Ko He Faʼahiga Meʼa Kai Foʼou

ʼE KOUTOU ʼiloʼi koa pe koteā te meʼa ʼaē ʼe tae e te hahaʼi? ʼE hage ko te nive. ʼE hina, pea ʼe mānifi pea mo maʼamaʼa. Kae ʼe mole ko te nive; ʼe ko he meʼa kai.

Ko te māhina pe e tahi kua hili talu mai te mavae ʼa te kau Iselaelite mai Esipito. ʼE nātou nonofo nei ʼi te toafa. Neʼe mole lahi te meʼa kai ʼaē neʼe feala ke nātou maʼu ai, pea neʼe meo ai te hahaʼi, ʼo nātou ʼui fēnei: ‘Ka na neʼe tuku la e Sehova ke mātou mamate ʼi Esipito. Heʼe ʼi te fenua ʼaia, neʼe mātou maʼu ai te meʼa kai kehekehe ʼaē neʼe mātou loto kiai.’

Koia neʼe ʼui age ai e Sehova: ‘ ʼE ʼau fakatō anai he meʼa kai mai te lagi.’ Pea neʼe fai e Sehova te meʼa ʼaia. ʼI te uhu ake ʼi te sio ʼa te kau Iselaelite ki te meʼa hina ʼaē neʼe tō mai te lagi, neʼe nātou feʼuiʼaki fēnei: ‘Koteā ʼapē te meʼa ʼaenī?’

Neʼe ʼui age e Moisese: ‘ ʼE ko te meʼa kai ʼaia ʼaē ʼe foaki atu e Sehova ke koutou kai.’ Neʼe fakahigoaʼi e te hahaʼi te meʼa ʼaia ko te MANE. Ko te mane neʼe hage tona kano lelei ko he foʼi kekē ʼe fai ʼaki te meli.

Neʼe ʼui fēnei e Moisese ki te hahaʼi: ‘Koutou tae ʼo fakafeauga pe ki te meʼa ʼaē ʼe feala ke koutou kai takitahi.’ Koia ʼi te uhu fuli neʼe nātou fai te faʼahi ʼaia. Pea ʼi te vevela ʼo te laʼā, ko te mane ʼaē neʼe kei toe neʼe vaia.

Neʼe ʼui e Moisese: ‘Ke ʼaua naʼa fakatoe e he tahi he mane ki te ʼaho ake.’ Kae ko ʼihi neʼe mole nātou fakalogo. ʼE koutou ʼiloʼi pe koteā te meʼa ʼaē neʼe hoko? ʼI te uhu ake neʼe manua te mane pea neʼe kua mamanu!

Kae ʼe ʼi ai te ʼaho e tahi ʼo te vāhaʼa neʼe ʼui ai e Sehova ki te hahaʼi ke lahi tanatou tae te mane. Neʼe ko te ono ʼaho. Pea neʼe ʼui e Sehova ke taupau ki te ʼaho ake, koteʼuhi ʼe mole ina fakatō ifo anai te mane ʼi te fitu ʼaho. Kapau ʼe nātou taupau te mane ki te fitu ʼaho, ʼe mole manua anai pea ʼe mole mamanu anai! Neʼe ko te tahi ʼaia milakulo!

ʼI te ʼu taʼu fuli ʼaē neʼe nonofo ai te kau Iselaelite ʼi te toafa neʼe fafaga nātou e Sehova ʼaki te mane.