“Ke ʼAua Naʼa Vaivai Tou ʼu Nima”
“Ke ʼaua naʼa vaivai tou ʼu nima. Ko Sehova, tou ʼAtua, ʼe ʼi tou lotolotoiga. ʼI tona ʼuhiga ʼAtua mālohi, ʼe ina hāofaki anai.”—Sofonia 3:16, 17.
1. Koteā ʼaē neʼe ʼui e te tagata ʼe ina sivi te Tohi-Tapu ʼo ʼuhiga mo te lea faka polofeta ʼo Sofonia?
KO TE lea faka polofeta ʼo Sofonia neʼe mole gata pe tona ʼuluaki fakahoko ʼi te fitu pea mo te ono sēkulō ʼi muʼa ʼo totatou temi. ʼI tana talanoa ʼo ʼuhiga mo te tohi ʼo Sofonia, neʼe tohi fēnei e te polofesea ko Carl Keil: “Ko te lea faka polofeta ʼo Sofonia . . . ʼe mole kamata ʼaki pe te tala ʼo te fakamāu lahi ki te malamanei katoa, ʼaē neʼe kau ai te fakamāuʼi ʼo Suta ʼuhi ko tana ʼu agahala, pea mo te ʼu puleʼaga ʼuhi ko tanatou agakovi ki te hahaʼi ʼa Sehova; kae ʼe toe palalau ʼi te tohi katoa ʼo ʼuhiga mo te ʼaho lahi pea mo fakamataku ʼo Sehova.”
2. Koteā te ʼu meʼa ʼaē ʼe tatau ʼi te ʼu ʼaluʼaga ʼo te temi ʼo Sofonia pea mo te ʼaluʼaga ʼo te Keletiate ia ʼaho nei?
2 Ia ʼaho nei, ko te fakatotonu faifakamāu ʼa Sehova ko te tānaki ʼo te ʼu puleʼaga moʼo fakaʼauha nātou, ʼi he ʼaluʼaga ʼe lahi age ia ʼi te temi ʼo Sofonia. (Sofonia 3:8) Ko te ʼu puleʼaga ʼaia ʼaē ʼe nātou lau ko nātou ko te kau Kilisitiano, ko nātou tāfito ʼaē ʼe hala ia mata ʼo te ʼAtua. Ohage pe ko te fakatūʼa mamafa ʼaē neʼe hoko kia Selusalemi ʼuhi ko tana heʼe agatonu kia Sehova, koia ʼe tonu ke huʼi maʼua te Keletiate ki te ʼAtua ʼo ʼuhiga mo tana fai te ʼu aga heʼeʼaoga. Ko te ʼu fakamāu fakaʼatua ʼaē neʼe fai ki te kolo ʼo Suta pea mo Selusalemi ʼi te temi ʼo Sofonia, ʼe toe faka ʼuhiga lahi ki te ʼu ʼēkelesia pea mo te ʼu magaʼi lotu ʼo te Keletiate. Neʼe nātou toe ʼulihi foki te tauhi maʼa ʼaki tanatou ʼu akonaki ʼaē ʼe nātou fakalainoaʼi te ʼAtua, pea ʼe lahi te ʼu akonaki ʼe ko te ʼu akonaki faka pagani. Neʼe nātou momoli te lauʼi miliona ʼo tanatou ʼu fānau ki te solia, pea ko te tokolahi ia nātou kua mamate. Tahi ʼaē meʼa, ko te hahaʼi ʼaē ʼe nonofo ʼi te Selusalemi fakatā neʼe nātou fakahū ki te meʼa ʼaē neʼe ʼui ko te Lotu Faka Kilisitiano, te lau ʼo te ʼu fetuʼu ʼo ʼuhiga mo te ka haʼu, te faifakalauʼakau, pea mo te ʼu felāveʼi fakasino heʼeʼaoga ʼaē ʼe fakalialia, ʼaē ʼe tatau mo te tauhi ʼo Paale.—Sofonia 1:4, 5.
3. Koteā ʼaē ʼe feala ke ʼui ʼo ʼuhiga mo te tokolahi ʼo te kau takitaki pea mo te ʼu puleʼaga faka politike ia ʼaho nei, pea koteā ʼaē neʼe fakakikite e Sofonia?
