Ko Te Hahaʼi ʼa Sehova ʼe Nātou Vikiʼi Ia Ia ʼi Te Malamanei
“ ʼE ʼau foaki anai ki te hahaʼi he fetogi, ʼe ko he lea maʼa, ke feala hanatou pāui fuli ki te huafa ʼo Sehova.”—Sofonia 3:9.
1. He koʼe neʼe hoko te ʼu logo ʼo te fakamāu kia Suta pea mo te tahi ʼu puleʼaga?
ʼE KO he ʼu logo mālohi ʼaē neʼe foaki e Sehova kia Sofonia ke ina tala! Ko te ʼu folafola ʼaia ʼo te fakamāu neʼe hoko ki te puleʼaga ʼo Suta pea mo tona kolo hau, ko Selusalemi, he ko te kau pule pea mo te teitei hahaʼi fuli neʼe mole nātou fai te finegalo ʼo te ʼAtua. ʼO feiā mo te ʼu puleʼaga ʼi ʼonatou tafa, ohage ko Filisitia, Moape pea mo Amone, neʼe hoko kia nātou te hāūhāū ʼo te ʼAtua. Koteā tona tupuʼaga? ʼUhi ko tanatou ʼu fakafeagai pea mo gaohi koviʼi talu mai fualoa ia te hahaʼi ʼa Sehova. ʼUhi ko te faʼahi ʼaia, neʼe fakaʼauha mo te mālohi faka malamanei ʼo Asilia ʼo talu ai.
2. Ko ai ʼaē neʼe lagi fai ki ai te ʼu palalau ʼo Sofonia 3:8?
2 Kae neʼe ʼi ai te ʼu hahaʼi lotolelei ʼi Suta ʼāfea. Neʼe nātou atalitali ki te fakahoko ʼo te fakamāu fakaʼatua ki te kau agakovi pea neʼe lagi fai kia nātou te ʼu palalau ʼaenī: “ ‘Koutou atalitali mai,’ ʼe ko te tala ʼaia ʼa Sehova, ‘ ʼo aʼu ki te ʼaho ʼaē ʼe ʼau tuʼu ai anai ʼo ʼuhiga mo te ʼu koloā ʼaē neʼe kaihaʼa, heʼe ko taku fakatotonu fakamāu ko te fakatahiʼi ʼo te ʼu fenua, ke ʼau fakamāʼopoʼopo mai te ʼatu puleʼaga, ke feala haku huaʼi kia nātou toku ʼu hāūhāū, toku hāūhāū katoa; heʼe ʼaki te afi ʼo toku mālohi ko te kele katoa ʼe ʼauha anai.’ ”—Sofonia 3:8.
ʼE Foaki Kia Ai Te “Lea Maʼa”?
3. Koteā te logo ʼaē neʼe fakahā e Sofonia ʼo ʼuhiga mo he ʼamanaki?
3 ʼE moʼoni, neʼe tala e Sofonia te ʼu logo ʼo te fakamāu ʼa Sehova. Kae neʼe toe foaki ki te polofeta te logo taulekaleka ʼo ʼuhiga mo he ʼamanaki—ko he logo neʼe fakaloto fīmālie kia nātou ʼaē neʼe haga nonofo agatonu kia Sehova. Ohage ko tona fakamatala ia Sofonia 3:9, neʼe ʼui fēnei e Sehova ʼAtua: “ ʼE ʼau foaki anai ki te hahaʼi he fetogi, ʼe ko he lea maʼa, ke feala hanatou pāui fuli ki te huafa ʼo Sehova, ke feala hanatou tauhi fakatahi kia te ia.”
4, 5. (a) Koteā ʼaē neʼe hoko ki te kau heʼe faitotonu? (b) Ko ai ʼaē neʼe nātou maʼu te faʼahi ʼaia, pea koteā tona tupuʼaga?
