Kapite 12

Te Papitema ʼo Sesu

KO TE fai faka mafola ʼa Soane kua katoa nei kiai māhina e ono ʼo tona kua kamata. Ko te taʼu 30 leva ʼaenī ʼo Sesu, pea haʼu ai kia Soane ki te vai ʼo Solotane. Koteā tona tupuʼaga? ʼE haʼu ʼapē koa ia ʼo fakasiosio, peʼe ko tana pe fia ʼiloʼi te gāue ʼa Soane? Kailoa; ʼe haʼu ia ʼo kole age ki ai ke papitemaʼi ia ia.

Ka neʼe fakafisi age ia Soane. “ ʼE ko ʼau ia ʼaē ʼe ʼaoga ke papitemaʼi e koe, ka ke haʼu koe kia ʼau?” ʼE ʼiloʼi foki ia e Soane ko tona tēhina mataʼi tama ʼaē ko Sesu ko te ʼAlo ia ʼo te ʼAtua. Neʼe mole koa la ko ia totonu pe ʼaē neʼe hopo fakafiafia ʼi te fatu ʼo Elisapeta, tana faʼe, ʼi te hū ake ʼaē ʼa Malia ki tonatou ʼapi ka kei faitamaʼi ia Sesu? Neʼe lagi fakamatala age e Elisapeta, kia ia te meʼa ʼaia ki muli age. Neʼe lagi ina toe fakamatala age pe la ia te ʼaselo ʼaē neʼe ina fakahā te tupu ʼa Sesu, pea mo te ʼu ʼaselo ʼaē neʼe hā ki te ʼu tagata tauhi ōvi ʼi te po ʼaē neʼe tupu ai ia Sesu.

Koʼena te tupuʼaga ʼo te ʼiloʼi e Soane ia Sesu. Pea ʼe ina ʼiloʼi lelei foki ko te papitema ʼaē ʼe ina fai ʼe mole ʼaoga ia kia Sesu. ʼE fakatuʼutuʼu ia kia nātou ʼaē ʼe fakahemala ki ʼanatou ʼu agahala; kae ko Sesu ʼe mole hana agahala. Kae, logope te fakafisi ʼa Soane, neʼe fakakinau age pe ia Sesu: “Tuku ke fai te meʼa ʼaenī, heʼe tau mo tatou ke tou fai feiā te meʼa fuli pe ʼaē ʼe tonu.”

He koʼe koa ʼe tonu ke papitemaʼi ia Sesu? Koteʼuhi ʼo ʼuhiga mo ia, ko te papitema, ʼe mole faka ʼuhiga ko hana fakahemala ki he ʼu agahala neʼe ina fai, kae ko tana hā ki tana Tāmai, ke ina fai tona finegalo. ʼO aʼu ki te temi fuli ʼaia, ko Sesu neʼe tufuga ʼakau ia; kae ʼi te temi fuli leva ʼaē kua hoko te hola ʼaē ʼe tonu ke kamata ai te minisitelio ʼaē neʼe tupu ai tona fekauʼi mai e Sehova ʼAtua ki te kele. ʼI takotou manatu neʼe ʼamanaki koa ia Soane ki he hoko ʼo he meʼa fakatalakitupua ʼi te temi fuli ʼaē ʼe ina papitemaʼi ai ia Sesu?

Ki muli age, neʼe ina fakamatala fēnei: “Ko ia ʼaē neʼe ina fekauʼi mai ʼau ke ʼau haʼu ʼo fai papitema ʼi te vai neʼe ina ʼui mai: ‘Ko ia ʼaē ka ke sio anai ʼe hifo ki ai te laumālie maʼoniʼoni ʼo tuʼu ai, ko ia ʼaia ʼe fai papitema ʼi te laumālie maʼoniʼoni.’ ” Koia, kua ʼamanaki ia Soane ʼe sio anai ki te laumālie maʼoniʼoni ʼo te ʼAtua ʼe tuʼu ʼi he tahi ia nātou ʼaē ka ina papitemaʼi. Koia neʼe mole loko punamaʼuli ai ia, ʼi tana sio ki te hifo ifo ʼo te ‘laumālie ʼo te ʼAtua ohage he lupe hina ʼo haʼu kia Sesu’ ʼi te temi fuli ʼaē neʼe hake ake ai mai te vai.

