Koutou Kumi Ia Sehova ʼi Muʼa ʼo Te ʼAho ʼo Tona Hāūhāū
“Koutou kumi ia Sehova . . . Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.”—Sofonia 2:3.
1. Neʼe koteā te ʼaluʼaga fakalaumālie ʼo Suta ʼi te temi ʼaē neʼe kamata ai te gāue faka polofeta ʼa Sofonia?
NEʼE kamata te gāue faka polofeta ʼa Sofonia ʼi te temi maʼuhiga ʼo te hisitolia ʼo Suta. Neʼe kovi ʼaupito te ʼaluʼaga fakalaumālie ʼo te puleʼaga. Neʼe mole falala te hahaʼi kia Sehova, kae neʼe nātou kumi te takitaki ʼa te kau pelepitelo pagani pea mo te hahaʼi ʼaē ʼe nātou fakakikite ʼaki te ʼu fetuʼu. Neʼe mafola ʼi te fenua te tauhi ʼo Paale, pea mo tona ʼu toʼotoʼoga ʼo te fanaunau. Ko te ʼu pule—te kau tama ʼaliki, mo te kau ʼaliki, pea mo te kau tuʼi fakamāu—neʼe nātou fakaloto mamahi te hahaʼi ʼaē neʼe tonu ke puipui. (Sofonia 1:9; 3:3) Koia neʼe fakatotonu ai e Sehova ke ina ‘faoʼi tona nima’ moʼo fakaʼauha ia Suta pea mo Selusalemi!—Sofonia 1:4.
2. Neʼe koteā te ʼamanaki ki te kau kaugana agatonu ʼa te ʼAtua ʼi Suta?
2 Logola te kua kovi ʼo te ʼaluʼaga, kae neʼe ʼi ai pe te ʼamanaki. ʼI te temi ʼaia, neʼe ko Sosiasi te foha ʼo Amone, ʼaē neʼe pule. Logola neʼe kei tamasiʼi, kae neʼe ʼofa moʼoni ia Sosiasi kia Sehova. Kapau neʼe toe fakatuʼu e te hau foʼou te tauhi maʼa ʼi Suta, pea neʼe ko he fakaloto mālohi lahi ʼaia ki te tokosiʼi ʼaē neʼe tauhi agatonu ki te ʼAtua! Neʼe feala ke uga ai ʼihi ke nātou fakatahi mo nātou, pea ke toe hāo mo nātou ʼi te ʼaho ʼo te hāūhāū ʼo Sehova.
Te ʼu Meʼa ʼe Tonu Ke Tou Fai Ke Tou Hāo Ai
3, 4. Koteā te ʼu faʼahi ʼe tolu ʼaē ʼe tonu ke fai e he tahi ke feala hana hāo ʼi “te ʼaho ʼo te hāūhāū ʼo Sehova”?
3 Neʼe feala moʼoni koa ke hāo ʼihi ʼi te ʼaho ʼo te hāūhāū ʼo Sehova? Ei, mo kapau neʼe nātou mulimuli ki te ʼu faʼahi e tolu ʼaē neʼe fakahā lelei ia Sofonia 2:2, 3. ʼI tatatou lau te ʼu vaega ʼaia, tou tāʼofi lelei te ʼu meʼa ʼaē ʼe fakamaʼua mai. Neʼe tohi fēnei e Sofonia: “ ʼI muʼa ʼo te fānauʼi e te lao ia he meʼa, ʼi muʼa ʼo te fakalaka ʼo te ʼaho ohage ko te ʼotaʼotaʼi fulumeto, ʼi muʼa ʼo te hoko mai kia koutou te hāūhāū kakaha ʼo Sehova, ʼi muʼa ʼo te hoko mai kia koutou ia te ʼaho ʼo te hāūhāū ʼo Sehova, koutou kumi ia Sehova, ia koutou fuli, kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.”
