Kapite 8

Te Fakalainoaʼi ʼo Te Tagata Fakapō

NEʼE fafagu e Sosefo ia Malia. ʼE ʼi ai te meʼa maʼuhiga ʼe ina fia fakahā age. Ko te ʼaselo ʼa Sehova neʼe hā age kia ia pea koʼeni tana ʼui age: “Tuʼu ake, pea ke toʼo te kiʼi tamasiʼi mo tana faʼe, pea ke hola ki Esipito, pea ke nofo ʼi ai ʼo aʼu aipe ki taku fakaʼiloʼilo atu; heʼe kumi anai e Helote te kiʼi tamasiʼi ke ina fakamole.”

Neʼe mole tuai, pea nātou feholaki toko tolu. Meʼa lelei foki heʼe kua ʼiloʼi leva e Helote tona kākāʼi e te kau masi pea mo tanatou kua mavae ʼi te fenua. ʼE tou manatuʼi neʼe tonu foki ke nātou toe liliu ʼo fakahā kia Helote te potu ʼaē ʼe nofo ai Sesu mokā nātou maʼu. Kua makalililili ʼosi ia Helote. ʼAki tona loto ʼaē ke matehi ia Sesu, neʼe ina fai te fakatuʼutuʼu ʼaenī ke matehi fuli te ʼu tamaliki tagata e taʼu lua ʼo fai ifo ki lalo ʼi Petelehemi pea mo te telituale ʼo te kolo ʼaia. Neʼe ina fili te taʼi tamaliki ʼaia ʼo mulimuli pe ki te ʼu meʼa ʼaē neʼe fakahā age e te kau masi.

Ko te matematehi ʼo te ʼu kiʼi tamaliki tagata ʼaia neʼe ko he meʼa fakalialia ia. Ko te kau solia ʼa Helote neʼe nātou ulufi fakamālohi te ʼu ʼapi ʼo faʼao te ʼu kiʼi tamaliki tagata ʼi te ʼu nima ʼo tanatou ʼu faʼe. ʼE mole tou ʼiloʼi pe ko te ʼu kiʼi tamaliki tagata e fia ʼaē neʼe nātou matematehi, kae ko te ʼu tagilāulau pea mo te fai fetagihi ʼa te ʼu faʼe ʼaia neʼe nātou fakahoko ai te lea faka polofeta ʼa te Tohi-Tapu ʼaē neʼe fai e Selemia, ko te polofeta ʼa te ʼAtua.

ʼI te temi ʼaia, kua kaku haohaoa ia Sosefo pea mo tona famili ki Esipito ʼo nātou nonofo ai. Kae ʼi te tahi po, neʼe toe hā age te ʼaselo ʼa Sehova kia Sosefo ʼi te misi. “Tuʼu ake, pea ke toʼo te kiʼi tamasiʼi mo tana faʼe, pea ke ʼalu ki te fenua ʼo Iselaele, he kua mamate ia nātou ʼaē neʼe nātou kumi te maʼuli ʼo te kiʼi tamasiʼi.” Koia neʼe toe liliu ai leva te famili ʼaia ki tonatou fenua, ʼo fakahoko ai te tahi lea faka polofeta ʼa te Tohi-Tapu ʼaē neʼe ʼui ai ko te ʼAlo ʼo te ʼAtua ʼe pāuiʼi anai mai Esipito.

ʼE mahino ia neʼe ko te loto ʼo Sosefo ke ʼalu ʼo nofo ʼi Petelehemi ʼi Sutea, ʼi te koga meʼa ʼaē neʼe nofo ai ʼi muʼa ʼo tana hola ki Esipito. Kae neʼe ina ʼiloʼi ai ko Akelausi, foha agakovi ʼo Helote, ʼaē kua hau ʼi Sutea, pea ʼi te tahi misi, neʼe fakahā age leva e Sehova ke tokaga ki te tuʼutāmaki ʼaia. Koia, ko Sosefo pea mo tona famili neʼe nātou ʼolo leva ki te potu tokelau ʼo nonofo ʼi te kolo ko Nasaleti ʼi Kalilea. Pea neʼe ko te potu ʼaia, ʼaē ʼe mamaʼo ʼi te lotomalie ʼo te maʼuli faka lotu ʼo te kau Sutea ʼaē neʼe lahi ai ia Sesu. Mateo 2:13-23; Selemia 31:15; Osea 11:1.

▪ ʼI te mole toe liliu mai ʼa te kau masi, neʼe koteā koa te meʼa fakalialia ʼaē neʼe fai e Helote? Kae neʼe feafeaʼi koa te puipui ʼo Sesu?

▪ ʼI tana liliu mai Esipito, he koʼe koa neʼe mole toe ʼalu ia Sosefo ʼo nofo ʼi Petelehemi?

▪ Ko te ʼu lea faka polofeta fea koa ʼo te Tohi-Tapu ʼaē neʼe hoko ʼi te temi ʼaia?