Te ʼu Fehuʼi ʼa Te Kau Lautohi

Neʼe ʼui fēnei e Sesu: “Kapau ʼe koutou fakamolemole he ʼu agahala ʼa he tahi, ʼe fakamolemole anai kia nātou; kapau ʼe koutou tāʼofi te ʼu agahala ʼa he tahi, ʼe tāʼofi anai ia.” ʼE faka ʼuhiga koa e te palalau ʼaia ʼe feala ki te kau Kilisitiano ke nātou fakamolemole te ʼu agahala?

ʼE mole ʼi ai he fakatafito faka Tohi-Tapu ke ʼui ai ko te kau Kilisitiano fuli, peʼe māʼia mo te kau tagata ʼāfea ʼaē neʼe fakanofo ʼi te ʼu kokelekasio, ʼe nātou maʼu te pule fakaʼatua moʼo fakamolemole te ʼu agahala. Kae ko te meʼa ʼaē neʼe ʼui e Sesu ki tana ʼu tisipulo ia Soane 20⁠:​23, ʼaē ʼe talanoa ki ai ʼi ʼoluga, ʼe fakahā ai neʼe foaki e te ʼAtua ki te kau ʼapositolo te mālohi makehe ʼo ʼuhiga mo te faʼahi ʼaia. Pea ko te fakamatala ʼa Sesu ʼe feala ke ʼi ai hona pikipikiga mo te meʼa ʼaē neʼe ina ʼui ia Mateo 18⁠:18 ʼo ʼuhiga mo te ʼu tonu ʼaē ʼe fai ʼi selo.

ʼE feala ki te kau Kilisitiano ke nātou fakamolemole ʼihi ʼu hala, ʼo ʼalutahi mo te tokoni ʼa te ʼapositolo ko Paulo, ʼaē ʼe ina ʼui fēnei ia Efesi 4⁠:32: “Kae ke koutou liliu ʼo feagaleleiʼaki, fonu ʼi te manavaʼofa, ʼo koutou fefakamolemoleʼaki, ohage ko te fakamolemole ʼa te ʼAtua kia koutou ʼaki ia Kilisito.” Neʼe talanoa ʼi henī ia Paulo ʼo ʼuhiga mo te ʼu fihifihia ʼaē ʼe hoko ʼi te kau Kilisitiano, ohage ko he ʼu palalau ʼe lave kovi. ʼE tonu ke nātou faiga ke nātou fakatokatoka te ʼu faʼahi ʼaia, ʼo nātou fefakamolemoleʼaki. Koutou manatuʼi te ʼu palalau ʼaē neʼe fai e Sesu: “Koia, kapau ʼe ke ʼaumai tou mōlaga ki te ʼaletale pea ʼe ke manatuʼi ai ko tou tēhina ʼe nofo mo hona lotomamahi kia te koe, tuku muʼa tou mōlaga ʼi te muʼa ʼaletale, ka ke ʼalu muʼa ʼo fakatokatoka mo tou tēhina, pea ka ke liliu mai, pea hoki ke momoli ai leva tou mōlaga.”​—Mateo 5:​23, 24; 1 Petelo 4:8.

Kae, ʼi te ʼu vaega ki muʼa pea mo te ʼu vaega ʼaē ʼe hoa ki te vaega ʼo Soane 20⁠:23, ʼe hā ai neʼe talanoa Sesu ki te ʼu agahala ʼe mamafa age, ohage ko tana fakahā ʼi tana tahi ʼu palalau neʼe ina fai ki te hahaʼi tonu ʼaia ʼaē neʼe fakalogo kia ia. Tou vakaʼi pe koteā tona tupuʼaga.

ʼI te ʼaho ʼaē neʼe fakatuʼuake ai, neʼe hā Sesu ki te kau tisipulo ʼi te koga fale neʼe fakamaʼu, ʼi Selusalemi. ʼE ʼui fēnei e te fakamatala: “Pea neʼe toe ʼui maʼa Sesu kia nātou: ‘Ke ia koutou te tokalelei. Ohage ko te fekauʼi ʼau e te Tāmai, pea mo ʼau foki ʼe ʼau fekauʼi koutou.’ Pea ʼi tana ʼosi ʼui te meʼa ʼaia neʼe ina pupuhi kia nātou pea mo ʼui maʼana kia nātou: ‘Koutou tali te laumālie maʼoniʼoni. Kapau ʼe koutou fakamolemole te ʼu agahala ʼa he tahi, ʼe fakamolemole anai kia nātou; kapau ʼe koutou tāʼofi te ʼu agahala ʼa he tahi, ʼe tāʼofi anai ia.’ ”​—Soane 20:21-​23.

