Kapite 20

Ko Te Lua Milakulo ʼi Kana

ʼI TE toe liliu mai ʼa Sesu ki tona fenua ʼi te ʼosi ʼo tana fai faka mafola loaloaga ʼi Sutea, neʼe mole haʼu ia ke mālōlō. Kailoa, ʼe ina kamata ʼi Kalilea te fenua ʼaē neʼe lahi ai tana minisitelio ʼe maʼuhiga ake. Kae ko tana kau tisipulo neʼe mole nonofo mo ia, neʼe toe liliu nātou ki ʼonatou famili pea mo toe fai tanatou ʼu gāue ʼāfea.

Koteā te logo neʼe faka mafola e Sesu? Ko ia ʼaenī: “Ko te puleʼaga ʼo te ʼAtua kua fakaōvi mai. Koutou fakahemala pea ke koutou tui ki te logo lelei.” Neʼe feafeaʼi koa te aga ʼa te kau Kalilea? Neʼe nātou tali ia Sesu pea mo nātou fakaʼapaʼapa fuli ki ai. Kae, neʼe mole tupu pe ʼuhi ko te logo ʼaē neʼe ina fakahā, kae tāfito foki, he neʼe tokolahi ia nātou neʼe ʼi Selusalemi ki te Pāsikate, ʼi te ʼu māhina ki muʼa atu, pea neʼe nātou sisio ai ki te ʼu fakaʼiloga fakaofoofo ʼaē neʼe ina fai.

ʼE ʼiloga mai ia ko te minisitelio lahi ʼo Sesu ʼi Kalilea neʼe kamata ia ʼi Kana. ʼE koutou manatuʼi: ʼi te kolo ʼaia, ʼi muʼa atu, ʼi tana liliu mai Sutea, neʼe fakaliliu e Sesu te vai ko he vino lolotoga te fai ʼohoana ʼi Kana. Ko te tuʼa lua leva ʼaenī ʼo tana nofo ʼi Kana; neʼe ʼi ai te foha ʼo te tagata gāue faka puleʼaga ʼi te fale ʼo te hau ko Helote Atipasi neʼe mahaki ʼo kovi ʼaupito. ʼI te ʼiloʼi ʼaē e te tagata gāue faka puleʼaga ʼaia kua tau mai ia Sesu mai Sutea ki Kana, neʼe haʼu mamaʼo ia mai Kapenaume, te kolo ʼaē ʼe nofo ai ke felāveʼi mo ia. ʼI te lahi ʼaē ʼo tona lotomamahi, neʼe ina kole mamahi age kia Sesu: ‘Fakalelei siou loto, ka ke foimo haʼu nei, ʼi muʼa ʼo te mate ʼo taku tamasiʼi.’

Neʼe tali age e Sesu: ‘Liliu ki tou ʼapi. Kua maʼuli tou foha!’ Neʼe tui ki ai te tagata gāue faka puleʼaga pea toe liliu ki tona ʼapi. ʼI te ala neʼe faka felāveʼi mai kia ia tana ʼu tagata faifekau, neʼe nātou ʼōmai ʼo ʼui age kia ia kua tokalelei te ʼu meʼa fuli, heʼe kua lelei te mahaki ʼo tona foha. ‘Ko te temi fea ʼaē neʼe lelei ai tona mahaki?’ ko te fehuʼi age ʼaia ʼa te tagata.

‘Neʼe kamata ʼanāfi, ʼi te hola tahi hili hoʼatā’, ko te tali age ʼaia ʼa tana kau faifekau.

ʼO ʼiloʼi atu aipe e te tagata ko te hola totonu pe ʼaia ʼaē neʼe ʼui age ai e Sesu kia ia: ‘Kua maʼuli tou foha!’ Pea ʼosi pe ʼaia, pea liliu te tagata ʼaia mo tona loto fale katoa ko te ʼu tisipulo ʼa Kilisito.

Koia ko Kana ko te kolo neʼe manuʼia ia he neʼe fakaʼiloga e Sesu ʼo tuʼa lua ʼaki te milakulo ʼi te potu ʼaia, ʼi tana liliu ʼaē mai Sutea. ʼE moʼoni, ʼe mole ko te ʼu milakulo pe ʼaia neʼe ina fai talu mai te kamata ʼo tona minisitelio, kae ʼe maʼuhiga ia he neʼe fakaʼiloga ʼaki tana toe liliu mai ki Kalilea.

ʼE ʼalu leva ia Sesu ʼi te temi nei ki Nasaleti, te kolo ʼaē ʼe nofo ai tona famili. Koteā te meʼa ʼaē ka hoko kia ia ʼi te potu ʼaia? Soane 4:43-54; Maleko 1:14, 15; Luka 4:14, 15.

▪ ʼI te toe liliu mai ʼa Sesu ki Kalilea, koteā te meʼa ʼaē neʼe fai e tana ʼu tisipulo, pea neʼe feafeaʼi tona tali e te hahaʼi?

▪ Ko te milakulo fea ʼaē neʼe fai e Sesu, pea koteā tona fua kia nātou ʼaē neʼe lelei tāfito ki ai?

▪ Neʼe feafeaʼi koa te faka manuʼia ʼo te kolo ko Kana e Sesu?