ʼE Fia ʼIloʼi E Te Kau Lautohi . . .

He Koʼē ʼe Fai Fakamafola Ia Te Kau Fakamoʼoni ʼa Sehova ʼi Te ʼu ʼApi?

▪ ʼE tou maʼu ʼi te Tohi-Tapu ia te fakatotonu ʼaenī neʼe fai e Sesu ki ʼana tisipulo: “Koia, koutou olo, kotou fai ni tisipulo i te u puleaga fuli, . . . pea kotou ako natou.” (Mateo 28:19, 20) ʼE tonu koa ke mulimuli te kau Kilisitiano fuli ki te fakatotonu ʼaia? Neʼe mahino te kau ʼuluaki tisipulo ʼa Sesu ʼe tonu ke fakalogo kiai te kau Kilisitiano fuli. Ohagē lā, neʼe ʼui fēnei e te ʼapositolo ko Petelo: “Nee fakatotonu mai e Sesu kia matou ke matou fakaha ki te hahai mo fakamooni.” (Gaue 10:42) Pea neʼe tohi fēnei e te ʼapositolo ko Paulo: “E au fakaha te Evaselio, . . . koteuhi nee tuku mai ia kia au, pea e malaia kia au mo kapau e mole au fakaha te Evaselio!”—1 Kolinito 9:16.

Ko Paulo, mo Petelo pea mo te ʼu Kilisitiano fuli ʼo te temi ʼo Sesu neʼe natou fakalogo ki te fakatotonu ʼa Sesu. Neʼe maʼuhiga ʼaupitō kiā nātou te gāue fai fakamafola. (Gaue 5:28-32, 41, 42) ʼE faiga e te kau Fakamoʼoni ʼa Sehova iā ʼaho nei ke natou toe fai fēia mo nātou. ʼE natou fakamafola te logo ʼaē neʼe fakamafola e Sesu, ʼaē ko “te puleaga o te atu lagi.”—Mateo 10:7.

ʼE tonu ke fakamafola kiā ai te logo ʼo te Puleʼaga? Neʼe fakahā e Sesu ʼe tonu ke fakamafola ki te hahaʼi ʼi te ʼu potu fuli. Neʼe ina ʼui fēnei ki ʼana tisipulo: “E koutou liliu anai ko aku tagata fakamooni . . . o kaku ki te u potu fuli o te malamanei.” (Gaue 1:8) Neʼe ina toe fakakikite foki, ʼi muʼa ʼo te hoko mai ʼo te fakaʼosi ʼo te tuʼu ʼaenī, “e fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli.” (Mateo 24:14) ʼO mulimuli kiai, neʼe faiga e te kau Kilisitiano ʼo te ʼuluaki sēkulō ke natou palalau mo te hahaʼi fuli, ʼo mole gata pē ki ʼonatou feʼilo peʼe ki te hahaʼi ʼaē ʼe mole lotu. (Kolose 1:23; 1 Timoteo 2:3, 4) ʼO toe fēia, ʼe faiga e te kau Fakamoʼoni ʼa Sehova iā ʼaho nei ke natou fai fakamafola ki te hahaʼi fuli.a

Koteā te faʼahiga fai ʼaē ʼe lelei ʼaupitō moʼo fakamafola te logo ʼo te Puleʼaga? Neʼe ʼiloʼi e Sesu peʼe feafeaʼi te fakamafola ʼo te logo ki te hahaʼi tokolahi, koia neʼe ina fekauʼi ai ʼana tisipulo ki te ʼu kolo lalahi, mo te ʼu kolo liliki, pea mo te ʼu ʼapi ʼo te hahaʼi. (Mateo 10:7, 11, 12) Hili te mate ʼa Sesu pea mo tona fakatuʼuake, neʼe hoko atu aipē te fai fakamafola ʼo ʼana tisipulo ʼi “te u fale fuli.” (Gaue 5:42) Ohagē ko Sesu, neʼe natou toe fai fagonogono faigamālie pea mo fai fakamafola ʼi te ʼu koga meʼa ʼaē neʼe maʼu ai te hahaʼi. (Soane 4:7-26; 18:20; Gaue 17:17) Iā ʼaho nei, ʼe mulimuli te kau Fakamoʼoni ʼa Sehova ki te ʼu faʼahiga fai ʼaia moʼo fai fakamafola ki te hahaʼi fuli pē.

Neʼe fakahā e Sesu ʼe mole ko te hahaʼi fuli ʼaē kā natou fia fakalogo anai. (Mateo 10:14; 24:37-39) ʼE fakagata ai koa e te kau Kilisitiano tanatou fai fakamafola? Tou vakaʼi ia te fakatā ʼaenī: Kapau ʼe kotou kau ki he kūtuga haofaki maʼuli ʼi te ʼosi hoko ʼo he mafuike fakamataku, pea hili kiai he temi, ʼe kotou fakagata anai koa takotou kumi ʼuhi pē he neʼe tokosiʼi nātou ʼaē neʼe kotou maʼu? Kailoa ia, kae ʼe kotou haga kumi anai ʼaki te fakaʼamu ʼaē ke kotou haofaki he tahi. Neʼe fakatotonu e Sesu ki ʼana tisipulo ke natou faʼa kātaki ʼaki te fakaʼamu ʼaē ke natou maʼu he ʼu hahaʼi ʼe natou tali anai te logo lelei ʼo te Puleʼaga. (Mateo 10:23; 1 Timoteo 4:16) ʼI te ʼolo ʼa te kau Fakamoʼoni ʼa Sehova ki te ʼu ʼapi ʼo kumi te hahaʼi, ʼe natou fakahā ai tonatou ʼofa ki te ʼAtua pea mo ʼonatou tatau, heʼe feala ke haofaki ai nātou ʼaē ʼe natou tali anai te logo ʼo te Puleʼaga.—Mateo 22:37-39; 2 Tesalonika 1:8.

ʼE fakahā ʼi te nusipepa ʼaenī te logo ʼaia ʼaē ʼe tuʼu ʼi te Tohi-Tapu. Kapau ʼe kotou fia maʼu he tahi ʼu fakamahino, kotou palalau mo te kau Fakamoʼoni ʼa Sehova mokā natou toe ʼaʼahi koutou, peʼe kotou faitohi kiā nātou ʼaē ʼe natou tā te nusipepa ʼaenī.

[Nota]