Te ʼu Kokelekasio ʼe Fakatuʼutuʼu Ki Te Fai Faka Mafola
ʼI tana nofo ʼi te kele, neʼe faka mafola e Sesu Kilisito te Puleʼaga ʼo te ʼAtua, ʼi te ʼu kolo liliki pea mo te ʼu kolo lalahi. Neʼe ina teuteuʼi foki tana ʼu tisipulo pea ina fekauʼi ke nātou toe fai te gāue pe ʼaia. ʼI muʼa ʼo tana hake ki selo, neʼe ina fakatotonu age kia nātou ke nātou fai he ʼu tisipulo ʼi te hahaʼi ʼo te ʼatu fenua fuli. Mai te kamataʼaga, ko te ʼuluaki kokelekasio faka Kilisitiano neʼe fakatuʼutuʼu ʼo ʼuhiga mo te faka mafola ʼo te logo lelei. ʼI he koga meʼa pe neʼe fekauʼi kiai te kau tisipulo, neʼe maʼu atu ia nātou ʼe nātou faka mafola te Puleʼaga ʼo te ʼAtua.—Mateo 4:17, 23; 10:1-16; 28:19, 20; Luka 4:43, 44; 8:1; 10:1-9; Gāue 1:8; 4:31; 5:42; 8:12; 19:8; 28:23, 30, 31; Loma 10:9, 10, 14.
ʼI te lea faka polofeta ʼa Sesu ʼo ʼuhiga mo te fakaʼosi ʼo te tuʼu ʼo te ʼu faʼahiga meʼa, neʼe ina ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” Ko te fai faka mafola ʼe ko te ʼuluaki maʼua ʼaia ʼo te kokelekasio faka Kilisitiano ia ʼaho nei.—Mateo 24:14; Maleko 13:10.
ʼI te malamanei katoa, ko te ʼu kokelekasio ʼa te kau Fakamoʼoni ʼa Sehova ʼe nātou teuteu ke nātou ʼaʼahi tuʼumaʼu tonatou telituale ʼaki te faka mafola ʼo te logo lelei ʼo te Puleʼaga ʼo te ʼAtua. Moʼo fai fakalelei ʼo te gāue ʼaia, ʼe foaki e te filiale ʼo te Sosiete Watch Tower ʼi te ʼu fenua fuli, ki te ʼu kokelekasio takitahi he telituale moʼo fai ʼo te fai faka mafola. ʼE vaevae e te kokelekasio te telituale ʼaia ko he ʼu kiʼi koga veliveli, ʼosi ʼaia pea ʼe ina foaki te ʼu kiʼi kogaʼi telituale ʼaia ki te kau fai faka mafola, ʼaē ko tonatou maʼua ko te tokakaga ke logo te hahaʼi ʼo te telituale ki te logo lelei ʼo te Puleʼaga.—1 Kolonito 14:33, 40.
ʼI te agamāhani ʼe faka felāveʼi te kau Fakamoʼoni mo te hahaʼi ʼi tanatou ʼolo ʼo fai faka mafola ʼi te ʼu ʼapi. ʼI te ʼu fono ʼo tonatou kokelekasio, ʼe fai e te kau Fakamoʼoni ʼa Sehova te ʼu faʼifaʼitaki fakanounou ʼo ʼuhiga mo te faka mafola ʼo te logo ʼo te Puleʼaga ʼi te ʼu ʼapi, ʼo nātou fakaʼaogaʼi tanatou ʼu Tohi-Tapu. ʼE ʼave e te kau Fakamoʼoni te ʼu tohi faka Tohi-Tapu ke feala ai hanatou tuku ki ʼaē ʼe loto ke lahi age tana mahino ki te Folafola ʼa te ʼAtua.
Moʼo faka fealagia ki te hahaʼi takitokotahi ʼi te telituale ke nātou fagono ki te logo maʼuhiga ʼo te Puleʼaga, ʼe tohi e te kau Fakamoʼoni ʼi tanatou fai faka mafola, te pepa ʼe tuʼu ai te ʼu ʼapi ʼaē ʼe lāvaki peʼe ko he tahi age tupuʼaga ʼaē ʼe mole feala ai te fakahā ʼo te logo kia nātou. ʼE ʼaʼahi anai ia nātou ʼaia ʼi he tahi temi. Kapau ʼe fia logo he tahi, ʼe tohi anai te faʼahi ʼaia, pea ʼe toe liliu te kau Fakamoʼoni ʼo fakahā ki ai te tahi ʼu manatu faka Tohi-Tapu. Kapau ʼe lotolelei ia, pea ʼe feala anai te fai ʼo hana ako faka Tohi-Tapu. Ko te faʼahi fuli ʼaia ʼe mole totogi.
Ko te kau Fakamoʼoni ʼa Sehova ʼe nātou fakahā foki te ʼu nusipepa ki te hahaʼi ʼi te ala. ʼI te faʼahi ʼaia ʼe feala ke nātou felāveʼi mo he tokolahi ʼe mole nātou maʼu atu ki tonatou ʼapi. Ko he faiga mālohi ʼe fai moʼo maʼu ʼo he tahi ʼe fia logo anai ki te Puleʼaga.—Gāue 17:17; Fakahā 14:6, 7; 22:17.
He koʼe koa ʼe hoholo te ʼaʼahi ʼo te hahaʼi e te kau Fakamoʼoni kae tokolahi ʼe mole fia logo? Ko te ʼaluʼaga ʼo te hahaʼi takitokotahi ʼe tautau fetogi, pea ʼe feala ai hanatou tali fakalelei te moʼoni ʼi he tahi age ʼaʼahi, peʼe ko he tahi age ʼi te ʼapi ʼaia e lagi fia logo.
Neʼe ʼui e Sesu ki tana ʼu tisipulo: “Ke koutou haga kumi muʼa te puleʼaga pea mo tona faitotonu.” Ko te faka mafola ʼo te Puleʼaga ʼo te ʼAtua ʼe ko he koga maʼuhiga ʼaia ʼi tatatou kumi te Puleʼaga, pea ko te kau Fakamoʼoni ʼa Sehova ʼe nātou fakatuʼutuʼu te faʼahi ʼaia ko he koga maʼuhiga ʼaupito ʼi tonatou maʼuli.—Mateo 6:33; 2 Timoteo 4:2.
• Ko te gāue fea neʼe fai e Sesu pea mo te ʼu ʼuluaki Kilisitiano neʼe fakakikite ke toe fai foki ia ʼaho nei?
• E feafeaʼi te fakatuʼutuʼu ʼo te fai faka mafola ʼa te kau Fakamoʼoni ʼa Sehova?
• He koʼe koa ʼe hoholo te ʼaʼahi ʼo te hahaʼi e te kau Fakamoʼoni kae tokolahi ʼe mole fia logo?
[Paki ʼo te pasina 16, 17]
Ko te kau Fakamoʼoni ʼa Sehova ʼe nātou faka mafola te Puleʼaga ʼo te ʼAtua ʼi te ʼu fenua kehekehe
Tailani
Mekesike
Holani
Kolea
Curaçao
Kana
Pilitania
Ositalalia