Te ʼu Fehuʼi ʼa Te Kau Lautohi
Neʼe heʼe fakaʼapaʼapa koa ia Sesu ʼaki tana palalau ʼaē ki tana faʼē ʼi te fai ʼohoana ʼi Kana?—Soane 2:4.
Mole faʼa fualoa ki te ʼosi ʼo te papitema ʼo Sesu, neʼe fakaafe ia ia pea mo tana kau tisipulo ki te kaitahi ʼo te fai ʼohoana ʼi Kana. Neʼe kau ai mo tana faʼē. ʼI te kua vave ʼosi ʼo te vino, neʼe lea fēnei age ia Malia kiā Sesu: “ ʼE mole [kei] ʼi ai hanatou vino.” Neʼe tali fēnei age e Sesu ki tana faʼē: “Koteā te meʼa ke au fai mo koe, fafine? ʼE mole heʼeki hoko mai toku hola.”—Soane 2:1-4, MN.
Iā ʼaho nei, kapau ʼe toʼo e he tahi tana faʼē “fafine” pea mo ʼui age: “Koteā te meʼa ke au fai mo koe?” ʼe lagi faka ʼuhiga kovi anai, peʼe mata pauʼu. Kae ke ʼaua naʼa tou tukugākoviʼi ia Sesu ʼe mole fakaʼapaʼapa peʼe pauʼu, ʼe tonu muʼa ke tou mahino ki te agaʼi fenua faka Sutea pea mo te ʼu faʼahiga fakaʼaogaʼi ʼo te ʼu kupuʼi palalau ʼi te ʼu meʼa ʼaē ʼe hoko. ʼE hoki feala pē anai ke tou mahino ki te ʼu palalau ʼa Sesu mo kapau ʼe tou mahino ki te fakaʼaogaʼi ʼo te ʼu kupuʼi palalau ʼaia ʼi te ʼu temi faka Tohi-Tapu.
ʼO ʼuhiga mo te kupu “fafine,” ʼe ʼui fēnei ʼi te tikisionalio Vine’s Expository Dictionary of Old and New Testament Words: “Neʼe fakaʼaogaʼi moʼo talanoa ki he fafine, ʼe mole faka ʼuhiga ia moʼo fakatonutonuʼi peʼe mo tauteaʼi, kae ko he kupu fakapelepele peʼe fakaʼapaʼapa.” ʼE fakamoʼoni te tahi age ʼu tohi ki te manatu ʼaia. Ohagē lā, ʼe ʼui fēnei ʼi te Tohi-Tapu The Anchor Bible: “ ʼE mole ko he kupu moʼo fakatonutonuʼi, peʼe heʼe fakaʼapaʼapa, peʼe heʼe ʼofa . . . Neʼe ko he kupu ia neʼe fakaʼaogaʼi māhani e Sesu moʼo palalau fakapoipoi ki he ʼu fafine.” Ko te tikisionalio The New International Dictionary of New Testament Theology ʼe ina faka mahino, ko te kupu ʼaia “ ʼe mole ʼi ai hona tahi age faka ʼuhiga, ke ʼui lā ʼe heʼe fakaʼapaʼapa tona toʼo feiā.” Pea ʼe ʼui e Gerhard Kittel ʼi tana tikisionalio Theological Dictionary of the New Testament, ko te taʼi fakaʼaogaʼi ʼaia “ ʼe mole heʼe fakaʼapaʼapa peʼe mo kovi.” Koia, ʼe mole tonu ke tou ʼui neʼe fefeka ia Sesu peʼe heʼe fakaʼapaʼapa, ʼi tana palalau ki tana faʼē ʼo toʼo age ki ai te kupu “fafine.”—Mateo 15:28; Luka 13:12; Soane 4:21; 19:26; 20:13, 15.
ʼE feafeaʼi ki tana ʼui ʼaē: “Koteā te meʼa ke au fai mo koe?” ʼE lagi neʼe ko he faʼahiga palalau neʼe māhani kiai te kau Sutea, pea ʼe fakaʼaogaʼi tuʼa lahi ʼi te Tohi-Tapu. Ohagē lā, iā 2 Samuele 16:10, ʼe tou lau ai neʼe tāʼofi e Tavite ia Apisai ke mole ina matehi ia Simei, ʼo ina ʼui fēnei: “Koteā te meʼa ke au fai mo koutou ʼu tagata, ʼu foha ʼo Seluia? Ke ina pāui te kovi kiā te au, heʼe ko Sehova totonu neʼe ina ʼui age kiā te ia: ‘Pāui te kovi kiā Tavite!’ ” ʼO feiā mo te koga tohi ʼo 1 Hau 17:18, ʼi te maʼu atu e te fafine vītua ʼo Salefate tana tama kua mate, neʼe ina ʼui fēnei kiā Elia: “Koteā te meʼa ke au fai mo koe, ê tagata ʼa te ʼAtua moʼoni? Neʼe ke haʼu ki toku ʼapi ke ke fakamanatuʼi taku hala pea ke mate ai taku tama.”
