Tou Tauʼi Te ʼu Meʼa ʼAē ʼe Fakafeagai Ki Te Agatonu!

“Koutou kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.”​—Efesi 4⁠:24.

1. He koʼe ʼe tonu ke tou agatonu kia Sehova ʼAtua?

KO TE tauʼi ʼo te ʼu meʼa ʼaē ʼe fakafeagai ki te agatonu ʼe lahi ʼaupito tona ʼu agaaga. Ko te meʼa ʼaē ʼe maʼuhiga age ko tatatou tauʼi te meʼa ʼaē ʼe fakafeagai ki tatatou agatonu kia Sehova ʼAtua. ʼE moʼoni, ʼi tatatou ʼiloʼi ʼaē pe ko ai ia Sehova, pea mo te ʼu meʼa ʼaē neʼe ina fai maʼa tatou, pea mo tatatou foaki totatou maʼuli kia te ia, ʼe tonu ke tou agatonu kia te ia. E feafeaʼi koa hatatou fakahā tatatou agatonu kia Sehova ʼAtua? ʼE maʼua tāfito ke tou agatonu ki te ʼu lekula faitotonu ʼa Sehova.

2, 3. Koteā te pikipikiga ʼo te agatonu pea mo te faitotonu?

² Moʼo tauʼi ʼo te ʼu meʼa ʼaia, ʼe tonu ke tou tokagaʼi te ʼu palalau ʼaē ʼe tuʼu ia 1 Petelo 1:​15, 16: “ ʼO ʼalutahi mo te Maʼoniʼoni ʼaē neʼe ina pāui koutou, mo koutou foki koutou liliu ʼo maʼoniʼoni ʼi takotou aga katoa, heʼe tohi fēnei: ‘ ʼE tonu ke koutou maʼoniʼoni, heʼe ʼau maʼoniʼoni.’ ” Ko te agatonu kia Sehova ʼAtua ʼe ina uga anai tatou ke tou fakalogo kia te ia ʼi te temi fuli pe, ke tou faka ʼalutahi tatatou ʼu manatu, tatatou ʼu palalau, pea mo tatatou ʼu gāue mo tona finegalo taputapu. Ko tona faka ʼuhiga ke tou taupau maʼu he leʼo ʼo loto ʼe lelei, ohage ko tona fakatotonu mai kia tatou ia 1 Timoteo 1:​3-5: “ ʼE mahino ia ko te fakatuʼutuʼu ʼo te fakatotonu ʼaenī [ʼe mole ko te ako ʼo he tahi akonaki peʼe ko te tokaga ki te ʼu hisitolia loi kae] ʼe ko te ʼofa ʼaē ʼe haʼu mai he loto ʼe maʼa pea mo he leʼo ʼo loto ʼe lelei pea mo he tui ʼe mole malualoi.” ʼE moʼoni, ʼe mole he tahi ia tatou ʼe haohaoa, kae ʼe tonu ke tou faiga fakamalotoloto ke tou fai te faʼahi ʼaia, kaeā koa la?

³ Ko te agatonu kia Sehova ʼe ina taupau anai tatou mai te manatu pe ʼaē kia kita, ʼo mole tou fai he ʼu meʼa ʼe fakafeagai ki te ʼu pelesepeto faitotonu. ʼE moʼoni, ko te faitotonu ʼe ina taupau anai tatou mai te maʼuli malualoi. Ko te agatonu ʼe ko te meʼa ʼaē neʼe manatuʼi e te tagata fai pesalemo ʼi tana hiva fēnei: “Akoʼi ʼau ki tou ala, Ê Sehova! ʼE ʼau haʼele anai ʼi tou moʼoni. Gaohi ke tahi toku loto ke ʼau manavasiʼi ki tou huafa.” (Pesalemo 86:11) Ko te agatonu ʼe ina fakamaʼua te meʼa ʼaē neʼe fakamahino lelei ohage ko te “fakalogo ki te ʼu lao peʼe ko te ʼu pelesepeto ʼaē ʼe mole feala ke fakakinauʼi e he tagata ki he tahi.”

4, 5. Ko te agatonu ʼe ina tāʼofi anai tatou ke ʼaua naʼa tou fai te aga fea?

