ʼE Tou Fakatahitahi Moʼo Tauhi Kia Sehova

1. ʼI te temi ʼae neʼe fakatahitahi ai te ʼu tisipulo, kotea te tokoni neʼe natou maʼu pea he ko ʼe neʼe ʼaoga te tokoni ʼaia?

MOLE fualoa ʼi te kua fakatuʼuake ʼo Sesu, neʼe fakatahitahi te ʼu tisipulo ke natou fefakalotomalohiʼaki. Kaʼe neʼe natou kalavi te ʼu matapa ʼi tanatou matataku ki ʼonatou fili. ʼE mahino ia neʼe puli tanatou matataku ʼi te temi ʼae neʼe ha ai Sesu pea mo ina ui fenei: “Kotou tali te Laumalie Maonioni.” (Lau ia Soane 20:19-22.) Ki muli age, neʼe toe fakatahitahi te ʼu tisipulo pea neʼe foaki ifo e Sehova kia natou tona laumalie maʼoniʼoni. Neʼe natou maʼu ai ia te toe malohi lahi ke feala hanatou fakahoko ia te gaue faifakamafola.—Gaue 2:1-7.

2. (1) ʼE foaki feafeaʼi mai e Sehova ia te malohi, pea he ko ʼe ʼe ʼaoga te malohi ʼaia? (2) He ko ʼe ʼe maʼuhiga ia te Ako Fakafamili? (Vakaʼi te nota pea mo te fakamatala ʼae ʼi te ʼa takai “Te Ako Fakafamili,” ʼi te pasina 175.)

² Ko te ʼu faigataʼaia ʼae ʼe tou tau mo ia ʼe toe tatau mo ʼae ʼo te kau ʼuluaki Kilisitiano. (1 Pet. 5:9) Ohage la, ʼi ʼihi temi, ko ʼihi ia tatou ʼe matataku. Pea ʼe ʼaoga kia tatou te malohi ʼae ʼe foaki e Sehova ke feala hatatou hoko atu ia te gaue faifakamafola. (Efe. 6:10) ʼE foaki lahi mai e Sehova ia te malohi ʼaia ʼaki te ʼu fono. Ia ʼaho nei, ʼe ko ʼatatou fono ʼe nima ʼi te vahaʼa fuli: ʼE ko te Akonaki Ki Te Kaugā Malie, mo te Ako ʼo Te Tule Leʼo, mo te Ako Tohi-Tapu ʼo Te Kokelekasio, mo te Ako Fakateokalatike, pea mo te Fono Gaue.a ʼE ʼi ai mo ʼatatou fakatahi maʼuhiga ʼe fa ʼi te taʼu fuli: ʼE ko te fakatahi fakafenua, mo te ʼu fakatahi fakasiliko ʼe lua pea mo te ʼAho Fakamanatu ʼo te mate ʼo Kilisito. He ko ʼe ʼe maʼuhiga ke tou kau ki te ʼu fono mo te ʼu fakatahi lalahi fuli ʼaia? Kotea te ʼu fetogi neʼe fai ki ʼatatou fono? Pea kotea ʼae ʼe ha ʼi tatatou kau ki te ʼu fono?

He Ko ʼe ʼe Tonu Ke Tou Fakatahitahi?

3, 4. Kotea ʼae ʼe fakamaʼua e Sehova ki tana hahaʼi? Tuku mai he ʼu faʼifaʼitaki.

³ Talu mai te temi muʼa mo te fakamaʼua e Sehova ki tana hahaʼi ke natou fakatahitahi moʼo tauhi kia te ia. Ohage la, ʼi te taʼu 1513 I.M.T.S., neʼe foaki e Sehova ia tana Lao ki te puleʼaga ʼo Iselaele. Neʼe fakatotonu ʼi te Lao ʼaia ki te ʼu famili ke natou fai ʼi te vahaʼa fuli ia te Sapato, ke feala hanatou tauhi kia te ia pea mo natou ako te Lao. (Tet. 5:12; 6:4-9) Kapau neʼe mulimuli te kau Iselaele ki te fakatotonu ʼaia, neʼe liliu te ʼu famili ʼo malolohi pea ko te puleʼaga katoa neʼe maʼa mo malohi ʼi te faʼahi fakalaumalie. Kaʼe kapau neʼe mole fakalogo te puleʼaga ki te Lao, ʼo mole kei natou fakahoko te ʼu maʼua ohage ko te fakatahitahi moʼo tauhi kia Sehova, pea neʼe liakī natou e te ʼAtua.—Lev. 10:11; 26:31-35; 2 Klk. 36:20, 21.

