Tou Tauhi Agatonu Ki Te Kautahi ʼa Sehova

“Kia ia ʼaē ʼe agatonu ʼe ke agatonu anai.”​—2 Samuele 22⁠:26.

1, 2. Ko te ʼu faʼifaʼitaki fea ʼaē ʼe feala ke tou sio kiai ʼi te kokelekasio ʼo ʼuhiga mo te agatonu?

ʼI TE tahi afiafi, ʼe teuteuʼi e te tagata ʼāfea te akonaki ki te fono. ʼE ina fia tuku muʼa tana teuteuʼi pea mo ʼai hana kiʼi mālōlō; kae ʼe hoko atu tana gāue, ʼo ina kumi he ʼu faʼifaʼitaki faka Tohi-Tapu pea mo he ʼu lea fakatātā, ʼe nātou uga anai pea mo fakaloto mālohiʼi anai te faga ōvi. ʼI te po ʼaē ʼe fai ai te fono, ko te taumatuʼa ʼo te kokelekasio ʼaia kua nā gaʼegaʼe, pea ʼe lagi nā fia nonofo ʼo mālōlō ʼi tonā ʼapi; kae ʼaki he loto faʼa kātaki ʼe nā teuteuʼi tana fānau ʼo nātou ʼolo ʼo fono. ʼI te ʼosi ʼo te fono, pea fai palalau te ʼu tēhina mo te ʼu tuagaʼane ʼo ʼuhiga mo te akonaki ʼa te tagata ʼāfea. Ko te tahi tuagaʼane ʼe ina fia fakahā ko te tahi ʼaho neʼe lavea tona loto ʼi te ʼu palalau ʼaē neʼe fai e te tēhina ʼaia. Neʼe mole ina fai te meʼa ʼaia, kae neʼe palalau te tuagaʼane ʼaia ʼaki he loto fiafia ʼo ʼuhiga mo te puani neʼe talanoa kiai te tēhina ʼaia. ʼE koutou mahino koa ki te puani ʼaē ʼe tatau ai te ʼu faʼifaʼitaki ʼaenī e tolu?

² Ko te puani ʼaia ʼe ko te agatonu. ʼE gāue agatonu te tagata ʼāfea moʼo tauhi ki te faga ōvi ʼa te ʼAtua; ʼe agatonu te ʼu mātuʼa ʼi tanā kau ki te ʼu fono ʼo te kokelekasio; ʼe agatonu te tuagaʼane ʼo lagolago ki te ʼu tagata ʼāfea. (Hepeleo 10:24, 25; 13:17; 1 Petelo 5:2) Ei, ʼi te ʼu faʼahi fuli ʼo te maʼuli, ʼe tou sio ki te lotomālohi ʼa te hahaʼi ʼa te ʼAtua ke nātou tauhi agatonu ki te kautahi ʼa Sehova.

3. He koʼe ʼe maʼuhiga ʼaupito ke tou nonofo agatonu ki te kautahi fakakelekele ʼa Sehova?

³ Ka mamata ia Sehova ki te mālama aga fakahehema ʼaenī, pea ʼe sio ki te tokosiʼi ʼo te hahaʼi agatonu. (Mikea 7:2) ʼE lagi fiafia ʼaupito tona loto ʼi tana sio ki te agatonu ʼo tana hahaʼi! Ei, ʼe fiafia ʼi takotou nofo agatonu. Kae ʼe fakatupu ʼita kia Satana, ia te ʼuluaki agatuʼu, pea ʼe fakamoʼoni ai ʼe gutuloi. (Tāʼaga Lea 27:11; Soane 8:​44) ʼE faiga anai e Satana ke ina maumauʼi takotou agatonu kia Sehova pea mo Tana kautahi fakakelekele. Tou vakavakaʼi he ʼu ʼaluʼaga ʼe fai ai e Satana ia te faʼahi ʼaia, pea ʼe feala ai anai ke tou ʼiloʼi lelei peʼe lava feafeaʼi hatatou nonofo agatonu ʼo aʼu ki te fakaʼosi.​—2 Kolonito 2:​11.

Ko Te Tokagaʼi Fau ʼo Te ʼu Hala ʼe Feala Ke Fakatupu Kovi Ki Tatatou Nofo Agatonu

4. (a) He koʼe ʼe faigafua te valoki ʼo nātou ʼaē ʼe pule? (b) Neʼe liliu feafeaʼi ia Kole ʼo heʼe agatonu ki te kautahi ʼa Sehova?

⁴ Ka maʼu tuʼulaga he tēhina pea ʼe lagi feala ke hā lelei tana ʼu hala. ʼE ko he meʼa faigafua hatatou tokagaʼi ‘te mohuku ʼaē ʼe ʼi te mata ʼo totatou tēhina, kae mole tou tokagaʼi tatou te lalago ʼaē ʼi totatou mata’! (Mateo 7:​1-5) Koia ko he tahi ʼe ina tokagaʼi fau te ʼu hala, ʼe feala ke tupu ai hana heʼe agatonu. Moʼo fakatā te faʼahi ʼaia, tou vakaʼi te kehekehe ʼo Kole pea mo Tavite. Neʼe lahi te ʼu maʼua ʼa Kole, pea ʼe mahino papau ia neʼe nofo agatonu lolotoga ni ʼu taʼu, kae ki muli age neʼe fia maʼu tuʼulaga. Neʼe ʼita ki te takitaki ʼa Moisese pea mo Alone, tona ʼu tēhina mataʼi tama. Logope la ko Moisese neʼe ko te tagata agavaivai ʼi te ʼu tagata fuli, kae ʼe hā mai neʼe kamata valoki ia ia e Kole. Neʼe lagi sio ia ki he ʼu hala ʼa Moisese. Kae neʼe mole tonu ki te ʼu hala ʼaia ke fakatupu ʼaki ai he agatuʼu ʼa Kole ki te kautahi ʼa Sehova. Neʼe molehi ia ia ʼi te lotolotoiga ʼo te kokelekasio.​—Faka au 12:3; 16:11, 31-​33.

