Kua Ōvi Mai Te ʼAho ʼo Te Fakamāu ʼa Sehova!
“Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.”—Sofonia 1:14.
1. Koteā te fakatokaga ʼaē neʼe fakahā e te ʼAtua ʼaki ia Sofonia?
KO SEHOVA ʼATUA ʼe ʼamanaki nei ke ina pulihi te kau agakovi. Koutou fakalogo! Koʼeni te fakatokaga ʼaē ʼe ina fai: “ ʼE ʼau pulihi anai te tagata fakakelekele . . . ʼE ʼau taʼaki anai te hahaʼi ʼi te fuga ʼo te kele.” (Sofonia 1:3) Ko te ʼu folafola ʼaia ʼa te Tui ʼAliki ko Sehova ʼaē neʼe ina fakahā ʼaki tana polofeta ko Sofonia, ʼaē ʼe lagi hifo mai te hōloga ʼo te Hau agatonu ko Esekiasi, te tolu taʼiake. Ko te folafola ʼaia, ʼaē neʼe fai ʼi te temi ʼo te Hau agalelei ko Sosiasi, neʼe mole ko he logo lelei ki te hahaʼi agakovi ʼaē neʼe nonofo ʼi te fenua ʼo Suta.
2. Logola te ʼu gāue ʼaē neʼe fai e Sosiasi, kae he koʼe neʼe mole tāʼofi te ʼaho ʼo te fakamāu ʼa Sehova?
2 ʼE mahino ia, ʼaki te fai fakakikite ʼa Sofonia neʼe ʼiloʼi ai e te tūpulaga ko Sosiasi, ʼe maʼua ke pulihi te tauhi heʼe maʼa ʼi Suta. Kae ko te ʼu meʼa ʼaē neʼe fai e te hau moʼo pulihi ʼi te fenua ia te lotu hala, neʼe mole ina pulihi katoa te agakovi ʼa te hahaʼi peʼe fakamolemole ia te ʼu agahala ʼo tana kui, te Hau ko Manase, ʼaē neʼe ina “fakafonu ai ia Selusalemi ʼaki te toto heʼe hala.” (2 Hau 24:3, 4; 2 Fakamatala 34:3) Koia neʼe tonu ke hoko moʼoni te ʼaho ʼo te fakamāu ʼa Sehova.
3. He koʼe ʼe feala ke tou tui papau ʼe tou lava hāo ʼi “te ʼaho ʼo te hāūhāū ʼo Sehova”?
3 Kae ko ʼihi ʼe nātou hāo anai ʼi te ʼaho fakamataku ʼaia. Koia neʼe uga fēnei ai e te polofeta ʼa te ʼAtua: “ ʼI muʼa ʼo te fānauʼi e te lao ia he meʼa, ʼi muʼa ʼo te fakalaka ʼo te ʼaho ohage ko te ʼotaʼotaʼi fulumeto, ʼi muʼa ʼo te hoko mai kia koutou te hāūhāū kakaha ʼo Sehova, ʼi muʼa ʼo te hoko mai kia koutou ia te ʼaho ʼo te hāūhāū ʼo Sehova, koutou kumi ia Sehova, ia koutou fuli, kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.” (Sofonia 2:2, 3) ʼI tatatou vakavakaʼi te tohi faka Tohi-Tapu ʼo Sofonia, tou manatuʼi tatatou ʼamanaki ʼaē ke tou hāo ʼi te ʼaho ʼo te fakamāu ʼa Sehova. Neʼe fai te tohi ʼa Sofonia ʼi Suta ʼi muʼa ʼo te taʼu 648 ʼi muʼa ʼo totatou temi, pea ʼe ko he koga ʼo te “folafola faka polofeta,” ʼaē ʼe tonu ke tou tokakaga fuli kiai ʼaki totatou loto katoa.—2 Petelo 1:19, MN.
Neʼe Faoʼi e Sehova Tona Nima
4, 5. Neʼe hoko feafeaʼi ia Sofonia 1:1-3 ki te hahaʼi agakovi ʼo Suta?