3 Tokolahi te kau takitaki faka politike ʼo te Keletiate ʼe nātou leleiʼia ke faka maʼuhigaʼi ia nātou ʼi te ʼēkelesia. Kae ohage ko te kau “tama ʼaliki,” ʼo Suta ko ʼihi ia nātou ʼe nātou faka kauganaʼi te hahaʼi ohage ko “he ʼu laione gugulu” pea mo he ʼu “lupo” kaikai. (Sofonia 3:1-3) Ko te kau tagata faifekau faka politike ʼo nātou ʼaia “ ʼe nātou fakafonu te ʼapi ʼo tanatou ʼu pule ʼaki te agamālohi pea mo te aga fakakākā.” (Sofonia 1:9) ʼE lahi ai te aga fakahehema. Pea ki te ʼu puleʼaga ʼaē ʼe nātou ʼi loto pea mo nātou ʼi tuʼa ʼo te Keletiate, ʼe ʼāsili tuputupu ia nātou ʼaē ʼe ‘fialahi’ ki te hahaʼi ʼo Sehova ʼo te ʼatu kautau, ʼaē ko tona ʼu Fakamoʼoni, pea mo nātou lau ko nātou ko te “magaʼi lotu” ʼe fehiʼaʼinaʼi. (Sofonia 2:8; Gāue 24:5, 14) ʼO ʼuhiga mo te kau tagata takitaki faka politike ʼaia pea mo tanatou ʼu hahaʼi fakalogo, neʼe fakakikite fēnei e Sofonia: “ ʼE mole feala anai ke hāofaki nātou e tanatou siliva pea mo tanatou aulo ʼi te ʼaho ʼo te hāūhāū ʼo te ʼAtua; kae ʼaki te afi ʼo tana fakamalotoloto ʼe fakaʼauha anai te kele katoa, heʼe ina fai anai he tāmateʼi, ʼio he tāmateʼi fakamataku, ei, ʼo te hahaʼi fuli ʼo te kele.”—Sofonia 1:18.
“ ʼE Fufū Anai Koutou ʼi Te ʼAho ʼo Te Hāūhāū ʼo Sehova”
4. Koteā ʼaē ʼe hā mai ai ʼe ʼi ai anai te ʼu hahaʼi ʼe hāo ʼi te ʼaho lahi ʼo Sehova, kae koteā te meʼa ʼaē ʼe tonu ke nātou fai?
4 Neʼe mole fakaʼauha fuli te hahaʼi ʼo Selusalemi ʼi te fitu sēkulō ʼi muʼa ʼo totatou temi. ʼO toe feiā aipe, ʼe ʼi ai te ʼu hahaʼi ʼe nātou hāo anai ʼi te ʼaho lahi ʼo Sehova. Ki te ʼu hahaʼi ʼaia neʼe ʼui fēnei e Sehova ʼaki tana polofeta ko Sofonia: “ ʼI muʼa ʼo te fānauʼi e te lao ia he meʼa, ʼi muʼa ʼo te fakalaka ʼo te ʼaho ohage ko te ʼotaʼotaʼi fulumeto, ʼi muʼa ʼo te hoko kia koutou te hāūhāū lahi ʼo Sehova, ʼi muʼa ʼo te hoko mai kia koutou te ʼaho ʼo te hāūhāū ʼo Sehova, koutou kumi ia Sehova, ia koutou fuli, ʼaē ko te kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.”—Sofonia 2:2, 3.
5. ʼI te temi ʼaenī ʼo te fakaʼosi, ko ai ia nātou ʼaē neʼe nātou ʼuluaki tokagaʼi te fakatokaga ʼo Sofonia, pea neʼe fakaʼaogaʼi feafeaʼi nātou e Sehova?