5. He koʼe neʼe feala ke agatuʼu ia Tavite kia Saulo?

⁵ ʼI te tahi faʼahi, ko Tavite neʼe gāue maʼa te Hau ko Saulo. Ki muʼa atu, ko Saulo neʼe ko te hau agalelei, kae ki muli age, neʼe liliu ʼo agakovi. Neʼe tonu ke maʼu e Tavite te tui, mo te faʼa kātaki, pea mo he faʼahiga poto ke hāo mai te ʼu fakatuʼutuʼu ʼaē neʼe fai e Saulo ke ina matehi ia ia, ʼuhi ko tana maheka. Kae ʼi te temi ʼaē neʼe maʼu ai e Tavite te faigamālie ke ina liufaki te ʼu kovi ʼaē neʼe fai age kia ia e Saulo, neʼe ina ʼui ai ‘ ʼe mole feala, ʼi te manatu ʼa Sehova,’ ke ina fai te aga heʼe agatonu ʼaia kia ia ʼaē neʼe fakanofo e Sehova.​—1 Samuele 26:11.

6. Tatau aipe peʼe tou sio ki he ʼu vaivaiʼaga peʼe ko he ʼu hala ʼa te kau tagata ʼāfea, koteā ʼaē ʼe mole tonu ke tou fai?

⁶ Ka hage ʼe hala te manatu ʼa ʼihi ia nātou ʼaē ʼe nātou takitaki tatou, peʼe fefeka tanatou ʼu palalau, peʼe hage ʼe nātou fakapalatahi, ʼe tou meo anai koa ʼo ʼuhiga mo nātou ʼaia, ʼo lagi tou kau ki he ʼu fai fatufatu ʼe fai ʼi te kokelekasio? ʼE mole tou toe ʼolo anai koa ʼo fono moʼo fakahā ʼaki ai tatatou ʼita? Kailoa ia! Ohage ko Tavite, ʼe mole tou tuku anai te ʼu hala ʼa ʼihi ke tupu ʼaki ai hatatou heʼe agatonu kia Sehova pea mo tana kautahi!​—Pesalemo 119:165.

7. Koteā te ʼu aga heʼeʼaoga ʼaē neʼe mafola ʼi te fale lotu ʼo Selusalemi, pea neʼe koteā te manatu ʼa Sesu ʼo ʼuhiga mo te ʼu meʼa ʼaia?

⁷ Ko te tagata ʼaē neʼe ina tuku mai te faʼifaʼitaki ʼaē ʼe lahi tokotahi ʼo ʼuhiga mo te agatonu neʼe ko Sesu Kilisito, pea neʼe talanoa ki ai te ʼu lea faka polofeta ohage ko “te tagata agatonu” ʼa Sehova. (Pesalemo 16:10) ʼE mahino ia ko te fakaʼaogaʼi kovi ʼo te fale lotu ʼaē ʼi Selusalemi, neʼe ko he ʼahiʼahiʼi ʼo te agatonu. Neʼe ʼiloʼi e Sesu ko te gāue ʼa te pelepitelo lahi pea mo te ʼu sakilifisio, neʼe nātou fakatātā tona minisitelio pea mo tana mate faka sakilifisio, pea neʼe mahino kia te ia neʼe maʼuhiga ke ʼiloʼi e te hahaʼi te ʼu meʼa ʼaia. Koia neʼe tonu ai tana ʼita lahi, ʼi tana sio ki te kua liliu ʼo te fale lotu “ko he ʼana ʼo he kau kaihaʼa.” ʼAki te mālohi ʼaē neʼe foaki age e te ʼAtua, neʼe ina fakamaʼa tuʼa lua te fale lotu.a​—Mateo 21:12, 13; Soane 2:​15-​17.

8. (a) Neʼe fakahā feafeaʼi e Sesu tana agatonu ki te fakatuʼutuʼu ʼo te fale lotu? (b) ʼE tou fakahā feafeaʼi ʼe tou leleiʼia te tauhi kia Sehova ʼaki tana kautahi maʼa?