⁴ Ko te agatonu kia Sehova ʼAtua ʼe ina taupau anai tatou ke ʼaua naʼa tou fai he meʼa ʼe fakatupu ufiufi ki tona huafa pea mo tona Puleʼaga. Ohage la, ko te ʼu Kilisitiano ʼe toko lua neʼe nā tokakovi pea neʼe nā ʼolo ʼo fakatokatoka ʼi te telepinale kae neʼe mole tonu ke nā fai feiā. Neʼe fehuʼi age e te tuʼi fakamāu kia nāua, ‘Ko koulua ko te ʼu Fakamoʼoni ʼa Sehova?’ ʼE mahino ia neʼe mole mahino kia ia pe koʼe neʼe nā ʼolo age ki te telepinale. ʼI meʼa fakaufiufi foki! Ko te agatonu ʼaē kia Sehova ʼAtua neʼe tonu ke ina uga te ʼu tēhina ʼaia ke nā tokagaʼi te tokoni ʼaenī ʼa te ʼapositolo ko Paulo: “ ʼE mahino papau ia, ʼe ko he lavā katoa ʼo koutou ʼi takotou fefakamāuʼaki. He koʼe ʼe mole koutou tuku ke faka lākahalaʼi koutou? He koʼe ʼe mole koutou tuku ke koutou hala ʼi he meʼa.” (1 Kolonito 6:7) ʼE mahino papau ia, ko te agatonu ʼaē kia Sehova ʼAtua ʼe ina faka fealagia ke kita tali ke faka lākahalaʼi kita, ʼi takita fakatupu ufiufi ʼaē kia Sehova pea mo tana kautahi.

⁵ Ko te agatonu kia Sehova ʼAtua ʼe toe pipiki kiai te mole manavasiʼi ki te tagata. “Ko te mataku ki te tagata koʼena te meʼa ʼe liliu ko he hele, kae ko ia ʼaē ʼe falala kia Sehova ʼe puipui anai ia.” (Tāʼaga Lea 29:25) Koia, ʼe mole tou tali anai he meʼa ʼe mole ʼalutahi mo tatatou tui mokā fakatagaʼi tatou, kae ʼe tou mulimuli anai ki te faʼifaʼitaki ʼaē neʼe tuku mai e te kau Fakamoʼoni ʼa Sehova ʼi te Lusia ʼāfea, ʼi Malaui, ʼi Etiopea, pea mo te tahi ʼatu ʼu fenua.

6. Ko te agatonu ʼe ina tāʼofi anai tatou ke ʼaua naʼa tou fakatahi mo te hahaʼi fea?

⁶ Kapau ʼe tou agatonu kia Sehova ʼAtua, ʼe mole tou fia kaumeʼa anai mo nātou fuli ʼaē ʼe ko tona ʼu fili. Ko te tupuʼaga la ʼaia ʼo te tohi e te tisipulo ko Sake te meʼa ʼaenī: “Kau fafine tono, ʼe mole koutou ʼiloʼi koa la ko te ʼofa ki te malamanei ʼe ko he fehiʼa ia ki te ʼAtua? Ko ʼaē ʼe fia kaumeʼa mo te malamanei ʼe liliu ia ko he fili ʼo te ʼAtua.” (Sake 4:4) ʼE tou fia agatonu ohage ko te Hau ko Tavite ʼi tana ʼui ʼaē: “ ʼE mole ʼau fehiʼa koa la kia nātou ʼaē ʼe fehiʼa ʼaupito kia te koe, Ê Sehova, pea ʼe mole ʼau fakalialia koa la kia nātou ʼaē ʼe fakafeagai kia te koe? ʼE ʼau fehiʼa kia nātou ʼi he fehiʼa katoa. Kua nātou liliu nātou kia te ʼau ko te kau fili moʼoni.” (Pesalemo 139:21, 22) ʼE mole tou fia faifaitahi mo te hahaʼi ʼaē ʼe agahala ʼi tonatou loto faʼifaʼitaliha, koteʼuhi ʼe mole tatau totatou maʼuli mo tonatou maʼuli. ʼE taupau anai koa tatou e te agatonu ki te ʼAtua, ke ʼaua naʼa tou faifaitahi mo te ʼu fili ʼaia ʼo Sehova, tatau aipe peʼe tou palalau mo nātou peʼe tou sioʼi ia nātou ʼi te televisio?

