼe te kau Fakamoʼoni.
• E feafeaʼi te maʼu ʼo tonatou ʼu fale fono?
[Paki ʼo te pasina 14]
Ko te tagata ʼāfea ʼe ina fai te ako ʼo Te Tule Leʼo, ʼi Amelika
Ko te fai palalau ʼe fai ʼi te Ako ʼo Te Minisitelio Faka Teokalatike, ʼi te motu ko Féroé
Ko te kiʼi kūtuga ʼe nātou ako ʼi te ʼapi, ʼi Yap
Ko te Fale ʼo te Puleʼaga, ʼo New Braunfels, ʼi Texas, ʼi Amelika, neʼe laga ia ʼaho e lua e te kau Fakamoʼoni ʼa Sehova
[Paki ʼo te pasina 15]
Ko te ʼu Fale ʼo te Puleʼaga ʼi te ʼu fenua kehekehe
Saponia
Ositalalia
Otilisia
Sepania