4 Koia, ke hāo he tahi, neʼe tonu (1) ke ina kumi ia Sehova, (2) ke ina kumi te faitotonu, pea (3) ke ina kumi te agavaivai. ʼE tonu ke tou tokagaʼi lelei te ʼu faʼahi ʼaia ia ʼaho nei. Koteā tona tupuʼaga? Koteʼuhi ohage pe ko te ʼaho huʼi maʼua neʼe hoko ʼi Suta pea mo Selusalemi ʼi te fitu sēkulō ʼi muʼa ʼo totatou temi, ʼe toe feiā pe ki te ʼu puleʼaga ʼo te Keletiate—pea mo te hahaʼi agakovi fuli—ʼe tonu anai ke nātou faka lākatonuʼi tonatou ʼaluʼaga ia muʼa ʼo Sehova ʼAtua ʼi te “mamahi lahi” ʼaē ka hoko mai. (Mateo 24:21) Ko nātou ʼaē ʼe nātou loto ke fufū nātou ʼi te temi ʼaia, ʼe tonu ke nātou fai he tonu ʼi te temi nei. Koteā ʼaē ʼe tonu ke nātou fai? ʼE tonu ke nātou kumi ia Sehova, mo kumi te faitotonu, pea mo kumi te agavaivai naʼa tauhala!
5. Ia ʼaho nei, koteā tona faka ʼuhiga ke tou “kumi ia Sehova”?
5 ʼE feala ke koutou ʼui fēnei: ‘Kua ʼau foaki toku maʼuli kia Sehova, ko ʼau ko te kaugana ʼa te ʼAtua kua papitema, ko he Fakamoʼoni ʼa Sehova. ʼE mole heʼeki ʼau fai koa la te ʼu meʼa ʼaē ʼe fakamaʼua mai?’ ʼI tona ʼuhiga moʼoni, ʼe mole gata pe ki tatatou foaki ʼo totatou maʼuli kia Sehova. Ko Iselaele neʼe ko he puleʼaga kua foaki ki te ʼAtua, kae ʼi te temi ʼo Sofonia neʼe mole kei nātou fakaʼapaʼapa ki tanatou kua foaki ʼo tonatou maʼuli kia Sehova. Koia, neʼe līaki te puleʼaga ki muli age. Ko te ‘kumi ʼo Sehova’ ia ʼaho nei ko tona faka ʼuhiga ke tou maʼu pea mo taupau he ʼu felogoi lelei mo ia, ʼo tou gāue tahi mo tana kautahi ʼaē ʼi te kele. Ko tona faka ʼuhiga ke tou ʼiloʼi te manatu ʼa te ʼAtua pea mo te ʼu meʼa ʼaē ʼe loto kiai. ʼE tou kumi ia Sehova mokā tou ako fakalelei tana Folafola, mo tou metitasioʼi, pea mo maʼuliʼi tana ʼu tokoni. Kapau ʼe tou toe kumi te takitaki ʼa Sehova ʼi te faikole pea mo fakalogo ki te takitaki ʼo tona laumālie maʼoniʼoni, pea ʼe loloto anai tatatou ʼu felogoi mo ia, pea ʼe uga ai anai tatou ke tou tauhi kia te ia ‘ ʼaki totatou loto katoa, mo totatou nefesi katoa, pea mo totatou mālohi katoa.’—Teutalonome 6:5; Kalate 5:22-25; Filipe 4:6, 7; Apokalipesi 4:11.