Tou Lagolago Kia Sehova

7. Ko te agatonu ʼe tokoni anai kia tatou ke tou fai te meʼa fea ʼo ʼuhiga mo Sehova, pea neʼe fai feafeaʼi e Eliu te faʼahi ʼaia?

⁷ Ko te agatonu ʼe ina uga anai tatou ke tou lagolago kia Sehova ʼAtua. ʼI faʼifaʼitaki lelei leva ʼaē neʼe tuku mai e Eliu! ʼE ʼui fēnei mai e Sopo 32:​2, 3 kia tatou: “Ko te ʼita ʼo Eliu . . . neʼe kakaha ʼaupito. Neʼe tō tona ʼita kia Sopo koteʼuhi neʼe ina ʼui ʼe faitotonu age tona nefesi ʼi te ʼAtua. Neʼe toe tō foki tona ʼita ki tona ʼu kaumeʼa ʼe toko tolu, koteʼuhi neʼe mole nātou maʼu he tali, kae neʼe nātou ʼui ʼe agakovi te ʼAtua.” Ia Sopo kapite 32 ki te 37, ʼe lagolago ia Eliu kia Sehova. Ohage la, neʼe ina ʼui fēnei: “Ke ke kātakiʼi ʼau ʼi he kiʼi temi nounou, pea ʼe ʼau fakahā atu anai kia te koe ʼe kei ʼi ai te ʼu palalau ʼe tonu ke fai ʼo ʼuhiga mo te ʼAtua. . . . Kia Ia ʼaē neʼe ina Faʼu ʼau ʼe ʼau ʼui ʼo ʼuhiga mo ia ʼe faitotonu. . . . ʼE mole ina toʼo kehe anai tana sio mai te faitotonu.”​—Sopo 36:​2-7.

8. He koʼe ʼe tonu ke tou lagolago kia Sehova?

⁸ He koʼe ʼe tonu ke tou lagolago kia Sehova? Ia ʼaho nei, ʼe lahi ʼaupito te ʼu faʼahi ʼe leakoviʼi ai totatou ʼAtua ko Sehova. ʼE ʼui ʼo ʼuhiga mo ia ʼe mole maʼuli moʼoni ia, ko ia ko he koga ʼo te Tahitolu, ʼe ina fakamamahiʼi ʼo heʼegata te hahaʼi ʼi he ʼifeli kakaha, ʼe ina faigaʼi māmālie ke ina fakamaliu te hahaʼi, ʼe mole tokaga ia ki te malamanei, pea mo te tahi ʼu meʼa. ʼE tou fakahā tatatou agatonu kia Sehova ʼaki tatatou lagolago kia te ia pea mo tatatou fakamoʼoni ʼe maʼuli moʼoni ia ia; ʼe poto, ʼe faitotonu, ʼe māfimāfi, pea ʼe ko te ʼAtua ʼofa, ʼe ina fakatuʼutuʼu te temi ʼo ʼuhiga mo te ʼu meʼa fuli; pea ka hoko mai tona temi, ʼe ina fakagata anai te agakovi pea ʼe ina fakatuʼu anai te palatiso ʼi te kele katoa. (Tagata Tānaki 3:1) Ko te faʼahi ʼe fakamaʼua ai kia tatou ke tou fakaʼaogaʼi te ʼu fealagia fuli ke tou fakamoʼoni ai ki te huafa ʼo Sehova pea mo tona Puleʼaga.