4 “Ko te folafola ʼa Sehova” kia Sofonia ʼe kamata ʼaki te fakatokaga ʼaē neʼe tou talanoa kiai ʼi te kamata. ʼE tala fēnei e te ʼAtua: “ ‘ ʼE ʼau fakaʼauha moʼoni anai ia meʼa fuli ʼi te fuga kele,’ ʼe ko te tala ʼaia ʼa Sehova. ‘ ʼE ʼau pulihi anai te tagata fakakelekele pea mo te manu. ʼE ʼau pulihi anai te ʼu manulele ʼo te lagi pea mo te ʼu ika ʼo te tai, pea mo te ʼu meʼa fakatupu tūkia ʼo fakatahi mo te hahaʼi agakovi; pea ʼe ʼau taʼaki anai te hahaʼi ʼi te fuga kele,’ ʼe ko te tala ʼaia ʼa Sehova.”—Sofonia 1:1-3.
5 Ei, neʼe kua fakatuʼutuʼu e Sehova ke ina pulihi te agakovi lahi ʼi te fenua ʼo Suta. Ko ai ʼaē ka fakaʼaogaʼi e te ʼAtua moʼo “fakaʼauha ia meʼa fuli pe ʼi te fuga kele”? Mai tona ʼaluʼaga ʼaē neʼe lea fakakikite ia Sofonia ʼi te kamata pule ʼa te Hau ko Sosiasi, ʼi te 659 ʼi muʼa ʼo totatou temi, koia neʼe hoko te ʼu lea faka polofeta ʼaia ʼi te temi ʼaē neʼe fakaʼauha ai e te kau Papiloni ia Suta pea mo tona kolo hau, ko Selusalemi, ʼi te taʼu 607 ʼi muʼa ʼo totatou temi. ʼI te temi ʼaia, neʼe “pulihi” te kau agakovi ʼo Suta.
6-8. Koteā ʼaē neʼe fakakikite ia Sofonia 1:4-6, pea neʼe hoko feafeaʼi te lea faka polofeta kia Suta ʼo te temi muʼa?
6 ʼI tana fakakikite te ʼu gāue ʼaē ka fai e te ʼAtua ki te kau tauhi hala, ʼe ʼui fēnei ia Sofonia 1:4-6: “ ʼE ʼau faoʼi atu anai toku nima ki Suta pea mo te hahaʼi fuli ʼaē ʼe nonofo ʼi Selusalemi, pea ʼe ʼau toʼo anai mai te potu ʼaia te toega hahaʼi ʼa Paale, mo te higoa ʼo te kau pelepitelo ʼo te ʼu ʼatua matāpule pea mo te kau pelepitelo, pea mo nātou ʼaē ʼe tulolo ʼi te ʼu fuga ʼato ki te kautau ʼo te lagi, pea mo nātou ʼaē ʼe tulolo ʼo fai he ʼu fakapapau kia Sehova pea mo nātou fai he ʼu fakapapau ʼaki ia Malakami; pea mo nātou ʼaē ʼe nātou lītuʼa kia Sehova pea neʼe mole nātou kumi ia Sehova pea mo fakalavelave kia te ia.”
7 Neʼe faoʼi e Sehova tona nima ki te hahaʼi ʼo Suta pea mo Selusalemi. Neʼe ina fakatotonu ke ina matehi te kau atolasio ʼo Paale, te ʼatua Kanaane ʼo te fanaunau. Ko te ʼu ʼatua kehekehe ʼo te fenua neʼe higoaʼi ko te ʼu Paale, he neʼe manatu e tanatou kau atolasio ʼe ʼi ai te ʼu koga meʼa ʼe puleʼi ai te ʼu Paale ʼaia pea mo malave tanatou mālohi ki ni ʼu koga meʼa. Ohage la, neʼe ʼi ai te Paale ʼaē neʼe atolasioʼi e te kau Moapite pea mo te kau Matianite ʼi te Moʼuga ʼo Peole. (Faka au 25:1, 3, 6) ʼI Suta, neʼe fakaʼauha e Sehova te kau pelepitelo ʼo Paale, ʼo feiā mo te kau pelepitelo heʼe agatonu ʼo te kalasi ʼo te kau Levite, ʼaē neʼe nātou maumauʼi te lao ʼa te ʼAtua ʼi tanatou gāue tahi mo te kau pelepitelo ʼaia.—Ekesote 20:2, 3.