6. E feafeaʼi hatatou “kumi te faitotonu,” pea māʼia te mālama ʼaenī he koʼe ʼe feala ke fai te faʼahi ʼaia?
6 Ko te lua puani ʼaē ʼe tuʼu ia Sofonia 2:3, ke tou “kumi te faitotonu.” Tokolahi ia tatou neʼe tou fai he ʼu fetogi lahi ke feala hatatou papitema, kae ʼe tonu ke tou lagolago tuʼumaʼu ʼi totatou maʼuli ki te ʼu lekula faitotonu ʼa te ʼAtua. Ko ʼihi ʼaē neʼe nātou kamata lelei te faʼahi ʼaia, neʼe nātou tuku ke ʼulihi nātou e te ʼu aga heʼemaʼa ʼo te mālama. ʼE mole faigafua te kumi ʼo te faitotonu, he ko te hahaʼi tokolahi ʼe nātou manatu ʼe ko he meʼa noa te ʼu felāveʼi fakasino heʼeʼaoga, mo te loi pea mo te tahi ʼu agahala. Kae ko tatatou lotomālohi ʼaē ke tou fakafiafia ia Sehova, ʼe feala ke ina tāʼofi tatatou fia kaumeʼa pea mo tatatou fia faifaitahi mo te mālama. Neʼe mole kei maʼu e Suta te ʼofa ʼa te ʼAtua he neʼe ina faʼifaʼitakiʼi te ʼu puleʼaga pagani ʼi ʼona ʼu tafa. ʼAua naʼa tou faʼifaʼitakiʼi te mālama, kae ke tou liliu ko he ʼu “faifaitaki o te Atua,” ʼo tou “kofu ki te tagata foou nee fakatupu o fai ki te Atua i te susitisia mo te maonioni o te mooni.”—Efeso 4:24; 5:1.
7. E feafeaʼi hatatou “kumi te agavaivai”?
7 Ko te tolu puani ʼaē ʼe tuʼu ia Sofonia 2:3, kapau ʼe tou loto ke fufū tatou ʼi te ʼaho ʼo te hāūhāū ʼo Sehova, pea ʼe tonu ke tou “kumi te agavaivai.” ʼI te ʼaho fuli pe, ʼe tou felāveʼi mo ni hahaʼi tagata, mo fafine, pea mo he kau tūpulaga ʼe mole agavaivai. ʼI tanatou manatu, ʼe ko he mele mokā kita agamālū. ʼE nātou ʼui ʼe kita vaivai mo kapau ʼe kita fakalogo ki he tahi. ʼE nātou aga fefeka, mo manatu pe kia nātou, mo nātou faiga ke tuʼu tanatou tonu, ʼo nātou tui ko te ʼu meʼa ʼaē ʼe tonu ke nātou fai pea mo te ʼu meʼa ʼaē ʼe nātou leleiʼia, ʼe tonu ke tali e te hahaʼi tatau aipe pe koteā anai tona ʼu fua. ʼI meʼa kovi leva mo kapau ʼe tou maʼu te ʼu aga ʼaia! ʼI te temi ʼaenī ʼe tonu ke tou “kumi te agavaivai.” ʼO feafeaʼi? ʼO tou fakalogo ki te ʼAtua, mo tou tali ʼaki he agavaivai ke ina fakatonutonuʼi tatou pea mo tou mulimuli ki tona finegalo.
He Koʼe “ ʼe Mahalo Pe” ʼe Fufū Anai Koutou?
8. He koʼe ʼe ʼui ia Sofonia 2:3, “ ʼe mahalo pe”?
8 Koutou fakatokagaʼi, ʼe ʼui fēnei ia Sofonia 2:3: “ ʼE mahalo pe ʼe fufū anai koutou ʼi te ʼaho ʼo te hāūhāū ʼo Sehova.” He koʼe ʼe ʼui “ ʼe mahalo pe” ʼo ʼuhiga mo te hahaʼi “agavaivai ʼo te kele”? Ko te hahaʼi agavaivai ʼaia neʼe nātou fai te ʼu meʼa lelei, kae neʼe mole tonu ke nātou falala fau kia nātou. Neʼe mole heʼeki ʼosi tanatou lele agatonu. Neʼe feala pe ke tō ʼihi ki te agahala. ʼE toe moʼoni te faʼahi ʼaia ʼo ʼuhiga mo tatou. Neʼe ʼui fēnei e Sesu: “Ko ae e kataki anai ki te gataʼaga, e mauli anai.” (Mateo 24:13) Ei, ko te hāofaki ʼi te ʼaho ʼo te hāūhāū ʼo Sehova ʼe fakalogo ki tatatou haga fai te meʼa ʼaē ʼe totonu ki ʼona mata. ʼE ko te meʼa koa ʼaia ʼaē ʼe koutou fakatotonu ke koutou fai?