Tou Agatonu Ki Te Kautahi ʼa Sehova

9. Ko te ʼu faʼahi fea ʼaē neʼe lītuʼa ai ʼihi ki tanatou agatonu?

⁹ ʼI te temi nei ʼe tou palalau anai ki te agatonu ki te kautahi fakahāhā ʼa Sehova. ʼE mahino ia, ʼe tonu ke tou agatonu kiai, pea mo tou agatonu ki “te tagata kaugana agatonu mo poto,” ʼaē ʼe ina fafaga te kokelekasio faka Kilisitiano ʼi te faʼahi fakalaumālie. (Mateo 24:45-​47) Ohage la kapau ʼe fakahā he puani ʼi Te Tule Leʼo ʼe mole tou mahino kiai peʼe mole ʼalutahi tatatou manatu mo te puani ʼi te temi ʼaia. Koteā anai te meʼa ʼaē ka tou fai? ʼE tou ʼiʼita anai koa pea mo tou mavae ʼi te kautahi? Koʼena te meʼa ʼaē neʼe fai e ʼihi kua hili kiai ni ʼu taʼu ʼi te temi ʼaē neʼe faka ʼuhiga ai e Te Tule Leʼo, te fuakava foʼou ki te ʼu taʼu e Afe. Ko ʼihi neʼe nātou ʼiʼita ki te talanoa ʼa Te Tule Leʼo ʼi te tahi temi ʼo ʼuhiga mo te mole kau ʼa te kau Kilisitiano ki te ʼu meʼa ʼo te malamanei. Kanapaula ko nātou ʼaē neʼe tūkia ʼi te ʼu fakamatala ʼaia neʼe nātou agatonu ki te kautahi pea mo tonatou ʼu tēhina, ka na ʼaua la neʼe nātou talitali ke fakamālamaʼi e Sehova te ʼu faʼahi ʼaia, ʼi tona temi totonu. Koia, ko te agatonu ʼe kau kiai te talitali fakalelei ki he tahi ʼu fakamahino ʼaē ka tā e te tagata kaugana agatonu mo poto.

10. Ko te agatonu ʼe ina tāʼofi anai tatou ke ʼaua naʼa tou fia ʼiloʼi te meʼa fea?

¹⁰ Ko te agatonu ki te kautahi fakahāhā ʼa Sehova, ko tona tahi faka ʼuhiga ko te līaki ʼo te ʼu manatu faka ʼaposita. Ko te kau Kilisitiano agatonu ʼe mole nātou fia ʼiloʼi anai te ʼu meʼa ʼaē ʼe lau e te kau ʼaposita ʼaia. ʼE moʼoni, ko te ʼu tagata ʼaē neʼe fakaʼaogaʼi e Sehova ʼAtua moʼo takitaki ʼo tana gāue ʼi te kele ʼe nātou heʼe haohaoa. Kae koteā koa te meʼa ʼe ʼui mai e te Folafola ʼa te ʼAtua ke tou fai? Ke tou mavae koa ʼi te kautahi ʼa te ʼAtua? Kailoa. Ko te ʼofa fakatautehina ʼe tonu ke ina uga tatou ke tou agatonu ki tana kautahi, pea ʼe tonu ke hoholo atu tatatou “feʼofamamahiʼaki.”​—1 Petelo 1:⁠22.

Tou Agatonu Ki Te ʼu Tagata ʼĀfea Agatonu

11. Ko te agatonu ʼe tokoni anai kia tatou ke tou fakamamaʼo mai te manatu kovi fea?

¹¹ Kapau ʼe fakahā he meʼa peʼe fai he meʼa ʼi te kokelekasio ʼe faigataʼa tatatou mahino kiai, ko te agatonu ʼe tokoni anai kia tatou ke ʼaua naʼa tou fakamāuʼi, pea ʼe toe tokoni anai kia tatou ke tou lagolago ki te tonu ʼaē neʼe fai. ʼE mole lelei age koa la tatatou tokagaʼi te ʼu kalitate lelei ʼo te ʼu tagata ʼāfea ʼaē neʼe fakanofo, pea mo te ʼu kalitate ʼo ʼihi ʼo totatou ʼu kaugā fagona ʼi te tui, ʼi tatatou tokagaʼi tonatou ʼu mele? ʼIo, ʼe tou fia fakamamaʼo ʼi te ʼu faʼahiga manatu fuli ʼaia ʼe mole lelei, koteʼuhi ʼe pipiki ki te heʼe agatonu! Ko te agatonu ʼe toe tokoni anai kia tatou ke tou fakalogo ki te tokoni ʼaenī ʼa te ʼapositolo ko Paulo “ke ʼaua naʼa [tou] palalau kovi ki he tahi.”​—Tito 3:​1, 2.

12, 13. Koteā te ʼu meʼa tāfito ʼaē ʼe fakamaʼua ki te ʼu tagata ʼāfea?