4 ʼE ʼi ai ni ʼu hahaʼi neʼe mole foaki kia nātou te lea maʼa. ʼE talanoa te lea faka polofeta kia nātou ʼaia, ʼo ina ʼui fēnei: “ ʼE ʼau toʼo anai mai ia te koe ia nātou ʼaē ʼe fiafia ʼi tanatou fialahi.” (Sofonia 3:11) Koia, ʼe molehi anai te hahaʼi fialahi ʼaē neʼe nātou fehiʼa ki te ʼu lao ʼa te ʼAtua pea mo nātou fai te ʼu aga heʼe faitotonu. Kae ko ai ʼaē neʼe foaki ki ai te lea maʼa? ʼE ʼui fēnei ia Sofonia 3:12, 13: “ ʼE mahino papau ia, ʼe ʼau [Sehova] tuku anai ʼi tou lotolotoiga he hahaʼi agavaivai pea mo loto fia mālalo, pea ʼe nātou kumi moʼoni anai honatou hāofaki ʼi te huafa ʼo Sehova. Kae ki te toega hahaʼi ʼo Iselaele, ʼe mole nātou fai anai he ʼu aga heʼe faitotonu, ʼe mole nātou fakamatala anai ni ʼu loi, pea ʼe mole maʼu anai ʼi tonatou ʼu gutu he ʼalelo kākā; koteʼuhi ʼe nātou kakai anai pea mo nātou takokoto moʼoni anai, pea ʼe mole ʼi ai anai he tahi mo ʼonatou fakamatakuʼi.”
5 Neʼe ʼi ai te toe ʼo te hahaʼi agatonu ʼi Suta neʼe tonu ke foaki kia nātou te lea maʼa ʼaia. Koteā tona tupuʼaga? Koteʼuhi neʼe nātou mulimuli ki te ʼu palalau ʼaenī: “Koutou kumi ia Sehova, ia koutou fuli, kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.”—Sofonia 2:3.
6. ʼI te ʼuluaki fakahoko ʼo te lea faka polofeta ʼa Sofonia, koteā ʼaē neʼe hoko?
6 ʼI te ʼuluaki fakahoko ʼo te lea faka polofeta ʼa Sofonia, neʼe tautea e te ʼAtua ia Suta ʼaē neʼe mole agatonu, ʼo ina tuku te Mālohi Faka Malamanei ʼo Papiloni ke ina ʼohofi pea mo ʼave popūla tana hahaʼi ʼi te 607 ʼi muʼa ʼo totatou temi. Ko ʼihi, ʼo kau ai te polofeta ko Selemia, neʼe nātou hāo, pea ko ʼihi neʼe nātou nonofo agatonu kia Sehova ʼi tanatou ʼaunofo. ʼI te 539 ʼi muʼa ʼo totatou temi, neʼe maumauʼi ia Papiloni e te kau Metia pea mo Pelesia ʼi te temi Hau ʼo Siliusi. Ia teitei taʼu e lua ki muli age, neʼe tala e Siliusi te fakatotonu neʼe fakagafua ai ki te toe ʼo te kau Sutea ke nātou toe liliu ki tonatou fenua. ʼAki te temi, neʼe toe laga te fale lotu ʼo Selusalemi pea neʼe toe feala ai ki te kau pelepitelo ke nātou akoʼi te Lao ki te hahaʼi. (Malakia 2:7) Koia neʼe tapuakina ai e Sehova te toe ʼo te hahaʼi ʼaia neʼe toe liliu—ʼo fakalogo ki tanatou haga nonofo agatonu.
7, 8. Neʼe faka ʼuhiga kia ai te ʼu folafola faka polofeta ʼo Sofonia 3:14-17, pea he koʼe ʼe koutou tali feiā?
