Kapite 30

Te Tali ʼa Sesu Ki Tona Kau Fakakovi

ʼI TE talaʼakiʼi ʼo Sesu e te kau takitaki lotu sutea ʼo ʼui neʼe ina maumauʼi te sapato, neʼe tali age e Sesu kia nātou: “Ko taku Tāmai neʼe gāue tuʼumaʼu ʼo kaku mai ki te temi nei, pea ʼe toe feiā foki mo ʼau ʼe ʼau gāue tuʼumaʼu.”

Logope te ʼu fakamoʼoni ʼa te kau Faliseo, ko te gāue ʼa Sesu neʼe mole tatau ia mo te meʼa ʼaē ʼe tapuʼi ʼi te lao ʼo te sapato. Ko te ʼAtua ʼaē neʼe ina foaki age ki ai te gāue ʼaē ko te fai faka mafola pea mo te fakamālōlō, pea, ʼaki tana faʼifaʼitaki ki tana Tāmai, neʼe fai e Sesu te ʼu meʼa ʼaia tuʼumaʼu ʼi te ʼaho fuli pe. Kae, ko tana tali ki te kau Sutea, neʼe toe ʼāsili ai tonatou ʼiʼita, pea neʼe nātou faigaʼi ke matehi ia ia. Koteā koa tona tupuʼaga?

Heʼe ʼi te temi nei ʼe mole gata pe ʼi tanatou ʼui ʼaē ʼe maumauʼi e Sesu te sapato, kae ʼe nātou ʼui ʼe leakovi ia, ʼi tana ʼui ʼaē ko ia ko te ʼAlo ʼo te ʼAtua. Kae, neʼe mole ina tuʼania te faʼahi ʼaia, neʼe lea age ia Sesu ʼo ʼuhiga mo tana fakatahi ʼaē mo te ʼAtua. “Ko te Tāmai ʼe ʼofa ki te ʼAlo, ko tana fakamahino age ʼaia, pea ʼe ina fakahā age ki ai te ʼu meʼa fuli ʼaē ʼe ina fai e ia totonu.”

‘Ohage ko te toe fakatuʼuake e te Tāmai te ʼu mate mo foaki age kia nātou te maʼuli, ko te hoko atu ʼaia ʼa te palalau ʼa Sesu, ʼe toe feiā pe mo te ʼAlo ʼe ina toe foaki te maʼuli kia nātou ʼaē ʼe loto ia ia ki ai.’ ʼE moʼoni, ko te ʼAlo kua ina fakatuʼuake ia nātou ʼaē kua mamate ʼi te faʼahi fakalaumālie. ‘Ko ʼaē ʼe fagono mai ki taku palalau pea mo tui kia te ia ʼaē neʼe ina fekauʼi mai ʼau, ko tana toe ʼui ʼaia, ʼe haʼu ia mai te mate ki te maʼuli.’ Pea neʼe ina fakamahino lelei age: “ ʼE haʼu te hola, pea ʼe ko te temi nei, ʼaia ʼe logo ai anai te kau mate ki te leʼo ʼo te ʼAlo ʼo te ʼAtua, pea ko nātou ʼaē neʼe tokakaga ʼe nātou maʼuʼuli anai.”

Logope neʼe mole heʼeki fakatuʼuake e Sesu he tahi mai te mate, kae neʼe ina fakamahino age ki te kau Faliseo ko te faʼahi ʼaia ʼe hoko anai ia. “ ʼAua naʼa koutou punamaʼuli ki te meʼa ʼaenī, ko tana tala age ʼaia, heʼe haʼu te hola, ʼaē ʼe ko nātou fuli ʼe ʼi te ʼu loto falemaka fakamanatu ʼe nātou logo anai ki tona leʼo pea ʼe nātou hū mai anai ki tuʼa.”

ʼO aʼu ki te temi ʼaia, neʼe mole heʼeki fakahāhā lelei e Sesu te tuʼulaga tāfito ʼo ia ʼi te fakatuʼutuʼu ʼa te ʼAtua. Kae neʼe lahi te ʼu meʼa neʼe ʼiloʼi e tona kau fakakovi ʼo ʼuhiga mo te ʼu fehuʼi ʼaia. “Neʼe koutou fekauʼi te ʼu tagata kia Soane, pea neʼe fakamoʼoni e ia ki te moʼoni”, ko tona fakamanatu age ʼaia kia nātou e Sesu.

Kua ʼosi taʼu e lua ki muʼa atu, neʼe palalau ia Soane Patita ki te kau takitaki lotu sutea ʼaia ʼo ʼuhiga mo Ia ʼaē ka muli mai. Neʼe ina fakamanatu age kia nātou ko te temi ʼaē, neʼe nātou leleiʼia lahi ʼaupito ia Soane, ʼaenī kua pilisoniʼi ʼi te temi nei, neʼe ʼui age e Sesu kia nātou: “ ʼI he kiʼi temi siʼisiʼipe, neʼe koutou leleiʼia ke koutou fakafiafia lahi ʼi tona mālama.” Neʼe fakamanatuʼi age e Sesu kia nātou te meʼa ʼaia ʼaki tana falala ʼaē ke tokoni kia nātou, ʼio, ke ina hāofaki ia nātou. Ka neʼe mole ʼi ai he ʼaoga tāfito ia kia te ia te fakamoʼoni ʼa Soane.

“Ko te ʼu gāue totonu ʼaia ʼe ʼau fai [ohage ko te milakulo ʼaē neʼe ina hoki ʼosi fai atu pe], ʼe nātou fakamoʼoni kia te ʼau, ko te Tāmai ʼaē neʼe ina fekauʼi mai ʼau.” Kae, neʼe ina toe ʼui age, “ko te Tāmai ʼaē neʼe ina fekauʼi mai ʼau neʼe ina fakamoʼoni tonu e ia ʼo ʼuhiga mo ʼau”. Neʼe fai e te ʼAtua te fakamoʼoni ʼo ʼuhiga mo Sesu, ʼi te temi ʼo tona papitema, ʼi tana folafola ifo ʼaē: “Ko ia nei ko toku ʼAlo, ʼofaina.”

Koia, ko te kau fakakovi ʼo Sesu neʼe mole tonu ai ke nātou fakafisi kia te ia. Heʼe ko te ʼu Tohi ʼaē ʼe nātou fakamoʼoni mai ʼe nātou vakaʼi ʼe fakamoʼoni ia ʼo ʼuhiga mo ia! “Heʼe kapau, ʼe koutou tui kia Moisese, pea ʼe koutou toe tui foki kia te ʼau, ko te fakaʼosi ʼaia ʼo te palalau ʼa Sesu, heʼe ko ia na neʼe faitohi ʼo ʼuhiga mo ʼau. Kae kapau ʼe mole koutou tui ki tana ʼu tohi, pea ʼe feafeaʼi leva anai hakotou tui ki ʼaku palalau? ” Soane 5:17-47; 1:19-27; Mateo 3:17.

▪ He koʼe ko te gāue ʼaē ʼa Sesu neʼe mole ko he meʼa ʼe ina maumauʼi te sapato?

▪ Neʼe feafeaʼi te fakamatalatala e Sesu te tuʼulaga tāfito ʼo ia ʼi te fakatuʼutuʼu ʼa te ʼAtua?

▪ Moʼo fakamoʼoni ko ia ko te ʼAlo ʼo te ʼAtua, ko te fakamoʼoni ʼa ai ʼaē neʼe talanoa kiai ia Sesu?