¹² ʼE lahi te ʼu faʼahi maʼuhiga ʼe pipiki kiai te agatonu ʼa te kau tagata ʼāfea. ʼI te ʼu faʼahi ʼaia ʼe kau kiai te taupau ʼo te ʼu meʼa fakalilo ʼo te kokelekasio. Ko he tahi ʼi te kokelekasio ʼe feala ke ʼalu ʼo fakahā hona fihifihia ki he tagata ʼāfea. Ko te agatonu kia ia ʼaia ʼe tokoni anai ki te tagata ʼāfea ke ʼaua naʼa ina fakahā te fihifihia ʼaia. ʼE ina tokagaʼi anai te tokoni ʼaē ʼe tuʼu ia Tāʼaga Lea 25:9: “ ʼAua naʼa ke fakahā te ʼu logo fakalilo ʼa ʼihi.” Māʼiape la mo tona ʼohoana ʼe mole tonu ke ina fakahā ki ai te ʼu meʼa ʼaia!

¹³ Tahi ʼaē meʼa, ʼe ʼi ai te tahi ʼu faʼahi ʼe tonu ke agatonu ai te kau tagata ʼāfea. ʼE nātou faigaʼi anai koa ke leleiʼia nātou e te hahaʼi, peʼe nātou lototoʼa anai pea mo agamālū mokā ʼe nātou tokoniʼi ia nātou ʼaē ʼe ʼaoga kiai he tokoni, tatau aipe pe ko tonatou ʼu kāiga peʼe ko tonatou ʼu kaumeʼa? Ko te agatonu ki te kautahi ʼa Sehova ʼe ina uga anai te ʼu tagata ʼāfea ke nātou faiga ke nātou tokoni ki ʼaē ʼe ʼaoga kiai he tokoni ʼi te faʼahi fakalaumālie. (Kalate 6:​1, 2) Ko te agatonu ʼe ina uga anai tatou ke tou palalau fakahagatonu mo ʼotatou ʼu kaugā fagona ʼaē ʼe tagata ʼāfea, ohage pe ko te palalau fakahagatonu ʼa Paulo ki te ʼapositolo ko Petelo. (Kalate 2:​11-​14) Tahi ʼaē meʼa, ko te ʼu tagata taupau ʼe nātou tokakaga fakalelei anai, ke ʼaua naʼa nātou aga heʼe fakapotopoto peʼe nātou fakapalatahi peʼe nātou fakaʼaogaʼi kovi tonatou ʼuhiga pule ʼi he tahi faʼahi, ʼo faigataʼa ai te agatonu ʼa te kokelekasio ki te kautahi ʼa te ʼAtua.​—Filipe 4:5.

14, 15. Koteā te ʼu meʼa ʼaē ʼe feala ke liliu ko he ʼu ʼahiʼahi ki te agatonu ʼa te kokelekasio?

¹⁴ ʼE ʼi ai te tahi ʼu faʼahi ʼe ʼaoga moʼo tauʼi ʼo te ʼu meʼa ʼaē ʼe fakafeagai ki te agatonu ki te kokelekasio pea mo te kau tagata ʼāfea. Kapau ʼe ʼi ai he ʼu ʼaluʼaga ʼe fakatupu kovi ki te kokelekasio, ko te faʼahi ʼaia ʼe ina faka fealagia kia tatou ke tou fakahā te agatonu kia Sehova pea mo nātou ʼaē ʼe nātou fakafofoga ia ia. (Vakaʼi Te Tule Leʼo, ʼo te ʼaho 15 ʼo Sūnio 1987, ʼi te ʼu pasina 15-​17.) Ka fakamavae he tahi, ko te agatonu ʼe tokoni anai kia tatou ke tou lagolago ki te kau tagata ʼāfea, kae mole tou faiga anai ke tou kumikumi pe neʼe ʼi ai he ʼu tupuʼaga lelei ʼo tona fakamavae.