7 ʼO ʼuhiga mo te hahaʼi ʼaia ʼaē neʼe toe liliu, neʼe fakakikite fēnei e Sofonia: “Kalaga fakafiafia, Ê ʼofafine ʼo Sione! Kalaga, Ê Iselaele! Ke ke fiafia ʼi tou loto katoa, Ê ʼofafine ʼo Selusalemi! Neʼe molehi e Sehova te ʼu fakamāu ʼaē neʼe fai kia te koe. Neʼe ina fakamamaʼo tou fili. Ko te hau ʼo Iselaele, ia Sehova, ʼe ʼi tou lotolotoiga. ʼE mole ke toe tuʼania anai he malaʼia. ʼI te ʼaho ʼaia, ʼe ʼui anai kia Selusalemi: ‘ ʼAua naʼa ke mataku, Ê Sione! Ke ʼaua naʼa vaivai tou ʼu nima. Ko Sehova, tou ʼAtua, ʼe nofo ʼi tou lotolotoiga. ʼI tona ʼuhiga ʼAtua mālohi, ʼe ina hāofaki anai. ʼE fiafia anai kia te koe. ʼE fakalogologo anai ʼi tona ʼofa. ʼE fiafia anai kia koe ʼaki he ʼu kalaga fakafiafia.’ ”—Sofonia 3:14-17.
8 Ko te ʼu palalau faka polofeta ʼaia neʼe faka ʼuhiga ki te toega hahaʼi ʼaē neʼe fakatahi ʼi tanatou mavae mai tanatou ʼaunofo ʼi Papiloni, ʼo toe liliu ki te fenua ʼo tanatou ʼu kui. ʼE fakahā lelei te faʼahi ʼaia ia Sofonia 3:18-20, ʼaē ʼe tou lau fēnei ai: “ ‘Ei, ʼe ʼau [Sehova] fakatahiʼi anai ia nātou ʼaē neʼe lahi tonatou lotomamahi, ʼi tanatou nonofo mamaʼo, neʼe mole nātou kau ki tou temi fakafiafia, he neʼe nātou ʼamo te hala ʼuhi ko ia. Koʼeni, ʼe ʼau fakafeagai kia nātou fuli ʼaē ʼe nātou fakamamahiʼi koe, ʼi te temi ʼaia; pea ʼe ʼau hāofaki anai ia ia ʼaē ʼe ketu, pea ko ia ʼaē ʼe mavetevete ʼe ʼau fakatahiʼi anai. Pea ʼe ʼau fakanofo anai nātou ohage ko he fakavikiviki pe ko he higoa ʼi te fenua katoa ʼo tanatou ufiufi. ʼI te temi ʼaia, ʼe ʼau fakahū anai koutou, ei ʼi te temi ʼaē ʼe ʼau tānaki anai koutou. Heʼe ʼau fakatuʼutuʼu anai ke koutou liliu ko he higoa pea mo he fakavikiviki ʼi te lotolotoiga ʼo te hahaʼi fuli ʼo te kele, ʼi te temi ʼaia ka ʼau toe fakatahiʼi ai takotou ʼu hahaʼi pilisoni ia muʼa ʼo ʼoku mata,’ ʼe ko te ʼui ʼaia ʼa Sehova.”
9. Neʼe fakahā feafeaʼi e Sehova tona huafa ʼi te meʼa ʼaē neʼe hoko ki Suta?
9 Koutou fakakaukauʼi age muʼa te ōfo ʼo te ʼu puleʼaga tafaʼaki ʼaē neʼe ko te ʼu fili ʼo te hahaʼi ʼa te ʼAtua! Neʼe ʼaunofo te hahaʼi ʼo Suta ʼi te mālohi ʼo Papiloni, pea neʼe hage ʼe mole faka ʼāteainaʼi anai nātou ʼi he temi. Pea tahi ʼaē, neʼe tuku maumau tonatou fenua. Kae ʼaki te mālohi ʼo te ʼAtua, neʼe nātou toe liliu ki tonatou fenua hili kiai taʼu e 70, pea neʼe maumauʼi te ʼu puleʼaga ʼaē neʼe fakafeagai kia nātou. Neʼe fakahā lelei ai e Sehova tona huafa lahi ʼi tana toe fakaliliu mai te toe ʼo te kau Sutea agatonu ʼaia! Neʼe ina fakaliliu ai nātou “ko he higoa pea mo he fakavikiviki ʼi te lotolotoiga ʼo te hahaʼi fuli ʼo te kele.” Ko te toe liliu ʼaia ʼa te hahaʼi neʼe tupu ai te vikiʼi lahi ʼo Sehova pea mo nātou ʼaē neʼe nātou toʼo tona huafa!