⁸ Kae neʼe agatonu ia Sesu ʼo lagolago ki te fakatuʼutuʼu ʼo te fale lotu. Talu mai tana kei veliveli, neʼe kau ki te ʼu lafeti ʼaē neʼe fai ʼi te fale lotu pea neʼe tautau faiakonaki ai. Neʼe ina totogi te tukuhau ʼo te fale lotu, logope la, ʼi tona fakahagatonu, neʼe mole maʼua ke ina fai te faʼahi ʼaia. (Mateo 17:24-​27) Neʼe vikiʼi e Sesu te fafine vitua masiva ʼaē neʼe ina tuku “te meʼa katoa ʼaē neʼe ina maʼu” ki te puha tānaki paʼaga ʼo te fale lotu. Mole fualoa kiai, pea līaki e Sehova te fale lotu ʼaia ʼo talu ai. Kae ʼo aʼu ki te temi ʼaia, neʼe agatonu ia Sesu ki te fale lotu. (Maleko 12:41-​44; Mateo 23:38) Ia ʼaho nei, ko te kautahi fakakelekele ʼa te ʼAtua ʼe lahi age ia ʼi te tuʼu faka Sutea pea mo tona fale lotu. ʼE moʼoni ʼe mole haohaoa tatatou kautahi; ko te tupuʼaga la ʼaia ʼo te tautau fai ʼo te ʼu fetogi. Kae ʼe mole ina tali he aga fakahehema, pea ʼe mole fetogi anai e Sehova ʼAtua tana kautahi ʼaki he tahi kautahi. ʼE mole tonu ke tou tuku te ʼu vaivaiʼaga ʼaē ʼe tou sio kiai ʼi tatatou kautahi, ke ina fakaloto vaivaiʼi tatou, peʼe ina fakaneke tatou ke tou fai valoki peʼe tou meomeo. Kae ʼe tonu ke tou faʼifaʼitakiʼi te agatonu ʼa Sesu Kilisito.​—1 Petelo 2:​21.

Totatou ʼu Vaivaiʼaga

9, 10. (a) ʼE fakaʼaogaʼi feafeaʼi e te tuʼu ʼo te ʼu faʼahiga meʼa ʼa Satana totatou ʼu vaivaiʼaga, ke tou tō ai ki he aga heʼe agatonu? (b) Koteā te meʼa ʼaē ʼe tonu ke fai e he tahi neʼe ina fai he agahala mamafa?

⁹ ʼE toe faigaʼi foki e Satana ke tou heʼe agatonu ʼo ina fakaʼaogaʼi totatou ʼu vaivaiʼaga. ʼE fakaʼaogaʼi e te tuʼu ʼo te ʼu faʼahiga meʼa ʼa Satana totatou ʼu vaivaiʼaga, ʼo ina fakahalaʼi tatou ke tou fai te meʼa ʼaē ʼe kovi kia mata ʼo Sehova. Meʼa fakaʼofaʼofa foki, ʼi te taʼu fuli, ko te toko lauʼi afe tēhina mo tuagaʼane ʼe nātou fai te ʼu aga heʼeʼaoga. Ko ʼihi ʼe nātou fakaʼāsili kovi tonatou heʼe agatonu he nātou maʼuli fakakākā, ʼo nātou haga fai he aga ʼe kovi pea mo nātou ʼui ko nātou ko he kau Kilisitiano agatonu. ʼI tana faitohi ʼo ʼuhiga mo te alatike ʼo te Réveillez-vous! “Te fehuʼi ʼa te kau tūpulaga . . .” ʼaē neʼe talanoa ki te faʼahi ʼaia, neʼe ʼui fēnei e te finemui: “Neʼe fakamatala lelei e te ʼu alatike te ʼuhiga ʼo toku maʼuli.” Neʼe kaumeʼa fakafūfū te finemui ʼaia mo te ʼu tūpulaga neʼe mole nātou ʼoʼofa kia Sehova. Koteā te meʼa ʼaē neʼe hoko? ʼE ina tohi fēnei: “Neʼe fakahaʼuhaʼu ʼo kovi ʼaupito toku maʼuli, pea neʼe ʼau fai te aga heʼeʼaoga pea neʼe tonu ke fakatonutonuʼi ʼau. Neʼe fakatupu kovi te faʼahi ʼaia ki taku ʼu felogoi mo Sehova, pea neʼe mole kei falala taku ʼu mātuʼa pea mo te ʼu tagata ʼāfea kia ʼau.”b

¹⁰ Neʼe maʼu e te finemui ʼaia te tokoni mai te ʼu tagata ʼāfea pea neʼe toe kau ki te tauhi agatonu kia Sehova. Kae ko te meʼa ʼaē ʼe fakaʼofaʼofa, ko te tokolahi ʼe hoko kia nātou te ʼu fua ʼe kovi age ʼo te aga ʼaē neʼe nātou fai, pea ko ʼihi neʼe mole nātou toe liliu mai ki te kokelekasio. Koia ʼe lelei age hatatou agatonu pea mo hatatou tauʼi te fakahala ʼi te tuʼu agakovi ʼaenī! Koutou mulimuli ki te ʼu fakatokaga ʼaē ʼe foaki mai e te ʼu nusipepa Te Tule Leʼo pea mo te Réveillez-vous! ʼo ʼuhiga mo te faʼahi ʼaia, ohage la ko te fakakaugā mo te hahaʼi ʼo te mālama pea mo te ʼu fakafiafia fakalialia. ʼE mātou fakaʼamu ke ʼaua naʼa koutou fai ʼi he temi he aga ʼe heʼe agatonu. Kae kapau ʼe hoko te faʼahi ʼaia, pea ʼaua naʼa koutou fufū te aga ʼaē neʼe koutou fai. (Pesalemo 26:4) Kae koutou kumi tokoni. ʼE feala ke tokoni atu takotou ʼu mātuʼa Kilisitiano pea mo te ʼu tagata ʼāfea.​—Sake 5:​14.

11. He koʼe ʼe mole lelei hatatou manatu ʼe mole he ʼamanaki ʼuhi ko te aga kovi ʼaē neʼe tou fai, pea koteā te faʼifaʼitaki ʼi te Tohi-Tapu ʼe tokoni kia tatou ke tou fakatonutonuʼi tatatou manatu?