8 Neʼe toe fakaʼauha e te ʼAtua mo te hahaʼi ʼaē ‘neʼe tulolo ki te kautau ʼo te lagi,’ he neʼe nātou fakakikite ʼaki te ʼu fetuʼu pea mo nātou atolasio ki te laʼā. (2 Hau 23:11; Selemia 19:13; 32:29) Neʼe toe fakahoko mo te hāūhāū ʼo te ʼAtua ki te hahaʼi ʼaē neʼe nātou faiga ke nātou fio te tauhi moʼoni pea mo te lotu hala, he neʼe nātou ‘fai te ʼu fakapapau kia Sehova pea mo Malakami.’ Ko Malakami ʼe lagi ko te tahi higoa ʼaia ʼo Moleke, te ʼatua tāfito ʼo te kau Amonite. ʼI te tauhi ʼaē kia Moleke, neʼe sakilifisioʼi te ʼu tamaliki.—1 Hau 11:5; Selemia 32:35.
Kua Ōvi Mai Te Pulihi ʼo Te Keletiate!
9. (a) Koteā te hala neʼe fai e te Keletiate? (b) ʼO mole hage ko te hahaʼi heʼe agatonu ʼo Suta, koteā ʼaē ʼe tonu ke tou fakatotonu ke tou fai?
9 Ko te ʼu faʼahi fuli ʼaia ʼe nātou fakamanatuʼi mai te Keletiate, ʼaē ʼe lahi ʼaupito ai te tauhi hala pea mo tana fakakikite ʼaki te ʼu fetuʼu. Pea ʼe ko he meʼa fakalialia tana kau ki te matehi ʼa te lauʼi miliona hahaʼi ʼi te tau ʼaē neʼe lagolago kiai te kau takitaki lotu! ʼAua naʼa tou liliu ʼi he temi ohage ko te hahaʼi heʼe agatonu ʼo Suta, ʼaē neʼe nātou “lītuʼa kia Sehova,” ʼo mole kei nātou fia fakalogo pea neʼe mole kei nātou fia kumi ia ia pea mo tana takitaki. Kae ke tou haga nofo agatonu ki te ʼAtua.
10. E feafeaʼi hakotou fakamahino te faka ʼuhiga ʼo te lea faka polofeta ʼa Sofonia 1:7?
10 Ko te ʼu palalau ʼaē ʼe fai e te polofeta ki muli age, ʼe faka ʼuhiga lelei ki te hahaʼi agakovi ʼo Suta pea mo nātou ia ʼaho nei. ʼE ʼui fēnei ia Sofonia 1:7: “Ke fakalogologo ia muʼa ʼo te Tuʼi ʼAliki ko Sehova, he ko te ʼaho ʼo Sehova kua ōvi mai, he neʼe teuteuʼi e Sehova he sakilifisio; neʼe ina fakamaʼoniʼoni tana ʼu hahaʼi fakaafe.” Ko te ʼu “hahaʼi fakaafe” ʼaia neʼe ko te ʼu fili Kalitia ʼo Suta. Ko te “sakilifisio” neʼe ko Suta totonu, pea mo tona kolo hau. Neʼe fakakikite ai e Sofonia te fakatuʼutuʼu ʼa te ʼAtua ke ina maumauʼi ia Selusalemi, pea neʼe toe faka ʼuhiga te lea faka polofeta ʼaia ki te fakaʼauha ʼo te Keletiate. ʼI te temi nei kua ōvi mai te ʼaho fakamāu ʼa te ʼAtua, koia ʼe tonu ai ki te malamanei katoa ke nofo “fakalogologo ia muʼa ʼo te Tuʼi ʼAliki ko Sehova,” pea mo fakalogo ki te meʼa ʼaē ʼe ina ʼui ʼaki te “kiʼi faga ōvi” ʼaē ko te ʼu tisipulo fakanofo ʼa Sesu, pea mo tonatou ʼu kaugā gāue, tana “tahi ʼu ōvi.” (Luka 12:32, MN; Soane 10:16, MN ) ʼE fakaʼauha anai ia nātou fuli ʼaē ʼe mole nātou fakalogo pea mo nātou liliu ʼo fakafeagai ki te Puleʼaga ʼa te ʼAtua.—Pesalemo 2:1, 2.