⁴ Tou toe vakaʼi mo te faʼifaʼitaki ʼo Sesu. Neʼe ko tana agamahani te alu ki te sinakoka ʼi te vahaʼa fuli ʼi te ʼaho ʼo te Sapato. (Luka 4:16) Hili tana mate pea mo tona fakatuʼuake, neʼe maʼu pe e ʼana tisipulo te agamahani ʼae ko te fakatahitahi tuʼumaʼu, logo la tanatou mole kei fakalogo ki te lao ʼo te Sapato. (Gaue 1:6, 12-14; 2:1-4; Loma 14:5; Kol. 2:13, 14) ʼI tanatou fakatahitahi ʼaia, neʼe akoʼi ai te kau Kilisitiano pea mo fakalotomalohiʼi natou. Pea neʼe natou toe momoli ai ki te ʼAtua ni sakilifisio fakavikiviki ʼaki ʼanatou faikole, mo ʼanatou tali pea mo ni hiva.—Kol. 3:16; Hep. 13:15.

5. He ko ʼe ʼe tou kau ʼi te vahaʼa fuli ki te ʼu fono pea ʼi te taʼu fuli ki te ʼu fakatahi lalahi? (Vakaʼi mo te fakamatala ʼae ʼi te ʼa takai “ ʼE Fakatahitahi Te Hahaʼi ʼa Te ʼAtua ʼi Te Taʼu Fuli,” ʼi te pasina 176.)

⁵ ʼO toe feia pe, moka tou kau ʼi te vahaʼa fuli ki ʼatatou fono pea ʼi te taʼu fuli ki ʼatatou fakatahi lalahi, ʼe tou fakaha ai tatatou lagolago ki te Puleʼaga ʼo te ʼAtua. Pea ʼe tou maʼu ai te malohi ʼaki te laumalie maʼoniʼoni pea ʼe tou fakalotomalohiʼi ai ʼihi ʼaki ʼatatou palalau ʼae ʼe ha ai tatatou tui. Kaʼe ko te faʼahi ʼae ʼe maʼuhiga age, ʼe tou maʼu ai te faigamalie ʼae ke tou tauhi kia Sehova ʼaki ʼatatou faikole, mo ʼatatou tali pea mo ni hiva. ʼE lagi kehekehe ia te agaaga fai ʼo ʼatatou fono mo ʼae ʼa te kau Iselaele pea mo te kau ʼuluaki Kilisitiano, kaʼe ʼe kei maʼuhiga tatau pe. Kotea te ʼu fetogi neʼe fai ki ʼatatou fono?

Te ʼu Fono ʼi Te Vahaʼa Fuli ʼe Ina Uga Ki “Te Ofa Pea Mo Te u Gaue Lelei”

6, 7. (1) Kotea te fakatuʼutuʼu ʼo ʼatatou fono? (2) Kotea ʼae neʼe kehekehe ai te ʼu fono ʼae neʼe fai e te Kau Ako ʼo Te Tohi-Tapu?

⁶ ʼI te temi ʼae neʼe kamata kumi ai e te tehina ko Charles Taze Russell ia te moʼoni ʼi te Folafola ʼa te ʼAtua, neʼe mahino ai kia ia ʼe tonu ke fakatahi mo ʼihi ʼae neʼe tatau tanatou fakatuʼutuʼu mo ia. ʼI te taʼu 1879, neʼe tohi fenei e Russell: “Ko au pea mo ʼihi atu ʼi Pittsburgh, kua matou fakatuʼutuʼu ia te kiʼi kutuga ako ʼo te Tohi-Tapu. ʼE matou fono ʼi te ʼAhotapu fuli, ʼo matou vakaʼi fakamalotoloto ia te Tohi-Tapu.” Neʼe fakalotomalohiʼi ai ia te kau lautohi ʼo Te Tule Leʼo ke natou fakatahitahi, pea ʼi te taʼu 1881, neʼe fai te ʼu fono ʼi te kolo ko Pittsburgh, ʼi Amelika, ʼi te ʼu ʼAhotapu pea mo te ʼu Feliafa fuli. ʼI Te Tule Leʼo ʼo te ʼaho 15 ʼo Novepeli 1895, neʼe ui ai neʼe fakatuʼutuʼu te ʼu fono ʼaia ke tuputupu ai te ʼofa fakatautehina Fakakilisitiano mo te logotahi, pea ke feala kia natou ʼae ʼe kau ki ai ke natou fefakalotomalohiʼaki.—Lau ia Hepeleo 10:24, 25.

