Kapite 16

ʼE Tokaga Fakamalotoloto Ki Te Tauhi ʼAē Kia Sehova

KO TE ʼu higoa ʼo te ʼu tēhina ʼo Sesu, ia te tahi ʼu tama ʼa Malia ko Sake, Sosefo, Simone pea mo Suta. ʼI muʼa ʼo tanatou ʼolo mo Sesu pea mo tana ʼu tisipulo ki Kapenaume, te kolo ʼaē ʼe ōvi mai ki te tai ʼo Kalilea, neʼe lagi nātou tutuʼu muʼa ʼi tonatou ʼapi ʼi Nasaleti ʼo tānaki te ʼu meʼa ʼaē ka ʼaoga anai kia nātou.

He koʼe koa ʼe ʼalu ia Sesu ki Kapenaume ka mole hoko atu pe tana minisitelio ʼi Kana, peʼe ʼi Nasaleti peʼe ʼi he tahi ʼatu faʼahi ʼo Kalilea? ʼUluaki, ko Kapenaume ko te kolo ʼe tuʼulaga lelei pea e lagi maʼuhiga ake. Pea tahi foki ʼe teitei fuli pe ko nātou ʼaē ko tana ʼu tisipulo foʼou ʼe nonofo ʼi Kapenaume peʼe ʼi ʼona tafaʼaki. ʼE feala anai leva tonatou akoʼi e Sesu ʼo mole ʼaoga kia nātou ke nātou mavae ʼi tonatou ʼapi.

Lolotoga tana nofo ʼi Kapenaume, neʼe fai e Sesu te ʼu milakulo fakatalakitupua, ʼo ina fakamoʼoni anai ki ai ʼi ni ʼu māhina ki muli age. Kae koʼeni ia ia ʼe toe maʼu age ʼi te ʼu ala, pea mo tona ʼu feʼao. Ko te fasiga taʼu mātala ʼaia, pea ʼe nātou ʼolo ki Selusalemi ʼo kau ki te Pāsikate ʼo te taʼu 30. ʼI Selusalemi, ʼe hoki ʼiloʼi anai e te ʼu tisipulo te tahi ia faʼahi ʼo te agaaga ʼo Sesu ʼaē neʼe mole lagi heʼeki nātou ʼiloʼi.

ʼI te Lao ʼa te ʼAtua, ʼe tonu ke momoli e te kau Iselaele he ʼu sakilifisio ʼaki he ʼu manu. Koia neʼe fakatau ai e te ʼu tagata faifakatau ʼi Selusalemi te ʼu manu pea mo te ʼu lupe ki te kau Iselaele, ʼo faka faigafua kia nātou ʼaē ʼe ʼolo ki te fale lotu. Kae, neʼe fai foki tanatou fakatau meʼa ʼaia ʼi loto ʼi te fale lotu, pea neʼe nātou kaihaʼa te hahaʼi ʼo hiki te ʼu totogi ʼo te ʼu meʼa.

Neʼe ʼita ia Sesu. Pea ina fai tana huipi ʼaki te ʼu kauʼi maea pea ina kapu ki tuʼa ʼi te fale lotu te kau faifakatau. Neʼe ina laku ki lalo te ʼu paʼaga ʼa te kau fetogi paʼaga pea ina tokatokahi tonatou ʼu laupapa. “Koutou ʼave kehe te ʼu meʼa ʼaenī ʼi henī! ko tana leʼolahi age ʼaia ki te kau fakatau lupe. Tuku takotou fakaliliu te fale ʼo taku Tāmai ko he fale faifakatau! ”

ʼI te sisio ʼa te kau tisipulo ki te meʼa ʼaia, neʼe nātou manatuʼi te lea faka polofeta ʼaē neʼe ʼui ai ʼo ʼuhiga mo te ʼAlo ʼo te ʼAtua: “Ko te fakamalotoloto ʼaē ki tou fale ʼe ina mofi anai ʼau.” Kae, neʼe fehuʼi e te kau Sutea kia Sesu: “Koteā te fakaʼiloga ʼa koe ʼe ke fakahā mai kia mātou, koteʼuhi ko tau fai te ʼu meʼa ʼaenā? ” Neʼe tali age e Sesu: “Koutou maumauʼi te fale lotu ʼaenī, pea ʼe ʼau toe fakatuʼu ake anai ia ʼaho e tolu.”

Neʼe ʼui ia e te kau Sutea ʼe palalau ia Sesu ki te fale lotu ʼaē ʼe faʼu ʼaki te maka, koia neʼe nātou fehuʼi age ki ai: “Ko te fale lotu ʼaenī neʼe laga ia taʼu e fāgofulu-ma-ono, pea ko koe ia, ʼe ke toe laga anai koe ia ʼaho e tolu?” Kae ʼe palalau ia Sesu ki te tahi ia fale lotu, ʼaē ko tona sino. Hili taʼu e tolu ki muli age, ʼi te toe fakatuʼuake ʼo Sesu mai te mate, ʼe manatuʼi anai e tana kau tisipulo tana ʼu palalau ʼaia. Soane 2:12-22; Mateo 13:55; Luka 4:23.

▪ Neʼe ʼalu koa Sesu kifea ʼi te ʼosi ʼo te fai ʼohoana ʼaē ʼi Kana?

▪ He koʼe neʼe ʼita ia Sesu, pea koteā te meʼa neʼe ina fai?

▪ Koteā te meʼa ʼaē neʼe manatuʼi e te kau tisipulo ʼa Sesu ʼi tanatou sisio ki te meʼa ʼaē neʼe ina fai?

▪ Koteā te meʼa ʼaē neʼe ʼui age e Sesu ʼo ʼuhiga mo te “fale lotu ʼaia”, pea koteā te faka ʼuhiga ʼo tana palalau?