Kua Ōvi Mai Te ʼAho ʼo Te Fetāgihi!
11. Koteā ʼaē ʼe talanoa tāfito kiai ia Sofonia 1:8-11?
11 ʼO ʼuhiga mo te ʼaho ʼo Sehova, ʼe toe ʼui fēnei ia Sofonia 1:8-11: “ ‘Ko te meʼa ʼaē ka hoko, ʼi te ʼaho ʼo te sakilifisio ʼa Sehova, ʼe ʼau tokagaʼi anai te kau tama ʼaliki, pea mo te ʼu foha ʼo te hau, pea mo nātou fuli ʼaē ʼe nātou ʼai te ʼu kofu ʼo te kau matāpule. Pea ʼe ʼau tokagaʼi anai nātou fuli ʼaē ʼe kake ki te potu māʼoluga ʼi te ʼaho ʼaia, nātou ʼaē ʼe nātou fakafonu te ʼapi ʼo tonatou ʼu pule ʼaki te agamālohi pea mo te aga kākā. Pea ʼe hoko anai ʼi te ʼaho ʼaia,’ ʼe ko te tala ʼaia ʼa Sehova, ‘he kalaga ʼe haʼu mai te Matapā ʼo te ʼu Ika, pea mo te tagi mai te lua kolo, pea mo te maumau lahi mai te ʼu moʼuga. Koutou fetāgihi, hahaʼi ʼo Makitesi, he ko te hahaʼi fuli ʼaē ʼe fai fakatau kua nātou fakalogologo; ia nātou fuli ʼaē ʼe nātou fua ia te siliva, kua molehi nātou.’ ”
12. He koʼe ʼe ʼui ko ʼihi neʼe nātou “ ʼai te ʼu kofu ʼo te kau matāpule”?
12 Neʼe hoa ki te Hau ko Sosiasi, te hau ko Seoasi, mo Seoiakimi, pea mo Seoiakini. Pea neʼe hoa kiai te temi Hau ʼo Setesiasi, ʼaē neʼe hoko ai te fakaʼauha ʼo Selusalemi. Logola neʼe ʼamanaki hoko kia nātou te malaʼia ʼaia, kae neʼe kumi e ʼihi ke nātou fakatahi mo te ʼu puleʼaga ʼi ʼonatou tafa, ʼo nātou “ ʼai te ʼu kofu ʼo te kau matāpule.” ʼO toe feiā, tokolahi ia ʼaho nei ʼi te ʼu ʼaluʼaga kehekehe ʼe hā lelei tanatou mole kau ki te kautahi ʼa Sehova. ʼE fakaʼauha anai nātou, koteʼuhi ʼe nātou kau ki te kautahi ʼa Satana.
13. ʼO mulimuli ki te lea faka polofeta ʼa Sofonia, koteā ʼaē neʼe hoko ʼi te ʼohofi e te kau Papiloni ia Selusalemi?
