Ko Te ʼu Fehuʼi ʼAnatou ʼe Lautohi
ʼE tonu koa ke tou ʼui ko te ʼu palalau ʼaē ia Mateo 11:11, neʼe ko Sesu neʼe kua nā ʼiloʼi fakatomuʼa ko Soane Patita ka ʼuluaki mate ānai ia te ia?
ʼE moʼoni foki, neʼe mahino lelei Sesu, ko Soane Patita ʼe mole maʼuli fualoa ke liliu ko he kilisitiano fakanofo, he neʼe ʼui e Sesu: “ ʼE ʼau tala moʼoni atu kia koutou: Ia natou fuli ʼaē neʼe fānauʼi mai te ʼu fafine, ʼe mole he tahi ʼe lahi age ia Soane Patita; kae ko ʼaē ʼe veliveli ʼi te Puleʼaga ʼo selo ʼe lahi age ia ia te ia.” — Mateo 11:11.
ʼI te temi neʼe fakahā ai e te ʼaselo ko Kapeliele te tupu ʼo Soane, neʼe ina fakakikite age ko Soane ʼe ina “maʼu ānai te laumālie pea mo te mālohi ʼo Elia, ( . . . ) moʼo teuteuʼi he hahaʼi ke lelei kia Sehova.” Ko Soane Patita neʼe muʼa ia Sesu, moʼo teuteuʼi he hahaʼi ki te Mesia ʼo Sehova. Kae, ʼe mole ʼi ai he meʼa ʼe ʼiloga mai ʼi te fakakikite fakaʼatua ʼaia ko Soane ka liliu ānai ko he tisipulo ʼa te Mesia ʼaē ka hā, pe ko he ʼu fakahāhā ʼo ʼuhiga mo te lea ʼaia fakakikite neʼe fai ʼe te tāmai ʼa Soane, ia Sakalia. — Luka 1:17, 67-79.
ʼIo, ʼi te ʼosi papitemaʼi ʼo Sesu, neʼe hoko atu pe te faka mafola ʼa Soane pea mo tana fai papitema, ki tana gāue ʼaē ko te teuteuʼi ʼo te hahaʼi. Neʼe ʼiloʼi faka milakulo foki e Soane, ko Sesu ka ina fai he papitema ʼaki te laumālie maʼoniʼoni, kae neʼe mole ina ʼui ia ko ia ʼe ina maʼu ānai te laumālie maʼoniʼoni, ʼo liliu ai ko he kilisitiano fakanofo (Mateo 3:11). Neʼe toe mahino foki Soane ko ia ka to ki muli kae ko Sesu ka to ki muʼa. — Soane 3:22-30.
ʼI te temi ʼaē neʼe ʼui e Sesu te palalau ʼaē ʼe tou lau ia Mateo 11:11, neʼe ko Soane ia neʼe kua pilisoniʼi. Neʼe ʼiloʼi fakatomuʼa foki ia e Sesu ko te polofeta ʼaia kua pilisoniʼi ʼe veliveli age ia ʼi ʼaē ka liliu ʼo gāue ohage ko he pelepitelo-hau ʼi te lagi. Kae, neʼe hage pe foki neʼe toe mahino Sesu ko Soane ka vave mate, ʼo puli ānai ia ʼi te kele ia muʼa ʼo te tofa ʼo te ala “foʼou” ʼaē ki te maʼuli ki te lagi ka avahi e Sesu (Hepeleo 10:19, 20). Ko tona ʼuhiga ʼaia ko Soane ʼe mole kei maʼuli ānai ia ʼi te Penikosite ʼo te taʼu 33 ʼo totatou temi, ʼi te temi ʼaē ka kamata fakanofo ai e Sesu tana kau tisipulo ʼaki te laumālie maʼoniʼoni. Ko ia ʼaē, ko te ʼu palalau ʼaē ʼa Sesu ia Mateo 11:11 ʼe feala ke mahino ko he fakaʼiloga: neʼe ina ʼiloʼi ko Soane ʼe mole hake ānai ia ki te lagi.