Kapite 48

Neʼe Mavae Ia Sesu ʼi Te ʼApi ʼo Sailusi Pea Toe Liliu Ki Nasaleti

NEʼE lahi te gāue ʼa Sesu neʼe ina fai ʼi te ʼaho ʼaia: ʼi tana liliu mai te fenua ko Tekapole ʼi te vaka, neʼe ina fakamālōlō te fafine neʼe maligi ia ia te toto, pea neʼe ina fakatuʼuake te ʼofafine ʼo Sailusi. Kae ko te gāue ʼo te ʼaho ʼaia ʼe mole heʼeki ʼosi. ʼI tana mavae pe ʼi te loto fale ʼo Sailusi neʼe muliʼi ia ia e te ʼu kivi e toko lua ʼo nā kalaga fēnei: “ ʼOfa mai kia māua, ʼAlo ʼo Tavite!”

ʼI tana fakahigoaʼi ia Sesu ko te “ ʼAlo ʼo Tavite”, neʼe fakamoʼoni leʼolahi ai e te ʼu tagata ʼaia ʼe ko ia ʼaē ʼe ina maʼu te tofiʼa ʼo te hekaʼaga faka hau ʼo Tavite, pea ko ia foki ko te Mesia ʼaē ʼe tonu ke haʼu. Kae, neʼe fakatuli ia Sesu ki tanā pāui, e lagi ko tana fia ʼahiʼahiʼi ia nāua peʼe nā faʼa kātaki. Kae neʼe mole fiu te ʼu tagata. Neʼe nā muliʼi ia Sesu ʼo aʼu ki te ʼapi ʼaē ʼe nofo ai; ʼi tana hū ki fale, neʼe toe fehūfi ai mo nāua.

Neʼe fehuʼi age ai e Sesu kia nāua: “ ʼE koulua tui ʼe feala ke ʼau fai te meʼa ʼaia?”

“Ei ʼAliki”, ko tanā tali age ʼaia ʼaki tanā falala.

Pea ʼi tana fāfā ki tonā ʼu mata, neʼe fakatotonu e Sesu: “Ke hoko kia koulua ohage ko takolua tui!” Pea sio ai ʼona mata ʼi te temi pe ʼaia! Kae, neʼe fakatotonu mālohi age e Sesu kia nāua: “Koulua tokaga ke ʼaua naʼa ʼiloʼi e he tahi!” Kae, ʼaki te lahi ʼo tonā fiafia, neʼe mole nā fakalogo ki te fakatotonu ʼaia pea nā palalau ai ʼi te potu fenua katoa ʼaia kia Sesu.

Neʼe mole heʼeki mamaʼo atu ia nāua kae ʼaumai kia Sesu te tagata neʼe ulusino ai te temonio, neʼe mole kei palalau ʼuhi ko te gāue ʼa te temonio. ʼI te ʼosi kapu e Sesu te laumālie kovi, neʼe hoki palalau ai te tagata ʼaia. Neʼe ōfo ai te hahaʼi ʼi tanatou mamata ki te ʼu milakulo ʼaia, ʼo ʼui maʼa nātou: “Neʼe heʼeki mamata he tahi ki he meʼa feiā ʼi Iselaele.”

Neʼe nonofo foki ʼi ai mo te kau Faliseo. Neʼe mole feala ke nātou kinauʼi te ʼu milakulo ʼaia; kae ʼaki tanatou tui gataʼa pea mo tonatou agakovi, neʼe nātou kinau ki te haʼuʼaga ʼo te mālohi ʼo Sesu, ʼo ʼui maʼa nātou: “ ʼE ina kapu te kau temonio ʼaki te pule ʼo te kau temonio.”

