Te ʼu Fehuʼi ʼa Te Kau Lautohi

Koteā te faka ʼuhiga ʼo te ʼu palalau ʼaenī “te mauli ia te ia”?

ʼE ʼui e te Tohi-Tapu ʼo ʼuhiga mo Sesu Kilisito ʼe ina maʼu “te mauli ia te ia” pea ʼo ʼuhiga mo tana ʼu tisipulo ʼe ‘ia nātou te maʼuli.’ (Soane 5⁠:26; 6⁠:53) Kae ʼe mole tatau te faka ʼuhiga ʼo te ʼu vaega ʼaia e lua.

Neʼe tala fēnei e Sesu: “O hage ko te Tamai e ina maù te mauli ia te ia, pea e feiape, kua ina foaki ki te Alo ke ina maù te mauli ia te ia.” ʼI muʼa ʼo tana fai tana palalau ʼaia, neʼe ʼui fēnei e Sesu: “Mooni, mooni e au tala atu kia koutou, ko ae e fakalogo ki taku folafola pea mo tui kia ia nee ina fekauʼi mai au, e ina mau te mauli heegata . . . E hoko mai te hola, i te lakaga nei kua kaku mai ia, e fakalogo ai e te hahai mate te leo o te Alo o te Atua, pea kia natou nee natou logoi e natou mauli anai.” ʼI henī, neʼe palalau ia Sesu ki te mālohi fakaofoofo ʼaē neʼe foaki age kia ia e tana Tāmai​—te fealagia ʼaē ke ina foaki ki te hahaʼi he tuʼulaga ʼofainaʼi ia muʼa ʼo te ʼAtua. Pea tahi ʼaē meʼa, ʼe lava fakatuʼuake e Sesu ia nātou ʼaē kua mamate pea mo foaki age kia nātou te maʼuli. Kia Sesu, ko te maʼu ʼo “te mauli ia te ia” ʼe faka ʼuhiga ʼe ina maʼu papau te ʼu mālohi ʼaia. ʼI te tahi fakaliliu Tohi-Tapu, ʼe fakamahino ai, ko te ʼAlo ohage ko tana Tāmai, ʼe ina toe maʼu pe foki ‘ia te ia totonu te meʼa ʼofa ʼo te maʼuli.’ (Soane 5⁠:​24-26) Kae e feafeaʼi ki tana ʼu tisipulo?

Kua teitei hili kiai te taʼu katoa, neʼe ʼui fēnei e Sesu ki te hahaʼi ʼaē neʼe fakalogo age kia ia: “Mooni, mooni, e au tala atu kia koutou, kapau a mole koutou kai te kakano o te Foha o te tagata pea mo inu tona toto, pea e mole ia koutou te mauli. Kia ia ae e ina kai toku kakano pea mo inu toku toto e ina mau te mauli heegata, pea e au fakatuuʼake anai ia i te aho fakamuli.” (Soane 6⁠:​53, 54) ʼI henī ʼe fakatatau e Sesu ia te maʼu “ia koutou te mauli” mo te maʼu ʼo “te mauli heegata.” Ko te ʼu kupuʼi palalau mo tona faʼahiga faʼufaʼu feiā ohage ko te maʼu “ia koutou te mauli,” ʼe tuʼu ʼi te tahi ʼu faʼahi ʼo te Tauhi Foʼou. Koʼeni te ʼu faʼifaʼitaki e lua, “koutou mau he masima ia koutou” pea mo te “tali i onatou sino te totogi tonu.” (Maleko 9⁠:50; Loma 1⁠:27) ʼI te ʼu faʼifaʼitaki ʼaia e lua, ʼe mole faka ʼuhiga ʼe foaki te mālohi ki te māsima peʼe foaki he fakapale ki he tahi. Kae ʼe faka ʼuhiga ki he meʼa kua katoa ia ia totonu. Koia, ko te kupuʼi palalau “ia koutou te mauli” ʼaē ʼe fakaʼaogaʼi ia Soane 6⁠:​53, ʼe faka ʼuhiga pe ia ki te kua maʼu katoa ʼo te maʼuli.