Ka neʼe hoko te tahi ia meʼa lolotoga te papitemaʼi ʼo Sesu. ‘Koʼeni ia te lagi ʼe ava age’ kia te ia. Koteā tona faka ʼuhiga? Ko tona lagi ʼuhiga totonu ʼaenī, ʼi te lolotoga ʼo te temi fuli ʼaē neʼe papitemaʼi ai, neʼe ina toe manatuʼi tona maʼuli ʼi muʼa atu ʼaē ʼi selo. Koia kua toe manatuʼi lelei leva e Sesu te temi fuli ʼaē neʼe maʼuli ai ko te foha fakalaumālie ʼo Sehova ʼAtua, pea mo te ʼu meʼa fuli ʼaē neʼe ʼui age e te ʼAtua kia ia ʼi te lagi lolotoga te temi fuli neʼe nofo ai ʼi muʼa ʼo tana tupu ko he tagata.

Pea ko te tahi ʼaenī meʼa neʼe hoko, ʼi te lolotoga ʼo tona papitemaʼi, neʼe ʼi ai te leʼo mai te lagi neʼe ina ʼui fēnei: “Ko ia nei ko toku ʼAlo, ʼofaina, ʼaenī ku ʼau fiafia ʼaupito ia te ia.” Ko te leʼo koa ʼaia ʼo ai? ʼO Sesu? Kailoa! Ko te leʼo ia ʼo te ʼAtua. ʼE mahino papau ia kia tatou ko Sesu ko te ʼAlo ʼo te ʼAtua, kae mole ko te ʼAtua totonu ia, ohage ko tona lau e ʼihi.

Kae, ko Sesu neʼe ko te foha fakatagata ia ʼo te ʼAtua, ohage ko te ʼuluaki tagata ʼaē ko Atama. Ko te tisipulo ko Luka, ʼi te ʼosi ʼo tana fakamatala te papitema ʼo Sesu, neʼe ina fakahā lelei te faʼahi ʼaia: “Ko Sesu totonu, ʼi te temi fuli ʼaē neʼe ina kamata fai tana gāue, neʼe taʼu tolugofulu, pea, hage ko tona ʼui, ko ia ko te foha ʼo Sosefo, te foha ʼo Elia, (...) foha ʼo Tavite, (...) foha ʼo Apalahamo, (...) foha ʼo Noe, (...) foha ʼo Atama, ʼalo ʼo te ʼAtua.”

Ko Atama neʼe ko ia ko te “foha” fakatagata “ ʼo te ʼAtua”; neʼe toe feiā foki mo Sesu. Ko Sesu neʼe ko te tagata ʼaē ʼe lahi tokotahi ʼo te ʼu temi fuli, ʼe mole toe ʼi ai he mahalohalo ki te faʼahi ʼaia, mokā ʼe tou sivisivi tona maʼuli. Kae, ʼi te temi fuli ʼaē neʼe papitemaʼi ai, neʼe hū ia Sesu ki he ʼu felogoi foʼou pea mo te ʼAtua: neʼe liliu ai ko tona ʼAlo fakalaumālie. ʼI te temi fuli leva ʼaē, ʼe toe pāuiʼi ia ia e te ʼAtua ki te lagi, ʼo kamata ai kia ia te maʼuli ʼe fakatupu ʼaki ai tana fakafisi ʼo talu ai ki tona maʼuli fakatagata, ʼo ina sakilifisioʼi moʼo fakamaʼuli ʼo te malamanei ʼaenī kua fakatūʼa. Mateo 3:13-17; Luka 3:21-38; 1:34-36, 44; 2:10-14; Soane 1:32-34; Hepeleo 10:5-9.

▪ He koʼe neʼe mole pulipuli ia Sesu kia Soane?

▪ He koʼe neʼe papitemaʼi ia Sesu kae neʼe mole ina fai he agahala?

▪ ʼAki te ʼiloʼi e Soane te ʼu faʼahiga meʼa ʼo ʼuhiga mo Sesu, he koʼe ʼe feala ke tou manatu neʼe mole punamaʼuli ia Soane ʼi tana sio ʼaē ki te laumālie ʼo te ʼAtua ʼe hifo kia te ia?