ʼI te ʼosi ʼo te ʼu meʼa ʼaia, neʼe toe liliu ia Sesu ki Nasaleti, te kolo ʼaē neʼe lahi ai, pea ʼe kua ʼolo fakatahi leva ʼi tana ʼalu ʼaenī mo tana kau tisipulo. ʼI he taʼu ki muʼa atu, neʼe kua ʼosi ʼalu ia ki te sinakoka, ʼaia neʼe fai akonaki ai. Logope ʼi te kamataʼaga neʼe ōfo te hahaʼi ʼi tana ʼu palalau lave lelei, ki muli age neʼe nātou ʼiʼita ʼi tana ʼu akonaki pea neʼe nātou faigaʼi ke nātou matehi. ʼI te temi leva ʼaenī, ʼaki tona manavaʼofa, ʼe toe faigaʼi e Sesu ke tokoni ki te hahaʼi ʼaia.

Neʼe tokolahi te ʼōmai ʼa te hahaʼi kia Sesu ʼi te tahi ʼatu ʼu kolo, kae ʼi henī ʼe mole feiā ia. Koia, ʼi te hoko mai ʼo te sapato, neʼe ʼalu ia ki te sinakoka ʼo fai akonaki ai. Neʼe ōfo ai te tokolahi ʼonatou ʼaē ʼe nātou fakalogo tana akonaki. “Neʼe maʼu maifea e te tagata ʼaenī ia te poto ʼaia pea mo te ʼu gāue fakamālohi ʼaia? ko tanatou feʼekeʼaki ʼaia. ʼE mole ko te foha koa la ʼaenī ʼo te tagata tufuga ʼakau? ʼE mole higoa koa la tana faʼe ko Malia, pea mo ʼona tēhina, ko Sake, mo Sosefo, mo Simone, pea mo Suta? Pea ʼe mole nonofo fuli koa la ʼona tuagaʼane ia tatou? Neʼe maʼu maifea e te tagata ʼaenī te ʼu meʼa fuli ʼaia?”

‘Ko Sesu ʼe ko te tahi tagata pe ʼo te fenua ohage ko tatou, ko tanatou feʼuiʼaki ʼaia. Neʼe tou sisio ki tana lahilahi ake pea ʼe tou ʼiloʼi tona famili. E feafeaʼi koa hana liliu ko te Mesia?’ Koia, logope te ʼu fakamoʼoni ʼaē ʼo te lahi ʼo tona poto pea mo tana ʼu milakulo, neʼe mole nātou tali ia ia. Māʼia mo nātou ʼo tona famili totonu, ʼaki tanatou ʼiloʼi lelei ia ia, neʼe nātou tūkia ʼuhi ko ia, koia neʼe fakaʼosi fēnei ai e Sesu tana akonaki: “Ko he polofeta ʼe gata pe ki tona fenua totonu pea mo tona ʼapi totonu ʼo ia ʼe mole faka maʼuhiga ai.”

ʼIo, neʼe punamaʼuli ia Sesu ki te tui gataʼa ʼa te hahaʼi ʼo Nasaleti. ʼE mole lahi anai te ʼu milakulo ka ina fai ʼi te koga meʼa ʼaia, neʼe gata ʼaki pe tana hili ʼona nima ki te ʼu kiʼi mahaki tokosiʼi moʼo fakamālōlō ʼonatou. Mateo 9:27-34; 13:54-58; Maleko 6:1-6; Isaia 9:7.

▪ ʼI tanā fakahigoa ia Sesu ko te “ ʼAlo ʼo Tavite”, koteā te meʼa ʼaē neʼe fakamoʼoni fakahāhā ki ai te ʼu tagata kivi ʼaia e lua?

▪ Neʼe fakamahino feafeaʼi e te kau Faliseo te ʼu milakulo ʼa Sesu?

▪ He koʼe ʼe ko he manavaʼofa ia ʼo Sesu, ʼi tana toe liliu mai ʼo tokoni ki te hahaʼi ʼo Nasaleti?

▪ Neʼe feafeaʼi te tali ʼo Sesu ʼi Nasaleti, pea koteā tona tupuʼaga?