ʼI tana ʼui ko tana ʼu tisipulo ʼe nātou maʼu te maʼuli ia nātou, neʼe talanoa ia Sesu ki tona kakano pea mo tona taʼataʼa. Ki muli age, ʼi te fakatuʼu e Sesu ia te Ōmoe ʼo te ʼAliki, neʼe toe palalau ai ki tona kakano mo tona taʼataʼa, pea neʼe ina fakatotonu ki tana kau tisipulo ʼaē ka nātou hū anai ki te fuakava foʼou, ke nātou toʼo te pane ʼe mole hona meʼa fakatupu pea mo te vino. ʼE faka ʼuhiga ʼaki koa, ʼe ko te kau Kilisitiano fakanofo pe anai, ʼaē ʼe nātou hu ki te fuakava foʼou mo Sehova ʼAtua, ka nātou maʼu katoa te faʼahiga maʼuli ʼaia? Kailoa. Ko te ʼu ʼaluʼaga ʼaia e lua neʼe vaha ʼi te taʼu katoa. Ko nātou ʼaē neʼe nātou logo ki te ʼu palalau ʼa Sesu ʼaē ʼe fakamatala ia Soane 6⁠:​53, 54 neʼe mole nātou mahino ki he toʼotoʼoga ʼe fai ʼi te taʼu fuli ʼo ʼuhiga mo he fakaʼaogaʼi ʼo he ʼu meʼa ʼe nātou fakatātā te kakano pea mo te taʼataʼa ʼo Kilisito.

Ia Soane kapite 6, neʼe ʼuluaki fakatatau e Sesu tona kakano ki te mane, ʼo ina ʼui fēnei: “Nee kai e autou matua te mana i te toafa pea kua natou mamate. E koeni te pane e haele ifo mai Selo, ke aua naa mate iaʼia e ina kai. E ko au te pane o te mauli e haele ifo mai Selo. Kapau e i ai he tahi e ina kai te pane aeni, e mauli anai o heegata.” Ko te kakano ʼo Sesu, ʼo fakatahi mo tona taʼataʼa, ʼe maʼuhiga age ia ʼi te mane. ʼO feafeaʼi? Neʼe ina foaki tona kakano maʼa “te mauli o te malama-nei,” ʼo ina faka fealagia ai ia te maʼuli heʼegata.a Koia, ko te palalau “ia koutou te mauli” ʼaē ʼe tuʼu ia Soane 6⁠:​53, ʼe faka ʼuhiga kia nātou fuli ʼaē ka nātou maʼu anai te maʼuli heʼegata​—ʼi te lagi peʼe ʼi te kele.​—Soane 6⁠:​48-51.

Ko te temi fea ʼaē ʼe ka maʼu ai anai e te kau tisipulo ʼa Kilisito ia te maʼuli ia nātou totonu, peʼe nātou maʼu katoa te maʼuli? Ki te kau maʼu tofiʼa ʼo te Puleʼaga, ʼe hoki hoko te faʼahi ʼaia ʼi tonatou fakatuʼuake ki te maʼuli ʼi te lagi ohage ko he ʼu laumālie tuputupua. (1 Kolonito 15⁠:​52, 53; 1 Soane 3⁠:⁠2) ʼE hoki maʼu katoa e te “tahi ʼu ōvi” ʼa Sesu ia te maʼuli ʼi te ʼosi ʼo tana ʼAfio ia Taʼu e Afe. Kae ʼi muʼa atu, ʼe ʼahiʼahiʼi anai ia nātou, ʼe nātou nonofo agatonu anai, pea mo tala ai leva ʼe nātou faitotonu ki te maʼuli heʼegata ʼi te Palatiso ʼi te kele.​—Soane 10⁠:​16, MN; Apokalipesi 20⁠:​5, 7-10.

[Kiʼi nota]

[Paki ʼo te pasina 31]

ʼE feala ki te kau Kilisitiano moʼoni fuli ke ‘ia nātou te maʼuli’