Te ʼu Lelei ʼo “Te Pulapula Mai Lagi”

MOLE faʼa fualoa ʼi tonatou faka ʼāteaina faka milakulo mai Esipito, neʼe fakahā e te kau Iselaelite tanatou mole kei tui ki tonatou Hāofakiʼaga, ko Sehova. Koia neʼe fakahaʼele ai nātou e Sehova ʼi te toafa ʼo Sinai lolotoga taʼu e 40. Lolotoga te temi ʼaia, ko te kau Iselaelite pea mo te “toe hahaʼi tokolahi [matāpule] pea mo kehekehe” ʼaē neʼe nātou fakatahi mo nātou, neʼe nātou kakai pea mo ʼiʼinu “ ʼo nātou makokona ai.” (Ekesote 12:37, 38) ʼE ʼui ia Pesalemo 78:23-​25 pe neʼe lava feafeaʼi te faʼahi ʼaia: “Ko [Sehova] neʼe ina haga fakatotonu ki te lagi ʼaoʼia ʼi ʼoluga, pea neʼe ina avahi te ʼu matapā ʼo te lagi. Pea neʼe ina fakaʼua ifo kia nātou te mana ke nātou kai; neʼe ina foaki age kia nātou te pulapula mai lagi. Neʼe kai ai e te hahaʼi te pane ʼo te kau mālohi; neʼe ina foaki ai kia nātou te meʼa kai ʼo nātou makokona ai.”

Neʼe kai e Moisese te mana ʼaia, pea neʼe ina fakamatala tona agaaga. Neʼe ina ʼui ko te meʼa ʼaē neʼe hoko ʼi te uhu, ʼi te ʼosi “moamoa ʼo te hahau . . . , ʼi te fuga kele ʼo te toafa neʼe ʼi ai te meʼa mānifi, ohage ko te vavae, ʼe mānifi ohage ko he ʼaisi ʼi te kele. ʼI te temi ʼaē neʼe sio kiai te ʼu foha ʼo Iselaele, neʼe nātou kamata feʼuiʼaki: ‘Koteā koa te meʼa ʼaenī?’ ” peʼe ohage ko tanatou ʼui ʼi te lea faka Hepeleo, “man huʼ?” Ko te kupuʼi palalau ʼaia neʼe lagi ko te haʼuʼaga ʼaia ʼo te kupu “mana,” te higoa ʼaē neʼe foaki e te kau Iselaelite ki te meʼa kai ʼaia. Neʼe ʼui fēnei e Moisese: “Neʼe hina ohage ko te pulapula ʼo te kolianate, pea neʼe hage tona kano lelei ko te ʼu keke lafalafa ʼaē ʼe fai ʼaki te meli.”​—Ekesote 16:13-​15, 31, kiʼi nota ʼi te lalo pasina.

Ko te mana neʼe mole ko he meʼa kai neʼe fai ʼaki te ʼu meʼa māhani, ohage ko tona ʼui e ʼihi. Neʼe haʼu te meʼa kai ʼaia mai te mālohi makehe. Ohage la, neʼe mole maʼu pe ʼi he koga meʼa e tahi peʼe fakalogo ki te fasiga taʼu. Kapau neʼe tuku ʼi he po katoa, pea neʼe manua pea mo kamata mamanu; kae ko te mana ʼaē neʼe tae lahi e te ʼu famili pea mo tānaki ki te ʼaho ʼo te Sapato, neʼe mole pala ia ʼi te pōʼuli, pea neʼe feala ke nātou kai ʼi te Sapato​—te ʼaho ʼaē neʼe mole foaki ai te mana. ʼE mahino papau ia ko te mana neʼe ko he meʼa kai neʼe foaki faka milakulo.​—Ekesote 16:19-​30.