¹¹ ʼE feala ke fakatupu kovi kia tatou totatou ʼu vaivaiʼaga ʼi te tahi faʼahi. Ko ʼihi ʼaē ʼe nātou fai he aga heʼe agatonu, ʼe nātou līaki tanatou faiga ʼaē ke leleiʼia nātou e Sehova. Koutou manatuʼi, neʼe fai e Tavite te ʼu agahala mamafa. Kae hili te ʼu sēkulō ki te mate ʼa Tavite, neʼe fakamanatuʼi ia ia e Sehova ohage ko he kaugana agatonu. (Hepeleo 11:32; 12:1) Koteā tona tupuʼaga? Koteʼuhi neʼe mole he temi neʼe ina līaki ai tana faiga ʼaē ke leleiʼia ia ia e Sehova. ʼE ʼui fēnei ia Tāʼaga Lea 24⁠:16: “ ʼE feala ke tō tuʼa fitu te faitotonu, kae ʼe mahino papau ia ʼe toe tuʼu ake anai.” ʼE mahino ia, kapau ʼe tou fai he ʼu agahala veliveli, māʼia peʼe tuʼa lahi, ʼuhi ko he ʼu vaivaiʼaga ʼe tou tauʼi, ʼe feala pe ke toe hoko atu tatatou agatonu kia mata ʼo Sehova mo kapau ʼe tou ‘toe tutuʼu ake’​—ko tona faka ʼuhiga ke tou fakahemala moʼoni pea mo toe hoko atu tatatou lele ʼi tatatou tauhi agatonu.​—Vakaʼi ia 2 Kolonito 2:7.

Koutou Tokakaga Ki Te ʼu Agaaga Fakakākā ʼo Te Heʼe Agatonu!

12. ʼO ʼuhiga mo te kau Faliseo, neʼe iku feafeaʼi tanatou manatu fefeka fau ki te heʼe agatonu?

¹² ʼE toe feala foki ke hoko te heʼe agatonu ʼi he ʼu agaaga fakakākā. ʼE feala pe ke hā ki tuʼa ʼe tou agatonu! Ohage la ko te kau Faliseo ʼi te temi ʼo Sesu, neʼe lagi nātou manatu ʼe nātou agatonu ʼaupito.c Kae neʼe mole nātou sio ki te kehekehe ʼo he tahi ʼe agatonu pea mo he tahi ʼe pipiki fau ki te ʼu lekula fakatagata, koteʼuhi neʼe nātou fefeka pea neʼe mamafa tanatou faifakamāu. (Vakaʼi ia Tagata Tānaki 7:​16.) ʼI tona fakahagatonu, neʼe nātou heʼe agatonu ki te hahaʼi ʼaē neʼe tonu ke nātou tauhi ki ai, mo heʼe agatonu ki te ʼuhiga moʼoni ʼo te Lao ʼaē neʼe nātou ʼui ʼe nātou akoʼi, pea mo heʼe agatonu kia Sehova totonu. Kae ko Sesu neʼe agatonu ia ki te ʼuhiga moʼoni ʼo te Lao, ʼaē neʼe fakatafito ki te ʼofa. Neʼe ina fakaloto mālohiʼi te hahaʼi, ohage pe ko tona fakakikite e te ʼu lea faka polofeta ʼo ʼuhiga mo te Mesia.​—Isaia 42:3; 50:4; 61:​1, 2.

13. (a) ʼE lava feafeaʼi ke heʼe agatonu te ʼu mātuʼa Kilisitiano? (b) He koʼe ʼe mole tonu ke akonakiʼi e te ʼu mātuʼa tanatou fānau ʼaki te ʼita, pea mo valoki nātou, peʼe nātou fakatonutonuʼi ʼaki he manatu ʼe mole lelei?

¹³ Ko te kau Kilisitiano ʼaē ʼe nātou maʼu honatou faʼahiga pule, ʼe ʼaoga lahi kia nātou te faʼifaʼitaki ʼa Sesu ʼi te faʼahi ʼaia. Ohage la, ʼe ʼiloʼi e te ʼu mātuʼa agatonu ʼe tonu ke nātou akonakiʼi tanatou ʼu fānau. (Tāʼaga Lea 13:24) Kae ʼe tonu ke nātou ʼiloʼi papau ʼe mole nātou fakakinakinaʼi tanatou ʼu tamaliki ʼaki he fakatonutonu fefeka ʼe fai ʼaki te ʼita, peʼe ko te valokiʼi tuʼumaʼu ʼo nātou. Ko te ʼu fānau ʼaē ʼe nātou manatu ʼe mole feala ʼi he temi ke nātou fakafiafia tanatou ʼu mātuʼa, peʼe nātou manatu ko te lotu ʼo tanatou ʼu mātuʼa ʼe hage pe ia ʼe ina fakaliliu nātou ko he ʼu hahaʼi ʼe nātou kumi he ʼu hala peʼe nātou valoki, ʼe feala ke nātou lotovaivai ai pea mo nātou fakamamaʼo ʼi te moʼoni.​—Kolose 3:​21.

14. ʼE lava fakahā feafeaʼi e te ʼu tagata tauhi ōvi Kilisitiano tanatou agatonu ki te faga ōvi ʼaē ʼe nātou tauhi kiai?