9. Koteā te ʼu gāue lelei ʼaē neʼe fakahoko e te Hau tūpulaga ko Sosiasi?
9 ʼI tana lagi tali te ʼu palalau ʼa Sofonia, neʼe loto ai e te Hau ko Sosiasi ke ina “kumi ia Sehova.” ʼE ʼui fēnei e te Tohi-Tapu: “ ʼI te valu taʼu ʼo tana pule, ko [Sosiasi] ʼi tana kei tamasiʼi [neʼe ko tona lagi taʼu 16], neʼe ina kamata kumi te ʼAtua ʼo Tavite tana kui.” (2 Fakamatala 34:3) Tahi ʼaē meʼa, ko Sosiasi neʼe ina “kumi te faitotonu,” heʼe tou lau fēnei: “ ʼI te hogofulu-ma-lua taʼu ʼo tana pule [ʼi te lagi taʼu 20 ʼo Sosiasi] neʼe ina kamata fakamaʼa mai Suta pea mo Selusalemi te ʼu potu māʼoluga, mo te ʼu pou taputapu, mo te ʼu paki ʼaē neʼe togi pea mo te ʼu fakatātā ukamea. Tahi ʼaē meʼa, neʼe nātou maumauʼi ʼi ʼona muʼa te ʼu ʼaletale ʼo te ʼu Paale.” (2 Fakamatala 34:3, 4) Ko Sosiasi neʼe ina toe “kumi te agavaivai,” he neʼe gāue ʼaki he agavaivai moʼo fakafiafia ia Sehova, ʼo ina fakamaʼa te fenua mai te tauhi tamapua pea mo te ʼu toʼotoʼoga ʼo te lotu hala. Neʼe lagi fiafia lahi te kau agavaivai ʼi te ʼu fetogi ʼaia!
10. Koteā ʼaē neʼe hoko ki Suta ʼi te taʼu 607 ʼi muʼa ʼo totatou temi, kae ko ai ʼaē neʼe hāo?
10 Tokolahi te kau Sutea neʼe nātou toe liliu kia Sehova lolotoga te temi hau ʼo Sosiasi. Kae ʼi te ʼosi mate ʼa te hau, tokolahi neʼe nātou toe liliu ki tonatou maʼuli ʼāfea—ʼo nātou fai te ʼu aga ʼaē ʼe mole tali e te ʼAtua. Ohage ko tona fakatotonu e Sehova, neʼe maumauʼi e te kau Papiloni ia Suta pea mo tona kolo hau ko Selusalemi, ʼi te taʼu 607 ʼi muʼa ʼo totatou temi. Kae neʼe ʼi ai te ʼamanaki. Ko te polofeta ko Selemia, mo te tagata Etiopea ko Epeti-Meleki, mo te hākoga ʼo Sonatape, pea mo te tahi ʼu hahaʼi ʼaē neʼe agatonu ki te ʼAtua, neʼe fufū nātou ʼi te ʼaho ʼaia ʼo te hāūhāū ʼo Sehova.—Selemia 35:18, 19; 39:11, 12, 15-18.
Ke Tokakaga Te ʼu Fili ʼa Te ʼAtua
11. He koʼe ʼe ko he meʼa faigataʼa te nofo agatonu ki te ʼAtua ia ʼaho nei, kae koteā ʼaē ʼe tonu ke tokagaʼi e te ʼu fili ʼo te hahaʼi ʼa Sehova?