Ko te talanoa ʼo Pesalemo 78 ki te “kau mālohi,” peʼe ko te kau “ ʼaselo,” ʼe hā mai ai neʼe lagi fakaʼaogaʼi e Sehova te kau ʼaselo moʼo foaki te mana. (Pesalemo 78:25, kiʼi nota ʼi te lalo pasina) Tatau aipe pe neʼe feafeaʼi tona fai, kae neʼe tonu ke fakahā e te hahaʼi tonatou loto fakafetaʼi ki te agalelei ʼa te ʼAtua. Kae tokolahi ia nātou neʼe mole nātou fakamālo kia Ia ʼaē neʼe ina faka ʼāteainaʼi nātou mai tanatou nofo popūla ʼi Esipito. ʼE feala mo tatou ke tou meʼa noaʼi te ʼu meʼa ʼaē ʼe foaki mai e Sehova, peʼe mole tou loto fakafetaʼi mokā mole tou metitasio ki tona manavaʼofa. Koia ʼe feala ke tou fakamālo kia Sehova, he neʼe ina fai ke tohi te fakamatala ʼo te faka ʼāteaina ʼo Iselaele pea mo te ʼu meʼa ʼaē neʼe hoko “mo totatou akoʼi.”​—Loma 15:4.

ʼE ʼAoga Kia Tatou Te Meʼa ʼAē Neʼe Hoko Ki Te Kau Iselaelite

ʼI te foaki e Sehova te mana, neʼe mole manatu pe ia ke ina fakafimālie te fia kai ʼa te toko tolu miliona kau Iselaelite. Kae neʼe ina loto ia ke ina “fakamālaloʼi nātou pea mo ʼahiʼahiʼi nātou” ke fetogi tanatou aga pea mo fakatonutonuʼi nātou ke ʼaoga kia nātou. (Teutalonome 8:​16; Isaia 48:17) ʼI tanatou tali ʼaē ke nātou fetogi pea ke fakatonutonuʼi nātou, neʼe fiafia ai Sehova ʼo ina ‘fai te meʼa ʼaē ʼe lelei kia nātou ʼi tanatou ka haʼu,’ ʼo foaki kia nātou te tokalelei, mo te koloaʼia, pea mo te fiafia ʼi te Fenua ʼo Te Fakapapau.

Neʼe ʼi ai te meʼa maʼuhiga neʼe tonu ke nātou ʼiloʼi, ko “te tagata ʼe mole maʼuli ʼaki pe te pane, kae ʼe maʼuli te tagata ʼaki te folafola fuli pe ʼaē ʼe haʼu mai te gutu ʼo Sehova.” (Teutalonome 8:3) Kanapaula neʼe mole foaki e te ʼAtua te mana, kanaʼauala neʼe pakupaku te hahaʼi​—pea neʼe nātou mahino lelei ki te faʼahi ʼaia. (Ekesote 16:​3, 4) Ko te kau Iselaelite ʼaē neʼe loto fakafetaʼi ʼo ʼuhiga mo te faʼahi ʼaia, neʼe tonu ke nātou manatuʼi ʼi te ʼaho fuli ʼe fakalogo tonatou maʼuli kia Sehova pea ke nātou agavaivai ai. ʼI te temi leva ʼaē ka nātou nonofo ai ʼi te Fenua ʼo te Fakapapau ʼaē neʼe mahu ai te ʼu koloā, ʼe mole nātou galoʼi anai ia Sehova pea mo fakalogo kia te ia.

Ohage ko te kau Iselaelite, ʼe tonu ke mahino ki te kau Kilisitiano ʼe nātou fakalogo ki te ʼAtua ʼo ʼuhiga mo te ʼu meʼa ʼaē ʼe ʼaoga ki te maʼuli​—ʼi te faʼahi fakasino pea mo te faʼahi fakalaumālie. (Mateo 5:3; 6:​31-​33) ʼI tana tali ʼaē ki te fakahala ʼo te Tevolo, neʼe fakaʼaogaʼi e Sesu Kilisito te ʼu palalau ʼaē neʼe fai e Moisese, ʼaē ʼe tou maʼu ia Teutalonome 8:3, ʼo ina ʼui fēnei: “Kua tohi: E mole gata pe ki te pane e mauli ai anai te tagata, kae e mauli anai i te folafola fuape e mavae maia fofoga o te Atua.” (Mateo 4:4) Ei, ʼe fafaga te kau atolasio moʼoni ʼa te ʼAtua ʼaki te ʼu folafola ʼa Sehova ʼaē ʼe tou maʼu ʼi tana Tohi-Tapu. Pea tahi ʼaē meʼa, ʼe mālohi tanatou tui mokā nātou sio ki te ʼu fua lelei ʼo te ʼu folafola ʼaia ʼi tonatou maʼuli, ʼi tanatou haʼele mo te ʼAtua pea mo fakamuʼamuʼa tona Puleʼaga.

