Kapite 32

Koteā Koa Te Meʼa ʼe Gafua Ke Fai Lolotoga Te Sapato?

ʼI TE tahi ʼaho ʼo te sapato, neʼe hū ia Sesu ki te sinakoka ʼe ōvi ki te tai ʼo Kalilea. Neʼe ʼi ai te tagata ʼe mate tona nima mataʼu. Ko te kau sekelipa pea mo te kau Faliseo neʼe nātou lama ia Sesu peʼe ina fakamālōlō anai te tagata ʼaia. Pea neʼe nātou fehuʼi age kia te ia: “ ʼE gafua koa ke fai he fakamālōlō lolotoga te sapato?”

ʼI te manatu ʼa te kau takitaki lotu sutea ʼe feala ke fakamālōlō he tahi lolotoga te sapato mo kapau ʼe feala ke tuʼutāmaki tona maʼuli. Neʼe nātou akonaki, ʼo ʼuhiga mo te ʼaho ʼo te sapato ʼe tapu te fakatotonuʼi ʼo he hui neʼe mahuʼi pe ko he haʼi ʼo he tatepa. Koia, ko te fakafehuʼi e te kau sekelipa pea mo te kau Faliseo ia Sesu, ko tanatou fia maʼu he meʼa moʼona faka lākahalaʼi.

Kae, neʼe ʼiloʼi lelei pe e Sesu tanatou ʼu manatu. Neʼe ina toe tokagaʼi ai foki ko tanatou tonu ʼe mamafa fau, pea ʼe mole ʼalutahi ia mo te ʼu Tohi ʼo ʼuhiga mo he meʼa ʼe ina maumauʼi te lao ʼaē ʼe ina tapuʼi te gāue lolotoga te sapato. Koia neʼe ina teuteuʼi ai hanatou felāveʼi ʼaki tana fakatotonu age ki te tagata ʼaē ʼe mate tona nima: “Tuʼu ake ki ʼoluga pea ke haʼu ki loto.”

ʼOsi ʼaia, pea neʼe maliu ia Sesu ki te kau sekelipa pea mo te kau Faliseo, ʼo ina ʼui age kia nātou: “Ko ai te tagata ʼaē ia koutou ʼe ko hana ōvi pe e tahi pea ka tō ia ki he luo lolotoga te sapato, ʼe mole ina puke anai ia ʼo toʼo ake?” Ko he ōvi ʼe ko he koloā ia, pea ʼe mole nātou tuku anai ʼi te luo ʼo aʼu ki te uhu ake, heʼe feala ke kovi ai pea ʼe puli ai leva honatou koloā. Pea tahi foki, neʼe tala fēnei e te ʼu Tohi: “Ko te tagata agatonu ʼe tokaga lelei ki te nefesi ʼo tana manu lalata.”

Pea ʼi tana fakatatau ki te fakatā ʼaia, neʼe hoko atu te palalau ʼa Sesu: “Kae ko te tagata ʼe maʼuhiga lahi ake ia ʼi he ōvi! Koia ʼe gafua ai te fai ʼo he meʼa ʼe taulekaleka lolotoga te sapato.” Neʼe mole lava ke maʼu he tali ʼa te kau takitaki lotu ki te taʼi fakakaukau tonu ʼaia, ʼaē ʼe ʼiloga mai ai te lahi ʼaupito ʼo tona manavaʼofa, pea neʼe nātou nonofo fakalogologo.

ʼAki tona ʼita pea mo tona lotomamahi ʼuhi ko te fefeka ʼo tonatou loto, neʼe sioʼi ia nātou e Sesu. Pea ina ʼui age ai ki te tagata mahaki: “Faoʼi mai tou nima.” Neʼe fakalogo te tagata ʼaia, pea lelei ai tona nima.

Neʼe mole fiafia te kau Faliseo ki te fakamālōlō ʼaia, ka neʼe nātou ʼolo ai ki tuʼa pea nātou kamata fonofono atu aipe ke matehi ia Sesu, ʼo nātou felogoi pea mo te ʼu hahaʼi ʼa Helote. Ko nātou ʼaia ʼe nātou kau ki te faʼahi faka politike, ʼo kau ai foki mo te kau Satuseo. ʼI te agamāhani, ko nātou ʼaē ʼe kau mo Helote neʼe nātou fefakafeagaiʼaki mo te kau Faliseo, kae ʼi te temi nei kua nātou felogoi tahi ʼo fakafeagai kia Sesu. Mateo 12:9-14; Maleko 3:1-6; Luka 6:6-11; Tāʼaga Lea 12:10; Ekesote 20:8-10.

▪ Neʼe feafeaʼi koa te teuteuʼi e Sesu tana felāveʼi pea mo te kau takitaki lotu?

▪ Koteā te tonu ia ʼa te kau Sutea ʼaia ki te ʼu fai faitoʼo ʼaē ʼe fai lolotoga te sapato?

▪ Ko te fakatā fea ʼaē neʼe fakaʼaogaʼi e Sesu moʼo faka lākahalaʼi ʼo tanatou tonu ʼaē ʼe kovi?