¹⁵ Ko te agatonu ki te kokelekasio ʼe ina toe fakamaʼua kia tatou ke tou lagolago ki te ʼu fono e nima ʼaē ʼe fai ʼi te vāhaʼa fuli ʼo mulimuli ki totatou ʼu fealagia. Ko te agatonu ʼe ina fakamaʼua kia tatou ke mole gata pe ʼi tatatou ʼolo tuʼumaʼu ki te ʼu fono, kae ke tou teuteuʼi foki te ʼu fono, pea mo tou fai he ʼu tali ʼe fakatupu lotomālohi, mokā ʼe tuku mai he fealagia ke tou fai ai te faʼahi ʼaia.​—Hepeleo 10:24, 25.

Te Nofo Lelei ʼi Te Nofo Faka Taumatuʼa

16, 17. Koteā te ʼu meʼa ʼaē ʼe tonu ke tokakaga ki ai te kau Kilisitiano ʼaē kua ʼohoana?

¹⁶ Ko ai koa ʼaē ʼe tonu ke tou toe agatonu kiai? Kapau kua tou ʼohoana, ʼo mulimuli ki tatatou fakapapau ʼi tatatou ʼohoana, ʼe tou fakahoko te maʼua ʼaē ko te nofo lelei ki totatou ʼohoana. Ko te nofo lelei ki totatou ʼohoana ʼe ina taupau anai tatou ke ʼaua naʼa lahi age tatatou agalelei ki he tahi fafine peʼe ko he tahi tagata, ʼi totatou ʼohoana totonu. Ko te nofo lelei ki totatou ʼohoana ʼe ina toe fakamaʼua kia tatou ke mole tou fakahā ki niʼihi te ʼu vaivaiʼaga peʼe ko te ʼu hala ʼo totatou ʼohoana. ʼE faigafua age tatatou lāuga ki niʼihi, ʼi tatatou gāue kinakina moʼo taupau ʼo te ʼu felogoi lelei mo totatou ʼohoana, ʼaē ʼe tonu ke ʼalutahi mo te Lekula Aulo. (Mateo 7:​12) ʼI tona fakahagatonu, ko te nofo ʼohoana ʼe ko he meʼa ʼe fakamaʼua moʼoni kiai tatatou agatonu faka Kilisitiano.

¹⁷ Moʼo tauʼi ʼo te meʼa ʼaē ʼe fakafeagai ki te agatonu, ʼe mole gata pe ʼi tatatou tekeʼi te fai ʼo he agahala mamafa, kae ʼe tonu foki ke tou tokakaga ki tatatou ʼu manatu pea mo te ʼu meʼa ʼaē ʼi totatou loto. (Pesalemo 19:14) Ohage la, kapau ko te ʼu holi kovi ʼo totatou loto ʼe mānumānu ki te ʼu fiafia, pea mo te ʼu meʼa ʼaē ʼe nātou fakatupu te ʼu holi kovi, ʼe faigafua anai hatatou holi ki te meʼa ʼaia ʼo tupu ai mo tatatou loto kiai. ʼI tana fakaloto mālohiʼi te nofo lelei faka taumatuʼa, neʼe tokoniʼi e te Hau ko Salomone te ʼu tagata ʼohoana ʼi hona ʼaluʼaga fakatā ke nātou ‘ ʼinu te vai ʼo tonatou tane totonu.’ (Tāʼaga Lea 5:​15) Pea neʼe ʼui fēnei e Sesu: “Kaʼe ʼau tala atu ʼau kia koutou, ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto.” (Mateo 5:​28) Ko te ʼu tagata ʼohoana ʼaē ʼe nātou leleiʼia te ʼu tohi pe ko te ʼu ʼata ʼaē ʼe hā ai he ʼu felāveʼi fakasino heʼeʼaoga, ʼe feala ai ke fakahalaʼi nātou e tonatou loto ke nātou tono, ʼo nātou kākāʼi ai tonatou ʼu ʼohoana pea mo nātou heʼe agatonu kia nātou. ʼO toe feiā aipe, ko he fafine ʼe ina sioʼi te ʼu ʼata ʼaē ʼe fakahā ai te ʼu hahaʼi ʼaē ʼe tono, ʼe feala ke fakaneke ia ia ʼe tona loto ke mole lelei tana nofo ki tona ʼohoana. Kae, ko te nofo lelei ki totatou ʼohoana, ʼe fakamālohiʼi ai te noʼo ʼo te nofo ʼohoana, pea ʼe tou fetokoniʼaki anai ʼi tatatou ʼu faiga ʼaē ke leleiʼia tatou e Sehova ʼAtua.