ʼE mahino ia, ko te kau tisipulo ʼaē neʼe talanoa kiai neʼe ko te kau ʼapositolo agatonu tāfito. (Vakaʼi te vaega 24.) ʼI tana pupuhi kia nātou pea mo ʼui, “Koutou tali te laumālie maʼoniʼoni,” ko Sesu ʼi hona ʼaluʼaga fakatā, neʼe ina fakatokagaʼi nātou, kua fakaōvi mai te temi ʼaē ka folahi ai kia nātou te laumālie maʼoniʼoni. Neʼe toe hoko atu e Sesu ʼo ʼui maʼana, ʼe nātou maʼu anai te pule ki te fakamolemole ʼo te ʼu agahala. Koia, ʼe ʼalutahi tana ʼu fakamatala ʼaia e lua.

Hili ia ʼaho e nimagofulu ʼi tona ʼosi fakatuʼuake, ʼi te ʼaho ʼo te Penikosite, neʼe folahi e Sesu te laumālie maʼoniʼoni. Koteā ʼaē neʼe hoko ʼaki te faʼahi ʼaia? Ko te ʼuluaki meʼa ʼaē neʼe hoko, ko nātou ʼaē neʼe nātou maʼu te laumālie neʼe toe tutupu ohage ko he ʼu foha fakalaumālie ʼa te ʼAtua, ʼaki te ʼamanaki ʼaē ke liliu ko he ʼu kaugā hau mo Kilisito ʼi te lagi. (Soane 3:​3-5; Loma 8:​15-​17; 2 Kolonito 1:​22) Kae neʼe ʼi ai te tahi ʼu meʼa neʼe hoko ʼaki te folahi ʼaia ʼo te laumālie maʼoniʼoni. Ko ʼihi ia nātou, neʼe nātou maʼu te mālohi faka milakulo. ʼAki te faʼahi ʼaia, ko ʼihi neʼe feala ke nātou palalau ʼi te ʼu lea kehekehe neʼe mole nātou ʼiloʼi. Ko ʼihi neʼe feala ke nātou lea fakakikite. Pea ko ʼihi neʼe feala ke nātou fakamālōlō te kau mahaki pea mo fakatuʼuake te kau mate.​—1 Kolonito 12:​4-​11.

Mai tona ʼuhiga ʼaē ko te ʼu palalau ʼa Sesu ia Soane 20⁠:22 ʼe faka ʼuhiga ki te folahi ʼaia ʼo te laumālie maʼoniʼoni ki te kau tisipulo, ko tana ʼu palalau ki muli mai ʼo ʼuhiga mo te fakamolemole ʼo te ʼu agahala, ʼe hage ʼe ina faka ʼuhiga ko te ʼAtua neʼe ina foaki ʼāteaina pe ki te kau ʼapositolo, ʼaki te gāue ʼa te laumālie, te pule moʼo fakamolemole peʼe kailoa te ʼu agahala.​—Vakaʼi Te Tule Leʼo, (fakapilitānia) ʼo te ʼaho 1 ʼo Malesio 1949, pasina 78.

ʼE mole foaki mai e te Tohi-Tapu he fakamatala katoa ʼo te ʼu lakaga fuli ʼaē neʼe fakaʼaoga ai e te kau ʼapositolo te taʼi mālohi ʼaia, kae ʼe mole ina toe fakamatala foki mo te ʼu lakaga fuli ʼaē neʼe nātou fakaʼaoga ai te meʼa ʼofa faka milakulo ʼaē ko te palalau ʼi te ʼu lea kehekehe, mo fai fakakikite, peʼe mo fakamālōlō ʼaki te hahaʼi.​—2 Kolonito 12:12; Kalate 3:5; Hepeleo 2:4.

