Kapite 42

Neʼe Pupulaʼi e Sesu Te Kau Faliseo

NEʼE fēnei te fakakaukau ʼa Sesu: Kapau neʼe ina kapu te ʼu temonio ʼaki te mālohi ʼo Satana, pea ko Satana kua mavaevae ia ʼo fakafeagai pe ia kia ia totonu. “Peʼe koutou fai ke lelei te fuʼu ʼakau pea ʼe toe lelei ai mo tona fua, ko tana hoko atu ʼaia, peʼe koutou fai ke kovi te fuʼu ʼakau pea ʼe toe kovi ai mo tona fua; heʼe ko tona fua ʼaē ʼe ʼiloʼi ai te fuʼu ʼakau.”

ʼE ko he meʼa faka galivale ia te ʼui ʼe fua lelei te gāue ʼa Sesu, tana kapu te ʼu temonio, ʼuhi heʼe gāue kia Satana. Kapau ʼe matalelei te fua, ʼe mole feala ke kovi te fuʼu ʼakau. Kae, ko te ʼu fua ʼaē ʼe kovi ʼo te kau Faliseo, ʼaē ko tanatou ʼu fakakovi hihigo pea mo tanatou fakafeagai ʼaē mole hona fakatafitoʼaga kia Sesu, ʼe fakamoʼoni mai ai ko nātou totonu ʼe kovi. “Faga ʼuhiʼi gata kona, ko te ʼui age ʼaia ʼa Sesu, ʼe feala feafeaʼi hakotou palalau ki he ʼu meʼa ʼe lelei, kaʼe koutou agakovi? Heʼe ko te mahu ʼo te loto ʼaē ʼe palalau ai te gutu.”

Kapau ko tatatou ʼu palalau ʼe hā mai ai te agaaga ʼo totatou loto, ko te ʼu meʼa ʼaē ʼe tou lau ʼe feala ke fakamāuʼi ai ia tatou. Neʼe fakamoʼoni fēnei e Sesu: “ ʼE ʼau tala atu kia koutou: Ko te palalau vaʼiga fuli pe ʼe fai e te hahaʼi, ʼe fakamāuʼi anai ia nātou kiai ʼi te ʼAho ʼo te Fakamāu; heʼe ko tau ʼu palalau ʼaē ka fakatonuʼi ai koe pea ʼe ko tau ʼu palalau ʼaē ka faka lākahalaʼi ai koe.”

Logope la te ʼu gāue mālohi ʼaē kua fai e Sesu, neʼe fai age e te kau sekelipa pea mo te kau Faliseo te kole ʼaenī: “Faiako, ʼe mātou fia mamata ki he fakaʼiloga mai ia te koe.” Tatau aipe pe neʼe mole heʼeki sisio totonu te ʼu tagata ʼaia mai Selusalemi ki tana ʼu milakulo, ʼe ʼi ai te ʼu fakamoʼoni ʼe hā pea ʼe mole feala he kinau kiai. Koia neʼe tali age ai e Sesu ki te kau takitaki sutea: “Ko he taʼiake agakovi mo fai feʼauʼaki ʼe kei ina kumi pe he fakaʼiloga, kaʼe mole tuku kia ia he tahi ake fakaʼiloga ʼi te fakaʼiloga ʼaē ʼa te polofeta ko Sonasi.”

Pea ina fakamahino age te ʼuhiga ʼo tana palalau: “Ohage pe ko te nofo ʼa Sonasi ia ʼaho e tolu pea mo po e tolu ʼi te fatu ʼo te ika lahi, ʼe toe feiā pe mo te Foha ʼo te tagata, ʼe nofo anai ʼi te lotomalie ʼo te kele ia ʼaho e tolu pea mo po e tolu.” ʼI tona ʼosi folo e te ika, neʼe toe haʼu ia Sonasi ki tuʼa ohage pe neʼe fakatuʼuake ia ʼi te mate; koia neʼe fakakikite ai foki e Sesu ko ia totonu ʼe mate anai pea ʼe toe fakatuʼuake anai ia ʼi te tolu ʼaho. Kae, māʼia aipe la mokā fakatuʼuake anai mai te mate ki muli age, ko te kau takitaki sutea ʼe nātou fakafisi anai “ki te fakaʼiloga ʼo Sonasi”.