⁷ Lolotoga ni taʼu, neʼe kehekehe te ʼu ʼaho mo te faʼahiga fai ʼo te ʼu fono ʼa te Kau Ako ʼo Te Tohi-Tapu. Ohage la, neʼe ui fenei ʼi te tohi neʼe fai e te kutuga ʼi Amelika pea neʼe ta ʼi te taʼu 1911: “Ko ʼamatou fono ʼe nima ʼe matou fai ʼi te vahaʼa fuli.” Neʼe natou fai ʼanatou fono ʼi te Monite, mo te Feliafa, mo te Feliaono pea tuʼa lua ʼi te ʼAhotapu. ʼI te tahi tohi, neʼe fai e te kutuga ʼi Afelika pea neʼe ta ʼi te taʼu 1914, neʼe natou ui fenei ai: “ ʼE matou fono tuʼa lua ʼi te mahina, ʼo matou kamata ʼi te Feliaono ʼo kaku ki te ʼAhotapu.” Kaʼe ʼaki te temi, neʼe fai leva te ʼu fono ohage ko tatatou fai ia ʼaho nei. Tou vakaʼi fakanounou ia te ʼu fono takitahi ʼaia.

8. Kotea ʼae neʼe talanoa ki ai ʼi te ʼu ʼuluaki akonaki ki te kaugā malie?

⁸ Te Akonaki Ki Te Kaugā Malie. ʼI te taʼu 1880, hili te kamata ta e te tehina ko Russell ia Te Tule Leʼo, neʼe muliʼi e te tehina ia te faʼifaʼitaki ʼa Sesu pea mo kamata ai tana faifolau faifakamafola. (Luka 4:43) ʼI tana faifolau ʼaia, neʼe fakatuʼu ai e te tehina ko Russell ia te fono ʼae ʼi te temi nei ko te fono ʼo te Akonaki Ki Te Kaugā Malie. Neʼe tala ʼi Te Tule Leʼo ia tana folau ʼaia pea mo ui ai ʼe fiafia anai ia te tehina ko Russell ʼi te fai ʼo he akonaki ki te kaugā malie ʼe talanoa ʼo ʼuhiga mo te Puleʼaga ʼo te ʼAtua. ʼI te taʼu 1911, neʼe kua ʼosi fakatuʼu ʼi te ʼu fenua kehekehe ia te ʼu kokelekasio. Neʼe fakalotomalohiʼi ai te ʼu kokelekasio ʼaia ke natou fekauʼi ni tehina faiakonaki ki te tahi ʼu koga fenua moʼo fai te ʼu akonaki ʼe ono ʼae neʼe talanoa ki te fakamau pea mo te sakilifisio faitotogi ʼa Sesu. Pea ka kua ʼosi he akonaki, neʼe tala ifo ia te higoa ʼo te tehina pea mo te kupu tafitō ʼo tana akonaki ʼo te vahaʼa ka hoa mai.

9. Kotea te ʼu fetogi neʼe fai ki te fono ʼo te Akonaki Ki Te Kaugā Malie, pea ʼe ke lava lagolago feafeaʼi ki te fono ʼaia?

