Kapite 37

Neʼe Fakafimālieʼi e Sesu Te Fafine Vitua ʼi Tona Mamahi

ʼI TE ʼosi ʼo tana fakamālōlō te tagata kaugana ʼa te ofisie loma, neʼe ʼalu ia Sesu ki Naini, ko te kolo ʼaia ʼe tuʼu ʼi te potu toga-hihifo ʼo Kapenaume ʼo mamaʼo ia kilometa e tolugofulu. Neʼe muli ia te ia tana ʼu tisipulo pea mo te hahaʼi tokolahi. Neʼe lagi nātou aʼu atu ki te ʼu tafaʼaki ʼo te kolo ʼi te afiafi; pea neʼe nātou felāveʼi ai mo te ʼavaifo. Ko te sino ʼo te tama ʼe fata ki tuʼa kolo ke ʼave ʼo tanu.

Ko te faʼe ʼa te tama kua tō ia ki te tuʼutāmaki, heʼe ko ia ko te fafine vitua pea ko tana tama ʼaia neʼe ʼulu tokotahi. ʼI te mate ʼo tona ʼohoana, neʼe lava pe ʼo lotomālohi ʼo ʼui maʼana kei toe tana tama. Ko tana ʼu ʼamanaki fuli, te ʼu meʼa neʼe holi ia ki ai pea mo te ʼu meʼa neʼe fia fai ia ki ai, neʼe ina fakatuʼutuʼu fuli ki tana tama. Kae, ʼi te temi nei ʼe mole kei ʼi ai he tahi ke ina fakaloto fīmālieʼi ia ia. ʼE ko he fafine ia kua taʼomia ʼi tona mamahi ʼaē ʼe takitaki e te hahaʼi ki te tanuʼaga ʼo tana tama.

ʼI te sio ʼa Sesu ki te fafine ʼaia, neʼe lave ʼaupito ki tona loto ʼuhi ko te lahi ʼaupito ʼo tona mamahi. ʼAki tona ʼofa, pea mo te mālohi ʼaē ʼe fakatupu ai te falala kia te ia, neʼe ina ʼui age: “Tuku tau tagi.” Ko tana aga pea mo te faʼahiga meʼa ʼaē neʼe ina fai neʼe fakatokagaʼi e te hahaʼi, koia neʼe tutuʼu ai ia nātou ʼaē ʼe nātou fata te mate ʼi te temi neʼe kaku atu ai ia Sesu ʼo fāfā ki te fata ʼaē ʼe hili ai te mate. ʼE mahino neʼe lagi nātou feʼekeʼaki fuli pe koteā anai te meʼa ka ina fai.

Ko nātou ʼaē neʼe ʼolo mo Sesu neʼe kua nātou sisio foki ki tana fakamālōlō faka milakulo te ʼu mahaki. Kae ʼe ʼiloga mai ia neʼe mole heʼeki nātou sisio ki hana fakatuʼuake he tahi mai te mate. ʼE feala ʼapē koa hana fai he meʼa feiā? Neʼe palalau ia ki te mate, ʼo fēnei tana fakatotonu age: “Tūpulaga, ʼe ʼau ʼui atu kia koe, tuʼu ake!” Pea ʼi te temi pe ʼaia, neʼe mafuta ake ai ʼo nofo! ʼO kamata ai tana palalau, pea neʼe tuku age ai e Sesu ki tana faʼe.

ʼI te sio ʼa te hahaʼi kua maʼuli moʼoni te tūpulaga ʼaia, neʼe fēnei te ʼui ʼa ʼihi: “Ko te polofeta lahi kua fakatupu ia tatou.” Pea ʼui e ʼihi: “Ko te ʼAtua kua ina fakahaga tana tokaga ki tana hahaʼi.” Ko te logo ʼo te meʼa fakaofoofo ʼaia neʼe vave tona mafola ʼi Sutea katoa pea mo te fenua katoa ki tuʼa atu.

Ko Soane Patita, ʼe kei nofo nei pe ʼi te fale pilisoni, pea neʼe lahi te ʼu meʼa ʼe ina fia ʼiloʼi ʼo ʼuhiga mo te ʼu gāue ʼaē ʼe feala ke fai e Sesu. Ko te ʼu tisipulo ʼa Soane neʼe nātou fakamatala age ki ai te ʼu milakulo ʼaia. Neʼe feafeaʼi tana aga ʼi te faʼahi ʼaia? Luka 7:11-18.

▪ Koteā te meʼa neʼe hoko ʼi te ōvi ʼa Sesu ki te kolo ko Naini?

▪ Koteā ʼaē neʼe logoʼi e Sesu ʼi tona loto ʼi tana sio ki te meʼa ʼaia, pea koteā te meʼa neʼe ina fai?

▪ Neʼe feafeaʼi te aga ʼa te hahaʼi ʼi te milakulo ʼaē neʼe fai e Sesu?