Ko He Maʼuli Fīmālie ʼi He Mālama Foʼou
Koutou sioʼi te paki ʼaē ʼe tuʼu ʼi te kiʼi pepa lotu ʼaenī, koteā ʼaē ʼe hake ʼi tokotou loto? ʼE mole koa la ko te loto fīmālie, mo te loto fiafia, pea mo te manuʼia? ʼE mahino ia. Kae ʼe ko he moemisi pe koa ia, peʼe ko he faʼahiga manatu pe ia, te tui ʼaē ʼe hoko anai te ʼu ʼaluʼaga ʼaia ʼi te kele?
Tokolahi te hahaʼi e lagi nātou maʼu te manatu ʼaia. Ko te ʼu meʼa moʼoni ʼaē ʼe hoko ia ʼaho nei, te tau, te fakapō, te pakupaku, te mahaki, te matutuʼa—ʼo mole gata ʼaki aipe. Kae ʼe ʼi ai te tupuʼaga ʼaē ʼo tatatou maʼu te falala. Ka tou fakatokagaʼi te ka haʼu, ʼe talanoa te Tohi-Tapu ki te “ ʼu lagi foʼou pea mo te kele foʼou ʼaia ʼe tonu ke nofo ai te faitotonu.”—2 Petelo 3:13; Isaia 65:17.
Ko te “ ʼu lagi foʼou” pea mo te “kele foʼou,” ʼaia ʼe talanoa kiai te Tohi-Tapu, ʼe mole ko he ʼu lagi moʼoni peʼe ko he kele moʼoni. Ko te kele pea mo te ʼu lagi moʼoni neʼe lelei ʼaupito tonā fakatupu, pea ʼe fakahā mai e te Tohi-Tapu ʼe tuʼu anai ia ʼo heʼegata. (Pesalemo 89:36, 37; 104:5) Ko te “kele foʼou” ʼe ko he sosiete fakatagata ʼo te hahaʼi faitotonu ʼe maʼuʼuli anai ʼi te kele, pea ko te “ ʼu lagi foʼou” ʼe ko he puleʼaga haohaoa ʼi selo, ko he puleʼaga ʼe ina takitaki anai ia te sosiete fakatagata ʼaia. Kae ʼe tonu koa te ʼui ʼaē ko te “kele foʼou,” peʼe ko he mālama foʼou faka kolōlia, ʼe feala tona fakahoko?
ʼIo, tou fakatokagaʼi ko te ʼu ʼaluʼaga taulekaleka ʼaia neʼe kau ki te finegalo ʼo te ʼAtua ʼo ʼuhiga mo te kele ʼaenī. Neʼe ina tuku te ʼuluaki taumatuʼa ʼi te Palatiso fakakelekele ʼi Eteni pea neʼe ina foaki kia nāua te fakatotonu taulekaleka ʼaenī: “Koulua fanaunau, pea ke koulua liliu ʼo hahaʼi, pea ke koulua fakafonu te kele, pea ke koulua puleʼi.” (Senesi 1:28) ʼIo, ko te fakatuʼutuʼu ʼa te ʼAtua ke maʼu hana fānau pea ke nā fakalahi te Palatiso ke mafola ʼi te kele katoa. Logope la tanā fili ʼaē ke nā talagataʼa ki te ʼAtua ki muli age, ʼo nā fakahā ai ʼe mole tāu mo nāua ia te maʼuli heʼegata, neʼe mole fetogi te fakatuʼutuʼu ʼa te ʼAtua. Pea ʼe fakahoko anai ʼi te mālama foʼou!—Isaia 55:11.
Koia, mokā koutou lau te kole ʼa te ʼAliki, peʼe ko te Tāmai ʼe ʼi selo, ʼe koutou kole ke haʼu te Puleʼaga ʼo te ʼAtua, ʼe koutou kole ki tona puleʼaga ʼi selo ke ina molehi te agakovi ʼi te kele pea ke ina puleʼi te mālama foʼou ʼaia. (Mateo 6:9, 10) Pea ʼe feala ke tou falala ʼe tali anai e te ʼAtua ia te faikole ʼaia, koteʼuhi neʼe fakapapau mai e tana Folafola: “ ʼE maʼu anai te kele e te kau agatonu, pea ʼe nātou nonofo anai ʼi ai ʼo talu ai.”—Pesalemo 37:29.
Te Maʼuli ʼi Te Mālama Foʼou ʼo Te ʼAtua
Ko te Puleʼaga ʼo te ʼAtua ʼe ina foaki mai anai te ʼu tapuakina ki te kele ʼe mole hona fakatatau, ʼo fakahoko ʼaki ai te ʼu meʼa lelei fuli ʼaē neʼe fakatuʼutuʼu e te ʼAtua ʼi te kamataʼaga maʼa tana hahaʼi ke nātou fiafia ʼi te kele. ʼE gata anai te ʼu fehiʼa pea mo te ʼu aga fakapalatahi, pea ko ʼaē ka maʼuli anai ʼi te kele ʼe liliu anai ko he kaumeʼa moʼoni ʼo he tahi age. ʼI te Tohi-Tapu, ʼe fakapapau mai e te ʼAtua ʼe ina ‘fakagata anai te ʼu tau ʼo aʼu ki te potu taupotu ʼo te kele.’ “ ʼE mole toe hiki anai te heletā e he puleʼaga ki he tahi age puleʼaga, pea ʼe mole nātou toe ako anai te tau.”—Pesalemo 46:9; Isaia 2:4.
