Neʼe Natou Feholaki Mai Te Hau Agakovi

Neʼe fafagu e Sosefo ia Malia ʼo ina fakaha age he logo maʼuhiga. Neʼe hoki ha age pe kia ia te ʼaselo ʼa Sehova ʼi he moemisi, ʼo ina ui fenei age: “Tuʼu ake, toʼo te tamasiʼi mo tana faʼe pea ke hola ki Esipito, pea ke nofo ai ʼo kaku ki taku ui atu ke ke toe liliu mai, he ʼe kumi anai e Helote te tamasiʼi ke ina matehi.”—Mateo 2:13.

Neʼe foimo feholaki atu aipe ia Sosefo, mo Malia pea mo tanā tamasiʼi ʼi te poʼuli. Meʼa lelei foki tanatou feholaki vave, he neʼe kua iloʼi e Helote tona kakaʼi e te kau masi. Neʼe ina ui age ke natou toe liliu age kia ia ʼo fakaha pe ʼe nofo ʼifea ia Sesu. Kaʼe neʼe natou mavae ʼi te fenua. Neʼe lahi te ita ʼo Helote. ʼI tana fia matehi ia Sesu, neʼe ina fakatotonu ai ke matematehi ʼi Petelehemi mo ʼona tafaʼaki te tamaliki tagata fuli, ʼae ʼe taʼu lua peʼe siʼi ifo. Neʼe ina fakafuafua te taʼu ʼaia ʼo mulimuli ki te ʼu meʼa neʼe fakamahino age e te kau masi ʼae neʼe ʼomai mai te potu Esite.

Neʼe ko he meʼa fakalialia te matematehi ʼo te ʼu tamaliki tagata fuli ʼaia! ʼE mole tou iloʼi pe ko fanau ʼe fia ʼae neʼe matehi. Kaʼe ko te fetagihi mo te lauga ʼa te ʼu faʼe lotomamahi neʼe ko te fakahoko ʼaia ʼo te lea fakapolofeta ʼo te Tohi-Tapu, ʼae neʼe tala e Selemia, te polofeta ʼa te ʼAtua.—Selemia 31:15.

ʼI te temi ʼaia, neʼe kua feholaki ia Sosefo mo tona kiʼi famili ki Esipito, pea neʼe natou nonofo ai. Pea ʼi te tahi po, neʼe toe ha age te ʼaselo ʼa Sehova kia Sosefo ʼi he moemisi. Neʼe ina ui fenei age: “Tuʼu ake, toʼo te tamasiʼi mo tana faʼe pea kotou olo ki te fenua ʼo Iselaele, koteʼuhi kua mamate ia natou ʼae neʼe natou kumi ke natou matehi te tamasiʼi.” (Mateo 2:20) Neʼe manatu leva ia Sosefo, kua feala ke toe liliu tona kiʼi famili ki tonatou fenua. Neʼe fakahoko ai te tahi lea fakapolofeta ʼo te Tohi-Tapu, ʼae ʼe ina ui ʼe pauʼi te ʼAlo ʼo te ʼAtua mai Esipito.—Oseo 11:1.

ʼE mahino ia, neʼe loto e Sosefo ke maʼuli tona kiʼi famili ʼi Sutea, lagi ʼi he kolo ʼe ovi ki Petelehemi, ʼae neʼe natou maʼuʼuli ai ʼi muʼa ʼo tanatou feholaki ki Esipito. Kaʼe neʼe ina iloʼi, ko te hau ʼo Sutea neʼe ko Akelausi, te foha agakovi ʼo Helote. Pea ʼi te tahi age moemisi, neʼe fai e te ʼAtua he fakatokaga kia Sosefo. Koia neʼe fagona mamaʼo ai mo tona kiʼi famili ki te potu noleto, pea natou nonofo ai leva ʼi te kolo ko Nasaleti, ʼi Kalilea. Neʼe natou mamaʼo mo Selusalemi, te kolo ʼae neʼe tauhi tafito ai te kau Sutea ki te ʼAtua. Neʼe lahilahi ake ia Sesu ʼi Nasaleti, ʼo fakahoko ai te lea fakapolofeta ʼaeni: “ ʼE higoa anai ko he tagata Nasaleti.”—Mateo 2:23.