5 ʼI te temi fakaʼosi ʼo te mālama ʼaenī, ko nātou ʼaē neʼe nātou ʼuluaki tokagaʼi te fakaafe faka polofeta, neʼe ko te toe ʼo te kau Iselaelite fakalaumālie, te kau Kilisitiano fakanofo. (Loma 2:28, 29; 9:6; Kalate 6:16) ʼI tanatou kumi te faitotonu pea mo te agavaivai pea ʼi tanatou fakahā te fakaʼapaʼapa ki te ʼu faitotonu faifakamāu ʼo Sehova, neʼe faka ʼāteaina nātou mai Papiloni Lahi, te kautahi faka malamanei ʼo te lotu hala, pea neʼe nātou toe maʼu te ʼofa fakaʼatua ʼi te taʼu 1919. Talu mai ai, pea tāfito talu mai te taʼu 1922, ko te toe ʼo te hahaʼi agatonu ʼaia, neʼe nātou kalagaʼi, ʼaki he lototoʼa, te ʼu fakamāu ʼa Sehova ki te ʼu lotu pea mo te ʼu magaʼi lotu ʼo te Keletiate ʼo feiā aipe ki te ʼu puleʼaga faka politike.
6. (a) Koteā ʼaē neʼe fakakikite e Sofonia ʼo ʼuhiga mo te toe ʼo te hahaʼi agatonu? (b) Neʼe hoko feafeaʼi te lea faka polofeta ʼaia?
6 ʼO ʼuhiga mo te toe ʼo te hahaʼi agatonu ʼaia, neʼe fakakikite fēnei e Sofonia: “ ʼE mahino papau ia, ʼe ʼau tuku anai ʼi tou lotolotoiga he hahaʼi agavaivai pea mo loto fia mālalo, pea ʼe nātou kumi moʼoni anai te hāofaki ʼi te huafa ʼo Sehova. Kae kia nātou ʼaē ka toe anai ʼi Iselaele, ʼe mole nātou fai anai he ʼu aga heʼe faitotonu, pea ʼe mole nātou fakamatala anai ni ʼu loi, pea ʼe mole maʼu anai ʼi tonatou ʼu gutu he ʼalelo kākā; koteʼuhi, ko nātou ʼe nātou kakai anai pea mo nātou takokoto anai, pea ʼe mole ʼi ai anai he tahi ʼe ina fakamatakuʼi nātou.” (Sofonia 3:12, 13) Ko te kau Kilisitiano fakanofo ʼaia neʼe nātou faka maʼuhigaʼi tuʼumaʼu te huafa ʼo Sehova, kae tāfito talu mai te taʼu 1931, ʼi tanatou toʼo te higoa ʼaē ko te kau Fakamoʼoni ʼa Sehova. (Isaia 43:10-12) ʼI tanatou faka maʼuhigaʼi te fehuʼi ʼo ʼuhiga mo te pule faʼitaliha ʼa Sehova, neʼe nātou fakaʼapaʼapa ki te huafa fakaʼatua, pea neʼe liliu te faʼahi ʼaia ko he hāofakiʼaga maʼa nātou. (Tāʼaga Lea 18:10) Neʼe lahi te fafaga ʼo nātou e Sehova ʼi te faʼahi fakalaumālie, pea ʼe nātou nonofo ʼi te palatiso fakalaumālie, ʼo mole matataku.—Sofonia 3:16, 17.
“He Higoa Pea Mo He Fakavikiviki ʼi Te Lotolotoiga ʼo Te Hahaʼi Fuli”
7, 8. (a) Koteā te tahi lea faka polofeta neʼe hoko ki te toe ʼo te Iselaele fakalaumālie? (b) Koteā ʼaē neʼe mahino kiai te lauʼi miliona hahaʼi, pea koteā takotou manatu ʼo ʼuhiga mo te faʼahi ʼaia?