Neʼe Vikiʼi Te Tauhi Kia Sehova
10, 11. Ko te temi fea ʼaē neʼe hoko tāfito ai te lea faka polofeta ʼa Sofonia ʼo ʼuhiga mo te fili ʼo te tahi hahaʼi, pea ʼe tou ʼiloʼi feafeaʼi te faʼahi ʼaia?
10 Neʼe toe fili te tahi ʼu hahaʼi ʼi te ʼuluaki sēkulō ʼo totatou temi, ʼi te temi ʼaē neʼe fakatahiʼi ai e Sesu Kilisito te toe ʼo Iselaele ki te tauhi moʼoni. Neʼe ko te fakahā fakatomuʼa ʼaia ʼo te meʼa ʼaē neʼe tonu ke hoko mai, he neʼe tonu ke hoko tāfito te fili ʼaia ʼo te ʼu hahaʼi foʼou ʼi te ka haʼu. Neʼe fakakikite fēnei e te lea faka polofeta ʼa Mikea: “Ko te meʼa ʼaē ka hoko, ʼi te ʼu ʼaho fakaʼosi, ko te moʼuga ʼo te fale ʼo Sehova ʼe tuʼu mālohi anai ʼi ʼoluga ʼo te tumutumu ʼo te ʼu moʼuga, pea ʼe māʼoluga anai ʼi te ʼu kiʼi moʼuga liliki; pea ʼe tonu anai ke ʼolo kiai te ʼu puleʼaga fuli pe.”—Mikea 4:1.
11 Ko ʼafea ʼaē ka hoko ai te faʼahi ʼaia? ʼE ʼui e te lea faka polofeta ʼe hoko anai, “ ʼi te ʼu ʼaho fakaʼosi”—ei, lolotoga “te u aho fakamuli” ʼaenī. (2 Timoteo 3:1) ʼE tonu ke hoko te faʼahi ʼaia ʼi muʼa ʼo te fakaʼosi ʼo te tuʼu ʼo te ʼu faʼahiga meʼa agakovi ʼaenī, ʼi te temi ʼaē kei tauhi ai te ʼu puleʼaga ki te ʼu ʼatua loi. ʼE ʼui fēnei ia Mikea 4:5: “Ko te hahaʼi fuli ʼe nātou haʼele anai ʼi te huafa ʼo tonatou ʼatua.” Pea e feafeaʼi ʼo ʼuhiga mo te kau atolasio moʼoni? ʼE tali fēnei e te lea faka polofeta ʼo Mikea: “Kae kia tatou, ʼe tou haʼele anai ʼi te huafa ʼo Sehova totatou ʼAtua ʼo aʼu ki he ʼu temi ʼe heʼegata, ei ʼo talu ai.”
12. Neʼe hikihiki feafeaʼi te tauhi moʼoni ʼi te ʼu ʼaho fakamuli ʼaenī?
12 Koia, ʼi te ʼu ʼaho fakamuli ʼaenī, ko “te moʼuga ʼo te fale ʼo Sehova ʼe tuʼu mālohi . . . ʼi ʼoluga ʼo te tumutumu ʼo te ʼu moʼuga.” Ko te tauhi moʼoni ʼo Sehova pea mo māʼoluga neʼe toe fakatuʼu, ʼo tuʼu mālohi, pea kua hikihiki ake ʼi te faʼahiga lotu kehekehe fuape. Pea ohage ko tona fakakikite e te lea faka polofeta ʼa Mikea, “ ʼe tonu . . . ke ʼolo kiai te ʼu puleʼaga fuli pe.” Pea ko nātou ʼaē ʼe nātou kau ki te lotu moʼoni, ʼe nātou “haʼele anai ʼi te huafa ʼo Sehova [tonatou] ʼAtua, ʼo aʼu ki he ʼu temi ʼe heʼegata, ei ʼo talu ai.”
13, 14. Ko te temi fea ʼaē neʼe hū ai te malamanei ki “te ʼu ʼaho fakaʼosi,” pea koteā ʼaē neʼe hoko talu mai ai ʼo ʼuhiga mo te tauhi moʼoni?
