Kapite 41

ʼI Te Lotolotoiga ʼo Te Fefakafeagaiʼaki

ʼI TE ʼosi ʼo tona fakaafe ki te ʼapi ʼo Simone, neʼe fai e Sesu tana tahi foli fai faka mafola ʼi Kalilea. ʼI te lolotoga ʼo tana ʼuluaki foli fai faka mafola ʼi te telituale ʼaia, neʼe kaugā ʼolo mo tana ʼu ʼuluaki tisipulo, ʼaē ko Petelo, Atelea, Sake pea mo Soane. Kae ʼi te temi leva ʼaē ko te toko 12 ʼapositolo ʼe ʼolo mo ia, pea mo te ʼu fafine, ʼe kau ia Malia Maketalena, Susana pea mo Soana, ʼaia ʼe tuʼulaga faka puleʼaga tona ʼohoana ʼi te hau ko Helote.

ʼI te faka ʼaluʼalu ʼo te minisitelio ʼo Sesu ʼo lahi, ko te fefakafeagaiʼaki ʼaē neʼe tupu ʼuhi ko tana gāue kua ʼāsilisili tona mālohi. Neʼe ʼaumai kia Sesu te tagata neʼe ulusino ai te temonio, neʼe toe kivi pea mo ʼalelo mate. ʼI tona fakamālōlō e Sesu, ʼo faka ’āteaina mai te popūla ʼa te kau temonio pea mo foaki ki ai te fealagia ʼaē ke palalau pea mo sio, neʼe ōfo ʼalu kehe ai te hahaʼi. ʼO ʼui maʼa nātou: “ ʼE mole ko ia ʼapē koa te Foha ʼo Tavite?”

ʼI te kaugamālie ʼaupito ʼo te hahaʼi ʼaē neʼe fakatahitahi mai ki te ʼu tafaʼaki ʼo te ʼapi ʼaē neʼe nofo ai ia Sesu, neʼe mole kei feala kia ia pea mo ʼana tisipulo ke nātou kakai. ʼO kehe pe ia nātou ʼaē neʼe nātou manatu e lagi feala pe ko ia ko te “Foha ʼo Tavite” ʼaē kua fualoa te talitali ki ai, neʼe ʼi ai mo te kau sekelipa pea mo te kau Faliseo neʼe ʼōmai mai Selusalemi ko tona fakameleʼi. Pea tahi, ʼi te ʼiloʼi ʼaē e tona famili te gatutu ʼaē neʼe lagaʼi e Sesu, neʼe nātou ʼōmai ko tona puke. Koteā tona tupuʼaga?

Koteʼuhi, ʼo māʼia aipe la mo te ʼu tēhina ʼo Sesu neʼe mole heʼeki nātou tui ko ia ko te ʼAlo ʼo te ʼAtua. Pea tahi, ʼe mole kei tatau ia mo te Sesu ʼaē neʼe nātou sisio ki ai ʼi tana tuputupu ʼi Nasaleti, ke ina fakatupu he gatutu feiā pea mo he fefakafeagaiʼaki feiā. Koia neʼe nātou ʼui ai kua kovi ʼaupito te maveuveu ʼo tona ʼatamai. “Kua ʼuluvale ia”, ko tanatou manatu ʼaia, pea ʼe nātou fia puke ia ia ke nātou ʼave.

Kae, ʼe mole feala he kinau ki te fakamālōlō ʼaē e Sesu te tagata ʼaia neʼe ulusino ai te temonio. Ko te kau sekelipa pea mo te kau Faliseo ʼe nātou ʼiloʼi lelei ʼe mole feala hanatou kinau ki te moʼoni ʼo te milakulo ʼaia. Koia neʼe nātou ʼui age ki te hahaʼi ke fakakoviʼi ʼaki ia Sesu: “Ko te tagata ʼaenā ʼe ina kapu te kau temonio ʼaki pe ia Pelesepu, te pule ʼo te kau temonio.”

