Kapite 40

Ko He Ako ʼo Te Manavaʼofa

E LAGI mahalo pe ʼe kei nofo ia Sesu ʼi Naini, ʼaia neʼe hoki ʼosi atu pe tana fakatuʼuake ʼi ai te tama ʼa te fafine vitua, peʼe kua ʼalu la ia ki he tahi atu kolo ʼe ōvi mai. Ko te Faliseo ko Simone neʼe fakaʼamu ia ke sio kia ia ʼaē neʼe ina fai te ʼu toe gāue fakaofoofo ʼaia. Koia neʼe ina fakaafe ai Sesu ki tona loto fale ke nā kakai fakatahi.

Neʼe manatu ia ko te meʼa ʼaia ʼe ko he faigamālie ia ke feala te fai ai ʼo tona minisitelio kia nātou ʼaē ʼe felāveʼi anai mo ia, koia neʼe tali ai e Sesu te fakaafe ʼaia, ohage pe ko tana tali te fakaafe ʼa te ʼu tagata tānaki tukuhau pea mo te kau agahala. Kae, ʼi tana hū atu ki te ʼapi ʼo Simone, neʼe mole tali ia ʼo fai kia te ia te ʼu agamāhani ʼe fai kia nātou ʼaē ʼe fakaafe.

Kapau neʼe hoki ʼosi ifo pe hatā haʼele loaloaga ʼi te ʼu ala ʼe efu ʼaki te ʼu tapugā vaʼe, pea ʼe maka velavela pea mo ʼuli ʼotā ʼu vaʼe; koia ʼi te agaʼi fenua ko ia ʼaē ʼe fai fakaafe ʼe ina fufulu te ʼu vaʼe ʼo tana hahaʼi fakaafe. Kae, ʼi te kaku mai ʼa Sesu, neʼe mole he tahi neʼe ina fufulu tona ʼu vaʼe. Neʼe mole he tahi foki neʼe haʼu ʼo fai he ʼuma tali fagona kia te ia, ʼe ko he aga fakaʼapaʼapa ia. Pea, neʼe mole he tahi neʼe ina tākai tona ʼulu ʼaki te lolo tali fagona ohage ko tona fai māhani.

ʼI te lolotoga ʼo te kai, ka kua nonofo fuli te hahaʼi ʼaē neʼe fakaafe mai ʼi te laupapa, neʼe hū mai ki te loto fale te fafine neʼe mole kau ʼi te kau fakaafe. Ko te fafine ʼaia kua ʼiloʼi ʼi te kolo ʼuhi ko tona maʼuli ʼe heʼemaʼa. ʼE mahino ia neʼe lagi ina fakalogo te ʼu akonaki ʼa Sesu, tāfito tana fakaafe, ‘ia nātou fuli ʼaē ʼe mafasia, ke nātou ʼōmai kia te ia ke ina fakafimālie ia nātou’. ʼI te lave loloto kia ia ʼo te ʼu meʼa ʼaē neʼe sio pea mo logo kiai, neʼe kumi e te fafine ʼaia ia Sesu.

Neʼe fakalaka ia tuʼa ʼo Sesu, ʼaē kua nofo ʼi te laupapa, pea ʼalu ʼo tuʼutuli ʼi ʼona vaʼe. ʼI tana palapalaʼi tona ʼu vaʼe ʼaki tona ʼu loʼimata, neʼe ina holoholoʼi ʼaki tona lauʼulu. ʼOsi ʼaia pea ina liligi te hina lolo magoni ki tona ʼu vaʼe mo ʼuma mamahi kiai. Kae ko Simone neʼe mole ina leleiʼia te meʼa ʼaē ʼe sio kiai. Koʼeni tana manatu: “Ko te tagata ʼaenī, kapau ʼe ko he polofeta, pea ʼe ina ʼiloʼi anai pe ko ai pea ʼe ko te faʼahiga fafine feafeaʼi ʼaē ʼe fāfā mai kia te ia, ko te fafine agahala.”

ʼI tana ʼiloʼi tana manatu, neʼe lea age ia Sesu ki ai ʼo fēnei: “Simone, ʼe ʼi ai te meʼa ʼe ʼau fia ʼui atu kia koe.”