⁹ ʼI te taʼu 1945, neʼe tala ʼi Te Tule Leʼo ia tona kamata fai ʼi te malamanei te ʼu akonaki ʼe valu ki te kaugā malie, ʼe fakatafito ki te Tohi-Tapu pea mo talanoa ʼo ʼuhiga mo te ʼu fihifihia maʼuhiga ʼo totatou temi. Lolotoga ni taʼu, neʼe fakaʼaogaʼi e te ʼu tehina faiakonaki te ʼu manatu neʼe foaki age e te tagata faifekau agatonu. Pea neʼe natou toe fakaʼaogaʼi mo te ʼu akonaki neʼe natou tohi e natou totonu. Kaʼe ʼi te taʼu 1981, neʼe fakatotonu ki te ʼu tehina faiakonaki fuli ke natou mulimuli ki te ʼu pepa faiakonaki ʼae ʼe foaki ki te kokelekasio.b ʼO kaku ki te taʼu 1990, lolotoga ʼihi akonaki neʼe feala ke fakaha e te nofoʼaki tanatou manatu pea neʼe fai ai ni faʼifaʼitaki; kaʼe talu mai ai, neʼe mole kei fai te ’u faʼahi ʼaia. Neʼe fai te tahi fetogi ʼi te mahina ʼo Sanualio 2008, he neʼe mole kei fai te ʼu akonaki ia minuta ʼe 45 kaʼe ko minuta ʼe 30. Logo la te ʼu fetogi ʼaia, kaʼe ʼe hoko atu pe te teuteuʼi lelei ʼo te ʼu akonaki ki te kaugā malie, ke malohi ai tatatou tui ki te Folafola ʼa te ʼAtua pea mo akoʼi mai te ʼu faʼahi kehekehe ʼo te Puleʼaga ʼo te ʼAtua. (1 Tim. 4:13, 16) ʼE ke fakaafe koa natou ʼae ʼe ke ʼaʼahi pea mo ʼihi atu ʼe mole ko he kau Fakamoʼoni ke natou ʼomai ʼo fakalogo ki te ʼu akonaki maʼuhiga ʼaia ʼe fakatafito ki te Tohi-Tapu?

10-12. (1) Kotea te ʼu fetogi neʼe fai ki te fono ʼo te Ako ʼo Te Tule Leʼo? (2) Kotea te ʼu fehuʼi ʼe lelei ke tou tahi fai?

¹⁰ Te Ako ʼo Te Tule Leʼo. Neʼe fekauʼi e te Sosiete Watch Tower ia te ʼu tehina ke natou fai he ʼu akonaki ʼi te ʼu kokelekasio pea mo takitaki te faifakamafola. ʼI te taʼu 1922, neʼe ui e te ʼu tehina ʼaia ʼe lelei anai ke fakatuʼu he fono ʼe ako ai ia Te Tule Leʼo. Neʼe tali te faʼahi ʼaia, pea neʼe kamata fai te ʼu ʼuluaki ako ʼo Te Tule Leʼo lolotoga te vahaʼa peʼe ʼi te ʼAhotapu.

¹¹ ʼI Te Tule Leʼo ʼo te ʼaho 15 ʼo Sunio 1932, neʼe foaki ai te tahi fakamahino ʼo ʼuhiga mo te fai ʼo te fono ʼaia. Neʼe ui ʼi te alatike ʼaia ʼe tonu ke takitaki te fono e he tehina, ohage ko tona fai ʼi te Petele. Neʼe feala ke heheka mai muʼa te ʼu tehina ʼe toko tolu pea mo fefakahoahoaʼaki ʼi te lau ʼo te ʼu palakalafe. ʼI te temi ʼaia, neʼe mole he ʼu fehuʼi ʼi te ʼu alatike. Koia ko te tehina ʼae ʼe ina takitaki te fono neʼe ina kole ki te nofoʼaki ke natou lagaʼi ni fehuʼi ʼo ʼuhiga mo te alatike ʼae neʼe natou vakaʼi. Hili ia pea neʼe ina hinoʼi ʼihi ʼi te nofoʼaki ke natou tali ki te ʼu fehuʼi ʼaia. Kapau neʼe ʼaoga, pea neʼe fai e te tehina te tahi ʼu fakamahino nounou.