ʼE feala ke mole kei leleiʼia e te hahaʼi heʼe haohaoa te ʼu meʼa ʼaē kua nātou māhani kiai​—tatau aipe peʼe ko te ʼu meʼa ʼaia ʼe ko te fakahā ʼaia ʼo te ʼofa ʼo Sehova. Ohage la, ko te foaki faka milakulo ʼo te mana, ʼi te kamata, neʼe punamaʼuli pea mo fiafia ai te kau Iselaelite, kae ʼaki te temi, tokolahi ia nātou neʼe nātou meo. ʼAki he agatuʼu neʼe nātou tagi fēnei: “Ko tomatou ʼu nefesi kua fehiʼa ki te pane fakalialia ʼaenī”​—ʼo hā ai tanatou kamata ‘mavae mai te Atua mauli.’ (Faka au 11:6; 21:5; Hepeleo 3:​12) Koia, ko tanatou faʼifaʼitaki ʼe ko “totatou akoi, ia tatou aeni kua kaku ki te fakaosi o te temi.”​—1 Kolonito 10:11.

ʼE lava feafeaʼi hatatou manatuʼi te fakatokaga ʼaenī? ʼE mole tonu ke tou meʼa noaʼi te ʼu akonaki ʼo te Tohi-Tapu peʼe ko te meʼa kai ʼaē ʼe foaki mai e te kalasi ʼo te tagata kaugana agatonu mo poto, peʼe tou manatu ʼe mole ko he ʼu meʼa maʼuhiga. (Mateo 24:45) Kapau ʼe tou kamata manatu ʼe tou maʼu tuʼumaʼu anai te ʼu meʼa ʼofa ʼo Sehova peʼe tou meʼa noaʼi te ʼu meʼa ʼofa ʼaia, pea ʼe momoko anai tatatou ʼu felogoi mo ia.

Ko te tupuʼaga la ʼaia ʼaē ʼe mole foaki tuʼumaʼu mai e Sehova kia tatou he ʼu tuʼuga meʼa foʼou. Kae ʼaki te temi ʼe ina fakainaina māmālie tatou ke tou mahino ki tana Folafola. (Tāʼaga Lea 4:​18) Ko te faʼahi ʼaia ʼe ina faka fealagia ki tana hahaʼi ke nātou mahino ki te ʼu meʼa ʼaē ʼe nātou ako pea mo nātou maʼuliʼi. Neʼe mulimuli Sesu ki te faʼifaʼitaki ʼo tana Tāmai ʼi tana akoʼi tana ʼu ʼuluaki tisipulo. Neʼe ina fakamahino kia nātou te Folafola ʼa te ʼAtua “o faipe ki te feala o tanatou fakalogo,” peʼe ki tanatou “mahino,” ohage ko tona fakaliliu e ʼihi Tohi-Tapu.​—Maleko 4:​33; vakaʼi ia Soane 16:12.