13 Ko te ʼu meʼa ʼaē ʼe nātou fakahoko te lea faka polofeta ʼa te Tohi-Tapu, ʼe nātou fakamoʼoni neʼe hū te malamanei ki “te ʼu ʼaho fakaʼosi”—tona ʼu ʼaho fakamuli—ʼi te taʼu 1914. (Maleko 13:4-10) ʼE fakahā e te hisitolia neʼe kamata tānaki mai e Sehova ki te tauhi moʼoni te toe ʼo te kau fakanofo agatonu ʼaē ka ʼolo ki selo. Neʼe hoa kiai te tānaki ʼo “he hahai kaugamalie . . . mai te atu puleaga, mo te u hako, mo te u lanu, pea mo te u lea fuape”—ko nātou ʼaia ʼe nātou ʼamanaki maʼuʼuli ʼo heʼegata ʼi te kele.—Apokalipesi 7:9.
14 Talu mai te Lua Tau Faka Malamanei ʼo aʼu mai kia ʼaho nei, ko te tauhi kia Sehova ʼa te hahaʼi ʼaē ʼe nātou toʼo tona huafa ʼe haʼele ʼaupito ki muʼa ʼi tana takitaki. Neʼe nātou lauʼi afe ʼi te hili ʼo te ʼUluaki Tau Faka Malamanei, pea ʼi te temi nei kua tuputupu te kau kaugana ʼa Sehova ʼo aʼu ki te toko ono miliona tupu ia kokelekasio e 91 000 tupu ia fenua e 235. ʼI te taʼu fuli, ko te kau faka mafola ʼaia ʼo te Puleʼaga ʼe nātou fakaʼaogaʼi ia hola e tahi miliale tupu moʼo vikiʼi te ʼAtua ia muʼa ʼo te hahaʼi. ʼE hā lelei mai ai ko te kau Fakamoʼoni ʼaia ʼa Sehova ʼe nātou fakahoko te lea faka polofeta ʼaenī ʼa Sesu: “Ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.”—Mateo 24:14.
15. ʼE hoko feafeaʼi ia Sofonia 2:3 ʼi te temi nei?
15 ʼE ʼui fēnei ia Sofonia 3:17: “Ko Sehova, tou ʼAtua, ʼe nofo ʼi tou lotolotoiga. ʼI tona ʼuhiga ʼAtua mālohi, ʼe ina hāofaki anai.” Ko te mahu ʼi te faʼahi fakalaumālie ʼa te kau kaugana ʼa Sehova ʼi te ʼu ʼaho fakamuli ʼaenī, ʼe ko te fua ʼaia ʼo te nofo ʼo tonatou ʼAtua mālohi ʼaupito ‘ ʼi tonatou lotolotoiga.’ ʼE moʼoni te faʼahi ʼaia ohage pe ko te temi ʼaē neʼe toe fakatuʼu ai te tauhi moʼoni ʼi Sutea ʼāfea ʼi te taʼu 537 ʼi muʼa ʼo totatou temi. Koia ʼe feala ai ke tou sio ki te fakahoko tāfito ʼo Sofonia 2:3 ʼi totatou temi, ʼi tana ʼui fēnei: “Koutou kumi ia Sehova, ia koutou fuli, kau agavaivai ʼo te kele.” ʼI te taʼu 537 ʼi muʼa ʼo totatou temi, ko te hahaʼi “fuli” neʼe faka ʼuhiga ki te toe ʼo te kau Sutea ʼaē neʼe nātou toe liliu mai tanatou ʼaunofo ʼi Papiloni. ʼI te temi nei, ʼe faka ʼuhiga ki te hahaʼi agavaivai ʼo te ʼu fenua fuape ʼi te kele katoa, ʼaē ʼe nātou tali lelei te gāue fai faka mafola ʼo te Puleʼaga ʼi te malamanei, pea mo nātou hake fuli ki “te moʼuga ʼo te fale ʼo Sehova.”
