Kei Koutou Manatuʼi Koa?

Neʼe ʼaoga koa kia koutou te ʼu alatike fakamuli ʼo Te Tule Leʼo? Koia koutou vakaʼi peʼe kei koutou manatuʼi te ʼu tali ki te ʼu fehuʼi ʼaenī:

◻ Koteā te ako ʼe tou maʼu ʼaki te fakaʼauha ʼa te kau Amonite? (Sofonia 2:​9, 10)

Ko Sehova ʼe mole ina leleiʼia te meʼa noaʼi ʼo tona ʼofa, pea ʼi tona temi totonu ʼe ina toe fakahoko anai te fakaʼauha ʼo te ʼu puleʼaga, ohage ko tana fai ʼi te ʼu temi muʼa. (Vakaʼi ia Pesalemo 2:​6-​12.)​—15/12, pasina 10.

◻ Ko te ʼu faʼahi fea ʼaē ʼe tokalelei ai te kau Kilisitiano?

ʼUluaki, ʼe nātou “tokalelei mo te ʼAtua ʼaki totatou ʼAliki ko Sesu Kilisito.” (Loma 5:1) Lua, ʼe nātou tokalelei mo ʼonatou tēhina mo tuagaʼane ʼi tanatou maʼuliʼi “te poto mai ʼoluga,” ʼaē ʼe “maʼa, pea ʼe tokalelei.” (Sake 3:​17)​—1/1, pasina 11.

◻ Koteā te ʼu meʼa ʼe fakatatau kiai te Tohi-Tapu, pea ʼe tokoni feafeaʼi te faʼahi ʼaia kia tatou?

ʼE fakatatau te Tohi-Tapu ki he huʼa pipi, ki he meʼa kai mālohi, ki he vai mokomoko pea mo maʼa, ki he sioʼata, pea mo he heletā māsila. Ko te mahino lelei ki te ʼu kupu ʼaia ʼe tokoni ai ki he minisi ke ina fakaʼaogaʼi fakalelei te Tohi-Tapu.​—1/1, pasina 29.

◻ Koteā te tokoni ʼaē ʼe tonu ke tou maʼu ʼaki he ako ʼe fakafuafua lelei?

ʼE tokoni mai kia tatou ke tou popoto ʼi te lautohi, ke tou popoto ʼi te faitohi, ke tou tuputupu ʼi te faʼahi ʼo te ʼatamai pea mo te ʼu aga ʼaē ʼe tonu ke fai, pea ke tou maʼu te ako ʼaē ʼe ʼaoga ʼi te maʼuli ʼo te ʼaho fuli pea mo ʼaoga ʼi te gāue taputapu.​—1/2, pasina 10.

◻ Koteā te meʼa maʼuhiga ʼo ʼuhiga mo te ako ʼe feala ke tou maʼu mai ia Sesu?

ʼE mole tonu ke fakaʼaogaʼi te ako moʼo faka kolōliaʼi ʼo tatou totonu, kae ke tou fakaʼaogaʼi moʼo vikiʼi te Faiako ʼaē ʼe lahi tokotahi, ia Sehova ʼAtua. (Soane 7:​18)​—1/2, pasina 10.

◻ Koteā te Puleʼaga ʼa te ʼAtua?

Ko te Puleʼaga ʼe ko he puleʼaga fakaʼatua ʼe tuʼu ʼi te lagi, ke ina fakahoko te finegalo ʼo te ʼAtua, mo ina pulihi te ʼu fua ʼo te agahala pea mo te mate, pea mo ina fakatuʼu te ʼu ʼaluʼaga faitotonu ʼi te kele. (Taniela 2:​44; Fakahā 11:15; 12:10)​—1/2, pasina 16.

◻ ʼE foaki feafeaʼi e te Tohi-Tapu te ako ʼaē ʼe ʼaoga moʼo fakagata te agamālohi ʼo talu ai?

ʼAki tana Folafola, te Tohi-Tapu, ʼe akoʼi e Sehova tana hahaʼi ke nātou ʼofa ki te tokalelei pea mo te faitotonu. (Isaia 48:17, 18) Ko te Folafola ʼa te ʼAtua ʼe ina maʼu te mālohi ʼaē ʼe feala ke lave ki te loto ʼo he tahi pea mo ina fetogi tana manatu pea mo tana aga. (Hepeleo 4:​12)​—15/2, pasina 6.

◻ ʼE lava feafeaʼi hatatou ʼui ko te lea faka polofeta ʼo Isaia kapite 35 ʼe ʼi ai tana ʼu fakahoko e tolu?

