Neʼe Faʼafai Ia Sesu Ki Te Tauhi Moʼoni

Hili te faiʼohoana ʼae ʼi Kana, neʼe alu leva ia Sesu ki Kapenaume. Neʼe faifagona mo ia tana faʼe mo ʼona tehina ko Sakopo, mo Sosefo, mo Simone pea mo Sutasi.

Kaʼe he koʼe neʼe alu ia Sesu ki Kapenaume? Neʼe lahi age te kolo ʼaia ʼi Nasaleti mo Kana pea neʼe lelei tona tuʼuʼaga. Pea neʼe tokolahi te ʼu tisipulo foʼou ʼa Sesu neʼe maʼuʼuli ʼi Kapenaume peʼe ovi ki ai. Neʼe faigafua ai kia Sesu ke ina akoʼi natou ʼi tonatou kolo totonu.

Lolotoga tana nofo ʼi Kapenaume, neʼe fakahoko e Sesu ia he ʼu gaue maʼuhiga. Pea tokolahi te hahaʼi ʼo te kolo ʼaia pea mo ʼona tafaʼaki neʼe natou logo ki te ʼu meʼa ʼae neʼe ina fai. Kaʼe neʼe tonu leva kia Sesu mo ʼana tisipulo Sutea ʼae ʼe tauhi lotu lelei, ke natou faifagona ki Selusalemi ke natou kau ki te Pasikate. Neʼe ko te taʼu 30 H.T.S. ʼaia.

ʼI tanatou ʼi te fale lotu ʼo Selusalemi, neʼe punamaʼuli ia te ʼu tisipulo ʼa Sesu he neʼe ina fai te meʼa neʼe heʼeki ina fai ʼi muʼa atu.

ʼI te Lao ʼa te ʼAtua, neʼe tonu ki te kau Iselaele ke natou fai ia he ʼu sakilifisio manu ʼi te fale lotu. Pea ko natou ʼae neʼe ʼomai mai te tahi ʼu kolo ki Selusalemi, neʼe tonu ke ʼi ai hanatou meʼa kai lolotoga te temi ʼaia. Koia, neʼe fakagafua ai e te Lao kia natou ʼae ʼe faifagona mai mamaʼo ki Selusalemi, ke natou ʼaumai hanatou foʼi falā moʼo totogi “te u manu lalahi mo te u manu liliki” pea mo ʼihi meʼa ʼe ʼaoga kia natou. (Tetelonome 14:24-26) Kaʼe ko te kau faikoloa ʼo Selusalemi, neʼe natou fakatau te ʼu manu peʼe ko te ʼu manulele ʼi te loto malaʼe lahi ʼo te fale lotu. Pea ko ʼihi neʼe natou kakaʼi te hahaʼi ʼo natou hiki ia te ʼu totogi.

Neʼe ita leva ia Sesu pea neʼe ina huaʼi te ʼu piesi ʼa te hahaʼi fetogi paʼaga, mo tokatokahi ʼanatou laupapa pea mo kapu natou ki tuʼa. Pea neʼe ui fenei e Sesu: “Kotou toʼo kehe te ʼu meʼa ʼaeni ʼi heni! Tuku takotou fakaliliu ia te ʼapi ʼo taku Tamai ko he fale fakatauʼaga koloa!”—Soane 2:16.

ʼI te sisio ʼa te kau tisipulo ʼa Sesu ki te meʼa ʼaia, neʼe natou manatuʼi ai ia te lea fakapolofeta ʼaeni ʼo ʼuhiga mo te ʼAlo ʼo te ʼAtua: “Ko taku faʼafai ʼae ki tou ʼapi ʼe hage anai ko he afi kakaha.” Kaʼe neʼe ui fenei age e te kau Sutea: “Fakaha mai he fakailoga ʼe fakamoʼoni ai neʼe fakagafua atu ke ke fai te ʼu meʼa ʼaia.” Neʼe tali fenei age e Sesu: “Kotou holoʼi te fale lotu ʼaeni, pea ʼe au toe laga anai ia ʼaho ʼe tolu.”—Soane 2:17-19; Pesalemo 69:10.

Neʼe manatu ia te kau Sutea neʼe palalau ia Sesu ki te fale lotu ʼae ʼe tuʼu ʼi Selusalemi. Koia neʼe natou fehuʼi fenei age ai: “Neʼe laga te fale lotu ʼaeni ia taʼu ʼe 46, kaʼe ko koe, ʼe ke toe laga anai koa ia ʼaho ʼe tolu?” (Soane 2:20) Kaʼe neʼe palalau ia Sesu ʼo ʼuhiga mo tona sino ʼo ina fakata ki he fale lotu. Hili taʼu ʼe tolu, neʼe manatuʼi ai leva e ʼana tisipulo ʼana palalau ʼi te temi ʼae neʼe fakatuʼuake ai.