¹² ʼI te kamata, neʼe feala ki te ʼu kokelekasio takitahi ke natou filifili Te Tule Leʼo ʼae ʼe natou fia ako. Kaʼe ʼi Te Tule Leʼo ʼo te ʼaho 15 ʼo Apelili 1933, neʼe ui ai ke akoʼi e te ʼu kokelekasio fuli ia Te Tule Leʼo ʼo te mahina ʼae ʼe tonu ke fai ai. ʼI te taʼu 1937, neʼe fakaha ai ʼe tonu ke fai te fono ʼaia ʼi te ʼAhotapu. ʼI Te Tule Leʼo ʼo te ʼaho 1 ʼo Oketopeli 1942, neʼe tohi ai te tahi ʼu fetogi ki te fono ʼaia, ʼae ʼe tou mulimuli ki ai ia ʼaho nei. ʼUluaki, neʼe tala ʼi Te Tule Leʼo ʼaia ʼe tuʼu anai te ʼu fehuʼi ʼi te ʼu lalo pasina ʼo te ʼu alatike pea ʼe ko te ʼu fehuʼi pe ʼaia ʼe tonu ke vakaʼi. Pea neʼe ui ai ʼe tonu ke hola katoa te fono ʼaia. Neʼe toe fakalotomalohiʼi ai natou ʼae ʼe tali ke natou fai ʼaki ʼanatou palalau, kaʼe mole natou lau te tali ʼo te palakalafe. ʼE kei fakaʼaogaʼi tafitō e te tagata faifekau agatonu ia te fono ʼo te Ako ʼo Te Tule Leʼo moʼo foaki te meʼa kai fakalaumalie ʼi tona temi totonu. (Mat. 24:45) ʼE lelei ke tou tahi fai ia te ʼu fehuʼi ʼaeni: “ ʼE au teuteuʼi koa ʼi te vahaʼa fuli taku Tule Leʼo? Pea ʼe au faiga koa ke au fai haku tali, moka ʼe feala?”

13, 14. (1) Neʼe feafeaʼi te kamataʼaga mai ʼo te fono ʼo te Ako Tohi-Tapu ʼo Te Kokelekasio? (2) Kotea ʼae ʼe ke leleiʼia ʼi te fono ʼaia?

¹³ Te Ako Tohi-Tapu ʼo Te Kokelekasio. ʼI te kamata ʼo te ʼu taʼu 1890, neʼe kua ʼosi ta ʼihi tohi ʼo te LʼAurore du Millénium. Ko te tehina ko Rahn, ʼae neʼe ko he tagata Ako ʼo Te Tohi-Tapu neʼe nofo ʼi te kolo ko Baltimore, ʼi Amelika. Neʼe ina ui ke fakatuʼu te ʼu Cercles de lʼaurore (te Kutuga ʼo Te Mafoata) ke natou ako ia te Tohi-Tapu. ʼI te kamata, neʼe ʼahiʼahi pe muʼa te ʼu fono ʼaia pea neʼe fai ʼi te ʼu loto fale. Kaʼe ʼi te mahina ʼo Sepetepeli 1895, neʼe tokagaʼi te leleiʼia ʼo te ʼu fono ʼaia ʼae neʼe fai ʼi te ʼu kolo kehekehe ʼo Amelika. Koia, neʼe ui ʼi Te Tule Leʼo ʼo te mahina ʼaia ke fai e te kau ako fuli ʼo te moʼoni ia te ʼu fono ʼaia. Neʼe ui ai ʼe tonu ke fai te fono ʼaia e he tahi ʼe lautohi lelei. Neʼe tonu ke ina lau te ʼu falasisi takitahi pea mo fakatalitali ke fakaha e te nofoʼaki tanatou manatu. Hili te lau ʼo te ʼu falasisi fuli ʼo he palakalafe pea mo faipalalau ki ai, neʼe tonu ke ina toʼo mo lau te ʼu vaega Tohi-Tapu. ʼI te ʼosi vakaʼi ʼo te kapite, neʼe tonu ke fai e te takitokotahi ʼi te nofoʼaki ia he fakamanatu fakanounou ʼo te kapite.

¹⁴ Neʼe fetogi tuʼa lahi te higoa ʼo te fono ʼaia. Neʼe fakahigoaʼi ko te ʼu Cercles béréens pour l’étude de la Bible (te Kutuga Pelea ʼo Te Ako Tohi-Tapu), he neʼe fakaʼuhiga ki te kau Pelea ʼo te temi muʼa ʼae neʼe natou vakavakaʼi lelei ia te Tohi-Tapu. (Gaue 17:11) Pea neʼe toe fetogi ʼo fakahigoa ko te Ako Tohi ʼo Te Kokelekasio. ʼI te temi nei, kua fakahigoa ko te Ako Tohi-Tapu ʼo Te Kokelekasio, pea ʼe fakatahitahi te kokelekasio katoa ʼi te Fale Fono kaʼe mole kei fai ʼi te ʼu loto fale. ʼAki te temi, neʼe vakaʼi ʼi te fono ʼaia ia te ʼu tohi mo te ʼu kaupepa lalahi kehekehe, ʼo toe feia mo ni alatike ʼo Te Tule Leʼo. Talu mai tona kamata fai, neʼe fakalotomalohiʼi ia te nofoʼaki ke natou lagolago lelei ki te fono ʼaia. ʼE tokoni lahi mai ia te fono ʼaia ke tou fakaloloto tatatou mahino ki te Tohi-Tapu. ʼE ke teuteuʼi tuʼumaʼu koa te Ako Tohi-Tapu ʼo Te Kokelekasio pea mo ke fai hau tali, ʼo mulimuli ki tou fealagia?