Ko te faʼahi e tahi neʼe kau ai te mālohi ʼa te kau ʼapositolo moʼo fakamolemole peʼe tāʼofi te ʼu agahala, ʼe ko te meʼa ʼaē neʼe hoko kia Ananiasi pea mo Safila, ʼaē neʼe faiga ke nā loiʼi te laumālie. Ko Petelo, ʼaē neʼe logo ki te meʼa ʼaē neʼe ʼui e Sesu ʼaē ʼe tou lau ia Soane 20⁠:22, 23, neʼe ina fakahā lelei te ʼuhiga moʼoni ʼo Ananiasi pea mo Safila. Neʼe ʼuluaki palalau ia Petelo kia Ananiasi, ʼaē neʼe mate ʼi te temi pe ʼaia. Ki muli age, ʼi te haʼu ʼa Safila pea mo haga fai tana loi, neʼe tala e Petelo te fakamāu ʼaē kua fai kia ia. Neʼe mole fakamolemole e Petelo tana agahala kae neʼe ina ʼui fēnei: “Sio! Ko te ʼu vaʼe ʼo nātou ʼaē neʼe nātou ʼave tou ʼohoana ʼe nātou ʼi te matapā, pea ʼe nātou ʼave anai koe ki tuʼa.” Neʼe toe mate ai mo ia ʼi te moʼi temi pe ʼaia.​—Gāue 5:​1-​11.

ʼI te lakaga ʼaia neʼe fakaʼaogaʼi e Petelo te mālohi makehe moʼo fakahā te mole fakamolemole ʼo te agahala, neʼe kua ina ʼiloʼi faka milakulo, ko te ʼAtua neʼe mole ina fakamolemole te agahala ʼa Ananiasi pea mo Safila. Neʼe toe hā foki ko te kau ʼapositolo neʼe nātou maʼu te fakasiosio mamaʼo ʼe laka age ʼi te sio mamaʼo fakatagata, he neʼe nātou ʼiloʼi ai te ʼu lakaga ʼaē kua fakamolemole ʼaki te sakilifisio ʼa Kilisito. Koia, ʼaki te mālohi ʼo te laumālie ʼaē neʼe nātou maʼu, neʼe feala ai ki te kau ʼapositolo ke nātou fakamolemole te ʼu agahala peʼe kailoa.a

ʼE mole ʼui leva e te faʼahi ʼaia ko te kau tagata ʼāfea fuli ʼaē neʼe fakanofo e te laumālie neʼe nātou maʼu te taʼi pule ʼaē neʼe foaki faka milakulo age. ʼE tou sio ki te faʼahi ʼaia ʼi te meʼa ʼaē neʼe ʼui e Paulo ʼo ʼuhiga mo te fakamavae ʼo te tagata mai te kokelekasio ʼo Kolonito. Neʼe mole ʼui e Paulo, ‘ ʼe ʼau fakamolemole te ʼu agahala ʼa te tagata ʼaia’ pe neʼe ina ʼui ‘ ʼe ʼau ʼiloʼi kua fakamolemole ki te tagata ʼi te lagi, koia koutou tali ia ia.’ Kae neʼe uga e Paulo te kokelekasio katoa ke fakamolemole ki te Kilisitiano ʼaia ʼaē kua toe liliu mai pea mo fakahā age kia ia te ʼofa. Neʼe toe ʼui fēnei e Paulo: “Ko te meʼa ʼaē ʼe koutou lotolelei ʼo fakamolemole ki he tahi, ʼe ʼau toe fakamolemole mo ʼau.”​—2 Kolonito 2:​5-​11.

ʼI te temi leva ʼaē neʼe toe fakahū ai te tagata ki te kokelekasio, ko te ʼu tēhina mo tuagaʼane fuli neʼe kua feala hanatou fakamolemole kia ia, ko tona faka ʼuhiga ʼaē ke mole nātou taupau he lotokovi ki te meʼa ʼaē neʼe ina fai. Kae, ʼuluaki, neʼe tonu ke fakahemala pea ke toe fakahū ki te kokelekasio. ʼE lava hoko feafeaʼi te faʼahi ʼaia?