Koia neʼe fakamoʼoni age ai e Sesu ko te ʼu tagata ʼo Ninive ʼaē neʼe fakahemala ʼi te fai faka mafola ʼa Sonasi ʼe fakatuʼuake anai ia nātou ʼi te ʼaho ʼo te fakamāu pea ʼe nātou faka lākahalaʼi anai te kau Sutea ʼaē ʼe nātou fakafisi kia Sesu. Neʼe ina toe fakatatau tana palalau ki te hau fafine ʼo Sepa, ʼaē neʼe haʼu mai te ʼu potu taupotu ʼo te kele moʼo fagono ki te poto ʼo Salomone pea neʼe ōfo ai ʼi te ʼu meʼa ʼaē neʼe sio pea mo logo kiai. “Kae koʼeni ia, ko tona fakatokaga age ʼaia e Sesu, ʼe ʼi henī ia he tahi ʼe lahi ake ia Salomone.”

ʼOsi ʼaia pea ina fai age te lea fakatātā ʼo te tagata neʼe mavae ai te laumālie heʼemaʼa, kae, neʼe mole ina fakafonu te gaʼasi ʼaē neʼe tuku e te laumālie kovi ia ia ʼaki he ʼu meʼa ʼe lelei, koia neʼe hū ai kia ia te ʼu laumālie e toko fitu ʼe kovi ʼosi age. “Koia ʼe toe feiā anai ki te taʼiake agakovi ʼaenī”, ko te tala age ʼaia ʼa Sesu. Ko te puleʼaga ʼo Iselaele neʼe fakamaʼa pea neʼe fai kiai te ʼu fetogi, ʼe feala pe te fakatatau ʼo te meʼa ʼaia ki he mavae faka temi pe ʼa he laumālie heʼemaʼa. Kae ko tana fakafisi ki te ʼu polofeta ʼa te ʼAtua, ʼo laka age leva tona kovi ʼi te temi ʼaē neʼe fakafeagai ai te kau Iselaele kia Kilisito totonu, ʼo hā mai ai ko tona ʼuhiga agakovi ʼaē ʼo ia kua toe ʼāsili age ia ʼi tona ʼuhiga muʼa.

ʼI te lolotoga ʼo te palalau ʼa Sesu, neʼe kaku age tana faʼe pea mo tona ʼu tēhina pea neʼe nātou tutuʼu fakatahi mo te hahaʼi. Neʼe fakahā age ki ai: “Koʼeni tau faʼe pea mo ʼou tēhina ʼe tutuʼu ʼi tuʼa pea ʼe nātou faiga ke nātou palalau kia te koe.”

“Ko ai taku faʼe, pea ko ai ʼoku tēhina?” ko te fehuʼi age ʼaia ʼa Sesu. “ ʼI tana folahi tona nima ki ʼana tisipulo, neʼe ʼui maʼana: “Koʼeni taku faʼe pea mo ʼoku tēhina! He ko ʼaē ʼe ina fai te finegalo ʼo taku Tāmai ʼe ʼi selo, ʼe ko ia ia ʼaia ko toku tēhina, pe ko toku tuagaʼane, pe ko taku faʼe.” ʼAki tana ʼu palalau ʼaia neʼe fakahā ai e Sesu ko te ʼu faʼahiga meʼa ʼaē ʼe pipiki ai ki tona famili logope tona mālohi, ʼe mole mālohi ake ia ʼi te ʼu faʼahiga meʼa ʼaē ʼe pipiki ki tana ʼu tisipulo. Mateo 12:33-50; Maleko 3:31-35; Luka 8:19-21.

▪ He koʼe ʼe feala ke tou ʼui, ʼo ʼuhiga mo te kau Faliseo, ko te “fuʼu ʼakau” pea mo te “fua” ʼe mole matalelei?

▪ Koteā “te fakaʼiloga ʼo Sonasi” pea ʼe faka ʼuhiga feafeaʼi te fakafisi anai ʼaē kia ia ki muli age?

▪ He koʼe ʼe tatau te puleʼaga ʼo Iselaele ʼo te ʼuluaki sēkulō mo te tagata ʼaē neʼe mavae ai te laumālie heʼemaʼa?

▪ Neʼe feafeaʼi te fakahā e Sesu te maʼuhiga ʼo te ʼu faʼahiga meʼa ʼaē ʼe fakatahi ai mo tana ʼu tisipulo?