Neʼe Ina Fai He ʼu Milakulo, Kaʼe Neʼe Mole Tali Ia Ia Maʼia Pe La ʼi Nasaleti

Neʼe lahi te ʼu gaue ʼae neʼe fai e Sesu ʼi te ʼaho ʼaia. Hili tana toe liliu mai te koga fenua ʼo Tekapole, neʼe ina fakamalolo te fafine neʼe maligi te toto ia ia pea neʼe ina fakatuʼuake te ʼofafine ʼo Sailusi. Kaʼe neʼe mole gata ai. ʼI te mavae ʼa Sesu mai te ʼapi ʼo Sailusi, neʼe mulimuli ia te ia te ʼu tagata kivi ʼe toko lua, ʼo nā kalaga fenei: “Foha ʼo Tavite, ʼofa mai kia maua.”—Mateo 9:27.

ʼI tanā fakahigoaʼi ia Sesu ko te “Foha ʼo Tavite,” neʼe fakaha ai e te ʼu tagata ʼaia tanā tui ʼae ʼe ko Sesu ʼae ka hau anai, he ʼe hifo mai ia Tavite pea ʼe ko ia te Mesia. Neʼe hage ia neʼe mole tokagaʼi e Sesu tanā tau kalaga age, lagi he neʼe ina fia iloʼi pe ʼe nā hoko atu anai. Pea neʼe koia la ʼae neʼe nā fai. ʼI te hu ʼa Sesu ki te ʼapi, neʼe mulimuli ia te ia te ʼu tagata ʼaia ʼe toko lua. Neʼe fehuʼi fenei age e Sesu kia naua: “ ʼE kolua tui koa ʼe feala ke au fakahoko ia te faʼahi ʼaia?” Neʼe nā tali fenei age ʼaki he lotofalala: “ ʼE ma tui ki ai, ʼAliki.” Pea neʼe hili e Sesu ʼona nima ki ʼonā mata, ʼo ina ui fenei: “Ke hoko kia koulua ʼo mulimuli ki takolua tui.”—Mateo 9:28, 29.

Neʼe ava atu aipe ʼonā mata. Ohage ko tana fakatotonu ki ʼihi ʼi muʼa atu, neʼe toe fakatotonu age e Sesu kia naua ʼaeni ke ʼaua naʼa nā fakaha te meʼa ʼae neʼe ina fai. Kaʼe ʼi te lahi ʼo tonā fiafia, neʼe nā palalau ʼo ʼuhiga mo ia ʼi te ʼu potu kehekehe.

ʼI te mavae atu ʼa te ʼu tagata ʼaia ʼe toko lua, neʼe ʼaumai e te hahaʼi he tagata neʼe ʼalelo mate he neʼe ulu sino ai te temonio. Neʼe kapu e Sesu te temonio, pea neʼe palalau atu aipe ia te tagata. Neʼe punamaʼuli ai te hahaʼi kaugā malie, ʼo natou ui fenei: “Neʼe heʼeki matou sisio ki he aluʼaga feia ʼi Iselaele.” Neʼe toe ʼi ai foki mo te kau Faliseo. Neʼe mole feala hanatou fakafisi ki te ʼu milakulo, koia neʼe natou toe tukugakoviʼi ia te haʼuʼaga ʼo te malohi ʼo Sesu moʼo fai te ʼu gaue ʼaia, ʼo natou ui fenei: “ ʼE ina kapu te kau temonio ʼaki te malohi ʼo te pule ʼo te kau temonio.”—Mateo 9:33, 34.

Mole fualoa ki muli age, neʼe alu ia Sesu ki Nasaleti, ʼae neʼe lahilahi ake ai, pea neʼe olo ʼana tisipulo mo ia. ʼI he taʼu ki muʼa atu, neʼe faiakonaki ʼi te sinakoka ʼo Nasaleti. Pea ʼi te kamata neʼe leleiʼia e te hahaʼi ʼana palalau, kaʼe ki muli age neʼe natou iita ʼi tana faiakonaki pea neʼe natou fia matehi ia ia. ʼI tana toe liliu mai leva ʼaeni, neʼe toe faiga e Sesu ke tokoni ki te hahaʼi ʼo tona kolo.

ʼI te Sapato, neʼe toe liliu ki te sinakoka ʼo faiakonaki ai. Neʼe punamaʼuli ai te tokolahi, ʼo natou fehuʼi fenei: “ ʼE maʼu maifea e te tagata ʼaeni ia te poto pea mo te malohi ʼae ke ina fai te ʼu milakulo?” Pea neʼe natou ui fenei: “ ʼE mole koa la ko te foha ʼo te tagata tufuga ʼakau? ʼE mole higoa koa la tana faʼe ko Malia, pea mo ʼona tehina ko Sakopo, mo Sosefo, mo Simone pea mo Sutasi? Pea ʼe mole nonofo koa la mo tatou ʼona tokolua fuli? ʼE maʼu maifea e te tagata ʼaeni te ʼu meʼa fuli ʼaia?”—Mateo 13:54-56.

Ki te hahaʼi ko Sesu neʼe hage pe ko natou. Neʼe natou manatu fenei: “ ʼE matou iloʼi ia ia talu mai tana kei veliveli, ʼe lava feafeaʼi ke liliu ko te Mesia?” Koia, logo la te ʼu fakamoʼoni fuli, ohage ko te poto lahi ʼae neʼe maʼu e Sesu pea mo te ʼu milakulo ʼae neʼe ina fai, kaʼe neʼe mole natou tali ia ia. Maʼia mo ʼona kaiga, ʼae neʼe natou iloʼi lelei ia ia, neʼe natou tukia ʼuhi ko ia. Neʼe ina ui fenei ai: “ ʼI te potu fuli pe, ʼe fakaʼapaʼapaʼi e te hahaʼi he polofeta, kaʼe ʼe mole fakaʼapaʼapaʼi ia ʼi tona fenua totonu pea mo tona loto fale.”—Mateo 13:57.

Koia, neʼe punamaʼuli ia Sesu ki tanatou mole tui. Pea neʼe mole ina fakahoko he tahi age ʼu milakulo ʼi ai kaʼe “neʼe tokosiʼi pe ia natou ʼae neʼe ina fakamalolo ʼaki tana hili ʼona nima kia natou.”—Maleko 6:5, 6.