Kapite 15

Te ʼUluaki Milakulo ʼa Sesu

KUA ʼosi kiai te ʼaho e tahi peʼe lua ki te liliu ʼa Atelea, Petelo, Soane, Filipo, Natanaele, pea lagi mo Sake, ko te ʼu ʼuluaki tisipulo ʼa Sesu. Ko te temi nei, ʼe nātou liliu ki Kalilea, ko te tisitilike ʼaia neʼe nātou tutupu fuli ai. ʼE nātou ʼolo ki te fai ʼohoana ʼi Kana, ko te kolo ʼaia ʼo Natanaele. Ko Kana ʼe tuʼu ʼi te koga fenua e moʼugaʼia, ʼe mole mamaʼo mo Nasaleti, ʼaē neʼe lahi ai ia Sesu.

Ko te faʼe ʼa Sesu neʼe haʼu mo ia ki te fai ʼohoana. E lagi kaumeʼa lelei ia mo te famili ʼo nāua ʼaē ʼe ʼohoana, koia ʼaē neʼe koleʼi ai ia Malia ke selevisi ki te ʼu hahaʼi tokolahi ʼaē neʼe fakaafe. Koia neʼe ina tokagaʼi atu aipe ʼe ʼi ai te meʼa kua ʼosi, pea ʼalu ia ʼo fakahā age kia Sesu ʼo ina ʼui age ki ai: “ ʼE mole kei ʼi ai hanatou vino.”

ʼAki te ʼu palalau ʼaia, neʼe loto ia Malia ke fai e Sesu he meʼa ʼo ʼuhiga mo te faʼahi ʼaia. ʼI te kamata, neʼe mole faʼa loto kiai ia Sesu. “Koteā te meʼa ke ʼau fai mo koe? ” ko tana fehuʼi age ʼaia. ʼIo, ko ia ko te Hau ʼaē neʼe fakanofo e te ʼAtua; koia ko tona famili peʼe ko tona ʼu kaumeʼa ʼe mole ko nātou ʼaē ʼe tonu ke nātou fakatotonuʼi age kia ia te meʼa ʼaē ʼe tonu ke ina fai. Koia neʼe poto ia Malia ʼo ina tuku ai leva ki tana tama te vakaʼi ʼo te meʼa ʼaia, ʼo ina ʼui age kia nātou ʼaē ʼe takatuʼu ʼi ai: “Koutou fai fuli te ʼu meʼa ʼaē ka ina ʼui atu anai.”

Neʼe ʼi ai te ʼu foʼi ipu maka lalahi e ono, ko te ʼu ipu ʼutuʼaga vai ʼe feala ke ʼuʼutu kiai he ʼu lite e fāgofulu takitahi. Neʼe ʼui age e Sesu ki te kau faifekau: “Koutou fakafonu te ʼu foʼi ipu ʼaki te vai.” Pea fakafonu e te kau faifekau te ʼu foʼi ipu ʼo fonu gutugutu ʼosi. Pea toe ʼui age e Sesu: “Koutou ōhu la ʼo ʼave ki te pule ʼo te kātoaga.”

Neʼe punamaʼuli te pule ʼo te kātoaga ki te lelei ʼo te vino ʼaia, he neʼe mole ina ʼiloʼi ko te meʼa ʼaia neʼe ko te milakulo. Pea ina pāui ai te tagata ʼohoana, ʼo ina ʼui age ki ai: “Ko te tagata fuli pe ʼe ina ʼuluaki foaki muʼa te vino ʼaē ʼe lelei, pea ka konahihia te hahaʼi, pea hoki ina ʼaumai leva te vino ʼaē ʼe mole faʼa lelei. Kae ko koe ia, neʼe ke taupau mai pe koe te vino lelei ʼo aʼu mai ki te lakaga ʼaenī.”

Ko te ʼuluaki milakulo ʼaia ʼa Sesu, ʼe fakamālohiʼi ʼaki ai foki te tui ʼa tana kau tisipulo foʼou. Pea ʼosi pe ʼaia, pea ʼalu ia Sesu mo tana faʼe mo tona ʼu tēhina pea mo tana ʼu tisipulo ki te kolo ko Kapenaume, ʼe ōvi atu ki te tai ʼo Kalilea. Soane 2:1-12.

▪ Ko te temi fea ʼo te minisitelio ʼo Sesu ʼaē neʼe hoko ai te fai ʼohoana ʼi Kana?

▪ He koʼe koa neʼe fai e Sesu te fakafeagai ki te manatu ʼa tana faʼe?

▪ Koteā te milakulo ʼaē neʼe fai e Sesu, pea neʼe koteā te faka ʼuhiga ʼo te milakulo ʼaia?