Te ʼu Tokoni Ke Tou Nonofo Agatonu

18. Ko te loto fakafetaʼi ʼo ʼuhiga mo te meʼa fea ʼaē ka tokoni anai kia tatou ke tou nonofo agatonu?

¹⁸ Koteā koa te meʼa ʼaē ka tokoni anai kia tatou ke tou tauʼi te ʼu meʼa ʼaē ʼe fakafeagai ki te agatonu ʼi te ʼu faʼahi ʼaia e fā: te agatonu kia Sehova, ki tana kautahi, ki te kokelekasio, pea mo totatou ʼohoana? Ko te tahi tokoni ʼe ʼaoga moʼo tauʼi ʼo te ʼu meʼa ʼaē ʼe fakafeagai ki te agatonu, ʼe pipiki tāfito ki te faka lākatonuʼi ʼo te pule faʼitaliha ʼa Sehova. ʼIo, ʼaki tatatou nonofo agatonu, ʼe tou fakahā ai ʼe tou faka ʼuhiga ia Sehova ʼe ko te Tuʼi Faʼitaliha ʼo te ʼAtulaulau. Koia ʼe feala ke tou maʼu ai foki te fakaʼapaʼapa ʼaē kia kita, pea mo te ʼamanaki ki te maʼuli heʼegata ʼi te mālama foʼou ʼaē ka foaki mai anai e Sehova. ʼE feala hatatou faiga ke tou nonofo agatonu, ʼo tou tokagaʼi te ʼu faʼifaʼitaki ʼo ʼuhiga mo te agatonu, ʼo kamata mai ia Sehova pea mo nātou ʼaē ʼe tuʼu ʼi te Tohi-Tapu, pea mo nātou ʼaē ʼe talanoa kiai te ʼu tohi ʼa te Sosiete, pea mo nātou ʼaē ʼe talanoa kiai te Annuaire.

19. Koteā te pipikiga ʼo te tui mo tatatou agatonu?

¹⁹ Ko te tui mālohi kia Sehova ʼAtua pea mo te manavasiʼi ʼaē naʼa tou fai he meʼa ʼe mole ina leleiʼia, ʼe tokoni anai kia tatou ke tou tauʼi te ʼu meʼa ʼaē ʼe fakafeagai ki te agatonu. ʼE tou fakaloto mālohiʼi tatatou tui pea mo tatatou manavasiʼi kia Sehova, ʼaki tatatou ako fakalelei te Folafola ʼa te ʼAtua, pea mo tatatou kau ki te minisitelio faka Kilisitiano. Ko te faʼahi ʼaia ʼe tokoni anai kia tatou ke tou gāue ʼo ʼalutahi mo te tokoni ʼa Paulo ʼaē ʼe tuʼu ia Efesi 4:​23, 24: “Kae ʼe tonu ke koutou fakafoʼou ia koutou ʼi te mālohi ʼaē ʼe ina fakafalele tokotou ʼatamai, pea ʼe tonu ke koutou kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.”

20. Ia meʼa fuli, ko te kalitate fea ʼaē ka tokoni anai kia tatou ke tou agatonu kia Sehova, pea mo nātou fuli ʼaē ʼe tonu ke tou agatonu ki ai?

²⁰ Ko tatatou leleiʼia te ʼu kalitate ʼo Sehova ʼe tokoni kia tatou ke tou nofo agatonu. Ia meʼa fuli, ko te ʼofa ki tatatou Tāmai ʼaē ʼe ʼi selo pea mo te loto fakafetaʼi ʼo ʼuhiga mo te ʼu meʼa fuli ʼaē neʼe ina fai maʼa tatou, ko te ʼofa kia ia ʼaki totatou loto katoa pea mo totatou nefesi katoa pea mo totatou mālohi katoa, ʼe tokoni anai kia tatou ke tou agatonu kia te ia. Pea tahi ʼaē meʼa, ko te maʼu ʼo te ʼofa ʼaē neʼe ʼui e Sesu ʼe ko he fakaʼiloga ʼo tana kau tisipulo, ʼe tokoni anai kia tatou ke tou agatonu ki te kau Kilisitiano fuli ʼi te kokelekasio pea mo totatou famili. Ko tona faka ʼuhiga, ʼe tou fakahā ai peʼe tou manatu pe kia tatou peʼe kailoa. Ko te heʼe agatonu ko tona faka ʼuhiga ko te manatu pe ʼaē kia kita. Ko te agatonu ko tona faka ʼuhiga ko te mole manatu pe ʼaē kia kita.​—Maleko 12:30, 31; Soane 13:34, 35.

