Kapite 29

Neʼe Fai e Sesu Te ʼu Gāue Lelei Lolotoga Te Sapato

ʼE TOU nofo nei ʼi te fasiga taʼu mātala ʼo te taʼu 31. Kua ʼosi te ʼu māhina ki te ʼaho ʼaē neʼe fai palalau ai Sesu pea mo te fafine Samalitana ʼi te vai keli, ʼi tana mavae ʼaē ʼi Sutea ʼo ʼalu ki Kalilea.

ʼI te ʼosi ʼo tana fai akonaki ʼi Kalilea katoa, neʼe toe ʼalu ia Sesu ki Sutea, pea ʼi te potu ʼaia, neʼe ʼalu ia ʼo fai faka mafola ʼi te ʼu sinakoka. Kapau ʼe fakatatau te maʼuhiga ʼo te minisitelio ʼo Sesu ʼi Kalilea, ko te Tohi-Tapu ʼe siʼisiʼi tana talanoa ki tana gāue ʼaē ʼi Sutea ʼi tana ʼalu ʼaia kiai pea mo te ʼu māhina neʼe nofo ai talu mai te Pāsikate neʼe hoki ʼosi atu. ʼE ʼiloga mai ai neʼe mole tali leleiʼi tona minisitelio, ʼi Sutea ohage ko Kalilea.

Kua vave pe te ʼalu ʼa Sesu ki Selusalemi, te kolo tāfito ʼo Sutea, ki te Pāsikate ʼo te taʼu 31. ʼO ōvi ʼi te matapā e tahi ʼo te kolo, te Matapā ʼo te ʼu Akeno, ʼe ʼi ai te maʼanuʼaga ʼe higoa ko Petesata, ʼaia ʼe tokolahi te kau mahaki ʼe ʼolo ki ai, te ʼu kivi pea mo te ʼu hahaʼi ʼe ketu. ʼE nātou tui, ʼe feala ke lelei tonatou ʼu mahaki mokā ʼe nātou hifo ki te vai ʼo te maʼanuʼaga ʼaia ʼi te temi ʼaē ʼe fakaloka ai.

Ko te ʼaho ʼo te sapato, pea neʼe sio ia Sesu ki te tagata ʼi te vaʼe maʼanuʼaga ʼe mahaki talu mai ia taʼu e 38. ʼI tana ʼiloʼi ʼaē ko te tagata ʼaia kua fualoa ʼaupito tana faʼa kātakiʼi tona mahaki, neʼe fehuʼi age e Sesu ki ai: “ ʼE ke loto ke toe fakaliliu koe ki te maʼuli mālōlō? ”

Neʼe ina tali age kia Sesu: “ ʼAliki, ʼe mole he tagata ke ina tuku ʼau ki te loto maʼanuʼaga ʼi te temi ʼaē ʼe fakaloka ai te vai; kae, ʼi te lolotoga ʼo taku ʼalu kiai, ʼe hifo he tahi kehe ia ʼo muʼa ia te ʼau.”

Neʼe ʼui age ai e Sesu: “Tuʼu ake, toʼo tou palepale taki pea ke haʼele.” ʼI te ʼu palalau ʼaia, neʼe lelei atu aipe te mahaki ʼo te tagata ʼaia, ʼo ina toʼo tona palepale taki pea haʼele ai ia.

Kae ʼi te sio ʼa te kau Sutea ki te tagata ʼaia, neʼe nātou ʼui fēnei age ki ai: “Ko te sapato ʼaenī, pea ʼe mole gafua kia koe ke ke ʼefi te palepale taki ʼaenā.”

Neʼe ina tali age kia nātou: “Ko ia totonu ʼaē neʼe ina fakamālōlō ʼau neʼe ina ʼui mai kia te ʼau: ‘Toʼo tou palepale taki pea ke haʼele.’ ”

“Ko ai te tagata ʼaē neʼe ina ʼui atu kia koe: ‘Toʼo tou palepale taki pea ke haʼele’? ” ko tanatou fehuʼi age ʼaia. Neʼe mavae ia Sesu ʼuhi ko te hahaʼi, pea ko te tagata ʼaē neʼe ina fakamālōlō neʼe mole ina ʼiloʼi tona higoa. Ki muli age, neʼe felāveʼi ia Sesu mo ia ʼi te fale lotu, pea hoki ʼiloʼi ai e te tagata ia ia ʼaē neʼe ina fakamālōlō tona mahaki.

Pea ʼalu ai ki te kau Sutea ʼo fakahā ko Sesu ʼaē neʼe ina fakamālōlō tona mahaki. ʼI tanatou ʼiloʼi te meʼa ʼaia, neʼe ʼolo te kau Sutea kia Sesu. Koteā tona tupuʼaga? ʼE nātou holi koa ke nātou ʼiloʼi peʼe haʼu maifea tona mālohi ʼaē neʼe ina fai ai te ʼu meʼa fakaofoofo ʼaia? Kailoa; neʼe nātou ʼolo ki ai ko te valoki ʼo ia ʼi tana fai te ʼu gāue lelei ʼaia lolotoga te sapato. Pea neʼe nātou kamata ai tona fakatagaʼi. Luka 4:44; Soane 5:1-16.

▪ Ko temi e fia kua ʼosi kiai talu mai te ʼalu fakamuli ʼa Sesu ki Sutea?

▪ He koʼe ʼe tokolahi te hahaʼi ʼe ʼolo ki te maʼanuʼaga ʼaē ʼe higoa ko Petesata?

▪ Ko te milakulo fea ʼaē neʼe fai e Sesu ʼi te maʼanuʼaga ʼaia, pea koteā te aga ʼa te kau Sutea ki ai?