13 Ko “te ʼaho ʼaia” ʼaē ʼe huʼi maʼua ai Suta, ʼe faka ʼuhiga ki te ʼaho ʼaē ka fakahoko ai e Sehova te fakamāu ki tona ʼu fili, moʼo fakagata te agakovi, pea mo fakamoʼoni ki tona māʼoluga tokotahi. ʼI te ʼohofi e te kau Papiloni ia Selusalemi, neʼe logo ki te kalaga ʼe haʼu mai te Matapā ʼo te ʼu Ika. Neʼe lagi fakahigoa feiā he neʼe tuʼu ōvi ki te fakatauʼaga ika. (Nehemia 13:16) Ko te ʼu kautau ʼo Papiloni neʼe nātou hū ki te koga meʼa ʼaē ʼe higoa ko te lua kolo, pea ko te “maumau lahi mai te ʼu moʼuga” neʼe lagi faka ʼuhiga ki te logoaʼa ʼaē neʼe nātou logo kiai ʼi te fakaōvi mai ʼo te kau Kalitia. ʼE “fetāgihi” te hahaʼi ʼo Makitesi, lagi ʼi te fuga Mafa ʼo Tilopone. He koʼe ʼe nātou fetāgihi? Heʼe fakagata tanatou ʼu faifakatau, ʼo kau kiai te faifakatau ʼa ‘nātou ʼaē ʼe nātou fua te siliva.’
14. ʼE aʼu anai kifea te kumi ʼaē e te ʼAtua ia nātou ʼaē ʼe nātou lau ko tana kau atolasio?
14 ʼE aʼu anai kifea te kumi ʼaē e Sehova ia nātou ʼaē ʼe lau ko tana kau atolasio? ʼE hoko atu fēnei e te lea faka polofeta: “Ko te meʼa ʼaē ka hoko, ʼi te temi ʼaia, ʼe ʼau kumi lelei anai ia Selusalemi ʼaki he ʼu mālama, pea ʼe ʼau tokaga anai ki te kau tagata ʼaē ʼe nātou tagutu ʼi tonatou totoka, pea mo nātou ʼui ʼi tonatou loto: ‘Ko Sehova ʼe mole ina fai anai he meʼa ʼe lelei, pea ʼe mole ina fai anai he meʼa ʼe kovi.’ Pea ko tonatou ʼu koloā ʼe liliu anai ko he meʼa ʼe kaihaʼa, pea ʼe mole toe nofoʼi anai tonatou ʼu ʼapi. Pea ʼe nātou laga anai he ʼu ʼapi, kae mole nātou nofoʼi anai; pea ʼe nātou to anai he ʼu fuʼu vite, kae mole nātou ʼiʼinu anai ki te vino.”—Sofonia 1:12, 13.
15. (a) Koteā ʼaē neʼe hoko ki te kau pelepitelo ʼaposita ʼo Selusalemi? (b) Koteā ʼaē ka hoko anai kia nātou ʼaē ʼe kau ʼi te temi nei ki te lotu hala?
15 Neʼe fakafio e te kau pelepitelo ʼaposita ʼo Selusalemi te tauhi ʼaē kia Sehova pea mo te lotu hala. Logola neʼe nātou nonofo fīmālie, kae neʼe kumi nātou e Sehova ʼaki he ʼu mālama neʼe ina fakainaina te fakapōʼuli fakalaumālie ʼaē neʼe nātou fenonoʼi ai. Neʼe mole hāo he tahi ʼi te tala pea mo te fakahoko ʼo te fakamāu fakaʼatua. Ko te kau ʼaposita fakafīfīmālie ʼaia, neʼe nātou nonofo ohage ko te totoka ʼo te takeleʼi vino ʼi te topu. Neʼe mole nātou loto ke gaohaʼa age he folafola ʼo ʼuhiga mo te meʼa ka fai e te ʼAtua ki te hahaʼi, kae neʼe mole nātou hāo mai te fakahoko kia nātou ia te fakamāu ʼa te ʼAtua. ʼE mole toe hāo anai he tahi ʼi te hahaʼi ʼaē ʼe nātou mulimuli ki te lotu hala ia ʼaho nei, ohage ko te Keletiate pea mo nātou ʼaē neʼe fasituʼu ki te tauhi kia Sehova. ʼI tanatou mole tui ʼaē ʼe ko “te u aho fakamuli” ʼaenī, ʼe nātou ʼui ʼi tonatou loto, “ko Sehova ʼe mole ina fai anai he meʼa ʼe lelei, pea ʼe mole ina fai anai he meʼa ʼe kovi.” Kae ʼe nātou faihala ʼaupito!—2 Timoteo 3:1-5; 2 Petelo 3:3, 4, 10.