¹⁴ ʼO toe feiā pe, ʼe tokaga te ʼu tagata ʼāfea pea mo te ʼu tagata taupau feʼoloʼaki ki te ʼu fihifihia pea mo te ʼu tuʼutāmaki ʼaē ʼe hoko ki te faga ōvi. ʼI tonatou ʼuhiga tagata tauhi ōvi agatonu, ʼe nātou foaki he ʼu tokoni mo kapau ʼe ʼaoga, ʼo nātou vakaʼi pe kua nātou ʼiloʼi lelei te meʼa ʼaē neʼe hoko, mo nātou mahino ki te ʼu ʼaluʼaga fuli, pea mo nātou tokakaga ke nātou fakatafito te ʼu meʼa ʼaē ʼe nātou ʼui ki te Tohi-Tapu pea mo te ʼu tohi ʼa te Sosiete. (Pesalemo 119:105; Tāʼaga Lea 18:13) Tahi ʼaē meʼa, ʼe nātou ʼiloʼi ʼe falala te ʼu ōvi kia nātou, ke nātou foaki age he fakaloto mālohi pea mo he meʼa kai fakalaumālie. Koia ʼe nātou faiga ke nātou faʼifaʼitakiʼi ia Sesu Kilisito, te Tagata Tauhi Ōvi Lelei. ʼE nātou tauhi agatonu ki te ʼu ōvi ʼi te ʼu vāhaʼa fuli ʼi te ʼu fono, ʼo mole nātou fakamālaloʼi nātou kae nātou lagalaga nātou pea mo fakaloto mālohiʼi tanatou tui.​—Mateo 20:28; Efesi 4:​11, 12; Hepeleo 13:20, 21.

15. Neʼe fakahā feafeaʼi e ʼihi ʼi te ʼuluaki sēkulō neʼe nātou agatonu ki he meʼa neʼe mole tonu ke nātou agatonu kiai?

¹⁵ Ko te tahi agaaga fakakākā ʼo te heʼe agatonu ʼe ko tatatou agatonu ki he meʼa ʼe mole lelei. Ko te agatonu moʼoni ʼi tona ʼuhiga faka Tohi-Tapu, ʼe mole ina fakagafua ke tou fakamuʼamuʼa te fakalogo ki he puleʼaga peʼe ki he tahi, ʼi tatatou agatonu ʼaē kia Sehova ʼAtua. Tokolahi ʼi te kau Sutea ʼi te ʼuluaki sēkulō neʼe nātou faka maʼuhigaʼi fau te Lao Faka Moisese pea mo te fakatuʼutuʼu faka Sutea. Kae neʼe hoko mai te temi ʼaē neʼe tonu ai ke toʼo e Sehova tana tapuakina ʼi te puleʼaga agatuʼu ʼaia, ʼo ina tuku ki te puleʼaga ʼo te Iselaele fakalaumālie. Neʼe ko te tokosiʼi pe ʼaē neʼe nātou agatonu kia Sehova pea mo nātou mulimuli ki te fetogi maʼuhiga ʼaia. Māʼia ʼi te lotolotoiga ʼo te kau Kilisitiano moʼoni, ko ʼihi ʼu Sutea, ʼaē neʼe pipiki ki te Lao Faka Moisese neʼe nātou loto ke nātou toe liliu ki “te ʼu ʼuluaki meʼa vaivai pea mo masiva” ʼo te Lao Faka Moisese, ʼaē neʼe fakahoko e Kilisito.​—Kalate 4:9; 5:​6-​12; Filipe 3:​2, 3.

16. Neʼe tali feafeaʼi e te kau kaugana agatonu ʼa Sehova te ʼu fetogi ʼaē neʼe fai?

¹⁶ Kae ko te hahaʼi ʼa Sehova ʼi totatou temi neʼe nātou fakamoʼoni ʼe nātou agatonu ʼi te ʼu temi ʼaē neʼe hoko ai te ʼu fetogi. ʼE fai te ʼu fetogi ʼi te hoko atu ʼo te gigila ʼo te mālama ʼaē ʼe ina fakahā te moʼoni. (Tāʼaga Lea 4:​18) ʼE mole heʼeki faʼa fualoa, neʼe tokoni mai kia tatou “te tagata kaugana agatonu mo poto” ke tou mahino lelei ki te kupu “taʼiake” ʼaē ʼe fakaʼaogaʼi ia Mateo 24⁠:34 pea mo te temi ʼo te fakamāu ʼo “te ʼu ōvi” mo “te ʼu tao” ʼaē ʼe tuʼu ia Mateo 25⁠:​31-46, pea mo tatatou manatu ʼo ʼuhiga mo te ʼu faʼahiga gāue faka sivile. (Mateo 24:45) ʼE mahino papau ia, neʼe lagi fiafia anai ʼihi hahaʼi ʼaposita mo kanapaula neʼe mole fia fetogi e te kau Fakamoʼoni ʼa Sehova tanatou mahino ʼāfea ki te ʼu manatu ʼaia, pea mo kapau neʼe mole nātou fia haʼele ki muʼa ʼi tanatou ʼu fakamahino. Kae ʼe mole nātou feiā. Koteā tona tupuʼaga? Koteʼuhi ʼe agatonu te hahaʼi ʼa Sehova.

17. ʼI ʼihi temi, ʼe ʼahiʼahiʼi feafeaʼi tatatou agatonu e nātou ʼaē ʼe tou ʼoʼofa ai?