15. Kotea te fakatuʼutuʼu ʼo te fono ʼo te Ako Fakateokalatike?

¹⁵ Te Ako Fakateokalatike. Neʼe ui fenei e te tehina ko Carey Barber, ʼae neʼe gaue ʼi ʼotatou pilo lalahi ʼi Brooklyn, ʼi Amelika: “ ʼI te po ʼo te Monite, ʼaho 16 ʼo Fepualio 1942, neʼe fakaafe ia te ʼu tehina fuli ʼo te famili ʼo te Petele ʼo Brooklyn ke natou kau ki te ako ʼae neʼe fakahigoa ki muli age ko te Ako Fakateokalatike.” Ko te tehina ko Barber, ʼae neʼe kau ki muli age ʼi te Kolesi Pule, neʼe ina ui ʼo ʼuhiga mo te ako ʼaia ʼe “ko te fakalakalaka ki muʼa ʼo te ʼu gaue ʼae ʼe fai e Sehova maʼa tana hahaʼi ʼi totatou temi.” Neʼe tokoni lahi ia te ako ʼaia ki te ʼu tehina ke natou hikihiki tonatou poto faiako mo faifakamafola. Koia ʼi te taʼu 1943, neʼe fakafealagia ke maʼu ʼi te ʼu kokelekasio ʼi te malamanei ia te kaupepa Te Ako ʼo Te Minisitelio Fakateokalatike (Fakafalani). Neʼe ui ʼi Te Tule Leʼo ʼo te ʼaho 1 ʼo Sunio 1943, neʼe fakatuʼutuʼu ia te Ako Fakateokalatike moʼo tokoni ki te hahaʼi ʼa te ʼAtua ke natou “ako pea mo liliu ai ko he kau faifakamafola faiva ʼo te Puleʼaga.”—2 Tim. 2:15.

16, 17. ʼE ako pe koa ʼi te Ako Fakateokalatike ia te faʼahiga faiakonaki? Fakamahino.

¹⁶ ʼI te kamata, tokolahi neʼe matataku ʼi te palalau mai muʼa. Ko te tehina ko Clayton Woodworth, ʼae neʼe pilisoni tahi tana tamai mo te tehina ko Rutherford pea mo ʼihi atu ʼi te taʼu 1918, neʼe ina manatuʼi tana ʼuluaki kau ʼae ki te ako ʼaia ʼi te taʼu 1943. Neʼe ina ui fenei: “Neʼe faigataʼa ʼaupito kia au taku fai he ʼu akonaki. Neʼe hage neʼe mate noa toku ʼalelo, mo magemage toku gutu pea mo fetogitogi toku leʼo.” Kaʼe ʼi te hikihiki ʼo tana faiakonaki neʼe lahi ai te ʼu akonaki neʼe foaki age ki ai. Neʼe mole ina akoako pe ia te faʼahiga faiakonaki. Kaʼe neʼe ina toe ako te ʼu faʼahi maʼuhiga ʼae ko te agavaivai pea mo te falala kia Sehova. Neʼe ina ui fenei: “Neʼe mahino leva kia au, ʼe mole ko te tehina faiakonaki ʼae ʼe maʼuhiga. Kaʼe kapau ʼe ina teuteuʼi lelei tana akonaki pea mo falala katoa kia Sehova, pea ʼe fia fagono anai ia te nofoʼaki ki tana akonaki pea mo natou taʼofi mai ai ni ako.”

