Kapite 54

“Te Pane Moʼoni Mai Te Lagi”

ʼI ʼANĀFI neʼe lahi te ʼu meʼa neʼe fai e Sesu. Neʼe ina fafaga faka milakulo te hahaʼi ʼe lauʼi afe pea ʼosi ʼaia pea hola ia ʼuhi ko te faiga ʼa te hahaʼi ke nātou fakanofo ia ia ke hau. Pea, ʼi te pōʼuli, neʼe haʼele ia ʼi te fuga tai ʼo Kalilea. Neʼe ina hāofaki ia Petelo, ʼi tana kamata moū ʼaē ʼi tana haʼele ʼi te fuga tai ʼe tokakovi ʼuhi ko te afā. Pea, neʼe ina faka gona te matagi mo te tai, ʼo ina hāofaki ai tana kau tisipulo ʼi te moū ʼo te vaka.

ʼI te temi leva ʼaenī, ko te hahaʼi ʼaē neʼe fafaga faka milakulo e Sesu, ʼi te potu tokelau mo te potu hahake ʼo te tai ʼo Kalilea, kua nātou toe maʼu ia ia ʼi te potu ʼe ōvi atu ki Kapenaume pea nātou fehuʼi age ki ai: “Ko ʼanafea ʼaē neʼe ke tau mai ai ki henī?” Neʼe fakatonutonuʼi nātou e Sesu, ʼo ina ʼui age ʼe nātou kumi ia ia ʼuhi pe ke toe fafaga noa ia nātou. Neʼe ina tokoniʼi nātou ke ʼaua naʼa nātou gāue, ki te meʼa kai ʼaē ʼe ʼauha, kae ki te meʼa kai ʼaē ʼe tologa ki te maʼuli heʼegata. Neʼe fehuʼi age ʼe nātou ʼaē ʼe fai palalau mo ia: “Koteā anai te meʼa ke mātou fai moʼo fakahoko ʼo te ʼu gāue ʼa te ʼAtua?”

Neʼe fakahā age e Sesu te gāue pe e tahi, kae ʼe maʼuhiga ʼaupito ia. “Ko te meʼa ʼaenī, ʼe ko te gāue ʼa te ʼAtua, ko tana fakamahino age ʼaia, ke koutou tui kia Ia ʼaē neʼe ina fekauʼi mai.”

Kae, logope te ʼu milakulo fuli ʼaē neʼe fai e Sesu, neʼe mole tui te hahaʼi kia ia. Ko he meʼa faikehe foki, māʼia mo tana ʼosi fai te ʼu meʼa fakatalakitupua, neʼe fai age kia ia te fehuʼi ʼaenī. “Koteā koa te fakaʼiloga ka ke fai ke mātou sio kiai pea ke mātou tui ai kia te koe? Ko te gāue fea ʼaē ʼe ke fai? Ko tamatou ʼu kui neʼe nātou kai te mane ʼi te toafa, ohage ko te meʼa neʼe tohi: ‘Neʼe ina foaki age kia nātou te pane ʼaē neʼe haʼu mai te lagi.’ ”

ʼI tanatou kole age he fakaʼiloga, neʼe fakahā lelei age e Sesu pe ko ai te Matapuna ʼo te meʼa kai faka milakulo ʼaia, ʼo ʼui maʼana: “Neʼe mole foaki atu e Moisese te pane mai te lagi, kae ko taku Tāmai ʼaē ʼe ina foaki atu te pane moʼoni mai te lagi. Ko te pane ʼa te ʼAtua, ʼio, ʼe ko ia ʼaē ʼe hifo mai lagi pea mo ina foaki te maʼuli ki te malamanei.”

“ ʼAliki, ko tanatou ʼui age ʼaia, foaki tuʼumaʼu mai kia mātou te pane ʼaia.”

“Ko ʼau ko te pane ʼo te maʼuli, ko tona fakamahino age ʼaia e Sesu. Ko ʼaē ʼe haʼu kia te ʼau ʼe mole toe fia kai anai ia, pea ko ʼaē ʼe tui kia te ʼau ʼe mole toe fia ʼinu anai ia. Kae neʼe kua ʼau tala atu kia koutou: ʼio, kua koutou sisio kia te ʼau, kae ʼe mole koutou tui kia te ʼau. Ko nātou fuli ʼaē ʼe tuku mai e taku Tāmai kia te ʼau ʼe ʼōmai anai kia te ʼau, pea ko ia ʼaē ʼe haʼu kia te ʼau, ʼe mole ʼau kapu anai; he neʼe ʼau hifo mai te lagi, mole ko he fai ʼo toku finegalo, kae ko te finegalo ʼo ia ʼaē neʼe ina fekauʼi mai ʼau. Koʼeni te finegalo ʼo ia ʼaē neʼe ina fekauʼi mai ʼau: ke ʼaua naʼa puli ia te ʼau he tahi ia nātou fuli ʼaē neʼe ina tuku mai, kae ke ʼau fakatuʼuake ia ʼi te ʼaho fakamuli. He koʼeni te finegalo ʼo taku Tāmai: ko ʼaē ʼe sio ki te ʼAlo pea mo tui kia te ia, ke ina maʼu te maʼuli heʼegata.”

