Kapite 6

Te Tamasiʼi ʼo Te Fakapapau

NEʼE nonofo ia Sosefo pea mo Malia ʼi Petelehemi, neʼe mole nā toe liliu ki Nasaleti. ʼI te katoa ʼo te ʼaho valu ʼo te tamasiʼi, neʼe nā faka silikosisioʼi, ʼo fai pe ki te Lao ʼaē neʼe tuku e te ʼAtua kia Moisese. ʼE ʼiloga mai ko te agamāhani ia, ʼe toe fakahigoa ai te ʼu kihiʼi tamaliki tagata ʼi te ʼaho ʼaia. Neʼe fakahigoa e Sosefo pea mo Malia tanā tamasiʼi ko Sesu, ohage ko tona fakatotonu age e te ʼaselo ko Kapeliele.

Kua ʼosi leva kiai te māhina e tahi mo te tupu. Kua katoa ia ʼaho e 40 ʼo Sesu. ʼE ʼave koa ia ia e tanā ʼu mātuʼa kifea? Ki te fale lotu, ʼi Selusalemi, ʼe ōvi pe ʼi he ʼu kilometa ʼe mole lahi ki te faʼahi ʼaē ʼe nā nonofo ai. Ohage ko tona fakatotonu e te Lao ʼa Moisese, ko he fafine ʼe ina faʼeleʼi he tamasiʼi tagata, ʼe tonu ke ʼalu ia ki te fale lotu mokā katoa te ʼaho 40 ʼo te tamasiʼi ke ina momoli he mōlaga ʼo te fakamaʼa.

Ko te meʼa ʼaia ka fai e Malia. Ko tona mōlaga, ko te ʼu manu lele e lua. Ko te faʼahi ʼaia ʼe tou ʼiloʼi ai pe e feafeaʼi te maʼuli fakakoloa ʼo Sosefo pea mo Malia. Ko te Lao ʼa Moisese, ʼe ina fakahā mai ʼo ʼuhiga mo te faʼahi ʼaia ʼe tonu ke momoli ai he akeno tagata kei mui, ʼaē ʼe totogi kovi age ʼi te ʼu manu lele, kae, kapau ia ʼe mole maʼu e te faʼe heʼe totogi kovi, pea ʼe feʼauga pe ia ʼi he taluaʼi kulukulu pe ko he taluaʼi lupe.

ʼI te fale lotu, neʼe ʼi ai te matuʼa neʼe ina toʼo Sesu ʼo hapahapai ʼi ʼona nima. Ko tona higoa ko Simeone pea neʼe fakahā age e te ʼAtua ki ai ʼe mole feala anai ke mate ka mole heʼeki sio ia ki te Kilisito ʼa Sehova, te Mesia ʼaē neʼe fakapapauʼi mai. ʼI te temi neʼe kaku mai ai Simeone ki te fale lotu ʼi te ʼaho ʼaia, neʼe taki ia e te laumālie maʼoniʼoni ki te tamasiʼi ʼaē neʼe fua e Sosefo pea mo Malia.

ʼI tana hapahapai ia Sesu, neʼe fakafetaʼi ia Simeone ki te ʼAtua. “ ʼI te temi leva ʼaē, ko tana ʼui ʼaia, ʼAliki Hau, ko tau kaugana, ke ke tuku ke ʼalu ʼi te ʼāteaina pea mo te fīmālie, ohage pe ko tau folafola mai; he kua sio ʼoku mata ki te fakamaʼuli, ʼaē neʼe ke teuteuʼi ia mata ʼo te hahaʼi fuli pe, ia te mālama moʼo toʼo ʼo te fakapōʼuli ʼi te ʼu puleʼaga pea mo kolōlia ʼaki ia tau hahaʼi ko Iselaele.”

Neʼe punamaʼuli Sosefo pea mo Malia ʼi tanā logo ki tana palalau. Pea tapuakina ai nāua e Simeone, pea ina fakahā age kia Malia ko tana tama “ ʼe fakatuʼu ia ko te tōʼaga pea mo te toe fakatuʼuake ʼo te tokolahi ʼi Iselaele”. Pea neʼe ina toe fakahā age ko te lotomamahi, ohage ko he heletā māsila, ʼe ina hukiʼi anai te nefesi ʼo Malia.

Ko te fafine polofeta ko Ana, kua taʼu 84, neʼe toe ʼi ai mo ia ʼi te potu ʼaia. Neʼe mole puli ia ʼi te fale lotu. ʼI te hola pe ʼaia neʼe fakaōvi ki te tamasiʼi pea fakafetaʼi ki te ʼAtua pea palalau ʼo ʼuhiga mo Sesu kia nātou fuli ʼe fia fagono age.

Neʼe lagi lahi te fiafia ʼo Sosefo pea mo Malia ʼi te ʼu meʼa ʼaia neʼe hoko ʼi te fale lotu! Ko te ʼu meʼa fuli ʼaia ʼe fakamoʼoni ʼaki ai kia nāua ko Sesu ʼe ko te tamasiʼi ʼaē neʼe fakapapau mai ki ai te ʼAtua. Luka 2:21-38; Levitike 12:1-8.

▪ ʼI tona ʼiloga mai ʼi te agamāhani ʼa te kau Iselaele, ko te temi fea koa ʼaē ʼe fakahigoa ai te ʼu kihiʼi tamaliki tagata?

▪ Koteā te meʼa ʼaē ʼe tonu ke fai e te faʼe Iselaele fuli mokā katoa te ʼaho 40 ʼo tana tamasiʼi tagata? ʼI te fai e Malia tona maʼua ʼo ʼuhiga mo tona mōlaga, koteā te meʼa ʼaē ʼe tou ʼiloʼi ʼo ʼuhiga mo tona maʼuli fakakoloa?

▪ Ko ai te ʼu hahaʼi ʼaē neʼe nātou ʼiloʼi te ʼuhiga totonu ʼo Sesu ʼi te fale lotu, pea neʼe feafeaʼi?