¹⁷ ʼI te taʼu 1959, neʼe fakaafe te ʼu tuagaʼane ke natou kau ki te ako ʼaia. ʼE manatuʼi e te tuagaʼane ko Edna Bauer tona tala ifo ʼi te fakatahi ʼae neʼe kau ki ai. ʼE ina ui fenei: “Neʼe fiafia ʼaupito te ʼu tehina fuli. Neʼe ko te tahi ʼu fealagia ʼaia neʼe foaki kia natou.” Kua ke tohi koa ke ke kau ki te Ako Fakateokalatike pea mo ke liliu ko he “tisipulo” ʼa Sehova, peʼe ko he tahi ʼe ina akoʼi?—Lau ia Esaia 54:13.

18, 19. (1) ʼE haga mulimuli te Fono Gaue ki te faʼifaʼitaki fea? (2) He ko ʼe ʼe tou hiva ni katiko ʼi ʼatatou fono? (Vakaʼi te fakamatala ʼae ʼi te ʼa takai “Te Hivaʼi ʼo Te Moʼoni.”)

¹⁸ Te Fono Gaue. ʼI te taʼu 1919, neʼe fai te ʼu fono moʼo fakatuʼutuʼu te gaue faifakamafola. ʼI te temi ʼaia, neʼe mole ko te kokelekasio katoa ʼae neʼe kau ki te fono ʼaia. Neʼe gata pe kia natou ʼae neʼe natou tufa te ʼu tohi. ʼI te taʼu 1923, neʼe fai te Fono Gaue tuʼa tahi ʼi te mahina, pea neʼe ko te kokelekasio katoa ʼae neʼe tonu ke kau ki ai. ʼI te taʼu 1928, neʼe fakalotomalohiʼi ia te ʼu kokelekasio ke natou fai te Fono Gaue ʼi te vahaʼa fuli. Pea ʼi te taʼu 1935, neʼe ui ʼi Te Tule Leʼo ki te ʼu kokelekasio fuli ke natou fakatafito te fono ʼaia ki te pepa Lʼinstructeur (ʼae neʼe fakahigoa ki muli age ko te Informateur, pea ʼi te temi nei ko Te Minisitelio ʼo Te Puleʼaga). Neʼe kau leva te fono ʼaia ʼi te polokalama ʼo te ʼu kokelekasio.

¹⁹ ʼE haga mulimuli te Fono Gaue ki te faʼifaʼitaki ʼae neʼe tuku e Kilisito. Pea ʼe foaki mai ai he ʼu tokoni ki tatatou gaue faifakamafola. (Mat. 10:5-13) Kapau kua foaki atu hau Minisitelio ʼo Te Puleʼaga, pea ʼe ke teuteuʼi koa pea mo ke maʼuliʼi te ʼu tokoni moka ke faifakamafola?

Te Fono ʼAe ʼe Maʼuhiga ʼAupito ʼi Te Taʼu

20-22. (1) He ko ʼe ʼe tou fakamanatu ia te mate ʼa Sesu? (2) Kotea te ʼu lelei ʼe ke maʼu ʼi tau kau ʼi te taʼu fuli ki te ʼAho Fakamanatu?

²⁰ Neʼe kole e Sesu ki ʼana tisipulo ke natou haga fakamanatu ia tana mate ʼo kaku ki tana liliu mai. Ohage ko te Pasikate, ʼe fai te ʼAho Fakamanatu ʼo te mate ʼa Kilisito ʼi te taʼu fuli. (1 Ko. 11:23-26) ʼE ko te toko lau ʼi miliona hahaʼi ʼe natou fakatahitahi ki te fono ʼaia ʼi te taʼu fuli. ʼE fakamanatuʼi ʼi te fono ʼaia ia te pilivilesio ʼae ʼa te kau fakanofo ke natou maʼu tofiga fakatahi mo Kilisito ʼi te Puleʼaga. (Loma 8:17) Pea ʼe fakaʼapaʼapa lahi ai te tahi ʼu ovi ki te Hau ʼo te Puleʼaga ʼo te ʼAtua pea mo lagolago kia te ia.—Soa. 10:16.