7 Neʼe fakatokagaʼi te pipiki mālohi ʼo te toe ʼo te hahaʼi ʼaia ki te huafa ʼo Sehova pea mo te ʼu pelesepeto faitotonu ʼo tana Folafola. Ko te hahaʼi fakamalotoloto neʼe nātou sisio ki te kehekehe ʼo te aga ʼo te toe ʼo te kau fakanofo pea mo te aga fakahehema pea mo te malualoi ʼo te kau takitaki faka politike pea mo faka lotu ʼo te mālama ʼaenī. Neʼe tapuakina e Sehova “te toe ʼo te Iselaele [fakalaumālie].” Neʼe ina faka maʼuhigaʼi ia nātou ʼaki te pilivilesio ʼaē ke nātou fakafofoga tona huafa, pea neʼe ina fai ke ʼiloa lelei nātou ʼi te lotolotoiga ʼo te hahaʼi ʼo te kele. Neʼe ko te meʼa ʼaia ʼaē neʼe fakakikite e Sofonia, ʼi tana ʼui fēnei: “ ‘ ʼI te temi ʼaia, ʼe ʼau fakahū anai koutou, ʼio, ʼi te temi ʼaē ʼe ʼau tānaki anai koutou. Heʼe ʼau fai anai ke koutou liliu ko he higoa pea mo he fakavikiviki ʼi te lotolotoiga ʼo te hahaʼi fuli ʼo te kele, ʼi te temi ʼaē ʼe ʼau toe liufaki anai takotou ʼu hahaʼi popūla ʼi ʼokotou muʼa mata,’ ko te ʼui ʼaia ʼa Sehova.”—Sofonia 3:20.
8 Talu mai te taʼu 1935, ko te toko miliona hahaʼi neʼe nātou mahino ʼe tapuakina e Sehova te toe ʼo te kau fakanofo. Neʼe nātou mulimuli ʼaki he lotolelei ki te kau Sutea fakalaumālie ʼaia, peʼe ko te kau Iselaelite, ʼo nātou ʼui fēnei: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.” (Sakalia 8:23) Ko te “tahi ʼu ōvi” ʼaia ʼe nātou faka ʼuhiga te toe ʼo te kau fakanofo ʼaia ʼe ko “te tagata kaugana agatonu mo poto,” ʼaē neʼe fakanofo e Kilisito “ke pule ki ʼana meʼa fuli [ʼaē ʼi te kele].” ʼAki he loto fakafetaʼi, ʼe nātou fakaʼaogaʼi te meʼa kai ʼaē neʼe teuteuʼi e te kalasi ʼo te kaugana “ ʼi tona temi totonu.”—Soane 10:16; Mateo 24:45-47.
9. Koteā te “lea” ʼe ako e te lauʼi miliona hahaʼi, pea koteā te gāue ʼaē ʼe fai “fakatahi” e te tahi ʼu ōvi mo te toe ʼo te kau fakanofo?
9 ʼI te ʼu tafa ʼo te toe ʼo te hahaʼi ʼaia, ʼe ako te toko lauʼi miliona tahi ʼu ōvi ʼaia ke nātou maʼuʼuli pea mo palalau ʼo mulimuli ki te “lea maʼa.”a Neʼe fakakikite fēnei e Sehova ʼaki ia Sofonia: “Koteʼuhi ʼe ʼau foaki anai ki te hahaʼi—ʼe ko he fetogi—ko he lea maʼa, ke nātou pāui fuli ki te huafa ʼo Sehova, ke nātou tauhi fakatahi kia te ia.” (Sofonia 3:9) Ei, ʼaki he logo tahi ʼo te tahi ʼu ōvi ʼe nātou tauhi “fakatahi” kia Sehova mo te kau fakanofo ʼo te “kiʼi faga ōvi,” ʼi te gāue maʼuhiga ʼaē ko te faka mafola ia “te logo lelei ʼaenī ʼo te puleʼaga . . . ko he meʼa fakamoʼoni ia ki te ʼu puleʼaga katoa.”—Luka 12:32; Mateo 24:14.
“Ko Te ʼAho ʼo Sehova ʼe Hoko Anai”
10. Koteā ʼaē neʼe tui moʼoni tuʼumaʼu ki ai te toe ʼo te kau fakanofo, pea koteā ʼaē ka nātou ʼamanaki sisio anai kiai ʼi tonatou ʼuhiga kalasi?