¹⁷ Kae ʼe feala ke mamahi totatou loto ʼi tatatou agatonu ki he meʼa ʼe mole tonu ke kita agatonu kiai. Ka fili e hotatou kaumeʼa ʼe tou ʼofa lahi ai peʼe ko he tahi ʼi totatou famili ke ina fai he meʼa ʼe mole ʼalutahi mo te ʼu pelesepeto ʼo te Tohi-Tapu, ʼe feala ke tou logoʼi ʼi totatou loto ʼe tou fakaapelua ʼi tatatou agatonu. ʼE mahino ia ʼe tou fia nofo agatonu ki totatou famili. Kae ʼe mole tonu ke tou fakamuʼamuʼa tatatou agatonu kia nātou ʼi tatatou agatonu kia Sehova! (Vakaʼi ia 1 Samuele 23:16-​18.) ʼE mole tou fia tokoni anai kia nātou ʼaē neʼe nātou fai te meʼa ʼaē ʼe kovi ke nātou fufū he agahala mamafa, peʼe tou kau mo nātou ʼo fakafeagai ki te ʼu tagata ʼāfea ʼaē ʼe nātou faigaʼi ke nātou ‘fakatonutonuʼi nātou ʼaki he agamālū.’ (Kalate 6:1) ʼI tatatou fai te meʼa ʼaia ʼe tou heʼe agatonu kia Sehova, mo tana kautahi, pea mo ia ʼaē ʼe tou ʼofa ai. Pea ko tatatou mole loto ʼaē ke fakatonutonuʼi ia ia ʼaē neʼe ina fai te meʼa ʼaē ʼe kovi, ʼe mole ko he faka fealagia ʼaia ke ina maʼu te ʼofa ʼo Sehova. (Hepeleo 12:​5-7) Koutou toe manatuʼi foki, ko “te ʼu lavea ʼaē ʼe fai e ia ʼaē ʼe ʼofa ʼe agatonu ia.” (Tāʼaga Lea 27:6) Ko te tokoni fakahagatonu pea mo te ʼofa, ʼaē ʼe fakatafito ki te Folafola ʼa te ʼAtua, ʼe lagi lavea ai anai te loto ʼo ia ʼaē ʼe tou ʼofa ki ai ʼaē neʼe hēʼia, kae ʼe feala ke liliu te tokoni ʼaia ko hona hāofakiʼaga ki muli age!

Tou Nonofo Agatonu ʼi Te ʼu Fakataga

18, 19. (a) Koteā ʼaē neʼe loto kiai ia Akape ʼo ʼuhiga mo Napote, pea he koʼe neʼe fakafisi age ia Napote? (b) Neʼe ʼaoga koa ke mate ia Napote ʼi tana nofo agatonu? Koutou fakamahino.

¹⁸ ʼI ʼihi temi, ʼe tauʼi fakahagatonu e Satana tatatou agatonu. Koutou fakatokagaʼi te meʼa ʼaē neʼe hoko kia Napote. ʼI te temi ʼaē neʼe fakakinau ai e te hau ko Akape ke ina fakatau tana gāueʼaga vite, neʼe ina tali fēnei: “ ʼE mole feala tuʼa tahi ʼi te manatu ʼa Sehova, ke ʼau foaki atu kia koe te tofiʼa ʼaē neʼe ʼau maʼu mai taku ʼu kui.” (1 Hau 21:3) Ko Napote neʼe mole ko he tagata neʼe aga fefeka; neʼe agatonu ia. Neʼe fakatotonu e te Lao Faka Moisese ke mole fakatau e he Iselaelite ʼo talu ai tona kele ʼaē neʼe ina maʼu faka tofiʼa. (Levitike 25:23-​28) ʼE mahino ia neʼe ʼiloʼi e Napote neʼe feala ki te hau agakovi ʼaia ke ina matehi ia ia, koteʼuhi neʼe kua tuku e Akape tona ʼohoana ko Sesapele ke ina matehi te ʼu polofeta ʼe tokolahi ʼa Sehova! Kae neʼe nofo agatonu aipe ia Napote.​—1 Hau 18:4.

¹⁹ ʼI ʼihi temi, ʼe feala ke matehi kita ʼuhi ko takita nofo agatonu. Ko Sesapele, ʼaki te tokoni ʼo ʼihi “ ʼu tagata mole honatou ʼaoga,” neʼe nātou tukugakoviʼi ia Napote ʼo ʼuhiga mo he hala neʼe mole ina fai. Ko te meʼa ʼaē neʼe hoko, neʼe matehi ia ia pea mo tona ʼu foha. (1 Hau 21:​7-​16; 2 Hau 9:​26) ʼE faka ʼuhiga koa te faʼahi ʼaia neʼe agatonu ia Napote ki he meʼa ʼe mole lelei? Kailoa ia! ʼE kau Napote ʼi te ʼu tagata pea mo te ʼu fafine ʼaē ʼe nātou ‘maʼuʼuli’ ʼi te manatu ʼa Sehova ʼo aʼu ki te temi nei, pea ʼe nātou mālōlō ʼi te faitoka ʼo aʼu ki te temi ʼo te fakatuʼuake.​—Luka 20:38; Gāue 24:15.

20. ʼE lava tokoni feafeaʼi mai kia tatou te falala ki te ka haʼu ke tou taupau tatatou agatonu?

²⁰ Ko te ʼamanaki ʼaia ʼe ina foaki he loto falala ki te hahaʼi agatonu ʼa Sehova ia ʼaho nei. ʼE tou ʼiloʼi ko tatatou nonofo agatonu ʼi te mālama ʼaenī ʼe feala ke tuʼutāmaki ai totatou maʼuli. Neʼe matehi ia Sesu Kilisito ʼuhi ko tana nofo agatonu, pea neʼe ina ʼui ki tana ʼu tisipulo ʼe toe hoko kia nātou te ʼu meʼa ʼaia. (Soane 15:20) Ko tana ʼamanaki ki te ka haʼu neʼe tokoni kia ia, pea ʼe toe tokoni mai kia tatou tatatou ʼu ʼamanaki. (Hepeleo 12:2) ʼE feala ke tou nonofo agatonu ʼi te ʼu faʼahiga fakataga fuli pe.