Ke Tou Leleiʼia Tuʼumaʼu Te ʼu Meʼa ʼAē ʼe Foaki Mai e Te ʼAtua

Tahi ʼaē meʼa, neʼe fai liuliuga e Sesu tana ʼu akonaki. ʼE moʼoni ʼe feala ki te ʼatamai ke mahino vave ki he puani​—ohage la ko he pelesepeto ʼi te Tohi-Tapu​—kae ʼe ʼaoga he temi loaloaga ke malave ki te loto pea ke fakahū ki te “tagata [Kilisitiano] foou,” tāfito la mokā neʼe mālohi tatatou muliʼi ia te ʼu aga ʼāfea ʼo te mālama. (Efeso 4:​22-​24) ʼE mahino papau ia neʼe feiā te kau tisipulo ʼa Sesu ʼi te temi ʼaē neʼe maʼua ai ke nātou tauʼi te fialahi pea mo nātou maʼu ia te agavaivai. Neʼe maʼua ke akoʼi tuʼa lahi age e Sesu kia nātou te agavaivai, ʼo ina fakahā te manatu pe ʼaia ʼi he ʼu ʼaluʼaga kehekehe, ke nātou manatuʼi lelei pea ke nātou maʼuliʼi.​—Mateo 18:​1-4; 23:11, 12; Luka 14:​7-​11; Soane 13:​5, 12-​17.

ʼI totatou temi, ʼe mulimuli te ʼu fono faka Kilisitiano pea mo te ʼu tohi ʼo te Sosiete ki te faʼifaʼitaki ʼa Sesu, heʼe toe fakahā liuliuga ai te ʼu manatu. Koia, tou faka ʼuhiga te faʼahi ʼaia ohage ko he tokaga ʼofa ʼa te ʼAtua kia tatou, pea ʼaua naʼa tou fiu ʼi te ʼu meʼa ʼaē ʼe tou maʼu, ohage ko te fiu ʼa te kau Iselaelite ʼi te mana. Kapau ʼe tou tali te ʼu fakamanatu ʼaē ʼe fai liuliuga mai e Sehova, pea ʼe tou sio anai ki tona ʼu fua lelei ʼi totatou maʼuli. (2 Petelo 3:1) Kapau ʼe tou leleiʼia te ʼu faʼahi ʼaia, pea ʼe fakahā moʼoni ai kua tou ‘mahino’ ki te Folafola ʼa te ʼAtua ʼi totatou loto pea mo totatou ʼatamai. (Mateo 13:15, 19, 23) ʼO ʼuhiga mo te faʼahi ʼaia, ʼe ko he faʼifaʼitaki lelei kia tatou ia te tagata fai pesalemo ko Tavite. Logope la neʼe mole ina maʼu te meʼa kai fakalaumālie kehekehe ʼaē ʼe tou maʼu ʼi te temi nei, kae neʼe ina ʼui ʼo ʼuhiga mo te ʼu lao ʼa Sehova, ʼe “malie age ia ʼi te meli pea mo te meli ʼaē ʼe hali mai te ʼu tauga meli”!​—Pesalemo 19:10.

Te “Mana” ʼAē ʼe Ina Foaki Te Maʼuli Heʼegata

Neʼe ʼui fēnei e Sesu ki te kau Sutea: “E ko au te pane o te mauli. Nee kai e autou matua te mana i te toafa pea kua natou mamate. . . . E ko au te pane o te mauli e haele ifo mai Selo. Kapau e i ai he tahi e ina kai te pane aeni, e mauli anai o heegata . . . Ko te pane e au foakiʼage anai e ko toku kakano, e tukuʼage moʼo te mauli o te malama-nei.” (Soane 6:​48-​51) Ko te pane peʼe ko te mana neʼe mole feala ke ina foaki te maʼuli heʼegata. Kae ko nātou ʼaē ʼe nātou tui ki te sakilifisio faitotogi ʼo Sesu ʼe nātou maʼu anai te tapuakina ʼaē ko te maʼuli heʼegata.​—Mateo 20:28.