11 ʼI tatatou talitali ki te hoko mai ʼo te ʼaho ʼo te hāūhāū ʼo Sehova ki te tuʼu agakovi ʼaenī, ʼe tou felāveʼi mo he ʼu “faahiga ahiahi kehekehe.” (Sakopo 1:2) ʼI ʼihi fenua ʼaē ʼe faka maʼuhigaʼi ai te faʼifaʼitaliha ʼo te ʼu lotu, ko te kau takitaki lotu ʼe nātou fakaʼaogaʼi tonatou mālohi moʼo uga te ʼu pule ke nātou fakatagaʼi te hahaʼi ʼa te ʼAtua. Ko te ʼu tagata agakovi neʼe nātou fasituʼu ʼo ʼuhiga mo te kau Fakamoʼoni ʼa Sehova, ʼo nātou lau ko he “magaʼi lotu kovi.” ʼE ʼiloʼi e te ʼAtua tanatou aga—pea ʼe mole nātou hāo anai mai te tautea. ʼE tonu ke tokagaʼi e tona ʼu fili te ʼu meʼa ʼaē neʼe hoko ki te ʼu fili ʼo tana hahaʼi ʼo te temi muʼa, ohage ko te kau Filisitini. ʼE ʼui fēnei e te lea faka polofeta: “ ʼO ʼuhiga mo Kasa, ʼe liliu anai ko he koga meʼa kua līʼakina; pea ko Asekelone ʼe mole toe nofoʼi anai. ʼO ʼuhiga mo Asitolete, ʼi te fetapā ʼe kapu anai; pea ʼo ʼuhiga mo Ekiloni, ʼe taʼaki anai.” Ko te ʼu kolo Filisitini ʼaē ko Kasa, mo Asekelone, mo Asitote, pea mo Ekiloni ʼe fakaʼauha anai.”—Sofonia 2:4-7.
12. Koteā ʼaē neʼe hoko ki Filisitia mo Moape, pea mo Amone?
12 ʼE hoko atu fēnei te lea faka polofeta: “Neʼe ʼau logo ki te leakovi ʼa Moape pea mo te ʼu manuki ʼo te ʼu foha ʼo Amone, ʼo nātou leakoviʼi ai taku hahaʼi pea neʼe nātou laupisi tuʼumaʼu ʼo fakafeagai ki tonatou telituale.” (Sofonia 2:8) ʼE moʼoni, ko Esipito pea mo Etiopea neʼe nā maʼuli mamahi ʼi te ʼu nima ʼo te kau Papiloni. Kae neʼe koteā te fakamāu ʼa te ʼAtua kia Moape pea mo Amone, te ʼu puleʼaga ʼaē ʼe hifo mai ia Lote, te ʼilāmutu ʼo Apalahamo? Neʼe fakakikite fēnei e Sehova: “Ko Moape ʼe liliu anai ohage ko Sotoma, pea ko te ʼu foha ʼo Amone ohage ko Komola.” ʼO mole hage ko tanatou ʼu kui—te ʼu ʼofafine e toko lua ʼo Lote, ʼaē neʼe nā hāo ʼi te fakaʼauha ʼo Sotoma pea mo Komola—ko te ʼu kolo fialahi ko Moape pea mo Amone neʼe mole fufū ʼi te fakamāu ʼa te ʼAtua. (Sofonia 2:9-12; Senesi 19:16, 23-26, 36-38) Ia ʼaho nei, ʼe ʼifea koa ia Filisitia pea mo tona ʼu kolo? E feafeaʼi ʼo ʼuhiga mo te ʼu kolo fialahi ko Moape pea mo Amone? Koutou kumi, kae ʼe mole koutou maʼu anai te ʼu kolo ʼaia.
13. Koteā ʼaē neʼe maʼu e te tagata fai alekeolosia ʼi Ninive?
13 ʼI te temi ʼo Sofonia, neʼe kua mālohi ʼaupito te Puleʼaga ʼo Asilia. Ko te tagata fai alekeolosia ko Austen Layard, neʼe ina fakamatalatala te koga ʼo te fale hau neʼe ina maʼu ʼi Ninive, te kolo hau ʼo Asilia, ʼo ina tohi fēnei: “Ko te ʼu ʼaofi . . . neʼe vaevae tapa fā, pea neʼe pena ai te ʼu fisiʼi teu, peʼe ko he ʼu manu. Ko ʼihi neʼe teuteuʼi ʼaki te ivoire, pea neʼe fakamataleleiʼi pea mo togi te ʼu tuʼakoi ʼo te ʼu faʼahi fuli. Ko te ʼu lalago pea mo te ʼu tafaʼaki ʼo te ʼu kogafale neʼe lagi ʼaofi ʼaki te aulo mo te siliva mānifi peʼe mātolu, pea ko te ʼu ʼakau maʼu gataʼa, tāfito te setele, neʼe fakaʼaogaʼi e te ʼu fale tufuga ʼakau.” Kae ohage ko tona fakakikite ʼi te lea faka polofeta ʼa Sofonia, neʼe tonu ke fakaʼauha ia Asilia pea mo tona kolo hau ko Ninive, pea “ko he koga meʼa [ʼe] līʼakina” anai.—Sofonia 2:13.