21. Koteā te ʼu fakapapau ʼaē ʼe foaki e Sehova ki tana hahaʼi agatonu?

²¹ ʼE moʼoni, ʼe tokosiʼi ia tatou ʼaē ʼe tauʼi fakahagatonu tatatou agatonu. Kae ʼe feala ke faka ʼāsili age te ʼu fakataga ʼaē ka hoko ki te hahaʼi ʼa te ʼAtua ʼi muʼa ʼo te hoko mai ʼo te fakaʼosi. ʼE lava feafeaʼi hatatou ʼiloʼi peʼe tou taupau anai tatatou agatonu? ʼAki hatatou nonofo agatonu ʼi te temi nei. Neʼe foaki mai e Sehova kia tatou te gāue lahi: ke tou fai faka mafola pea mo akoʼi te hahaʼi ʼo ʼuhiga mo tona Puleʼaga. Tou agatonu ʼo haga fai te gāue maʼuhiga ʼaia. (1 Kolonito 15:58) Kapau ʼe mole tou tuku te ʼu vaivaiʼaga ʼa te tagata ki ina maumauʼi tatatou agatonu ki te kautahi ʼa Sehova, pea mo tou tokakaga ki te ʼu agaaga fakakākā ʼo te heʼe agatonu, ohage la ko hatatou agatonu ki he meʼa ʼe mole tonu ke tou agatonu kiai, pea ʼe mahino ia, ʼe feala anai hatatou nofo agatonu ʼi he ʼahiʼahi ʼe kovi age. ʼI te ʼu faʼahi fuli ʼaia, ʼe tonu ke tou ʼiloʼi papau ko Sehova ʼe agatonu tuʼumaʼu ki tana ʼu kaugana agatonu. (2 Samuele 22:26) Ei, ʼe ina hāofaki anai tana hahaʼi agatonu!​—Pesalemo 97:⁠10.

[Nota ʼi te lalo pasina]

ʼE Koutou Tali Feafeaʼi Anai?

◻ ʼE lava feafeaʼi hatatou tekeʼi te ʼu vaivaiʼaga ʼa ʼihi ke ʼaua naʼa tupu ʼaki ai hatatou heʼe agatonu?

◻ Ko te ʼu faʼahi fea ʼaē ʼe feala ke taki ai tatou e totatou ʼu vaivaiʼaga ke tou fai he aga heʼe agatonu?

◻ ʼE lava feafeaʼi hatatou tauʼi tatatou agatonu ki he meʼa ʼe mole tonu ke tou agatonu kiai?

◻ Koteā ʼaē ka tokoni anai kia tatou ke tou taupau tatatou agatonu, logope la te ʼu fakataga?

[Talanoa ʼo te pasina 9]

Tou Tauhi Agatonu ʼi Te Petele

Neʼe tohi fēnei e te ʼapositolo ko Paulo: “Koutou fai ia meʼa fuape ʼi te fakapotopoto pea mo te fakatokatoka.” (1 Kolonito 14:40) Neʼe ʼiloʼi e Paulo, ke haʼele lelei he kokelekasio neʼe tonu ke fai ʼi te “fakatokatoka,” ko tona faka ʼuhiga ke fai he ʼu fakatuʼutuʼu. ʼO toe feiā ia ʼaho nei, ʼe tonu ke fai e te kau tagata ʼāfea he ʼu tonu ʼo ʼuhiga mo te ʼu gāue ʼaē ʼe tonu ke fai, ohage ko te hinoʼi ʼo he ʼu tēhina ʼi te kokelekasio ki te ʼu ako tohi ʼi te ʼu faʼahi kehekehe ʼaē ʼe fai ai te ʼu ako, ki te ʼu fono faka mafola, pea mo vakavakaʼi te ʼu telituale fuli. ʼI ʼihi temi ʼaki te ʼu fakatuʼutuʼu ʼaia ʼe feala ke ʼahiʼahiʼi ai tatatou agatonu. Ko te ʼu fakatuʼutuʼu ʼaia neʼe mole tala gutu mai e te ʼAtua, pea ʼe mole feala ke leleiʼia fuli e te ʼu tēhina mo tuagaʼane.

ʼI ʼihi temi, ʼe koutou manatu koa ʼe faigataʼa te nofo agatonu ki ʼihi ʼu fakatuʼutuʼu ʼaē neʼe fai ʼi te kokelekasio? Kapau koia ʼaia, pea ʼe tokoni lahi anai kia koutou te faʼifaʼitaki ʼo te Petele. Ko te higoa Petele, ʼe ko he kupu faka Hepeleo, ʼaē ko tona faka ʼuhiga ko te “ ʼApi ʼo te ʼAtua,” ʼe fakahigoa ʼaki te ʼu filiale fuli e 104 ʼo te Sosiete Watch Tower, ʼo kau kiai mo te ʼu fale gāue ʼo te Sosiete, ʼi Amelika.* Ko nātou ʼaē ʼe maʼuʼuli pea mo nātou gāue ʼi te ʼu Petele, ʼe nātou loto ke fakahā ʼi te ʼu fale ʼaia te manavasiʼi pea mo te fakaʼapaʼapa kia Sehova. ʼE fakamaʼua e te faʼahi ʼaia ke nātou fakahā takitokotahi te agatonu.