ʼE Fua Lelei Te Tauhi Moʼoni
16. E feafeaʼi te aga ʼo tatatou ʼu fili ʼi tanatou sio ki te tuputupu ʼa te kau kaugana ʼa Sehova ʼi totatou temi?
16 Hili te taʼu 537 ʼi muʼa ʼo totatou temi, ko te ʼatu puleʼaga tafaʼaki, neʼe nātou ōfo ʼi te toe fakatuʼu ʼo te kau kaugana ʼa te ʼAtua ia te tauhi moʼoni ʼi tonatou fenua. Kae ko te meʼa ʼaia neʼe hoko ʼi hona ʼaluʼaga veliveli pe. ʼE feala koa hakotou fakakaukauʼi te ʼu palalau ʼa ʼihi—māʼia pe la mo te ʼu fili ʼo te hahaʼi ʼa te ʼAtua—ʼi tanatou sio ki te tuputupu fakaofoofo, mo te mahu pea mo te haʼele ki muʼa ʼa te kau kaugana ʼa Sehova ʼi totatou temi? ʼE mahino papau ia, ko ʼihi ʼi te ʼu fili ʼaia neʼe nātou hage ko te kau Faliseo ʼi te temi ʼaē neʼe nātou sisio ai ki te fakatahitahi ʼa te hahaʼi kia Sesu. Neʼe nātou ʼui fēnei: “Koʼeni! Kua muli te malamanei ia te ia.”—Soane 12:19, MN.
17. Koteā ʼaē neʼe ʼui e te tagata faitohi ʼo ʼuhiga mo te kau Fakamoʼoni ʼa Sehova, pea koteā te tuputupu ʼaē neʼe hoko?
17 ʼI tana tohi, These Also Believe, neʼe ʼui fēnei e te Polofesea ko Charles S. Braden: ‘Kua fakahoko moʼoni te gāue ʼa te kau Fakamoʼoni ʼa Sehova ʼi te kele katoa. ʼE moʼoni te ʼui ʼaē, ʼe mole he tahi age kūtuga lotu ʼi te malamanei neʼe ina fakahā he faiva lahi pea mo he faʼa kātaki lahi ohage ko te kau Fakamoʼoni ʼa Sehova, moʼo faka mafola te logo lelei ʼo te Puleʼaga. ʼE mahino ia ʼe tuputupu lahi anai te kūtuga ʼaia.’ Neʼe manatu tonu te tagata ʼaia! Neʼe ina tohi te ʼu palalau ʼaia kua hili kiai taʼu e 50, pea neʼe ko te toko 300 000 kau Fakamoʼoni pe neʼe nātou fai faka mafola ʼi te malamanei katoa. Kae koteā anai tana ʼui ia ʼaho nei, ʼi te kua tuputupu ʼo tuʼa 20 age—ko te toko ono miliona—te kaugamālie ʼo nātou ʼaē ʼe nātou faka mafola te logo lelei?
18. Koteā te lea maʼa, pea neʼe foaki e te ʼAtua kia ai?
18 ʼAki tana polofeta, neʼe fakapapau fēnei e te ʼAtua: “ ʼE ʼau foaki anai ki te hahaʼi he fetogi, ʼe ko he lea maʼa, ke feala hanatou pāui fuli ki te huafa ʼo Sehova, ke feala hanatou tauhi fakatahi kia te ia.” (Sofonia 3:9) ʼI te ʼu ʼaho fakamuli ʼaenī, ʼe ko te kau Fakamoʼoni ʼa Sehova ʼaē ʼe nātou pāui ki te huafa ʼo Sehova, pea mo nātou tauhi kia te ia ʼi te logo tahi, ʼi te ʼu noʼo mālohi ʼo te ʼofa—ei, ʼe nātou tauhi “fakatahi.” Neʼe foaki age kia nātou e Sehova te lea maʼa. ʼE faka ʼuhiga te lea maʼa ʼaia ki tanatou mahino lelei ki te moʼoni ʼo ʼuhiga mo te ʼAtua pea mo tana ʼu fakatuʼutuʼu. ʼE ko Sehova tokotahi ʼaē ʼe ina foaki te mālama ʼaia ʼaki tona laumālie maʼoniʼoni. (1 Kolonito 2:10) Neʼe ina foaki kia ai tona laumālie? Neʼe ina foaki pe “kia natou e fakalogo kia te ia.” (Gaue 5:32) ʼE ko te kau Fakamoʼoni ʼa Sehova pe ʼaē ʼe nātou fia fakalogo ki te ʼAtua ʼi tona ʼuhiga Pule ia meʼa fuli. Koia ʼe nātou maʼu te laumālie ʼo te ʼAtua pea mo nātou palalau ʼaki te lea maʼa, ʼaē ko te moʼoni ʼo ʼuhiga mo Sehova pea mo tana ʼu fakatuʼutuʼu fakatalakitupua. ʼE nātou fakaʼaogaʼi te lea maʼa moʼo vikiʼi ia Sehova ʼi te kele katoa ʼi hona ʼaluʼaga ʼe lahi pea mo tuputupu.