14. Neʼe hoko feafeaʼi ki Ninive te lea faka polofeta ʼa Sofonia?
14 Hili pe taʼu e 15 ʼi te ʼosi tala e Sofonia te lea faka polofeta ʼaia, neʼe maumauʼi te kolo mālohi ʼo Ninive, pea neʼe laliki mo tona fale hau. Ei, ko te kolo fialahi ʼaia neʼe maumauʼi katoa. Neʼe fakakikite lelei fēnei te fakaʼauha lahi ʼaia: “Ko te pelikani pea mo te manu kili talatala ʼe nā nonofo anai ʼi te pōʼuli ʼi tona ʼu fuga kolona [ʼaē kua holoʼi]. ʼE hiva tuʼumaʼu anai te leʼo ʼi te matapā fakamālama. ʼE hoko anai te fakaʼauha ʼi te muʼa matapā.” (Sofonia 2:14, 15) Ko te ʼu fale māʼoluga ʼo Ninive ʼe liliu anai ohage pe ko he ʼu koga meʼa ʼe nofoʼi e te ʼu manu kili talatala pea mo te ʼu pelikani. ʼE mole kei logoʼi te ʼu leʼo ʼo te hahaʼi fai fakatau, te kalaga ʼa te kau solia, pea mo te hiva ʼa te kau pelepitelo. ʼI te ʼu ala ʼaia ʼaē neʼe logoaʼa ʼi te temi muʼa, ʼe kita logo pe anai ki he leʼo ʼe ina fai he hiva lotomamahi, lagi ko te tagi ʼa he misi peʼe ko te agi ʼo te matagi. ʼOfa pe ke toe feiā mo te fakaʼosi ʼo te ʼu fili fuli ʼo te ʼAtua!
15. Koteā te ako ʼe feala ke tou tāʼofi mai te meʼa ʼaē neʼe hoko ki Filisitia, mo Moape, mo Amone, pea mo Asilia?
15 Koteā te ako ʼe tou tāʼofi mai te meʼa ʼaē neʼe hoko ki Filisitia mo Moape, mo Amone, pea mo Asilia? Ko tatou, ʼi totatou ʼuhiga kau kaugana ʼa Sehova, ʼe mole tonu ke tou matataku ʼi totatou ʼu fili. ʼE sio te ʼAtua ki te ʼu meʼa ʼaē ʼe fai e nātou ʼaē ʼe fakafeagai ki tana hahaʼi. ʼI te temi muʼa, neʼe fakafeagai Sehova ki tona ʼu fili, pea ia ʼaho nei, ʼe ina fakahoko anai tana ʼu fakamāu ki te hahaʼi fuli ʼaē ʼe nonofo ʼi te kele. Kae ʼe hāo anai ni ʼu hahaʼi—‘ko te hahaʼi tokolahi mai te ʼatu ʼu fenua.’ (Apokalipesi 7:9) ʼE feala ke koutou kau ia nātou—kapau ʼe koutou haga kumi ia Sehova, mo kumi te faitotonu, pea mo kumi te agavaivai.
Malaʼia Ki Te Kau Agakovi Agapauʼu!
16. Koteā ʼaē neʼe ʼui e te lea faka polofeta ʼa Sofonia ʼo ʼuhiga mo te ʼu tama ʼaliki ʼo Suta pea mo te kau takitaki lotu, pea he koʼe ʼe faka ʼuhiga te ʼu palalau ʼaia ki te Keletiate?
