Kapite 38

Neʼe Kua Vaivai Koa Te Tui ʼa Soane?

KO SOANE Patita, ʼaē ʼe nofo nei ʼi te fale pilisoni kua ʼosi ki ai te taʼu katoa, neʼe logo ia ki te fakatuʼuake e Sesu te tama ʼa te fafine vitua ʼi Naini. Kae ʼe ina fia ʼiloʼi totonu mai ia Sesu te faka ʼuhiga ʼo te milakulo ʼaia; koia neʼe ina fekauʼi ai ʼana ʼu tisipulo e lua ke nā ʼolo ʼo fehuʼi kia te ia: “ ʼE ko koe koa ʼAē ʼe haʼu, peʼe tonu ia ke mātou atalitali ki he tahi age?”

E lagi e mata faikehe foki te fehuʼi ʼaia, heʼe, ʼi te ʼu taʼu e lua ki muʼa ʼatu, neʼe sio ia Soane ki te hifo ʼa te laumālie ʼo te ʼAtua kia Sesu ʼi te temi ʼaē neʼe ina papitemaʼi ai pea neʼe logo ia ki te leʼo ʼo te ʼAtua ʼe ina ʼui ifo kua ina leleiʼia tona ʼAlo. ʼAki tana fehuʼi, neʼe lagi ʼui ai e ʼihi kua vaivai tana tui. Kae, kailoa ia. Ka na ʼaua la neʼe mole feala ke palalau lelei ia Sesu ʼo ʼuhiga mo Soane, ohage ko te meʼa ʼaē ka ina fai ʼo ʼuhiga mo te faʼahi ʼaia, mo ka na pau la neʼe kua lotolotolua tana tui. Kae koteā te tupuʼaga ʼo te fai e Soane te fehuʼi ʼaia?

E lagi neʼe ina loto ʼapē ke fakamoʼoni age e Sesu ko ia ko te Mesia. ʼE ko he meʼa fakaloto mālohi anai kia ia, ʼaē kua fiu ʼi te nofo ʼi te fale pilisoni. Kae ʼe ʼiloga mai ia neʼe ʼi ai te tahi ʼu tupuʼaga ʼo tana fai te fehuʼi ʼaia. ʼE ʼiloga mai ia ʼe ina fia ʼiloʼi peʼe ʼi ai he tahi ʼe tonu ke haʼu, ʼo hoko atu kia Sesu, ke ina fakaʼosi te fakahoko ʼo te ʼu tala faka polofeta fuli ʼaē ʼe tonu ke fakahoko e te Mesia.

ʼI te ʼu lea faka polofeta ʼo te Tohi-Tapu, ʼaē ʼe ʼiloʼi e Soane, ko te Fakanofo ʼa te ʼAtua ʼe tonu ko he hau, ko he tahi ʼe ina faka ʼāteaina te hahaʼi. Kae, koʼeni pe ia ʼe kei pilisoniʼi ia Soane, kua ʼosi la kiai te ʼu māhina talu mai te papitemaʼi ʼo Sesu. ʼE hā lelei mai ia ko te fehuʼi ʼa Soane kia Sesu, ʼe fēnei: ‘ ʼE ko koe moʼoni koa ia ia ʼaē ka ina fakatuʼu te Puleʼaga ʼo te ʼAtua ʼaki te fakahā ʼo te mālohi, peʼe tonu koa ia ke mātou talitali ki he tahi age, he tahi ke hoko kia te koe, ʼaia ka ina fakahoko anai te ʼu lea faka polofeta fakatalakitupua ʼo ʼuhiga mo te kolōlia ʼo te Mesia?’

Neʼe mole ina fai age he tali ki te ʼu tisipulo ʼa Soane ʼo fēnei: ‘ ʼE moʼoni ko ʼau ʼaē ʼe tonu ke haʼu!’, ka neʼe fai e Sesu ʼi te temi pe ʼaia te fakahāhā fakaofoofo ʼo ina fakamālōlō te ʼu hahaʼi tokolahi mai te ʼu faʼahiga mahaki kehekehe. ʼOsi ʼaia pea ina fakatotonu ki te ʼu tisipulo: “Koulua ʼolo ʼo fakahā kia Soane te ʼu meʼa ʼaē neʼe koulua sisio pea mo logo kiai: kua sio te kivi, kua haʼele te ketu, kua fakamaʼa te kilia pea kua logo te tuli, kua fakatuʼuake te kau mate, kua fakahā te logo lelei ki te kau masiva.”

ʼI tona tahi faʼahiga ʼui, ko te fehuʼi ʼa Soane ʼe hā mai ai tana fakaʼamu ʼaē ke fai e Sesu te ʼu meʼa ke laka age, ʼi te ʼu meʼa ʼaē ʼe ina fai pea, mo lagi, ke ina fakamavae ia Soane totonu mai te pilisoni. Kae, neʼe ʼui age e Sesu kia Soane ke ʼaua naʼa ʼamanaki ki he ʼu meʼa ʼe laka atu ʼi te ʼu milakulo ʼaē ʼe ina fai.

ʼI te mavae atu ʼa te ʼu tisipulo ʼa Soane, neʼe maliu ia Sesu ki te hahaʼi pea ina fakahā age kia nātou ko Soane ko te “tagata ʼave logo” ʼa Sehova ʼaē neʼe fakahā ia Malakia 3:1, pea neʼe ina toe lau ko ia ko te polofeta ko Elia ʼaē neʼe fakahā ia Malakia 4:5, 6. Neʼe ina vikivikiʼi ai ia Soane, ʼo ina fakamatatauʼi ia ia mo te ʼu polofeta ʼaē neʼe mumuʼa atu ia ia, ʼo hā mai ʼi tana ʼu palalau ʼaenī: “ ʼE ʼau tala moʼoni atu kia koutou: Ia nātou ʼaē neʼe tupu ʼi te fafine, neʼe heʼeki he tahi kua fakatupu ʼe lahi ake ia Soane Patita; kaʼe ko ʼaē ʼe veliveli ʼi te puleʼaga ʼo selo ʼe lahi ake ia te ia. Kaʼe talu mai ia ʼaho ʼo Soane Patita ʼo kaku mai ki te lakaga nei, ʼe ko te puleʼaga ʼo selo ʼaē ʼe laka fakamālohi kiai te ʼu tagata.”

ʼE fakahā e Sesu ʼi henī ʼe mole kau anai ia Soane ʼi te Puleʼaga ʼo selo, koteʼuhi ko he tahi ʼe veliveli ʼi te Puleʼaga ʼe lahi ake ia te ia. Neʼe teuteuʼi e Soane te ala kia Sesu, kae mate anai ia ʼi muʼa ʼo te fakamaʼu e Kilisito te fuakava mo tana kau tisipulo, ʼaē ke nātou hau mo ia ʼi tona Puleʼaga. Ko te tupuʼaga la ʼaia ʼo te fakamoʼoni age e Sesu ʼe mole kau anai ia Soane ʼi te Puleʼaga ʼo selo. ʼE maʼuli anai ia ʼi te kele ko he tagata fakalogo ʼo te Puleʼaga ʼo te ʼAtua. Luka 7:18-30; Mateo 11:2-15.

▪ He koe neʼe fehuʼi e Soane peʼe ko Sesu koa ia Ia ʼaē ʼe haʼu peʼe tonu ia ke talitali ki he tahi age?

▪ Maʼa Sesu, ko te ʼu lea faka polofeta fea ʼaē neʼe fakahoko e Soane?

▪ He koe ʼe mole fakatahi anai ia Soane Patita mo Sesu ʼi selo?