19. Koteā ʼaē ʼe faka ʼuhiga kiai te fakaʼaogaʼi ʼo te lea maʼa?
19 Ko te fakaʼaogaʼi ʼo te lea maʼa ko tona faka ʼuhiga ʼe tonu ke kita tui ki te moʼoni pea mo kita akoʼi ki te hahaʼi, pea mo kita maʼuliʼi te ʼu lao pea mo te ʼu pelesepeto ʼa te ʼAtua. Neʼe tuku e te kau Kilisitiano fakanofo te faʼifaʼitaki ʼo ʼuhiga mo te kumi ʼo Sehova pea mo te fakaʼaogaʼi ʼo te lea maʼa. Koutou fakakaukauʼi age muʼa te ʼu meʼa ʼaē kua fai! Logola kua tokosiʼi te kau fakanofo heʼe nātou toko 8 700, kae ko te teitei toko ono miliona hahaʼi ʼe nātou faʼifaʼitakiʼi tanatou tui ʼo nātou kumi ia Sehova pea mo fakaʼaogaʼi te lea maʼa. Ko nātou ʼaia ʼe ko te hahaʼi tokolahi ʼaē ʼe tuputupu, mai te ʼu fenua fuape pea ʼe nātou tui ki te sakilifisio faitotogi ʼa Sesu, mo nātou foaki he tauhi taputapu ʼi te malaʼe fakakelekele ʼo te fale lotu fakalaumālie ʼo te ʼAtua, pea mo nātou hāo anai ʼi “te ahiahi lahi” ʼaē kua vave hoko mai ki te mālama heʼe faitotonu ʼaenī.—Apokalipesi 7:9, 14, 15.
20. Koteā ʼaē ka hoko ki te kau fakanofo agatonu pea mo nātou ʼaē ʼe nātou faʼufaʼu te hahaʼi tokolahi?
20 ʼE taki anai te hahaʼi tokolahi ki te mālama foʼou faitotonu ʼa te ʼAtua. (2 Petelo 3:13) Ko Sesu Kilisito pea mo te toko 144 000 kau fakanofo ʼaē kua fakatuʼuake ki te maʼuli ʼi selo moʼo kaugā hau pea mo pelepitelo mo ia, ʼe nātou faʼufaʼu anai te puleʼaga foʼou ʼaē ka ina puleʼi te kele. (Loma 8:16, 17; Apokalipesi 7:4; 20:6) Ko nātou ʼaē ka hāo ʼi te mamahi lahi ʼe nātou fakaliliu anai te kele ko he palatiso pea mo hoko atu anai tanatou fakaʼaogaʼi ia te lea maʼa ʼaē neʼe foaki age e te ʼAtua. ʼI tona fakahagatonu, ʼe faka ʼuhiga kia nātou te ʼu palalau ʼaenī: “Ko tou ʼu foha fuli [pea mo tou ʼu ʼofafine] ʼe nātou liliu anai ko he ʼu hahaʼi neʼe akoʼi e Sehova, pea ko te tokalelei ʼo tou ʼu foha ʼe mahu anai. ʼE ke tuʼu mālohi anai ʼi tou faitotonu.”—Isaia 54:13, 14.