16 ʼE toe talanoa te lea faka polofeta ʼa Sofonia ʼo ʼuhiga mo Suta pea mo Selusalemi. ʼE ʼui fēnei ia Sofonia 3:1, 2: “Malaʼia kia ia ʼaē ʼe agatuʼu pea mo ina ʼulihi ia ia, ki te kolo ʼaē ʼe fakamamahiʼi. Neʼe mole fakalogo ia ki he leʼo; neʼe mole ina tali te fakatonutonuʼi. Neʼe mole falala ia kia Sehova. Neʼe mole fakaōvi ia ki tona ʼAtua.” ʼE ko he meʼa fakaʼofaʼofa te faiga ʼa Sehova ke ina fakatonutonuʼi tana hahaʼi kae mole nātou tokagaʼi! Pea neʼe toe fakaʼofaʼofa mo te aga fefeka ʼa te kau tama ʼaliki, mo te kau ʼaliki, pea mo te ʼu tuʼi fakamāu. Neʼe tauteaʼi e Sofonia te agakovi ʼa te kau takitaki lotu, ʼi tana ʼui fēnei: “Neʼe agapauʼu tana ʼu polofeta, neʼe aga kākā tana ʼu tagata. Neʼe ʼulihi e tana ʼu pelepitelo te meʼa ʼaē neʼe maʼoniʼoni, neʼe nātou fakafeagai ki te lao.” (Sofonia 3:3, 4) ʼE tuha te ʼu palalau ʼaia mo te ʼaluʼaga ʼo te kau polofeta pea mo te kau patele ʼo te Keletiate ia ʼaho nei! ʼI tanatou agapauʼu, neʼe nātou molehi te huafa ʼo te ʼAtua ʼi tanatou ʼu Tohi-Tapu pea mo nātou akoʼi he ʼu akonaki hala ʼo ʼuhiga mo Ia ʼaē ʼe nātou lau ʼe nātou atolasioʼi.
17. Tatau aipe peʼe fakalogo te hahaʼi peʼe kailoa, kae he koʼe ʼe tonu ke tou haga tala te logo lelei?
17 ʼI tana agalelei, neʼe fakatokagaʼi e Sehova ki tana hahaʼi ʼo te temi muʼa, te meʼa ʼaē ka ina fai. Neʼe ina fekauʼi tana ʼu kaugana te kau polofeta—ʼaē neʼe kau ai ia Sofonia pea mo Selemia—moʼo uga te hahaʼi ke nātou fakahemala. Ei, “ko Sehova . . . neʼe mole heʼe agatonu. ʼI te ʼaho ki te tahi ʼaho neʼe ina fakahā tana tonu fai fakamāu. ʼI te tuʼu ʼo te ʼaho neʼe mole hala ai.” Koteā ʼaē neʼe hoko? Neʼe ʼui fēnei e Sofonia: “Kae ko te tagata heʼe agatonu neʼe mole ina ʼiloʼi te ufiufi.” (Sofonia 3:5) ʼE toe fai te fakatokaga feiā ʼi te temi ʼaenī. Kapau ʼe koutou faka mafola te logo lelei, pea ʼe koutou kau ki te gāue ʼaia. Koutou haga tala mālohi te logo lelei! Tatau aipe pe fakalogo te hahaʼi peʼe kailoa, kae ʼe fua lelei takotou gāue ia mata ʼo te ʼAtua mo kapau ʼe koutou agatonu ʼo fakahoko tuʼumaʼu, ʼe mole tonu ke koutou ufiufi ʼi takotou faʼafai ʼi te gāue ʼa te ʼAtua.
18. ʼE hoko feafeaʼi anai ia Sofonia 3:6?