Ko te lea faka polofeta ʼo Isaia neʼe ʼuluaki hoko ʼi te temi ʼaē neʼe toe liliu ai te kau Sutea mai tanatou nofo popūla ʼi Papiloni ʼi te taʼu 537 ʼi muʼa ʼo totatou temi. ʼE toe maʼu tona fakahoko ʼi te faʼahi fakalaumālie ia ʼaho nei, talu mai te faka ʼāteaina ʼo te Iselaele fakalaumālie mai tanatou nofo popūla ʼi Papiloni Lahi. Pea ʼe toe ʼi ai anai tona tolu fakahoko ʼe ʼalutahi mo te fakapapau ʼo te Tohi-Tapu ʼo ʼuhiga mo te fakatuʼu ʼo te ʼu ʼaluʼaga faka palatiso, ʼi tona ʼaluʼaga moʼoni ʼi te kele. (Pesalemo 37:10, 11; Fakahā 21:​4, 5)​—15/2, pasina 17.

◻ Neʼe hā feafeaʼi te tokaga ʼa te ʼAtua ki te ʼu meʼa ʼaē ʼe ʼaoga ki te tagata, ʼi te ʼu milakulo ʼaē neʼe fakahoko e tona ʼAlo, ia Sesu?

Mai tona ʼaluʼaga ʼaē ko Sesu “ ʼe mole feala hana fai he meʼa ʼi tona loto faʼitaliha, kae ʼe ina fai pe te meʼa ʼaē neʼe sio ʼe fai e te Tāmai,” ko tona manavaʼofa ʼe hā ai te tokaga ʼaki he lotoʼofa ʼa Sehova ki tana ʼu kaugana takitokotahi. (Soane 5:​19)​—1/3, pasina 5.

◻ Koteā ʼaē ʼe faka ʼuhiga e te kupu ʼaē neʼe fakaʼaogaʼi e Sesu ia Soane 5⁠:​28, 29 ʼaē ko “te ʼu falemaka fakamanatu?

Ko te kupu faka Keleka mne·meiʼon (falemaka fakamanatu) ʼaē ʼe fakaʼaogaʼi ʼi henī, ʼe fakahā ai ko Sehova ʼe ina manatuʼi te ʼu meʼa fuli ʼo ʼuhiga mo ia ʼaē kua mate, ʼo kau ai mo tona ʼu agaaga pea mo tana manatu katoa. Ko te faʼahi ʼaia ʼe ko te fakamoʼoni tāfito ʼo te tokaga ʼa te ʼAtua kia tatou takitokotahi!​—1/3, pasina 6.

◻ Koteā te fakatokaga ʼi te lea faka polofeta ʼo Sofonia ʼe ko he tokoni ʼe ʼaoga kia tatou?

ʼI te temi nei, ʼe mole tonu ke lotolotolua totatou loto, pea ke ʼaua naʼa tou manatu ʼe kei mamaʼo te ʼaho ʼo Sehova. Pea tahi ʼaē, ʼe tonu ke tou tokakaga ke ʼaua naʼa tou lotovaivai ʼuhi ko te mole fia logo ʼa te hahaʼi ki te moʼoni. (Sofonia 1:​12, 13; 3:8)​—1/3, pasina 17.

◻ He koʼe ko te nofo agatonu ki te ʼAtua ʼe ko he meʼa faigataʼa?

Koteʼuhi ʼe fakafeagai te agatonu ki te tokaga pe ʼaē kia kita ʼaē neʼe tou maʼu mai ʼatatou ʼu mātuʼa. (Senesi 8:​21; Loma 7:​19) Kae tāfito, ko Satana mo tana kau temonio ʼe nātou faiga mālohi ke tou heʼe agatonu ki te ʼAtua. (Efesi 6:​12; 1 Petelo 5:8)​—15/3, pasina 10.

◻ Koteā te ʼu faʼahi e fā ʼaē ʼe tonu ke tou tauʼi ai te ʼu meʼa ʼaē ʼe fakafeagai ki te agatonu, pea koteā ʼaē ka tokoni anai kia tatou ke tou fai te faʼahi ʼaia?

Ko te ʼu faʼahi ʼaia ʼe fā ʼe ko te agatonu kia Sehova, ki tana kautahi, ki te kokelekasio, pea mo totatou ʼohoana. Ko te tahi tokoni ʼe ʼaoga moʼo tauʼi ʼo te ʼu meʼa ʼaē ʼe fakafeagai ki te agatonu, ʼe pipiki tāfito ki te faka lākatonuʼi ʼo te pule faʼitaliha ʼa Sehova.​—15/3, pasina 20.

◻ Koteā te ako ʼe feala ke tou tāʼofi ʼaki te meʼa ʼaē neʼe hoko kia Tavite ʼi tana faiga ʼaē ke ʼave te Aleka? (2 Samuele 6:​2-7)

Neʼe mole fakalogo Tavite ki te ʼu fakatotonu ʼaē neʼe foaki e Sehova ʼo ʼuhiga mo te feʼāveʼaki ʼo te Aleka, pea neʼe hoko ai te tuʼutāmaki. Ko te ako ʼaē ʼe tou maʼu mai ai ko te mole tonu ʼaē ke tou tukugakoviʼi ia Sehova ʼuhi ko te ʼu fihifihia ʼaē ʼe tupu ʼi tatatou mole fakalogo ki tana ʼu fakatotonu ʼaē ʼe kua fakamahino lelei mai. (Tāʼaga Lea 19:3)​—1/4, pasina 28, mo te 29.