Kapite 3

Kua Tupu Te Tagata Fakamelomelo ʼo Sesu

KUA hokosia leva te temi fānau ʼo Elisapeta. Lolotoga te ʼu māhina ʼaia e tolu kua hili, neʼe nofo ia Malia ʼi ʼona tafa, kae kua hoko leva te temi ke nā mavete ai, pea mo toe liliu ia ki Nasaleti. ʼE kei toe pe māhina e ono, pea toe fānau anai mo ia.

ʼI te ʼosi mavae pe ʼa Malia, neʼe faʼeleʼi e Elisapeta te tama. Kua fakafiafia te hahaʼi fuli ʼi tanatou sio ki te ʼalu lelei pe ʼo te faifānau pea mo te mālōlō lelei pe ʼo te faʼe mo te tamasiʼi. Kua fakasio e Elisapeta tana tamasiʼi ki ʼona vāhaʼa fale pea mo ʼona kāiga, pea nātou fakafiafia fuli mo ia.

ʼI Iselaele, ko te Lao ʼa te ʼAtua ʼe ina fakatotonu ke silikosisioʼi te tamasiʼi tagata fuli ʼi tona ʼaho valu. Pea ki te ʼaho ʼaia ko te ʼu kaumeʼa pea mo te famili ʼe nātou fakatahitahi. Neʼe nātou ʼui age ke fakahigoa te tamasiʼi ko Sakalia, ohage ko tana tāmai. Neʼe fakafisi age ia Elisapeta kia nātou. “Kailoa, ʼe higoa anai ia ko Soane.” ʼE tou manatuʼi ko te higoa ʼaia neʼe ʼui age e te ʼaselo ko Kapeliele ke fakahigoa ʼaki te tamasiʼi.

Ka neʼe mole leleiʼia e tona ʼu kaumeʼa: “ ʼE mole he tahi ʼi tou ʼu kāiga ʼe higoa feiā.” Pea nātou kamokamo ki tana tāmai, pe ʼe koteā tona loto ki te higoa ʼo tana tamasiʼi. Neʼe kamo age ia Sakalia ke ʼavage he maka faitohi, pea nātou punamaʼuli fuli, he koʼeni te meʼa neʼe ina tohi: “Ko Soane tona higoa.”

ʼI te temi pe ʼaia, neʼe ava faka milakulo ai tona gutu ʼo feala ai tana toe palalau. ʼE tou manatuʼi neʼe mate tona gutu koteʼuhi neʼe mole tui ia ki te tala age ʼaē e Kapeliele ko Elisapeta ʼe ina maʼu anai hana tamasiʼi. Pea ʼi te temi neʼe kamata palalau ai Sakalia, neʼe punamaʼuli te hahaʼi pea nātou feʼekeʼaki ʼo fēnei: “ ʼE feafeaʼi anai te tamasiʼi ʼaenī mokā lahi?”

ʼI te temi leva ʼaē kua fonu ia Sakalia ʼi te laumālie maʼoniʼoni; pea ʼi tona fiafia, neʼe ina ʼui fēnei: “Ke tapuakiʼi ia Sehova, te ʼAtua ʼo Iselaele, he kua ina fulihi tana tokaga ki tana hahaʼi pea kua ina fai kia nātou he fakahāo. Pea kua ina fakatupu maʼa tatou he mālohi ʼo te fakamaʼuli ʼi te ʼapi ʼo tana kaugana ko Tavite.” Ko te “mālohi ʼo te fakamaʼuli” ʼaia ko te ʼAliki ko Sesu, ʼaē kua vave tupu. ʼAki ia ia, ko tona ʼui ʼaia e Sakalia, ko te ʼAtua ‘ ʼe ina foaki mai anai kia tatou, ʼi te ʼosi ʼo totatou fakahāo mai te nima ʼo totatou ʼu fili, te pilivilesio ʼaē ke tou tauhi kia te ia ʼo mole tou manavasiʼi, ʼaki he tauhi tapu, ʼi te agatonu pea mo te faitotonu ʼi ʼona muʼa ʼi totatou ʼu ʼaho fuli pe’.

ʼOsi pe ʼaia, pea lea faka polofeta ia Sakalia ʼo ʼuhiga mo tona foha, ko Soane: “Pea kia koe, kiʼi tamasiʼi, ʼe fakahigoa anai koe ko te polofeta ʼo te Māʼoluga, he ʼe ke haʼele anai ʼi muʼa ia Sehova moʼo teuteuʼi tona ʼu ala, pea mo foaki ki tana hahaʼi te ʼiloʼi ʼo te fakamaʼuli ʼaki te fakamolemole ʼo tanatou ʼu agahala, ʼuhi ko te manavaʼofa ʼo totatou ʼAtua. ʼAki te manavaʼofa ʼaia, ʼe ʼaʼahi anai tatou e he māfoatā mai ʼoluga, moʼo fakamālamaʼi ia nātou ʼe nonofo ʼi te fakapōʼuli pea mo te malumalu ʼo te mate, pea mo takitaki ʼotatou vaʼe ʼi te ala ʼo te tokalelei.”

Kae ʼi te temi ʼaia, ko Malia, ʼaē neʼe mole heʼeki ʼohoana, kua kaku ia ki tona ʼapi, ʼi Nasaleti. Koteā anai te meʼa ka hoko kia ia mokā hā tona faitama? Luka 1:56-80; Levitike 12:2, 3.

▪ ʼE muʼa Soane ia Sesu ʼi te fia?

▪ Koteā te meʼa neʼe hoko ʼi te ʼaho valu ʼo Soane?

▪ Neʼe fulihi feafeaʼi e te ʼAtua tana tokaga ki tana hahaʼi?

▪ Koteā te gāue ʼaē ka fai e Soane, ohage ko tona tala e te lea faka polofeta?