ʼI te ʼu faʼifaʼitaki faka Tohi-Tapu ʼaia, ʼe tou mahino ai leva ki te ʼu palalau ʼaenī: “Koteā te meʼa ke au fai mo koe?” ʼI te agamāhani, ʼe mole fakaʼaogaʼi te faʼahiga palalau moʼo manukinuki peʼe mo fiatuʼu, kae moʼo tekeʼi he ʼu faʼahi ʼe mole kita loto kiai peʼe ko he ʼu manatu ʼe mole ʼalutahi mo tata manatu. Koia, ʼe feafeaʼi ki te ʼu palalau ʼaē neʼe fakaʼaogaʼi e Sesu kiā Malia?
ʼI te ʼui age e Malia kiā Sesu: “ ʼE mole [kei] ʼi ai hanatou vino,” ʼe lagi neʼe mole gata pē ʼi tana fakahā age te kua ʼosi ʼo te vino, kae ʼe mahino neʼe ina fakatotonu age kiā Sesu ke ina fai he meʼa ki te faʼahi ʼaia. Koia neʼe fakaʼaogaʼi ai e Sesu te kupu fafine moʼo fakafisi ki te kole ʼaē neʼe fia fai age e Malia, pea ʼi tana toe ʼui age “ ʼE mole heʼeki hoko mai toku hola,” ʼe tou mahino ai ki te tupuʼaga ʼo tana mole tali tana kole.
Mai te temi ʼaē neʼe papitema ai pea mo fakanofo e te laumālie māʼoniʼoni ʼi te taʼu 29 ʼo totatou temi, neʼe mahino lelei kiā Sesu neʼe ko te finegalo ʼo Sehova ʼo ʼuhiga mo ia, ʼi tona ʼuhiga Mēsia ʼaē neʼe fakapapauʼi mai, ke nofo agatonu ʼo aʼu anai ki tona mate, mo tona fakatuʼuake, pea mo tona faka kolōlia. Neʼe ina ʼui fēnei: “Ko te Foha o te tagata nee mole haele mai ke tauhi kia te ia, kae ke ina tauhi mo foaki tona mauli moʼo totogi aki o te tokolahi.” (Mateo 20:28) ʼI te kua ōvi mai ʼo tona temi mate, neʼe fakahā lelei e Sesu ia te faʼahi ʼaia, ʼo ina ʼui fēnei: “Kua hoko mai te hola.” (Soane 12:1, 23; 13:1) Koia, ʼi tana faikole ʼi te pō ʼi muʼa ʼo tona mate, neʼe ʼui fēnei e Sesu: “Tamai, kua hoko mai te hola, fakakololiaʼi tou Alo ke fakakololiaʼi koe e te Alo.” (Soane 17:1) ʼOsi ʼaia, ʼi te tau mai ʼo te hahaʼi ʼo puke ia ia ʼi Setesemane, neʼe fakaʼala e Sesu te kau ʼapositolo mai tanatou momoe pea neʼe ina ʼui fēnei age kiā nātou: “Koeni kua hoko mai te hola e tukuʼage ai te Foha o te tagata kia nima o te kau agahala.”—Maleko 14:41.
Kae ʼi te fai ʼohoana ʼi Kana, neʼe hoki kamata atu pē e Sesu tana minisitelio ʼi tona ʼuhiga Mēsia pea ko tona “hola” neʼe mole heʼeki hoko mai. Ko tana ʼuluaki gāue ʼaē neʼe fakatuʼutuʼu kiai, neʼe ko te fai ʼo te finegalo ʼo tana Tamai, pea mo mulimuli ki te temi pea mo tona faʼahiga fai ʼaē kua fakatotonu kiai tana Tamai, pea neʼe mole feala ki he tahi ke ina fakafihiʼi te faʼahi ʼaia. ʼAki tana ʼu palalau ʼaē neʼe ina fai ki tana faʼē, neʼe mole tuku e Sesu he tahi ke ina fakahēʼi ia ia mai te fakatuʼutuʼu ʼaia, kae neʼe mole heʼe fakaʼapaʼapa. Neʼe mole ʼiloga neʼe hagē kua lainoa ia pe neʼe laukoviʼi lā e tana tama. Kae neʼe mahino lelei pē kiā Malia te tali ʼaē neʼe fai age e Sesu, koia neʼe ina ʼui ai leva: “Kotou fai te ʼu meʼa fuli ʼaē kā ina ʼui atu anai.” Neʼe mole meʼa noaʼi e Sesu tana faʼē, heʼe ʼi tona ʼuhiga Mēsia neʼe ina fai tana ʼuluaki milakulo—ʼo fetogi te vai ko he vino huʼa lelei—pea neʼe ina fakahā ai he aga fakapotopoto ʼi tana fai ia te finegalo ʼo tana Tamai pea mo tokagaʼi te kole ʼa tana faʼē.—Soane 2:5-11, MN.
[Paki ʼo te pasina 31]
Neʼe ʼofa ia Sesu kae neʼe mole ina tuku tana faʼē ke ina fakahēʼi ia ia