10 Ko te toe ʼo te kau fakanofo neʼe nātou manatuʼi tuʼumaʼu te palalau ʼaē neʼe fai e Petelo ʼaki te laumālie ʼa te ʼAtua: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ke tou aʼu fuli ki te fakahemala. Kae ko te ʼaho ʼo Sehova ʼe haʼu anai ohage ko he tagata kaihaʼa.” (2 Petelo 3:9, 10) Ko nātou ʼaē ʼe nātou faʼufaʼu te kalasi ʼo te tagata kaugana agatonu, neʼe mole nātou lotoloto lua ʼi he temi ʼo ʼuhiga mo te hoko mai ʼo te ʼaho ʼo Sehova ʼi totatou temi. Ko te ʼaho lahi ʼaia ʼe kamata anai ʼaki te fakahoko ʼo te ʼu fakamāu ʼa te ʼAtua ki te Keletiate, ʼaē neʼe fakatātā e te Selusalemi ʼo te temi muʼa, pea mo te toe ʼo Papiloni Lahi.—Sofonia 1:2-4; Fakahā 17:1, 5; 19:1, 2.
11, 12. (a) Koteā te tahi koga ʼo te lea faka polofeta ʼo Sofonia neʼe hoko ki te toe ʼa te kau fakanofo? (b) Neʼe fakatokaga feafeaʼi e te toe ʼo te kau fakanofo te pāui ʼaenī “Ke ʼaua naʼa vaivai tou ʼu nima”?
11 ʼE fiafia te toe ʼo te kau fakanofo agatonu ʼi tanatou ʼāteaina ʼi te taʼu 1919 mai te nofo popūla ʼi te faʼahi fakalaumālie ʼi Papiloni Lahi, te kautahi faka malamanei ʼo te lotu hala. Neʼe hoko kia nātou te lea faka polofeta ʼo Sofonia, ʼaē ʼe ʼui fēnei: “Kalaga fakafiafia, Ê ʼofafine ʼo Sione! Kalaga, Ê Iselaele! Ke ke fiafia ʼi tou loto katoa, Ê ʼofafine ʼo Selusalemi! Ko Sehova neʼe ina fakamamaʼo te ʼu fakamāu ʼaē neʼe fai kia koe. Neʼe ina fakamamaʼo tou fili. Ko te hau ʼo Iselaele, ia Sehova, ʼe ʼi tou lotolotoiga. ʼE mole ke toe tuʼania anai he malaʼia. ʼI te ʼaho ʼaia, ʼe ʼui anai kia Selusalemi: ‘ ʼAua naʼa ke mataku, Ê Sione! Ke ʼaua naʼa vaivai tou ʼu nima! Ko Sehova, tou ʼAtua, ʼe ʼi tou lotolotoiga. ʼI tona ʼuhiga ʼAtua mālohi, ʼe ina hāofaki anai.’ ”—Sofonia 3:14-17.
12 ʼAki he tui papau pea mo he ʼu fakamoʼoni lahi ko Sehova ʼe tokoni kia nātou, ko te toe ʼo te kau fakanofo neʼe nātou haʼele ki muʼa, ʼo mole nātou matataku ʼi te fakahoko ʼo tanatou gāue fakaʼatua. Neʼe nātou faka mafola te logo lelei ʼo te Puleʼaga pea mo nātou fakahā te ʼu fakamāu ʼa Sehova ki te Keletiate, mo te toe ʼo Papiloni Lahi, pea mo te tuʼu ʼo te ʼu faʼahiga meʼa agakovi katoa ʼo Satana. Logope te ʼu faigataʼa fuli, ʼi te ʼu taʼu ʼe lauʼi hogofulu talu mai te taʼu 1919, neʼe nātou fakalogo ki te fakatotonu fakaʼatua, ʼaē ʼe ina ʼui fēnei: “ ʼAua naʼa ke mataku, Ê Sione. Ke ʼaua naʼa vaivai tou ʼu nima.” Neʼe nātou maʼumaʼua ʼaupito ʼi te tufa ʼo te ʼu lauʼi miliale pepa lotu, mo nusipepa, pea mo te ʼu tohi ʼe nātou kalagaʼi te Puleʼaga ʼo Sehova. Neʼe nātou liliu ko he faʼifaʼitaki lelei ʼi te tui ki te tahi ʼu ōvi ʼaē, talu mai te taʼu 1935, kua fakatahi ki ʼonatou tafa.