21. ʼE lava feafeaʼi hatatou fakamanatu te ʼu manatu ʼaē ʼe pipiki ki te ʼu meʼa ʼaē ʼe fakafeagai ki te agatonu?

²¹ Moʼo fai ʼo he fakamanatu: Ko te agatonu ʼe ko te kalitate mālohi ʼe fakahā e Sehova ʼAtua, mo Sesu Kilisito, pea mo te kau kaugana moʼoni fuli ʼa Sehova. Ke tou maʼu he ʼu felogoi lelei mo Sehova ʼAtua, ʼe tonu ke tou tauʼi te ʼu meʼa ʼaē ʼe fakafeagai ki te agatonu ʼaē kia te ia, ʼaki tatatou maʼuliʼi tana ʼu fakatotonu faitotonu, ʼo mole tou faifaitahi mo tona ʼu fili, pea mo tou lagolago kia Sehova ʼi te fagonogono ʼi te ʼu ʼapi pea mo te fagonogono faigamālie. Tahi ʼaē meʼa, ʼe tonu ke tou tauʼi te ʼu meʼa ʼaē ʼe fakafeagai ki te agatonu ʼaē ki te kautahi ʼa Sehova. ʼE tonu ke tou agatonu ki tatatou kokelekasio pea ke tou nofo lelei ki totatou ʼohoana. Kapau ʼe tou tauʼi fakalelei te ʼu meʼa ʼaē ʼe fakafeagai ki te agatonu, ʼe tou kau anai ki te faka lākatonuʼi ʼo te pule faʼitaliha ʼa Sehova, pea ʼe tou lagolago anai kia te ia ʼo ʼuhiga mo te fehuʼi ʼaē neʼe lagaʼi. Kapau ʼe tou fai te meʼa ʼaia, ʼe tou maʼu anai tona ʼofa pea ʼe tou maʼu anai te fakapale ʼo te maʼuli heʼegata. Ko te meʼa ʼaē neʼe ʼui e te ʼapositolo ko Paulo ʼo ʼuhiga mo te aga faka lotu, ʼe toe ʼaoga pe foki kia tatou ke tou tauʼi te ʼu meʼa ʼaē ʼe fakafeagai ki te agatonu. ʼE ʼaoga ki te maʼuli ʼi te temi ʼaenī, ʼo toe feiā aipe ki te maʼuli ʼi te temi ka haʼu.​—Pesalemo 18:25; 1 Timoteo 4:⁠8.

ʼE Feafeaʼi Anai Hakotou Tali?

◻ Ko te ʼu faʼahi fea ʼaē ʼe feala ke tou tauʼi ai te fihifihia ʼo ʼuhiga mo te agatonu ki te ʼAtua?

◻ Koteā te meʼa ʼaē ʼe fakamaʼua ke tou fai ʼo ʼuhiga mo tatatou agatonu ki te kautahi ʼa Sehova?

◻ ʼE lava feafeaʼi te tauʼi e te kau tagata ʼāfea ʼo te ʼu meʼa ʼaē ʼe fakafeagai ki te agatonu?

◻ Koteā te meʼa ʼaē ʼe tonu ke tauʼi e te kau Kilisitiano ʼaē kua ʼohoana?

◻ Koteā te ʼu kalitate ʼe tokoni anai kia tatou ke tou tauʼi te ʼu meʼa ʼaē ʼe fakafeagai ki te agatonu?

[Paki ʼo te pasina 17]

Ko te agatonu ki te kokelekasio ʼe tokoni anai ki te kau tagata ʼāfea ke ʼaua naʼa nātou fakahā te ʼu meʼa fakalilo

[Paki ʼo te pasina 18]

Ko te nofo lelei faka taumatuʼa ʼe fakamālohiʼi ai te noʼo ʼo te nofo ʼohoana