ʼI tana ʼiloʼi ʼanatou manatu, neʼe pāuiʼi e Sesu te kau sekelipa pea mo te kau Faliseo ke ʼolo age kia ia, pea ina ʼui age kia nātou: “Ko te puleʼaga fuli pe ʼe mavaevae ʼo fakafeagai kia ia totonu ʼe maumau ia, pea ko te kolo fuli pe pe ko he fale ʼe mavaevae ʼo fakafeagai kia ia totonu ʼe mole tuʼu fualoa anai ia. Kapau ko Satana ʼe ina kapu ia Satana, pea kua mavaevae ia ʼo fakafeagai pe ia kia ia totonu; pea e feafeaʼi leva te tuʼu fualoa ʼo tona puleʼaga?”

ʼI palalau lākatonu leva! ʼI te fakamoʼoni age ʼaē ʼa te kau Faliseo neʼe ʼi ai ʼihi ia nātou neʼe nātou kapu te ʼu temonio, neʼe toe fehuʼi age e Sesu kia nātou: “Pea kapau ʼe ʼau kapu te kau temonio ʼaki ia Pelesepu, ko ai ia ʼaē ʼe kapu ʼaki e ʼokotou foha te kau temonio?” ʼI tona tahi ʼu faʼahiga palalau, ko tanatou fakakovi kia Sesu ʼe toe feala pe anai ke toe fakaliliu age kia nātou. ʼOsi ʼaia pea tala age e Sesu: “Kaʼe kapau ʼe ʼau kapu te kau temonio ʼaki te laumālie ʼo te ʼAtua, ko te puleʼaga ʼo te ʼAtua kua kaku moʼoni atu kia koutou.”

Moʼo fakatā ʼo tana fealagia ʼaē ki te kapu ʼo te kau temonio ʼe ko he fakamoʼoni ia ʼe mālohi ake ia ia Satana, neʼe ʼui e Sesu: “Peʼe feafeaʼi he ulu ʼa he tahi ki he loto fale ʼo he tagata mālohi ʼo faʼao ʼona koloā, ka heʼeki ina haʼi muʼa te tagata mālohi? Pea hoki ina kaihaʼa ai leva tona loto fale. Ko ʼaē ʼe mole kau mo ʼau ʼe fakafeagai ia kia te ʼau, pea ko ʼaē ʼe mole ina tānaki fakatahi mo ʼau ʼe ina veuki ia.” ʼE ʼiloga lelei mai ai ko te kau Faliseo ʼe fakafeagai kia Sesu, ʼo hā ʼaki ai ko nātou ko te ʼu tagata gāue ʼa Satana. ʼE nātou fakamaliu te kau Iselaele mai ia Kilisito.

Koia, neʼe fakatokaga age ai ia Sesu ki te ʼu fili fakasatana ʼaia ʼo ina ʼui age “ko ʼaē ʼe palalau ʼo fakafeagai ki te laumālie maʼoniʼoni, ʼe mole fakamolemole anai”. Neʼe ina fakamahino age: “Ko ʼaē ʼe ina fai he palalau ʼo fakafeagai ki te Foha ʼo te tagata, ʼe fakamolemole anai ia kia te ia; kaʼe ko ʼaē ʼe palalau ʼo fakafeagai ki te laumālie maʼoniʼoni, ʼe mole fakamolemole anai ia kia te ia ʼi te tuʼu ʼo te ʼu faʼahiga meʼa ʼaenī pea mo te tuʼu ka haʼu.” Ko te kau sekelipa mo te kau Faliseo ʼaia neʼe nātou fai te taʼi faʼahiga agahala ʼaia ʼaē ʼe mole feala hona fakamolemole, koteʼuhi neʼe nātou tuku ʼaki te lotokovi kia Satana te gāue ʼe ʼiloga lelei mai ia ko te gāue faka milakulo ʼa te laumālie maʼoniʼoni ʼo te ʼAtua. Mateo 12:22-32; Maleko 3:19-30; Soane 7:5.

▪ Koteā ʼaē neʼe kehe ai te foli ʼa Sesu ʼi Kalilea pea mo te ʼuluaki?

▪ He koʼe koa neʼe faigaʼi e te famili ʼo Sesu ke nātou puke ia ia?

▪ Neʼe feafeaʼi te faiga ʼa te kau Faliseo ke nātou fakanoaʼi te ʼu maʼuhiga ʼo te milakulo ʼa Sesu, pea neʼe feafeaʼi te tali age ʼa Sesu kia nātou?

▪ Koteā te hala ʼa te kau Faliseo, pea koteā tona tupuʼaga?