“ ʼAua Naʼa Vaivai Tou ʼu Nima”
13, 14. (a) He koʼe neʼe maliu mai ʼihi ʼu Sutea mai te tauhi kia Sehova, pea neʼe hā feafeaʼi te faʼahi ʼaia? (b) Koteā anai te aga ʼaē ʼe mole fakapotopoto ke tou fai, pea ko te gāue fea ʼaē ʼe mole tonu ai ke vaivai ʼotatou ʼu nima?
13 ʼI ‘tatatou atalitali’ ki te ʼaho lahi ʼo Sehova, ʼe lava feafeaʼi ke tou maʼu he tokoni ʼe ʼaoga mai te lea faka polofeta ʼo Sofonia? ʼUluaki, ʼe tonu anai ke tou tokakaga naʼa tou liliu ohage ko te kau Sutea ʼi te temi ʼo Sofonia, ʼaē neʼe nātou maliu mai te mulimuli kia Sehova ʼuhi he neʼe nātou taupau he lotolotolua ʼo ʼuhiga mo te ʼamanaki hoko ʼo te ʼaho ʼo Sehova. Neʼe mole lagi fakahā e te kau Sutea ʼaia tanatou lotolotolua ia muʼa ʼo te hahaʼi, kae neʼe fakahā e tanatou ʼu aga tanatou mole tui moʼoni ki te kua ʼamanaki hoko ʼo te ʼaho lahi ʼo Sehova. Neʼe nātou tokakaga nātou ʼo tānaki he ʼu koloā kae mole nātou haga atalitali kia Sehova.—Sofonia 1:12, 13; 3:8.
14 ʼI te temi nei, ʼe mole tonu ke tou tuku ke hū he ʼu manatu lotolotolua ki totatou ʼu loto. ʼE mole ko he aga fakapotopoto anai hatatou toʼo kehe ʼi totatou ʼatamai pea mo totatou loto te ʼaho ʼo Sehova ʼaē ʼe ka hoko. (2 Petelo 3:1-4, 10) ʼE tonu anai ke ʼaua naʼa tou maliu mai tatatou mulimuli kia Sehova pea ke ʼaua naʼa ‘vaivai ʼotatou ʼu nima’ ʼi te tauhi ʼaē ʼe tou fai kia te ia. ʼE mole tonu foki ke tou “gāue ʼaki he nima ʼe fakapikopiko” ʼi tatatou faka mafola “te logo lelei.”—Tāʼaga Lea 10:4; Maleko 13:10.
Tou Tauʼi Te Mole Fia Logo
15. Koteā ʼaē ʼe feala ke fakatupu ʼaki ai he vaivai ʼo totatou ʼu nima ʼi te gāue kia Sehova, pea neʼe fakakikite feafeaʼi te fihifihia ʼaia ʼi te lea faka polofeta ʼo Sofonia?
15 Lua, ʼe tonu anai ke tou tokakaga ke ʼaua naʼa tou lotovaivai ʼuhi ko te mole fia logo ʼa te hahaʼi. ʼE lahi te ʼu fenua ʼo te Potu Hihifo, ko te mole tokakaga ʼa te hahaʼi ki te ʼu meʼa fakalaumālie ʼe feala ke liliu ko he meʼa fakatupu lotovaivai ʼi ʼihi kaugā fai faka mafola ʼo te logo lelei. Ko te mole fia logo ʼaia ʼa te hahaʼi neʼe maʼu ʼi te temi ʼo Sofonia. Neʼe ʼui e Sehova ʼaki tana polofeta: “ ʼE ʼau tokagaʼi anai te kau tagata ʼaē ʼe . . . nātou ʼui ʼi tonatou loto: ‘ ʼE mole fai anai e Sehova he meʼa ʼe lelei, pea ʼe mole ina fai anai he meʼa ʼe kovi.’ ” (Sofonia 1:12) ʼI tana tohi ʼo ʼuhiga mo te vaega ʼaia ʼi te tohi Cambridge Bible for Schools and Colleges, neʼe ʼui e A. B. Davidson ko te faʼahi ʼaia ʼe talanoa ʼo ʼuhiga mo “te hahaʼi ʼaē neʼe nātou liliu ʼo mole fia logo peʼe mole nātou tui ʼe ʼi ai anai he mālohi lahi ka ina fetogi anai te ʼu meʼa ʼo te malamanei.”