16. Koteā ʼaē neʼe tonu ke hoko ʼi te temi ʼaē neʼe tō ai te fakamāu fakaʼatua ki Suta, pea ʼe tonu ke malave feafeaʼi te faʼahi ʼaia kia tatou?
16 Neʼe fakatokagaʼi age ki te kau ʼaposita ʼo Suta ʼe toʼo fuli anai e te kau Papiloni tonatou ʼu koloā, mo maumauʼi tonatou ʼu ʼapi, pea mo toʼo te ʼu vite ʼo tanatou ʼu gāueʼaga vite. Neʼe mole ʼaoga te ʼu koloā ʼi te temi ʼaē neʼe hoko ai te fakamāu fakaʼatua ki Suta. ʼE toe feiā anai mokā hoko te ʼaho ʼo te fakamāu ʼa Sehova ki te tuʼu ʼo te ʼu faʼahiga meʼa ʼaenī. Koia, ʼofa pe ke tou maʼu he sio fakalaumālie pea ‘ke tou tānaki he ʼu koloā ʼi te lagi,’ ʼo tou fakamuʼamuʼa te tauhi kia Sehova ʼi totatou maʼuli katoa.—Mateo 6:19-21, 33.
“Ko Te ʼAho Lahi ʼo Sehova Kua Ōvi Mai”
17. ʼO mulimuli kia Sofonia 1:14-16, kua ōvi feafeaʼi mai te ʼaho fakamāu ʼa Sehova?
17 Kua ōvi feafeaʼi mai te ʼaho ʼo te fakamāu ʼa Sehova? Ohage ko tona ʼui ia Sofonia 1:14-16, ʼe fai e te ʼAtua te fakapapau ʼaenī: “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai. Ko te logoaʼa ʼo te ʼaho ʼo Sehova ʼe kona. ʼI te ʼaho ʼaia ʼe kalaga te tagata mālohi. Ko te ʼaho ʼaia ʼe ko he ʼaho ʼo te hāūhāū, ko he ʼaho ʼo te mamahi pea mo te tuʼania, ko he ʼaho ʼo te afā pea mo te maumau, ko he ʼaho ʼo te pōʼuli pea mo te fakapōʼuli gaogao, ko he ʼaho ʼaoʼaoa pea mo fakapōʼuli mātolu, ko he ʼaho ʼo te pupuhi fakatagi pea mo te fakatokaga ki te ʼu kolo mālolohi, pea mo te ʼu tule māʼoluga.”
18. He koʼe ʼe mole tonu ke tou manatu ʼe kei mamaʼo te ʼaho fakamāu ʼa Sehova?
18 Ko te kau pelepitelo agahala, mo te kau tama ʼaliki, pea mo te hahaʼi ʼo Suta, neʼe fakatokagaʼi kia nātou ‘kua ōvi mai te ʼaho lahi ʼo Sehova.’ Ki Suta neʼe hoko ‘fakavilivili ʼaupito te ʼaho ʼo Sehova.’ ʼO toe feiā ʼi totatou temi, ke ʼaua naʼa manatu he tahi ko te fakamāu ʼa Sehova ki te kau agakovi ʼe kei mamaʼo atu. Kailoa, kae ohage ko tona fakahoko fakavilivili e te ʼAtua ki Suta, koia ʼe ina fakahoko “fakavilivili” anai tona ʼaho fakamāu. (Apokalipesi 16:14, 16) ʼE ko he temi fakamamahi anai kia nātou fuli ʼaē ʼe nātou meʼa noaʼi te ʼu fakatokaga ʼa Sehova, ʼaē neʼe fakahā e te kau Fakamoʼoni pea kia nātou ʼaē neʼe mole nātou tali te tauhi moʼoni!