ʼE tautau fakatokagaʼi e nātou ʼaē ʼe ʼolo ʼo ʼaʼahi te ʼu Petele, te fakaʼaluʼalu lelei ʼo te gāue pea mo te maʼa ʼaē ʼo te ʼu fale ʼaia. ʼE lelei te fakatuʼutuʼu ʼo te gāue ʼa nātou ʼaē ʼe gāue ai pea ʼe nātou fiafia; ʼe hā ʼi tanatou ʼu palalau, mo tanatou ʼu aga, pea mo tanatou faʼahiga teu fakapotopoto ʼi te faʼahi fakalaumālie, mo tonatou ʼu leʼo ʼo loto ʼaē neʼe akoʼi ʼaki te Tohi-Tapu. Ko nātou ʼo te famili ʼo te Petele ʼe nātou mulimuli fuli ki te ʼu lekula ʼo te Folafola ʼa te ʼAtua.

Pea tahi ʼaē meʼa, ʼe foaki kia nātou e te Kolesi Pule te tohi ko tona kupu tāfito Habitons ensemble dans une étroite union (Tou nonofo fakatahi ʼi he logo tahi lelei), ʼe fakahā fakalelei ai te ʼu fakatuʼutuʼu ʼaē ʼe ʼaoga ki he famili kaugamālie feiā, ke nātou gāue lelei ʼi te logo tahi. (Pesalemo 133:1) Ohage la, ʼe talanoa ʼo ʼuhiga mo te ʼu kogafale, mo te kai, mo te maʼa, mo te faʼahiga teu pea mo te faʼu ʼo te lauʼulu, pea mo ʼihi ʼu meʼa feiā. Ko te famili ʼo te Petele ʼe nātou agatonu ʼo lagolago pea mo nātou mulimuli ki te ʼu fakatuʼutuʼu ʼaia, māʼiape la peʼe nātou holi ki he tahi age meʼa. ʼE mole nātou faka ʼuhiga te tohi ʼaia ohage ko he ʼu tuʼuga lekula fefeka, kae ohage ko he ʼu faʼahiga aga ʼe tonu ke nātou mulimuli kiai moʼo taupau te logo tahi pea mo te felogoi lelei. ʼE agatonu te ʼu tagata taupau ʼi tanatou lagolago ki te ʼu fakatuʼutuʼu ʼaia ʼaē ʼe fakatafito ki te Tohi-Tapu, pea mo nātou fakaʼaogaʼi te ʼu fakatuʼutuʼu ʼaia moʼo fakaloto mālohiʼi te famili ʼo te Petele ke nātou hoko atu tanatou tauhi taputapu ʼi te Petele.

* Ko te ʼu fale gāue, mo te ʼu pilō, pea mo te ʼu fale ʼaē ʼe nātou nonofo ai ʼe mole ko te fale lotu lahi fakalaumālie ʼa te ʼAtua, peʼe ko tona ʼapi. Ko te fale lotu fakalaumālie ʼa te ʼAtua ʼe ko tana fakatuʼutuʼu ʼo ʼuhiga mo te tauhi maʼa. (Mikea 4⁠:⁠1) ʼI tona faka ʼuhiga ʼaia, ʼe mole faka ʼuhiga te fale lotu ʼa te ʼAtua ki he fale neʼe laga ʼi te kele.

[Talanoa ʼo te pasina 10]

Te Tagata Agatonu Pea Mo Te Tagata ʼAē ʼe Pipiki Fau Ki Te Lao

ʼI te taʼu 1916, neʼe ʼui e te Encyclopædia of Religion and Ethics ko te “kehekehe ʼo te tagata ʼaē ʼe agatonu pea mo ia ʼaē ʼe pipiki fau ki te lao, neʼe maʼu ʼi te ʼu temi fuli pe pea ʼi te ʼu potu fuli pe.” Neʼe fakamahino fēnei e te tohi ʼaia: “ ʼE ʼi ai te tagata ʼaē ʼe pipiki fau ki te lao, ʼe ina fai te meʼa ʼaē ʼe ʼui e te lao ʼaia, ʼo mole talagataʼa ki he lekula; ʼe ina taupau tana tui ki te folafola pea ʼe nofo agatonu kiai. ʼE ʼi ai te tagata ʼaē ʼe agatonu ʼe ina fai te ʼu meʼa ʼaia, kae . . . ʼe laka age, ʼo tokaga katoa ki tana gāue, ʼo ina fai ke mulimuli tana aga mo te ʼuhiga ʼo te fakatuʼutuʼu ʼaē ʼe gāue kiai.” Ki muli age, ʼe toe ʼui fēnei e te tohi ʼaia: “Ko he tahi ʼe agatonu ʼe laka age ʼi hana fakaʼapaʼapa ki te lao. . . . ʼE kehekehe te tagata agatonu mo te tagata ʼaē ʼe fakaʼapaʼapa ki te lao, koteʼuhi ko te tagata agatonu ʼe tauhi ʼaki tona loto pea mo tona ʼatamai katoa . . . ʼE mole ina tali ke ina fai he agahala ʼaki tona loto katoa, peʼe ke agahala he neʼe mole ina fai te meʼa ʼaē neʼe tonu ke ina fai, pe neʼe agahala kae neʼe mole ina ʼiloʼi.”