18 Ko te fakamāu ʼaē ka fai e te ʼAtua ʼe mole gata pe anai ki tana maumauʼi ia te Keletiate. ʼE faka mafola e Sehova tana tautea ki te ʼu puleʼaga fuli: “Neʼe ʼau taʼaki te ʼu puleʼaga; ko tonatou ʼu tule neʼe holoʼi. Neʼe ʼau maumauʼi tonatou ʼu ala, ʼo mole fakalaka ai he tahi. Ko tonatou ʼu kolo kua lailai.” (Sofonia 3:6) ʼE palalau ia Sehova ʼo ʼuhiga mo te fakaʼauha ʼaia ohage ko he meʼa kua hoko, koteʼuhi ʼe ina fakahoko moʼoni anai. Koteā ʼaē neʼe hoko ki te ʼu kolo ʼo Filisitia mo Moape, pea mo Amone? Pea neʼe feafeaʼi ʼo ʼuhiga mo Ninive, te kolo hau ʼo Asilia? Ko tonatou fakaʼauha ʼe ko he fakatokaga ki te ʼu puleʼaga ia ʼaho nei. ʼE mole tonu ke kita manukinuki ki te ʼAtua.
Koutou Haga Kumi Ia Sehova
19. Koteā te ʼu fehuʼi ʼaē ʼe feala ke kita fakakaukauʼi?
19 ʼI te temi ʼo Sofonia, neʼe hoko te hāūhāū ʼo Sehova ki te kau agakovi ʼaē neʼe nātou “ ʼulihi tanatou aga fuli.” (Sofonia 3:7) ʼE toe hoko anai he meʼa feiā ʼi totatou temi. ʼE koutou sio koa ki te kua ōvi moʼoni mai ʼo te ʼaho ʼo te hāūhāū ʼo Sehova? ʼE koutou haga “kumi [koa] ia Sehova” ʼo koutou lau tuʼumaʼu tana Folafola—ʼi te ʼaho fuli? ʼE koutou “kumi [koa] te faitotonu” ʼo koutou taupau ke maʼa tokotou maʼuli ʼo mulimuli ki te ʼu lekula ʼa te ʼAtua? Pea ʼe koutou ‘haga kumi koa te agavaivai’ ʼo koutou agavaivai mo fakalogo ki te ʼAtua pea mo tana ʼu fakatuʼutuʼu ki te fakamaʼuli?
20. Koteā te ʼu fehuʼi ʼaē ka tou vakaʼi anai ʼi te alatike fakamuli ʼo te ʼu alatike ʼaenī ʼo ʼuhiga mo te lea faka polofeta ʼa Sofonia?
20 Kapau ʼe tou agatonu ʼo kumi ia Sehova, mo te faitotonu, pea mo te agavaivai, pea ʼe tou maʼu anai he ʼu tapuakina lahi ʼi te temi nei—ei, māʼia ʼi “te u aho fakamuli” ʼaenī ʼaē ʼe ʼahiʼahiʼi ai tatatou tui. (2 Timoteo 3:1-5; Tāʼaga Lea 10:22) Kae ʼe lagi tou feʼekeʼaki, ‘Ko te ʼu ʼaluʼaga fea ʼaē ʼe tapuakina ai te ʼu kaugana ʼa Sehova ʼo te temi nei, pea koteā te ʼu tapuakina ka haʼu neʼe fakakikite e te lea faka polofeta ʼa Sofonia kia nātou ʼaē ka fufū anai ʼi te ʼaho ʼo te hāūhāū ʼo Sehova ʼaē ʼe fakavilivili mai?’
ʼE Koutou Tali Feafeaʼi Anai?
• Ko te hahaʼi e feafeaʼi tanatou “kumi ia Sehova”?
• Koteā te faka ʼuhiga ʼo te ‘kumi ʼo te faitotonu’?
• E feafeaʼi hatatou “kumi te agavaivai”?
• He koʼe ʼe tonu ke tou haga kumi ia Sehova, mo te faitotonu, pea mo te agavaivai?
[Paki ʼo te pasina 18]
ʼE koutou kumi koa ia Sehova ʼo koutou ako te Tohi-Tapu pea mo faikole fakamalotoloto?
[Paki ʼo te pasina 21]
ʼE hāo anai te toe hahaʼi tokolahi ʼi te ʼaho ʼo te hāūhāū ʼo Sehova heʼe nātou haga kumi ia ia