19, 20. (a) Koteā ʼihi agaaga ʼo te fakaʼauha ʼaē neʼe fakahoko e te ʼAtua ki Suta pea mo Selusalemi? (b) ʼUhi ko te fakaʼauha lahi ʼaē ka hoko ki te tuʼu ʼo te ʼu faʼahiga meʼa ʼaenī, koteā te ʼu fehuʼi ʼaē ʼe lagaʼi?
19 Ko te fakahoko ʼo te hāūhāū ʼo te ʼAtua ki Suta pea mo Selusalemi, neʼe “ko he ʼaho ʼo te mamahi pea mo te tuʼania.” Neʼe mamahi ʼaupito te hahaʼi ʼo Suta ʼi te kau Papiloni ʼaē neʼe nātou ʼohofiʼi Suta, pea neʼe nātou toe tuʼania naʼa matehi nātou pea mo fakaʼauha nātou. Ko “he ʼaho ʼo te afā pea mo te maumau” ʼaia neʼe fakapōʼuli, mo ʼaoʼaoa, pea mo pōʼuli mātolu, ʼe mole lagi ko he ʼu palalau fakatātā pe kae neʼe lagi hoko moʼoni, he neʼe ʼi ai te ʼahu pea mo te maumau ʼi te potu fuli pe. Neʼe ko “he ʼaho ʼo te pupuhi fakatagi pea mo te fakatokaga,” kae neʼe mole ʼaoga te ʼu fakatokaga ʼaē neʼe fai.
20 Ko te ʼu tagata leʼo ʼo Selusalemi neʼe mole nātou lava fai he meʼa ʼi te temi ʼaē neʼe toli ai “te ʼu tule māʼoluga” e te ʼu foʼi pou ukamea ʼa Papiloni. Ko te ʼu tule ʼo te tuʼu ʼo te ʼu faʼahiga meʼa agakovi ʼaenī, ʼe mole nātou lava tāʼofi anai te ʼu mahafu ʼa te ʼAtua ʼaē ʼi selo, ʼaē ka ina fakaʼaogaʼi moʼo fakahoko te fakaʼauha ki te kau agakovi. ʼE koutou manatu koa ʼe koutou hāo anai? ʼE koutou lagolago koa kia Sehova, ʼaē ‘ ʼe ina taupau ia nātou fuli ʼaē ʼoʼofa kia te ia, kae ʼe ina fakaʼauha anai te kau agakovi fuli’?—Pesalemo 145:20.
21, 22. ʼE hoko feafeaʼi anai ia Sofonia 1:17, 18 ʼi totatou temi?
21 ʼE ko he ʼaho fakamataku ʼo te fakamāu ʼaē neʼe fakakikite e Sofonia 1:17, 18! ʼE ʼui fēnei e Sehova ʼAtua: “ ʼE ʼau fakaloto mamahi anai te hahaʼi, pea ʼe mahino ia ʼe nātou haʼele anai ohage ko he ʼu hahaʼi kivi; he neʼe nātou agahala kia Sehova. Pea ʼe liligi moʼoni anai tonatou toto ohage ko te efu, pea ko tonatou ʼu ʼate ʼe hage anai ko he ʼu faifekau. ʼE mole feala anai ke hāofaki nātou e tanatou siliva pea mo tanatou aulo ʼi te ʼaho ʼo te hāūhāū ʼo Sehova; kae ʼaki te afi ʼo tana fakamalotoloto ʼe fakaʼauha anai te kele katoa, heʼe ina fai anai he tāmateʼi, ʼio he tāmateʼi fakamataku, ei, ʼo te hahaʼi fuli ʼaē ʼi te kele.”