Te Gāue Faiako Lahi Tokotahi ʼo Te Hisitolia
21, 22. (a) Ohage ko tona fakahā ia Gaue 24:15, ko ai ʼaē ka akoʼi ki ai te lea maʼa? (b) Koteā te gāue faiako ʼe mole hona fakatatau ʼe fai anai ʼi te kele ʼi te pule ʼo te Puleʼaga?
21 Ko te kūtuga lahi ʼaē ka foaki anai kia nātou te fealagia ke nātou ako te lea maʼa ʼi te mālama foʼou, ʼe ko nātou ʼaē ʼe talanoa kiai ia Gaue 24:15, MN, ʼaē ʼe ʼui fēnei ai: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” ʼI te temi muʼa, neʼe mamate te lauʼi miliale hahaʼi kae neʼe mole nātou maʼu te ʼatamai mālama ʼo ʼuhiga mo Sehova. ʼE ina fakatuʼuake anai nātou, ʼo mulimuli ki te fakatuʼutuʼu ʼaē kua ina fai. Pea ko te kau fakatuʼuake ʼaia ʼe tonu anai ke akoʼi kia nātou te lea maʼa.
22 ʼE ko he pilivilesio lahi anai hatatou kau ki te gāue faiako lahi ʼaia! ʼE ko te gāue faiako lahi tokotahi anai ʼaē ka fai ʼi te hisitolia ʼo te malamanei. ʼE fakahoko anai ia meʼa fuli ʼaia ʼi te pule lelei ʼa Kilisito Sesu ʼi te mālohi ʼo te Puleʼaga. Ki muli age, ʼe sio anai ia te malamanei ki te fakahoko ʼo Isaia 11:9, ʼaē ʼe ina ʼui fēnei: “ ʼE fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”
23. He koʼe ʼe feala ke koutou ʼui ʼe ko he pilivilesio lahi ke tou kau ki te hahaʼi ʼa Sehova?
23 ʼE ko he pilivilesio lahi ʼaē ʼe tou maʼu ʼi te ʼu ʼaho fakamuli ʼaenī, ke teuteuʼi tatou ki te temi fakatalakitupua ʼaē ka fonu ai te ʼatamai mālama ʼo Sehova ʼi te kele! Pea ʼe ko he pilivilesio kua tou maʼu ʼi te temi nei ke tou kau ki te hahaʼi ʼa te ʼAtua, ia nātou ʼaē ʼe nātou sio ki te fakahoko lahi ʼo te ʼu palalau faka polofeta ʼaē ʼe tuʼu ia Sofonia 3:20! ʼE tou maʼu ai te fakapapau ʼaenī ʼa Sehova: “[ʼE] ʼau fakatuʼutuʼu anai ke koutou liliu ko he higoa pea mo he fakavikiviki ʼi te lotolotoiga ʼo te hahaʼi fuli ʼo te kele.”
ʼE Koutou Tali Feafeaʼi Anai?
• Neʼe hoko feafeaʼi te lea faka polofeta ʼa Sofonia ʼo ʼuhiga mo te toe fakatuʼu ʼo te tauhi moʼoni?
• Neʼe tuputupu feafeaʼi te tauhi moʼoni ʼi te ʼu ʼaho fakamuli ʼaenī?
• Koteā te gāue faiako lahi ʼaē ka fai anai ʼi te mālama foʼou?
[Paki ʼo te pasina 25]
Neʼe toe liliu te hahaʼi ʼa Sehova ki tonatou fenua moʼo toe fakatuʼu te tauhi maʼa. ʼE koutou ʼiloʼi koa te faka ʼuhiga ʼo te faʼahi ʼaia ia ʼaho nei?
[Paki ʼo te pasina 26]
ʼI tanatou fakaʼaogaʼi te “lea maʼa,” ʼe foaki e te kau Fakamoʼoni ʼa Sehova ki te hahaʼi te logo fakaloto fīmālie ʼa te Tohi-Tapu