ʼE ʼi ai te ʼu agahala mamafa ʼe tonu ke fakatokatoka e te kau tagata ʼāfea, ohage ko te kaihaʼa, te loi, pe ko he fai ʼo he aga heʼeʼaoga mamafa. ʼE nātou faiga anai ke nātou fakatonutonuʼi pea mo akonakiʼi te ʼu hahaʼi agahala ʼaia, ʼo nātou uga nātou ke nātou fakahemala. Kae kapau ko he tahi ʼe ina fai he agahala mamafa, kae mole fakahemala, ʼe fakahoko anai e te kau tagata ʼāfea ʼaia te fakatotonu fakaʼatua ʼaē ke fakamavae ia ia ʼaia. (1 Kolonito 5:​1-5, 11-​13) Ko te meʼa ʼaē neʼe ʼui e Sesu ia Soane 20:23 ʼe mole faka ʼuhiga ia ki te ʼu taʼi meʼa ʼaia. ʼE mole maʼu e te kau tagata ʼāfea ʼaia te meʼa ʼofa ʼaē neʼe foaki faka milakulo e te laumālie, ohage ko te fealagia ʼaē ke fakamālōlō te ʼu mahaki fakasino peʼe ko te fakatuʼuake ʼo te kau mate; ko te ʼu meʼa ʼofa ʼaia neʼe ʼaoga ia ki tanatou fakatuʼutuʼu ʼi te ʼuluaki sēkulō pea neʼe gata ai. (1 Kolonito 13:​8-​10) Pea tahi ʼaē meʼa, ʼe mole maʼu e te kau tagata ʼāfea te pule mai te ʼAtua ke nātou fakamolemole te ʼu hala mamafa, te tala ʼaē kua maʼa te tagata ʼaē neʼe agahala ia mata ʼo Sehova. Ko te faʼahiga fakamolemole ʼaia ʼe fakatafito ki te sakilifisio faitotogi, pea ʼe ko Sehova tokotahi pe ʼaē ʼe feala ke ina fakamolemole te ʼu agahala ʼo fakatafito ki te sakilifisio ʼaia.​—Pesalemo 32:5; Mateo 6:​9, 12; 1 Soane 1:9.

Ohage ko te meʼa ʼaē neʼe hoko ki te tagata ʼo te Kolonito ʼāfea, kapau ko he tahi neʼe ina fai he agahala mamafa ʼe mole fia fakahemala, pea ʼe tonu ke fakamavae. Kapau ki muli age ʼe fakahemala pea mo fai te ʼu gāue ʼaē ʼe ʼalutahi mo te fakahemala, ʼe feala ke fakamolemole e te ʼAtua. (Gāue 26:20) ʼI te taʼi ʼaluʼaga ʼaia, ʼe fakahā e te Tohi-Tapu ki te kau tagata ʼāfea ʼe feala ke nātou tui kua fakamolemole ia Sehova kia ia ʼaē neʼe agahala. Pea ʼi te temi ʼaē kua toe hū ai te Kilisitiano ʼaia ki te kokelekasio, ʼe feala ke tokoni te kau tagata ʼāfea kia ia ʼi te faʼahi fakalaumālie, ke liliu ʼo mālohi ʼi te tui. Ko nātou ʼo te kokelekasio ʼe feala ke nātou fakamolemole ohage pe ko te aga ʼa te kau Kilisitiano ʼo Kolonito ki te tagata ʼaē neʼe fakamavae pea neʼe toe fakahū ki te kokelekasio.

ʼI tanatou fakatokatoka feiā ia te ʼu meʼa ʼaia, ʼe mole fakamāu e te kau tagata ʼāfea ʼaki tanatou ʼu lekula ʼa nātou totonu. ʼE nātou fakaʼaogaʼi te ʼu pelesepeto ʼo te Tohi-Tapu pea mo nātou mulimuli lelei ki te ʼu fakatuʼutuʼu ʼo te Tohi-Tapu ʼaē neʼe fakatuʼu e Sehova. Koia, ko te tonu ʼaē ka fai e te kau tagata ʼāfea ʼo ʼuhiga mo te fakamolemole ʼo he agahala peʼe kailoa, ʼe mulimuli anai ki te ʼu palalau ʼa Sesu ʼaē ia Mateo 18⁠:​18, ʼaē ʼe ʼui fēnei: “ ʼE ʼau tala moʼoni atu kia koutou: Tatau aipe pe koteā te ʼu meʼa ka koutou haʼi anai ʼi te kele, ʼe ko te ʼu meʼa anai ia kua ʼosi haʼi ʼi selo, pea ʼe tatau aipe pe koteā te ʼu meʼa ka koutou vevete anai ʼi te kele, ʼe ko te ʼu meʼa anai ia kua ʼosi veteki ʼi selo.” Ko te tonu ʼaē ka nātou fai ʼo ʼuhiga mo te faʼahi ʼaia, ʼe ʼalutahi anai mo te manatu ʼa Sehova ohage ko tana fakahā ʼi te Tohi-Tapu.

Koia, ko te meʼa ʼaē neʼe ʼui e Sesu, ohage ko tona ʼui ia Soane 20⁠:​23, ʼe mole fakafeagai ia ki te tahi ʼu tohi ʼa te Tohi-Tapu, kae ʼe ina fakahā neʼe maʼu e te kau ʼapositolo te mālohi makehe ʼo ʼuhiga mo te fakamolemole, ʼo ʼalutahi mo tonatou tuʼulaga makehe ʼi te kamakamata ʼo te kokelekasio faka Kilisitiano.

[Nota ʼi te lalo pasina]