Ko te kele katoa ʼe ina toe maʼu anai tona ʼaluʼaga faka palatiso. ʼE ʼui fēnei e te Tohi-Tapu: “ ʼE fiafia anai te toafa pea mo te potu fenua ʼaē ʼe kele toafa, pea ʼe fiafia anai te potu lāvaki pea ʼe fisi anai ohage ko te safalani. . . . Heʼe mapuna anai ʼi te toafa te ʼu vai, pea mo he ʼu liuʼa ʼi te potu lāvaki. Pea ko te kele ʼaē ʼe vela ʼe liliu anai ohage he vai ʼe lahi ai te homo ʼo te kaho, pea ko te kele moamoa ohage he ʼu matapuna vai.”—Isaia 35:1, 6, 7.
ʼE ʼi ai anai te tupuʼaga ʼo tatatou fiafia ʼi te Palatiso ʼi te kele. ʼE mole toe felāveʼi anai te hahaʼi mo te pakupaku. “Ko te kele ʼe ina foaki moʼoni anai tona fua,” ko te ʼui ʼaia ʼa te Tohi-Tapu. (Pesalemo 67:6; 72:16) Ko tatou fuli ʼe tou fiafia anai ʼi te fua ʼo tatatou ʼu gāue, ohage ko te fakapapau mai e totatou Tupuʼaga: “ ʼE mahino papau ia ʼe nātou to anai he ʼu fuʼu vite pea ʼe nātou kai anai tona ʼu fua. . . . ʼe mole nātou to anai ke kai e he tahi kehe.”—Isaia 65:21, 22.
ʼI te mālama foʼou ʼo te ʼAtua, ʼe mole toe nonofo anai te hahaʼi ʼi he ʼu falefata peʼe ko he ʼu ʼapi ʼe mole maʼa, he neʼe fakatuʼutuʼu fēnei e te ʼAtua: “ ʼE mahino papau ia ʼe nātou laga anai ni fale pea ʼe nātou nofoʼi . . . ʼE mole nātou laga anai ke nofoʼi e he tahi kehe.” ʼE fakapapau mai foki e te Tohi-Tapu: “ ʼE mole nātou kinakina noa anai.” (Isaia 65:21-23) Koia ʼe maʼu anai e te hahaʼi he gāue ʼe ʼi ai hona fua pea mo lelei. ʼE mole nātou fiu anai ʼi te maʼuli.
ʼI te temi ʼaia, ʼe fakatuʼu anai e te Puleʼaga ʼo te ʼAtua te ʼu felogoi tokalelei ʼaē neʼe maʼu ʼi te ʼōloto ʼi Eteni, ʼi te ʼu manu, pea mo te ʼu manu mo te hahaʼi. ʼE ʼui fēnei e te Tohi-Tapu: “Ko te lupo ʼe nofo faka temi anai mo te akeno tagata, pea ko te leopa ʼe takoto fakatahi anai mo te ʼuhiʼi tao, pea ko te ʼuhiʼi pipi, pea mo te laione mui, pea mo te manu ʼaē neʼe fafaga lelei, ʼe nātou fakatahi fuli anai; pea ʼe takitaki anai nātou e he kiʼi tama veliveli.”—Isaia 11:6-9; Osea 2:18.
Koutou fakakaukauʼi muʼa, ʼi te Palatiso fakakelekele ʼe fakamālōlō foki anai mo te ʼu mahaki fuli pea mo te ʼu māʼimoa! ʼE fakapapau mai e te Folafola ʼa te ʼAtua: “ ʼE mole he tahi ʼe ina toe ʼui anai: ‘ ʼE ʼau mahaki.’ ” (Isaia 33:24) “[Ko te ʼAtua] ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.”—Apokalipesi 21:4.
ʼE Feala Hakotou Maʼu Te ʼu Tapuakina ʼAia
ʼE lave anai ʼi tokotou loto ia te ʼu fakapapau ʼa te ʼAtua ʼo ʼuhiga mo te maʼuli ʼi tona mālama foʼou faitotonu. Pea logope la te ʼui e ʼihi ʼe mole feala te fakahoko ʼo te ʼu tapuakina ʼaia, ko te ʼu lelei ʼaia ʼe feala noa pe tona fakahoko e totatou Tupuʼaga agaʼofa.—Pesalemo 145:16; Mikea 4:4.
ʼIo, ʼe ʼi ai te ʼu maʼua ʼe tonu ke tou fai mo kapau ʼe tou fia maʼuʼuli ʼo heʼegata ʼi te Palatiso fakakelekele. Neʼe fakahā e Sesu te maʼua tāfito, ʼi tana faikole ʼaē ki te ʼAtua: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, te ʼAtua moʼoni pe e tahi, pea mo ia ʼaē neʼe ke fekauʼi mai, ia Sesu Kilisito.”—Soane 17:3.
Koia kapau ʼe tou fia maʼuʼuli moʼoni ʼi te mālama foʼou ʼo te ʼAtua, ʼe ʼaoga ke tou ako muʼa ke tou ʼiloʼi te finegalo ʼo te ʼAtua pea ke tou fai. Heʼe ko te meʼa ʼaenī ka hoko moʼoni anai: “ ʼE mole te malamanei pea mo tona loto, ka ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai,” ʼo ina maʼu te ʼu tapuakina ʼo heʼegata ʼe foaki mai e totatou Tupuʼaga agaʼofa.—1 Soane 2:17.
Gata pe mokā ʼe fakahā, ko te ʼu vaega ʼo te Tohi-Tapu neʼe toʼo mai te Les Saintes Écritures—Traduction du monde nouveau.