Kapite 34

Te Fili e Sesu Tana Kau ʼApositolo

KUA ʼosi ki ai te taʼu katoa vaelua ki te fakahā ʼaē e Soane Patita ko Sesu ko te Akeno ʼo te ʼAtua, pea mo te kamata ʼo te minisitelio ʼo Sesu ki te hahaʼi. ʼI te temi ʼaia, ko Atelea, Simone Petelo, Soane pea mo lagi Sake (te tēhina ʼo Soane), ʼo feiā mo Filipo pea mo Natanaele (ʼaē ʼe toe higoa ko Paletolomeo), kua nātou liliu ko tana ʼu ʼuluaki tisipulo. Talu mai ai, neʼe toe tokolahi niʼihi neʼe fakatahi age kia nātou ke nātou muli ia Kilisito.

ʼI te temi leva ʼaē kua tokalelei ia Sesu ke ina fili tana kau ʼapositolo. Ko nātou ʼaia ʼe gāue fakatahi anai mo ia pea ʼe ina akoʼi anai nātou ʼo makehe age ki te faʼahi ʼaia. Kae ʼi muʼa ʼo tonatou fili, neʼe ʼalu ia Sesu ki te moʼuga pea nofo ai ʼi te po katoa ʼo faikole, ʼo lagi kole ki te ʼAtua ke ina tuku ifo kia te ia he poto pea mo Tana tapuaki. ʼI te ʼala uhu ake, neʼe ina pāui tana kau tisipulo fuli pea ina fili ai te toko 12. Kae, ʼi tonatou kei ʼuhiga ʼaē ko te kau ako ʼa Sesu, neʼe kei fakahigoaʼi aipe ia nātou ko te ʼu tisipulo.

Neʼe fili e Sesu te toko ono ʼaē neʼe tuʼu ʼonatou higoa ʼi ʼoluga ake, ʼaē neʼe ko tana ʼu ʼuluaki tisipulo. Neʼe ina toe fili foki mo Mateo, ʼaē neʼe ʼalu ia ʼo kumi mai tona pilō tānaki tukuhau. Ko te toko nima ki muli mai ko Suta (ʼe higoa ko Tateo), Sutasi Isikaliote, Simone te Kananite, Tomasi pea mo Sake, foha ʼo Alefeo. Ko te Sake ʼaia neʼe toe higoaʼi foki ko Sake Veliveli, neʼe lagi nounou ʼapē pe neʼe muli ia ʼi te ʼapositolo ʼaē ʼe tatau tona higoa mo ia.

Ko te ʼu tagata ʼaia e toko 12 neʼe kua fuafualoa pe tanatou fakatahi mo Sesu pea ʼe ʼiloʼi lelei ia nātou e Sesu. Ko ʼihi ia nātou, ko tona ʼu kāiga. Ko Sake pea mo tona tēhina ko Soane ʼe mahino ia ko te ʼu tēhina mataʼi tama ʼo Sesu. Pea ʼe mahalo pe ko Alefeo ko te tēhina ʼo Sosefo, te tāmai ʼaē neʼe ina vaheʼi ia Sesu. ʼI te faʼahi leva ʼaia, ko te ʼapositolo ko Sake foha ʼo Alefeo, ʼe ko te tahi ʼaia tēhina mataʼi tama ʼo Sesu.

Neʼe mole faigataʼa kia Sesu, tana manatuʼi te ʼu higoa ʼo tana kau ʼapositolo. Kaeā ia koutou, ʼe koutou manatuʼi koa? Koutou manatuʼi ko te ʼu Simone e lua, te ʼu Sake e lua, pea mo te ʼu Sutasi e lua, pea ko Simone ʼe ʼi ai tona tēhina ʼe higoa ko Atelea, pea ko Sake ʼe ʼi ai tona tēhina ʼe higoa ko Soane. Koia kua feala leva takotou fakamaʼumaʼu te ʼu higoa ʼo te ʼu ʼapositolo e toko valu. Pea ko te toko fā ʼaē, ʼe tou maʼu ai te tagata tānaki tukuhau ko (Mateo), mo te ʼapositolo ki muli age neʼe lotolotolua tana tui ko (Tomasi), mo te tahi neʼe nofo ʼi te lalo fuʼu ʼakau ʼi te temi ʼaē neʼe pāuiʼi ai e Sesu (ko Natanaele) pea mo tona kaumeʼa, ko Filipo.

Ko ʼapositolo e toko hogofulu-ma-tahi neʼe ʼōmai mai Kalilea, ohage ko Sesu. Ko Natanaele neʼe haʼu ia mai Kana. Ko Filipo, mo Petelo pea mo Atelea neʼe ʼōmai mai Petesaita, ka ko Petelo pea mo Atelea neʼe nā nonofo ki muli age ʼi Kapenaume, ko te kolo ʼaia neʼe toe nofo ai foki mo Mateo. Ko Sake pea mo Soane neʼe ko te ʼu tagata tautai, pea neʼe lagi nonofo foki mo nāua ʼi Kapenaume peʼe ko tona ʼu tafaʼaki. Ko Sutasi Isikaliote, ʼaē neʼe ina lavakiʼi ia Sesu ki muli age, neʼe ko te ʼapositolo pe ʼaia e tahi neʼe haʼu mai Sutea. Maleko 3:13-19; Luka 6:12-16.

▪ Ko ai te ʼu ʼapositolo ʼaē neʼe mahalo pe ko te ʼu kāiga ʼo Sesu?

▪ Ko ai te ʼu ʼapositolo ʼa Sesu, pea e feafeaʼi koa tatatou manatuʼi tonatou ʼu higoa?

▪ Neʼe ʼōmai te kau ʼapositolo mai te ʼu potu fenua fea?