Kapite 26

Tana Toe Liliu Ki Kapenaume

KO TE logona ʼo Sesu kua mafola ʼi te fenua katoa, pea kua lahi te hahaʼi ʼe ʼolo kiai ʼi te ʼu potu lāvaki ʼaē ʼe tuʼu ai tona fagona. Kae, neʼe ʼosi pe kiai te ʼu kiʼi ʼaho, pea toe liliu ia ki Kapenaume ʼo ʼalu ʼi te tai ʼo Kalilea. Ko tana toe liliu, neʼe vave tona logologo ʼi te kolo ʼaia, pea neʼe lahi te hahaʼi neʼe ʼōmai ki te fale ʼaē ʼe nofo ai. Ko te kau Faliseo pea mo te kau faiako ʼo te Lao neʼe ʼōmai mo nātou mai te ʼu koga meʼa ʼe mamaʼo atu ʼi Selusalemi.

ʼI te kaugamālie ʼaupito ʼo te hahaʼi neʼe mole kei feala he hū ki fale ʼi te matapā. Pea ʼe ko te lotolotoiga ʼo te ʼu meʼa ʼaia ka hoko ai te meʼa fakaofoofo. Ko te meʼa ʼaē ka hoko ʼe maʼuhiga ʼaupito, heʼe ko te meʼa ʼaia ka tou ʼiloʼi ai ko Sesu ʼe ia ia te mālohi ʼaē moʼo pulihi ʼo te tupuʼaga ʼo te ʼu mamahi ʼo te tagata pea mo toe foaki te maʼuli mālōlō kia nātou fuli ʼaē ʼe ina fili ke ina fakamālōlō.

ʼI te lolotoga ʼo te fai akonaki ʼa Sesu ki te hahaʼi, neʼe ʼaumai e te ʼu tagata ʼe toko fā ki te fale ʼaia te palalisia ʼe takoto ʼi tona palepale taki. ʼE nātou loto ke fakamālōlō e Sesu tonatou kaumeʼa, kae neʼe mole feala foki hanatou hū ki fale ʼuhi ko te hahaʼi. Neʼe mole lelei he meʼa kia nātou! Kae, neʼe mole nātou haganoa. Neʼe nātou kake ki te fuga fale, ʼo nātou avahi tona ʼato pea nātou tuku ifo ai te tagata palalisia ʼi tona palepale taki kia tafa ʼo Sesu.

Neʼe ʼita koa ia Sesu ʼi te fakaleluʼi ʼo tana fai akonaki? Kailoa! Neʼe punamaʼuli ia ki te tui ʼa te ʼu tagata ʼaia. Neʼe ina ʼui age ki te tagata palalisia: “Kua fakamolemole tau ʼu agahala.” Kae ʼe feala koa ke fakamolemole e Sesu te ʼu agahala? Neʼe mole tui te kau sekelipa pea mo te kau Faliseo ki te faʼahi ʼaia. Koʼeni tanatou manatu ʼi tonatou ʼu loto: “He koʼe ʼe palalau feiā te tagata ʼaenī? ʼE leakovi ia ki te ʼAtua. Ko ai koa ʼaē ʼe feala ke ina fakamolemole te ʼu agahala, ʼe mole koa la ko te ʼAtua tokotahi pe?”

ʼI te ʼiloʼi e Sesu tanatou ʼu manatu, neʼe ʼui maʼana: “He koʼe ʼe koutou fai te ʼu manatu ʼaia ʼi tokotou ʼu loto? Kofea te meʼa ʼaē ʼe faigafua age, ʼi te ʼui ki te tagata palalisia: ‘Kua fakamolemole tau ʼu agahala’, peʼe ko te ʼui age: ‘Tuʼu ake, toʼo tou palepale taki pea ke haʼele’?”

Pea tuku age ai e Sesu ki te hahaʼi he fealagia, ʼo feiā aipe mo nātou ʼaē ʼe fakafeagai, ke nātou sio ki he fakamoʼoni ʼe hā ʼaki ai ʼe ina maʼu te mālohi moʼo fakamolemole ʼo te ʼu agahala ʼi te kele, pea ko ia totonu, ko te tagata ʼaē ʼe lahi tokotahi ʼo te ʼu temi fuli. Neʼe maliu ia ki te tagata palalisia pea ina fakatotonu age: “Tuʼu ake, toʼo tou palepale taki, pea ke ʼalu ki tou ʼapi.” Pea ʼi te temi fuli pe ʼaia neʼe fai ai e te tagata te meʼa ʼaia, ʼo ʼalu ki tuʼa mo tona palepale ia mata ʼo te hahaʼi! Neʼe ōfo ai te hahaʼi, pea nātou faka kolōliaʼi te ʼAtua ʼo nātou ʼui fēnei: “Neʼe mole heʼeki mātou sio ki he meʼa fēnei.”

Neʼe koutou fakatokagaʼi koa, ko Sesu neʼe ina fakapipiki te agahala pea mo te mahaki, pea ko te fakamolemole ʼo te ʼu agahala ʼe kau ki te toe maʼu ʼo te maʼuli mālōlō? ʼE fakamahino mai e te Tohi-Tapu ko Atama, tatatou tāmai, neʼe agahala pea neʼe tou maʼu fuli te ʼu fua ʼo te agahala ʼaia, ʼaē ko te mahaki pea mo te mate. Kae ʼi te pule ʼa te Puleʼaga ʼo te ʼAtua, ʼe fakamolemole anai e Sesu te ʼu agahala ʼanatou fuli ʼaē ʼe ʼofa pea mo tauhi ki tana Tāmai, pea ʼe pulihi anai te ʼu faʼahiga mahaki kehekehe fuli. ʼI manuʼia leva ka tou maʼu! Maleko 2:1-12; Luka 5:17-26; Mateo 9:1-8; Loma 5:12, 17-19.

▪ Fakamatalatala te faʼahi ʼaē neʼe hoko ai te meʼa fakatalakitupua?

▪ Neʼe feafeaʼi koa te kaku ʼa te tagata palalisia kia Sesu?

▪ He koʼe e tou agahala fuli, kae neʼe feafeaʼi te fakahā mai ʼe Sesu ʼe feala tatatou falala ʼe fakamolemole ʼatatou ʼu agahala pea mo tou maʼu he maʼuli mālōlō haohaoa?