“Faiako, lea mai!”, ko te tali age ʼaia ʼa Simone.

“Ko tagata e toko lua neʼe tuʼu maʼua ki te tagata foaki maʼua; ko te maʼua ʼo te tahi ko te nimageau tenalio pea ko te tahi ko te nimagofulu. Pea ʼi te mole ʼi ai ʼaē ʼo hanā meʼa ke nā huʼi ʼaki, neʼe ina molehi fakaʼofa age kia nāua. Ko ai ʼaē ia nāua ka lahi anai tona ʼofa ki ai?”

ʼI tana lagi mole tokaga lelei ki te meʼa ʼaē ʼe ʼui age, neʼe tali ia Simone ki te fehuʼi ʼaia ʼaē ʼe hage kia ia ʼe mole ʼalutahi mo te meʼa ʼaē ʼe fai: “ ʼE ʼau mahalo ko ia ʼaē neʼe lahi tana molehi fakaʼofa ki ai.”

“ ʼE tonu tau fakamāu”, ko te fakamoʼoni age ʼaia ʼa Sesu. ʼOsi ʼaia, pea maliu ia ki te fafine, ʼo ina toe ʼui age kia Simone: “ ʼE ke sio ki te fafine ʼaenī? Neʼe ʼau hū mai ki tou loto fale; neʼe mole ke foaki mai he moʼi vai moʼo fufulu ʼo toku ʼu vaʼe. Kae ko te fafine ʼaenī neʼe ina fakapala toku ʼu vaʼe ʼaki tona ʼu loʼimata pea ina holo ʼaki tona lauʼulu. Neʼe mole ke ʼuma kia te ʼau; kae ko te fafine ʼaenī, talu mai te hola ʼaē neʼe ʼau hū mai ai ki tou loto fale, neʼe mole tuku tana ʼuma mamahi ki toku ʼu vaʼe. Neʼe mole ke tākai toku ʼulu ʼaki he moʼi lolo; kae ko te fafine ʼaenī neʼe ina tākai toku ʼu vaʼe ʼaki te lolo magoni.”

Neʼe fakahā ai foki e te fafine ʼaia te fakamoʼoni ʼo tana fakahemala fakamalotoloto ʼaē ki tona maʼuli heʼemaʼa ʼi te temi kua hili atu. Neʼe fakaʼosi fēnei leva te ʼu palalau ʼa Sesu: “Koia, ʼe ʼau tala atu kia koe, ko tana ʼu agahala, logope tona lahi, ʼe kua fakamolemole ia, koteʼuhi he neʼe ʼofa ia; kae kia ia ʼaē ʼe fakamolemole veliveli pe ki ai ʼe ʼofa veliveli pe.”

Ko Sesu neʼe mole ina faka lākatonuʼi peʼe ina fakaholoholoʼi te aga heʼemaʼa. Kae, ko te meʼa ʼaia neʼe hoko ʼe hā mai ai ʼe mahino lelei kia ia pea mo manavaʼofa ki te hahaʼi ʼaē neʼe nātou fai te ʼu hala ʼi tonatou maʼuli, kae ʼe nātou fakahā kua nātou fakahemala pea ʼaki te faʼahi ʼaia ʼe nātou ʼōmai kia te ia ke fakafimālie ʼonatou loto. ʼI tana foaki te fakafimālie moʼoni ki te fafine ʼaia, neʼe tala age e Sesu ki ai: “Ko tau ʼu agahala kua fakamolemole. (...) Kua fakamaʼuli koe ʼe tau tui; ʼalu ʼi te tokalelei.” Luka 7:36-50; Mateo 11:28-30.

▪ Neʼe feafeaʼi te tali ʼo Sesu e Simone, ʼaē neʼe ina fakaafe?

▪ Ko ai ʼaē neʼe hoki ina maʼu ia Sesu, pea koteā te tupuʼaga ʼo tana kumi ia ia?

▪ Koteā te lea fakatātā neʼe fai e Sesu, pea neʼe ina fakaʼaoga feafeaʼi?