Kapite 44

Neʼe Faka Gona e Sesu Te Afā Fakamataku

NEʼE mole maʼu he ava ʼo Sesu ʼi te ʼaho ʼaia, neʼe ina akonaki te hahaʼi ʼi te matatai pea, ki muli age, neʼe ina fakamahino tana ʼu lea fakatātā ki tana kau tisipulo ʼāteaina pe. ʼI te malū ʼo te afiafi, neʼe ina ʼui age: “Tou ʼolo ki te tahi kauvai.”

ʼI tuʼa atu ʼo te tai ʼo Kalilea, ʼi te potu hahake, ʼe ʼi ai te potu fenua ʼe higoa ko Tekapole, ko te higoa ʼaia ʼe haʼu mai te kupu faka keleka déka, ko tona faka ʼuhiga ko te “hogofulu”, pea mo polis, ko te “kolo”. Logope te lagi toe nofo ai ʼa he kau Sutea tokolahi, ko te ʼu kolo ʼo Tekapole ʼe ko he nofoʼaga ia ʼo te gāue fakaʼatamai faka keleka. Kae, ko te gāue ʼa Sesu ʼi te potu fenua ʼaia neʼe faka tuʼakoi ʼaupito. Māʼia mo te lolotoga ʼo tanatou ʼaʼahi ʼaia kiai, ohage ko te meʼa ka tou vakaʼi anai ki muli age, neʼe faigaʼi ke ʼaua naʼa fualoa tana nofo ai.

ʼI te ʼui age e Sesu ke nātou ʼolo ki te tahi kauvai, neʼe fakaheka ia ia e te kau tisipulo ʼi te vaka. Kae ko tanatou mavae ʼaia neʼe mole ū ki he tahi. Ko ʼihi hahaʼi neʼe tuku ʼonatou vaka ki te tai ke nātou muli ia nātou. Ko tanatou ʼolo ki te tahi kauvai ʼe mole loaloaga he ko te tai ʼo Kalilea, ʼe ko te foʼi vai lahi, ko tona loa e kilometa 20 pea ko tona laulahi e kilometa 12.

Kua gaʼegaʼe ia Sesu pea ʼe tou mahino ki te faʼahi ʼaia. Koia, ʼi te hili ʼo te kiʼi temi siʼisiʼipe ki tanatou mavae, neʼe takoto ia ʼi te taumuli ʼo te vaka, ʼo hili tona ʼulu ki te pila pea mate moe ia. E tokolahi ʼi te kau ʼapositolo ko te kau tautai kua māhani, pea nātou tautau gelu tuʼumaʼu ʼi te tai ʼo Kalilea. Ko nātou ʼaia neʼe nātou tokaga ki te foe ʼo te vaka.

Kae, faka ʼalu ke kovi tanatou ʼolo ʼaia. Heʼe, ko te ʼaele ʼe vela ʼi te fuga vai, ʼaia ʼe laka ia meta e 200 tona mālalo ʼi te tai, kae ʼi te momoko ʼo te ʼaele ʼi te ʼu moʼuga ʼe ōvi mai, ʼe tautau mafuta te ʼu matagi lalahi ʼo fakatupu te ʼu afā fakafokifā ʼi te vai. Ko te meʼa la ʼaia neʼe hoko ʼi te ʼaho ʼaia. Mole tuai pea kamata hā te peau ki te vaka ʼo ʼalu ki loto ʼo ʼamanaki ai ke moū. Ka koʼeni pe ia Sesu ia kei hoko atu pe tana moe!

ʼI tanatou kua māhani ʼi te mili vaka, neʼe fakaʼaoga e te kau tisipulo tonatou mālohi moʼo foe ʼo te vaka. Neʼe kua lagi nātou foe he vaka ʼi te ʼu tokakovi ʼo te tai. Kae, ʼi te temi nei, kua ʼosi fuli tonatou mālohi. ʼI tanatou manavasiʼi ki tonatou maʼuli, neʼe nātou fafagu ia Sesu. ‘ ʼAliki, ʼe mole ke tuʼania koa koe he meʼa? ko tanatou kalaga age ʼaia. Ko tatou ka tou moū! Hāofaki tatou, heʼe ko tatou ka tou malelemo!’

ʼI tana ʼala ake, neʼe pupulaʼi e Sesu te matagi pea mo te tai: “Fakalogologo! Tuku tau logoaʼa!” ʼI te temi pe ʼaia neʼe gona ai te matagi pea totofu lelei te tai. Neʼe fehuʼi age e Sesu ki te kau tisipulo ʼo fēnei: ‘He koʼe ʼe koutou manavasiʼi feiā? Heʼeki koa maʼu ia ʼe koutou he tui?’

ʼI te meʼa ʼaia neʼe hoko, neʼe maʼu e te kau tisipulo te manavasiʼi faikehe. ‘Ko ai koa te tagata ʼaenī? ko tanatou feʼuiʼaki ʼaia. Māʼia mo te matagi pea mo te tai ʼe ina fakatotonuʼi, pea ʼe nā fakalogo kia te ia.’

ʼE maʼu moʼoni e Sesu te mālohi lahi! ʼE ko he meʼa fakaloto fīmālie tatatou ʼiloʼi ʼaē ko totatou Hau ʼe pule ki te ʼu faʼahiga meʼa ʼo te mālama pea, ʼi te temi ka pule anai ki te kele ʼi te temi ʼaē ʼe hau ai, ko te hahaʼi fuli ʼe nonofo anai ʼi te tokalelei, haohaoa mai te ʼu afā mo ʼihi ʼatu tuʼutāmaki!

ʼI te ʼosi pe ʼo te gona ʼo te matagi, neʼe tau haohaoa ia Sesu pea mo tana kau tisipulo ki te kauvai ʼaē ʼe haga ki te potu hahake. Ko ʼihi ʼatu vaka, neʼe lagi nātou hāo ʼi te temi ʼaē neʼe mālohi ai te afā pea neʼe lagi nātou tau lelei. Maleko 4:35 ki te 5:1; Mateo 8:18, 23-27; Luka 8:22-26.

▪ Koteā te Tekapole, pea ʼe tuʼu ʼifea?

▪ Koteā koa te ʼu meʼa ʼaē ʼe fakatupu ʼaki te tō ʼo te ʼu afā lalahi ʼi te tai ʼo Kalilea?

▪ Koteā te meʼa neʼe fai e te kau tisipulo, ʼi te mole kei lavaʼi ʼaē e tonatou poto ʼi te mili vaka ke nātou hāo ai?