Ko te tokolahi ʼo nātou ʼaē ʼe nātou maʼu te ʼu fua lelei mai te totogi ʼaē neʼe foaki e Sesu, ʼe nātou maʼu anai te maʼuli heʼegata ʼi te palatiso ʼi te kele. Ko “te toe hahaʼi tokolahi”​—ʼaē neʼe fakatātā e te “toe hahaʼi tokolahi [matāpule] pea mo kehekehe” ʼaē neʼe mavae fakatahi mo te kau Iselaelite mai Esipito​—ʼe hāofaki anai nātou ʼi te “mamahi lahi” ʼaē ka hoko mai, pea ʼe pulihi anai ʼi te kele te agakovi fuli pe. (Apokalipesi 7:​9, 10, 14; Ekesote 12:38) ʼE maʼu e nātou ʼaē neʼe fakatātā e te kau Iselaelite he fakapale ʼe lahi age. Neʼe fakahā e te ʼapositolo ko Paulo ko nātou ʼaia, ko te toko 144 000, ʼe nātou faʼufaʼu te Iselaele fakalaumālie ʼa te ʼAtua. Ko tanatou fakapale ʼi te mate ʼe ko te fakatuʼuake ki te maʼuli ʼi selo. (Kalate 6:​16; Hepeleo 3:1; Apokalipesi 14:1) ʼI selo, ʼe foaki anai e Sesu kia nātou te mana makehe.

Te Faka ʼUhiga ʼo “Te Mana Nee Fufu”

Ko Sesu ʼaē kua fakatuʼuake, neʼe ina ʼui ki te Iselaele fakalaumālie, “ki te toà, e au foaki anai kia te ia te mana nee fufu.” (Apokalipesi 2⁠:17) Ko te mana fakatātā ʼaia ʼaē neʼe fufū, ʼe ina fakamanatuʼi mai te mana ʼaē neʼe fakatotonu e te ʼAtua kia Moisese ke ina taupau ʼi te ipu aulo ʼi te loto aleka taputapu ʼo te fuakava. Neʼe tuku te Aleka ʼi te Potu Taputapu ʼAupito ʼo te tapenakulo. Neʼe mole sio kiai he tahi, he neʼe fufū. Neʼe taupau te mana ʼaia ohage ko he fakamanatu, pea ko te mana ʼaia neʼe mole mamanu ʼi tona tuku ʼi te Aleka, koia neʼe ina fakatātā te meʼa kai ʼaē ʼe heʼe popo. (Ekesote 16:32; Hepeleo 9:​3, 4, 23, 24) ʼI tana foaki ki te toko 144 000 te mana ʼaē ʼe fufū, ʼe fakamoʼoni e Sesu ʼe foaki kia nātou te maʼuli tuputupua pea mo heʼe popo, ʼi tonatou ʼuhiga foha fakalaumālie ʼa te ʼAtua.​—Soane 6:​51; 1 Kolonito 15:54.

Neʼe ʼui fēnei e te tagata fai pesalemo: “ ʼE maʼu ʼi tou tafa [Sehova] te matapuna ʼo te maʼuli.” (Pesalemo 36:9) Ko te mana​—ʼi tona ʼuhiga moʼoni pea mo fakatātā​—ʼe ina toe fakahā te moʼoni ʼaia! Ko te mana ʼaē neʼe foaki e te ʼAtua ki te Iselaele ʼāfea, mo te mana fakatātā ʼaē neʼe ina foaki mai ʼaki te kakano ʼo Sesu, pea mo te mana fakatātā ʼaē ʼe fufū ʼaē ʼe foaki e Sesu ki te toko 144 000, ʼe ina fakamanatu mai kia tatou fuli te maʼua ʼaē ke tou fakalogo ki te ʼAtua ke feala ai hatatou maʼuli. (Pesalemo 39:​5, 7) Tou fakamoʼoni tuʼumaʼu ki te faʼahi ʼaia, ʼaki he agavaivai pea mo he fia mālalo. Ki muli age, ʼe fai anai e Sehova ‘te lelei kia tatou ʼi tatatou ka haʼu.’​—Teutalonome 8:​16.

[Paki ʼo te pasina 26]

Ke natou maʼu te maʼuli heʼegata, ʼe tonu ke fakalogo te hahaʼi fuli ki “te pane o te mauli e haele ifo mai Selo”

[Paki ʼo te pasina 28]

Ko tatatou kau ki te ʼu fono faka Kilisitiano fuli, ʼe ko he fakahā ʼaia ʼe tou leleiʼia te ʼu fakamanatu ʼa Sehova