16. Koteā te faʼahiga manatu ʼe maʼu ʼi te lotolotoiga ʼo te tokolahi ʼo te ʼu lotu ʼo te Keletiate, kae koteā te fakaloto mālohi ʼe foaki mai kia tatou e Sehova?
16 ʼE lahi te ʼu potu ʼo te kele ʼe mafola ai te mole fia logo ʼa te hahaʼi, tāfito ʼi te ʼu fenua maʼu koloā. Māʼiape la mo te hahaʼi ʼo te ʼu ʼēkelesia ʼo te Keletiate ʼe mole nātou tui ko Sehova ʼAtua ʼe ina fetogi anai te ʼaluʼaga ʼo te ʼu meʼa ʼa te tagata ʼi totatou temi. ʼE mole nātou tokagaʼi tatatou ʼu faiga ʼaē ke aʼu kia nātou te logo lelei ʼo te Puleʼaga, ʼaki he malimali ʼe hā ai tanatou mole tui kiai, peʼe ʼaki he tali nounou: “ ʼE mole ʼau fia fai ʼau ki te logo ʼaia!” ʼI te ʼu taʼi ʼaluʼaga ʼaia, ko te haga fai ʼo te gāue fai faka mafola ʼe feala ke liliu ʼo faigataʼa. ʼE ina ʼahiʼahiʼi tatatou faʼa kātaki. Kae, ʼaki te lea faka polofeta ʼo Sofonia, ʼe fakaloto mālohiʼi e Sehova tana hahaʼi agatonu, ʼo ina ʼui fēnei: “Ke ʼaua naʼa vaivai tou ʼu nima. Ko Sehova tou ʼAtua ʼe ʼi tou lotoloto iga. ʼI tona ʼuhiga ʼAtua mālohi, ʼe ina hāofaki anai. ʼE fiafia anai kia koe. ʼE fakalogologo anai ʼi tona ʼofa. ʼE fiafia anai kia koe ʼaki he ʼu kalaga fakafiafia.”—Sofonia 3:16, 17.
17. Koteā te faʼifaʼitaki lelei ʼaē ʼe tonu anai ke mulimuli ki ai te hahaʼi foʼou ʼo te tahi ʼu ōvi, pea ʼe feafeaʼi anai tanatou fai te faʼahi ʼaia?
17 ʼE ko he meʼa moʼoni ʼi te hisitolia ʼo te hahaʼi ʼa Sehova, ko te toe ʼo te kau fakanofo, pea mo nātou ʼaē kua matutuʼa ʼi te lotoloto iga ʼo te tahi ʼu ōvi, neʼe nātou fai te toe gāue ʼaupito ʼaē ko te tānaki ʼo te hahaʼi ʼi te ʼu ʼaho fakamuli ʼaenī. Ko te ʼu Kilisitiano agatonu fuli ʼaia neʼe nātou fakahā te faʼa kātaki lolotoga te ʼu taʼu ʼe lauʼi hogofulu. Neʼe mole nātou tuku ke fakaloto vaivaiʼi nātou e te mole fia logo ʼa te hahaʼi tokolahi ʼo te Keletiate. Koia, tou fakaʼamu ke mole lotovaivai te hahaʼi foʼou ʼaē ʼe ʼi te lotolotoiga ʼo te tahi ʼu ōvi ʼuhi ko te mole fia logo ʼa te hahaʼi ki te ʼu faʼahi fakalaumālie, ʼaē kua lahi ia ʼaho nei ʼi te ʼatu ʼu fenua kehekehe. Tou fakaʼamu ke mole nātou tuku ke ‘vaivai tonatou ʼu nima,’ peʼe nātou lotovaivai. Tou fakaʼamu ke nātou fakaʼaogaʼi te ʼu fealagia fuli moʼo fakahā Te Tule Leʼo, mo te Réveillez-vous!, pea mo ʼihi ʼu tohi lelei neʼe fai tāfito moʼo tokoni ki te hahaʼi ʼaē ʼe hage ko ni ʼu ōvi, ke nātou ako te moʼoni ʼo ʼuhiga mo te ʼaho ʼo Sehova pea mo te ʼu tapuakina ʼaē ka tou maʼu.
