Kapite 2

Faka Maʼuhiga Ka Heʼeki Tupu

KO TE ʼosi pe ʼaenī ʼo te fakahā age e te ʼaselo ko Kapeliele kia Malia, ko ia ka ina fānauʼi anai he tama ʼe liliu anai ko he hau heʼegata. Ka neʼe punamaʼuli foki te taʼahine: “ ʼE hoko feafeaʼi anai te meʼa ʼaia, heʼe mole heʼeki ʼau felāveʼi mo he tagata?”

“ ʼE hifo anai te laumālie maʼoniʼoni kia te koe, ko tona fakamahino age ʼaia e Kapeliele, pea ko te mālohi ʼo te Māʼoluga ʼe ina ʼuʼufi anai koe ʼaki tona malumalu. Koia ko te tamasiʼi ʼaē ka tupu ʼe ʼui anai ʼe maʼoniʼoni, ʼAlo ʼo te ʼAtua.”

Ke tui ia Malia ki tana fagonogono neʼe toe tala age e Kapeliele: “Pea koʼeni ia Elisapeta, tou kāiga, kua ina toe faitamaʼi mo ia he tama ka kua matuʼa, pea ko te māhina ʼaenī kia ia ko tona ono māhina, ʼo ia ʼaē neʼe ʼui ʼe paʼa; heʼe ki te ʼAtua ʼe mole he meʼa ʼe faigataʼa kia te ia.”

Neʼe tali e Malia te folafola ʼa Kapeliele. Pea neʼe koteā tana ʼui age? “Koʼeni te kaugana ʼa Sehova! Ke hoko te meʼa ʼaia kia te ʼau ohage ko tau lea! ”

Pea mavae ai Kapeliele ia te ia. Fuafualoa siʼipe pea teuteuʼi e Malia tona ʼu meʼa pea ʼalu ia ʼo fakasiosio kia Elisapeta, pea mo Sakalia, tona ʼohoana, ʼaē ʼe nonofo ʼi te ʼu moʼuga ʼo Sutea. Ko ia tonu ia neʼe nofo ʼi Nasaleti, ko te fagona loaloaga ia ʼe feala ke ʼaho tolu peʼe ʼaho fā ʼaē ka ina fai.

Kua kaku leva ia Malia ki ʼo Sakalia, pea hū ia ki fale ʼo fakamālo atu. ʼI te temi pe ʼaia, neʼe fonu ia Elisapeta ʼi te laumālie maʼoniʼoni, pea ina ʼui age kia Malia: “ ʼE ke manuʼia koe ʼi te fafine fuli, pea ʼe manuʼia te fua ʼo tou ʼalo! He koʼe kua tokagaʼi ʼau ke haʼele mai ai te faʼe ʼo toku ʼAliki kia te ʼau? He koʼeni ia, ʼi te temi pe ʼaē neʼe logo ai ʼoku taliga ki tau fakamālo, neʼe hopo fakafiafia ai te tamasiʼi ʼi toku ʼalo.”

ʼI tana logo ki te ʼu palalau ʼaia, neʼe tali age e Malia ʼaki te loto fakafetaʼi: “ ʼE fakavikivikiʼi e toku nefesi ia Sehova, pea ʼe fiafia toku laumālie ʼo ʼuhiga mo te ʼAtua toku Fakamaʼuli, he kua ina tokagaʼi ia te masiva ʼo tana kaugana. He koʼeni ʼe lau anai ʼe ʼau manuʼia e te taʼiake fuli, koteʼuhi neʼe fai e te Māfimāfi te ʼu meʼa lalahi kia te ʼau.” Kae, logope te ʼofa ʼaia neʼe fai kia ia, neʼe tuku aipe e Malia te vikiviki katoa ki te ʼAtua. “Ko tona huafa ʼe maʼoniʼoni, ko tana tala age ʼaia; pea ko tona manavaʼofa, ʼe tuku holo ia ʼi te taʼiake ki te taʼiake, kia nātou ʼe manavasiʼi kia te ia.”

Neʼe hoko atu te fakavikiviki ʼa Malia ki te ʼAtua ʼaki te hiva faka polofeta ʼaenī: “Neʼe ina fai te ʼu gāue mālohi ʼaki tona nima, neʼe ina veuki ia nātou ʼe fialahi ʼi tonatou loto. Neʼe ina fakahifo te kau mālohi mai tonatou ʼu ʼafioʼaga, pea ina hikihiki ia nātou ʼe agavaivai; neʼe ina fakamākona ʼaki te ʼu meʼa lelei ia nātou ʼe hālofia pea ina fakaliliu ia nātou ʼe maʼu meʼa ke māsisiva. Neʼe tokoni ia ki Iselaele, tana kaugana, ke ina manatuʼi te manavaʼofa, ohage ko tana tala age ki ʼatatou ʼu kui, kia Apalahamo pea mo tona hāko, ke talu ai.”

Neʼe nofo ia Malia mo Elisapeta ʼo māhina tolu. Neʼe lagi ʼaoga ia ki ai ʼi te ʼu vāhaʼa fakaʼosi ʼo tona faitama. Neʼe ko he meʼa lelei ia ki te ʼu fafine agatonu ʼaia e lua, ʼaē neʼe faitatama ʼuhi ko te gāue ʼa te ʼAtua, ke nā nonofo fakatahi ʼi te temi fakafiafia ʼaia ʼo tonā maʼuli.

Kua koutou tokagaʼi la te faka maʼuhiga ʼaē ʼo Sesu ka heʼeki tupu? Neʼe fakahigoaʼi ia ia e Elisapeta “ko toku ʼAliki”, pea ko te tamasiʼi ʼaē ʼe ina fuafatuʼi neʼe hopo fakafiafia ʼi te hū ake ʼa Malia. Kae, ki muli age ʼe ʼi ai anai niʼihi ʼe mole nātou maʼu he fakaʼapaʼapa kia Malia pea mo tana tamasiʼi ʼaē ka fānauʼi, pea ʼe tou vakaʼi anai te faʼahi ʼaia. Luka 1:26-56.

▪ Koteā te meʼa ʼaē neʼe tala age e Kapeliele kia Malia moʼo fakamahino age pe ʼe feafeaʼi anai te hoko ʼo tona faitama?

▪ Neʼe feafeaʼi te faka maʼuhiga ʼo Sesu ka heʼeki tupu?

▪ Koteā ʼaē neʼe ʼui e Malia ʼi tana hiva fakavikiviki ki te ʼAtua?

▪ Neʼe fualoa feafeaʼi te nofo ʼa Malia mo Elisapeta? He koʼe ʼe ko he meʼa lelei tana nofo mo ia ʼi te temi ʼaia?