ʼI te ʼu palalau ʼaia, neʼe femuhumuhuʼaki ai te kau Sutea ʼo ʼuhiga mo Sesu ʼi tana ʼui ʼaē: “Ko ʼau ko te pane neʼe hifo mai te lagi.” ʼI tanatou ʼiloʼi ʼaē ko ia ko te tama neʼe tupu ʼi te ʼu mātuʼa fakakelekele, neʼe nātou toe fai pe te ʼu palalau ʼaē neʼe fai ʼi muʼa e te hahaʼi ʼo Nasaleti ʼo ʼui maʼa nātou: “ ʼE mole koa la ko ia na ko Sesu, te foha ʼo Sosefo, ʼaē ʼe tou ʼiloʼi tana tāmai pea mo tana faʼe? E feafeaʼi leva taʼana ʼui ʼi te temi nei: ‘Neʼe ʼau hifo mai te lagi’?”

“Tuku takotou femuhumuhuʼaki, ko te tali age ʼaia ʼa Sesu. ʼE mole he tahi ʼe feala ke haʼu kia te ʼau, mo kapau ko te Tāmai ʼaē neʼe ina fekauʼi mai ʼau ʼe ina taki ia ia; pea ko ʼau, ʼe ʼau fakatuʼuake anai ia ia ʼi te ʼaho fakamuli. ʼE tohi ʼi te ʼu Polofeta: ‘Pea ʼe akonakiʼi anai fuli ia nātou e Sehova.’ Ko ʼaē neʼe fagono ki te Tāmai pea mo ina ako, ʼe haʼu kia te ʼau. ʼE mole faka ʼuhiga ʼaki ia kua sio he tagata ki te Tāmai, gata pe kia ia ʼaē neʼe haʼu mai ia tafa ʼo te ʼAtua; ko ia ia ʼaia neʼe sio ki te Tāmai. ʼE ʼau tala moʼoni atu kia koutou: ko ʼaē ʼe tui ʼe ina maʼu ia te maʼuli heʼegata.”

Neʼe toe fai e Sesu te ʼu palalau ʼaē neʼe ina fai ʼi te kamata: “Ko ʼau ko te pane ʼo te maʼuli. Ko takotou ʼu kui neʼe nātou kai te mane ʼi te toafa ka neʼe nātou mamate pe. Koʼeni te pane ʼaē ʼe hifo mai te lagi, koteʼuhi ke kai kiai he tahi pe pea ke ʼaua naʼa mate. Ko ʼau ko te pane maʼuli ʼaē neʼe hifo mai te lagi; kapau ʼe kai he tahi ki te pane ʼaia, pea ʼe maʼuli anai ia ʼo heʼegata.” ʼE moʼoni, ko te tui ʼaē kia Sesu, ia ia ʼaē neʼe fekauʼi mai e te ʼAtua, ʼe feala ke maʼu ai e te hahaʼi te maʼuli heʼegata; ko te meʼa ʼaia neʼe mole fealagia e te mane peʼe ko he tahi atu pane ke ina foaki kia nātou.

ʼE ʼiloga mai neʼe kamata te fai palalau ʼaia ʼi te ʼosi pe ʼaē ʼo te toe maʼu ʼo Sesu e te hahaʼi, ʼi te potu ʼe ōvi atu ki Kapenaume. Kae ʼe toe hoko atu te fai palalau ʼo toe lalahi age mokā fai akonaki anai ia Sesu ʼi te sinakoka ʼo Kapenaume. Soane 6:25-51, 59; Pesalemo 78:24; Isaia 54:13; Mateo 13:55-57.

▪ Koteā te meʼa ʼaē neʼe hoko ʼi muʼa ʼo te palalau ʼa Sesu ki te pane mai te lagi?

▪ ʼAki te ʼu meʼa ʼaē neʼe hoki fai atu pe e Sesu, he koʼe ʼe mole mata feʼauga mo te hahaʼi tanatou kole age he fakaʼiloga?

▪ ʼI te ʼui ʼaē e Sesu ko ia ko te pane moʼoni neʼe hifo mai te lagi, he koʼe neʼe femuhumuhuʼaki te kau Sutea kia te ia?

▪ Neʼe hoko ʼifea te fai palalau ʼaē ʼo ʼuhiga mo te pane ʼaē neʼe hifo mai te lagi?