Tou ʼAmanaki ʼi Tatatou Talitali Ki Te ʼAho Lahi!
18, 19. (a) Koteā te fakaloto mālohi ʼaē ke tou faʼa kātaki ʼe tou maʼu ia Mateo 24:13 pea ia Isaia 35:3, 4? (b) Koteā te tapuakina ʼaē ka tou maʼu, mo kapau ʼaki he logo tahi, ʼe tou haʼele ki muʼa ʼi te gāue kia Sehova?
18 Neʼe tala fēnei e Sesu: “Ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.” (Mateo 24:13) Koia, ke ʼaua naʼa “vaivai te ʼu nima” peʼe ke “tetetete te ʼu tuli” ʼi tatatou talitali ki te ʼaho lahi ʼo Sehova! (Isaia 35:3, 4) ʼE fakapapau mai e te lea faka polofeta ʼo Sofonia ʼo ʼuhiga mo Sehova, ʼo fēnei: “ ʼI tona ʼuhiga ʼAtua mālohi, ʼe ina hāofaki anai.” (Sofonia 3:17) Ei, ʼe hāofaki anai Sehova te “toe hahaʼi tokolahi” ʼi te koga fakaʼosi ʼo te “mamahi lahi,” ʼi te temi ʼaē ka ina fakatotonu ai ki tona ʼAlo ke ina laliki te ʼu puleʼaga faka politike ʼaē ʼe nātou taupau “te fialahi” ki tana hahaʼi.—Fakahā 7:9, 14; Sofonia 2:10, 11; Pesalemo 2:7-9.
19 ʼI te fakaōvi mai ʼo te ʼaho lahi ʼo Sehova, tou haʼele fakamalotoloto ki muʼa, ʼo tauhi “fakatahi” kia ia”! (Sofonia 3:9) Kapau ʼe tou fai feiā, ko tatou pea mo ʼihi hahaʼi tokolahi ʼe “fūfū anai ʼi te ʼaho ʼo te hāūhāū ʼo Sehova” pea mo tou sisio anai ki te tāpuhā ʼo tona huafa taputapu.
[Nota ʼi te lalo pasina]
a Ke koutou maʼu he fakamahino katoa ʼo ʼuhiga mo te “lea maʼa,” koutou vakaʼi Te Tule Leʼo (Fakafalani) ʼo te ʼaho 1 ʼo ʼApelili 1991, te pasina 20 ki te pasina 25, pea mo te ʼaho 1 ʼo Maio 1991, te pasina 10 ki te pasina 20.
Toe Vakaʼi
◻ Ko te ʼu faʼahi fea ʼaē ʼe tatau ai te ʼaluʼaga faka lotu ʼo te Keletiate pea mo te ʼaluʼaga faka lotu ʼo te temi ʼo Sofonia?
◻ E feafeaʼi te tatau ʼa te tokolahi ʼo te kau takitaki faka politike ia ʼaho nei mo te kau “tama ʼaliki” ʼo te temi ʼo Sofonia?
◻ Koteā te ʼu fakapapau ʼe tuʼu ia Sofonia neʼe hoko ki te toe ʼo te kau fakanofo?
◻ Koteā ʼaē neʼe kua mahino ki te lauʼi miliona hahaʼi?
◻ He koʼe ʼe mole tonu anai ke vaivai totatou ʼu nima ʼi te gāue kia Sehova?
[Paki ʼo te pasina 15]
Ohage ko Sofonia, neʼe faka mafola ʼaki he lototoʼa e te toe ʼo te kau Kilisitiano fakanofo agatonu te ʼu fakamāu ʼo Sehova
[Paki ʼo te pasina 18]
Neʼe mole tuku e te “tahi ʼu ōvi” ke fakaloto vaivaiʼi nātou e te mole fia logo ʼa te hahaʼi