²¹ Neʼe mahino ki te tehina ko Russell pea mo ʼana kaugā gaue ia te maʼuhiga ʼae ke fakamanatu ia te Taumafa ʼa Te ʼAliki. Pea neʼe natou toe iloʼi ʼe tonu ke fai tuʼa tahi pe ʼi te taʼu. Neʼe ui fenei ʼi Te Tule Leʼo ʼo Apelili 1880: “Talu mai ni taʼu ko te agamahani ʼa te tokolahi ʼi heni ʼi Pittsburgh ʼe ko te . . . fakamanatu ia te Pasikate [ʼAho Fakamanatu] pea mo kai te pane mo inu te vino ʼae ʼe ina fakata te sino mo te taʼataʼa ʼo te ʼAliki.” Ki muli age, neʼe fai te ʼAho Fakamanatu lolotoga te ʼu fakatahi lalahi. Neʼe fai ʼi te taʼu 1889 te ʼuluaki tanaki ʼo ʼuhiga mo te fakatahi lahi ʼaia, neʼe natou toko 225 pea neʼe papitema te toko 22.

²² Ia ʼaho nei ʼe mole kei fai te ʼAho Fakamanatu lolotoga te polokalama ʼo he fakatahi. Kaʼe ʼe tou fakaafe te hahaʼi fuli ʼo totatou telituale ke natou kau fakatahi mo tatou ki ai ʼi tatatou Fale Fono peʼe ʼi he fale neʼe tou lue. ʼI te taʼu 2013, ko te toko 19 miliona tupu neʼe natou fakamanatu ia te mate ʼa Sesu. ʼE ko he toe pilivilesio lahi ʼe tou maʼu ʼi tatatou kau ki te ʼAho Fakamanatu pea mo tou toe fakalotomalohiʼi te hahaʼi ke natou kau fakatahi mo tatou ki te po taputapu ʼaupito ʼaia. ʼE ke fakaafe koa ʼi te taʼu fuli ia he tokolahi ki te ʼAho Fakamanatu?

Kotea ʼAe ʼe Ha ʼi Tatatou Kau Ki Te ʼu Fono?

23. Kotea tau faʼahiga manatu ʼo ʼuhiga mo ʼatatou fono?

²³ Maʼa te ʼu kaugana agatonu ʼa Sehova ko te fakatotonu ʼae ke natou fakatahi ʼe mole ko he kavega ia. (Hep. 10:24, 25; 1 Soa. 5:3) Ohage la, neʼe leleiʼia e te Hau ko Tavite te alu ki te fale ʼa Sehova ʼo tauhi ai kia te ia. (Pes. 27:4) Pea neʼe ina leleiʼia tafitō tana fakahoko ia te faʼahi ʼaia mo natou ʼae ʼe ʼoʼofa ki te ʼAtua. (Pes. 35:18) Pea ʼe tou toe manatuʼi ia te faʼifaʼitaki ʼa Sesu. ʼI tana kei veliveli, neʼe fia nofo ia ʼi te fale tapu ʼo tana Tamai.—Luka 2:41-49.

24. Kotea te ʼu faigamalie ʼe tou maʼu moka tou kau ki te ʼu fono?

²⁴ Ka tou kau ki te ʼu fono, ʼe tou fakaha ai totatou ʼofa ʼae kia Sehova pea mo tatatou fia fakalotomalohiʼi ʼotatou tehina mo tuagaʼane. ʼE tou toe fakaha ai tatatou fia ako ʼae pe ʼe tonu ke feafeaʼi te maʼuli ʼa te hahaʼi fakalogo ʼo te Puleʼaga ʼo te ʼAtua. Pea ʼe tou maʼu tafitō ia te ako ʼaia ʼi ʼatatou fono pea mo ʼatatou fakatahi lalahi. ʼE toe akoʼi tatou ʼi ʼatatou fono ke tou popoto ʼi te fai ʼo ni tisipulo ʼa te Hau ko Sesu Kilisito pea mo akoʼi natou. Pea ʼe tou maʼu ai te malohi ke feala hatatou kataki ʼi te gaue maʼuhiga ʼaupito ʼaia ʼae ʼe tokaga ki ai te Puleʼaga ʼo te ʼAtua. (Lau ia Mateo 28:19, 20.) ʼE mahino ia, ko tatatou fia fakatahitahi mo ʼotatou tehina mo tuagaʼane ʼe ha ai ko te Puleʼaga ʼo te ʼAtua ʼe moʼoni kia tatou. ʼOfa pe ke maʼuhiga tuʼumaʼu kia tatou ʼatatou fono.