22 Ohage ko tona fai ʼi te temi ʼo Sofonia, kua vave fakahoko e Sehova te mamahi ki “te hahaʼi fuli ʼaē ʼi te kele,” kia nātou ʼaē ʼe mole fia logo ki tana ʼu fakatokaga. Neʼe nātou agahala ki te ʼAtua, koia ʼe nātou haʼele anai ohage ko he ʼu hahaʼi kivi ʼe mole honatou puipuiʼaga, ʼe mole feala ke maʼu honatou hāofakiʼaga. ʼI te ʼaho ʼo te fakamāu ʼa Sehova, “ ʼe liligi moʼoni anai tonatou toto ohage ko te efu,” ohage ko he meʼa ʼe mole maʼuhiga. ʼE mole faka maʼuhigaʼi anai tanatou mamate, koteʼuhi ʼe fakaleta anai e te ʼAtua te ʼu sino ʼi te kele—māʼia mo te ʼu ʼate—ʼo te hahaʼi agakovi ʼaia, “ ʼe hage anai ko he ʼu faifekau.”
23. Logola ko te kau agakovi ʼe mole nātou hāo anai “ ʼi te ʼaho ʼo te hāūhāū ʼo Sehova,” kae koteā te ʼamanaki ʼaē ʼe foaki e te lea faka polofeta ʼa Sofonia?
23 ʼE mole he tahi ʼe feala ke ina hāofaki te hahaʼi ʼaē ʼe fakafeagai ki te ʼAtua pea mo tana hahaʼi. Ko te siliva peʼe ko te aulo neʼe mole feala ke ina hāofaki te hahaʼi agakovi ʼo Suta, ohage pe ko te mole lava puipui anai peʼe hāofaki e te ʼu tuʼuga koloā pea mo te paʼaga mokā hoko “te ʼaho ʼo te hāūhāū ʼo Sehova” ki te Keletiate pea mo te tuʼu ʼo te ʼu faʼahiga meʼa ʼaenī. ʼI te ʼaho maʼuhiga ʼaia, “ ʼe fakaʼauha anai te kele katoa” ʼaki te afi ʼo te fakamalotoloto ʼo te ʼAtua mokā ina matehi anai te kau agakovi. ʼUhi ʼaē ʼe tou tui ki te folafola faka polofeta ʼa te ʼAtua, koia ʼe tou tui papau ai ʼe tou nonofo nei ʼi “te temi fakaʼosi.” (Taniela 12:4) Ko te ʼaho ʼo te fakamāu ʼa Sehova kua ōvi mai, pea kua ina vave fakahoko tona lagavaka ki tona ʼu fili. Kae ʼe foaki e te lea faka polofeta ʼa Sofonia te ʼamanaki ʼo te faka ʼāteaina. Koteā ʼaē ʼe tonu ke tou fai mo kapau ʼe tou loto ke fufū tatou ʼi te ʼaho ʼo te ʼita ʼo Sehova?
ʼE Koutou Tali Feafeaʼi Anai?
• Neʼe hoko feafeaʼi te lea faka polofeta ʼa Sofonia ki Suta pea mo Selusalemi?
• Koteā ʼaē ka hoko anai ki te Keletiate pea mo te kau agakovi fuli ʼo totatou temi?
• He koʼe ʼe mole tonu ke tou manatu ʼe kei mamaʼo te ʼaho fakamāu ʼa Sehova?
[Paki ʼo te pasina 13]
ʼAki he lototoʼa, neʼe tala e Sofonia neʼe kua nātou ōvi ki te ʼaho fakamāu ʼa Sehova
[Haʼuʼaga ʼo te paki]
From the Self-Pronouncing Edition of the Holy Bible, containing the King James and the Revised versions
[Paki ʼo te pasina 15]
ʼI te 607 ʼi muʼa ʼo totatou temi, neʼe fakahoko e te kau Papiloni te ʼaho ʼo Sehova ki Suta pea mo Selusalemi
[Paki ʼo te pasina 16]
ʼE koutou manatu koa ʼe koutou hāo anai ʼi te temi ʼaē ka fakaʼauha ai e Sehova te kau agakovi?