Neʼe Filifili e Sesu Te Kau Apositolo ʼe Toko Hogofulu-ma-lua

Neʼe kua hili te taʼu katoa vaelua ki te fakaha e Soane Patita ʼe ko Sesu te Akeno ʼo te ʼAtua. ʼI te kamata e Sesu tona minisitelio, neʼe liliu te ʼu tagata fakamalotoloto ko hana ʼu tisipulo, ohage ko Atelea, mo Simone Petelo, mo Soane, lagi mo Sakopo (te tehina ʼo Soane), mo Filipo pea mo Paletolomeo (neʼe toe fakahigoaʼi ko Natanaele). ʼAki te temi, neʼe muliʼi e te hahaʼi tokolahi ia Kilisito.—Soane 1:45-47.

Neʼe ʼamanaki filifili leva e Sesu tana kau apositolo. ʼE natou gaue fakatahi anai mo ia pea ʼe ina foaki anai kia natou he ako ʼe makehe. Kaʼe ʼi muʼa ʼo tana filifili ia natou ʼaia, neʼe alu ia Sesu ki te moʼuga, neʼe lagi ovi ki te Tai ʼo Kalilea, ʼo mole faʼa mamaʼo mai Kapenaume. Neʼe faikole ʼi te po katoa, ʼo lagi ina kole te poto pea mo te tapuakina ʼa te ʼAtua. ʼI te uhu ake, neʼe ina pauʼi leva tana kau tisipulo pea neʼe ina filifili mai ia natou tana kau apositolo ʼe toko 12.

Neʼe filifili e Sesu te toko ono ʼae ʼe tuʼu ʼonatou higoa ʼi te kamata ʼo te kapite ʼaeni, pea mo Mateo, ʼae neʼe gaue ʼi te fale ʼo te ʼu tukuhau ʼi te temi ʼae neʼe pauʼi ai ia ia e Sesu. Neʼe ina toe filifili mo te toko nima: ko Sutasi (neʼe toe fakahigoaʼi ko Tateo peʼe ko “te foha ʼo Sakopo”), mo Simone ʼae ʼe toe higoa ko te Kananite, mo Tomasi, mo Sakopo te foha ʼo Alefeo pea mo Sutasi Isekaliote.—Mateo 10:2-4; Luka 6:16.

Neʼe kua fuafualoa pe te feoloʼaki ʼa te ʼu tagata ʼaia ʼe toko 12 mo Sesu, koia neʼe ina iloʼi lelei ia natou. Ko ʼihi ia natou neʼe ko ʼona kaiga. ʼE mahino ia, ko te tau tehina ko Sakopo mo Soane neʼe ko te ʼu tehina mataʼi tama ʼo Sesu. Pea kapau, ohage ko te manatu ʼa ʼihi, ko Alefeo neʼe ko te tehina ʼo Sosefo, ia ia ʼae neʼe ina vaheʼi ia Sesu, pea ko te foha ʼo Alefeo, ia te apositolo ko Sakopo, neʼe ko te tehina mataʼi tama ʼo Sesu.

ʼE mahino ia, neʼe mole faigataʼa kia Sesu tana manatuʼi te ʼu higoa ʼo tana kau apositolo. Kaʼe ʼe feala koa kia koe hau manatuʼi ʼonatou higoa? ʼE faigafua anai kia koe mo kapau ʼe ke manatuʼi ko Simone ʼe lua, mo Sakopo ʼe lua pea mo Sutasi ʼe lua. Neʼe ʼi ai te tehina ʼo Simone (Petelo) ko Atelea, pea mo te tehina ʼo Sakopo (foha ʼo Sepeteo) ko Soane. Kua feala ai leva hau manatuʼi te ʼu higoa ʼo te ʼu apositolo ʼe toko valu. Pea ko te toko fa ʼae kei toe, neʼe ko te tagata tanaki tukuhau (ko Mateo), mo ia ʼae neʼe lotolotolua ki muli age (ko Tomasi), mo ia ʼae neʼe pauʼi ʼi tana heka ʼi te lalo fuʼu ʼakau (ko Natanaele) pea mo te kaumeʼa ʼo Natanaele (ko Filipo).

Ko apositolo ʼe toko 11 neʼe ko te kau Kalilea, te potu fenua ʼae neʼe lahilahi ake ai ia Sesu. Neʼe haʼu ia Natanaele mai te kolo ko Kana. Ko Filipo, mo Petelo pea mo Atelea neʼe natou ʼomai mai Petesaita. Ki muli age, neʼe mavae ia Petelo pea mo Atelea ʼo nā olo ki Kapenaume, ʼae neʼe lagi kua maʼuli ai ia Mateo. Neʼe toe nonofo foki ia Sakopo mo Soane ʼi Kapenaume peʼe ʼi ʼona tafaʼaki, pea neʼe nā fai ai tanā gaue tautai. Pea ko Sutasi Isekaliote, ʼae neʼe ina lavakiʼi ia Sesu ki muli age, neʼe hage ko ia tokotahi pe ʼae neʼe haʼu mai te potu fenua ko Sutea.