Kapite 65

Te Fagona Fakafūfū Ki Selusalemi

ʼE TOU nonofo nei ʼi te fasiga taʼu fakatōlau ʼo te taʼu 32, pea kua ōvi mai te lafeti ʼo te ʼu Tapenakulo. Talu mai te faiga ʼaē ʼa te kau Sutea ke matehi ia Sesu, ʼi te Pāsikate ʼo te taʼu 31, neʼe fai tāfito e Sesu tana gāue ʼi Kalilea. Neʼe lagi liliu pe ia ki Selusalemi ke kau ki te ʼu lafeti ʼaē e tolu ʼi te taʼu fuli ʼa te kau Sutea.

ʼI te temi nei, ʼe fakaholi ia ia ʼe tona ʼu tēhina: “Mavae ʼi henī pea ke ʼalu ki Sutea.” Ko Selusalemi ʼe ko te kolo maʼuhiga ʼaia ʼo Sutea pea ko te lotolotoiga ʼaia ʼo te lotu ʼo te fenua katoa. Neʼe ʼui fēnei e tona ʼu tēhina: “ ʼE mole he tahi ʼe ina fai fakafūfū he meʼa, mo kapau ʼe faiga ia ke logona.”

Logope tanatou mole tui ʼaē ko Sesu ko te Mesia, ko Sake, Simone, Sosefo pea mo Sutasi neʼe nātou loto ke ʼalu tonatou taʼokete ʼo fakahāhā tona ʼu mālohi faka milakulo ki te hahaʼi tokolahi ʼaē ka ʼolo anai ki te lafeti. Kae ʼe ʼiloʼi lelei pe e Sesu te tuʼutāmaki. “ ʼE mole he ʼuhiga ia e tahi ʼo he fehiʼa ʼa te malamanei kia koutou, ko tana ʼui age ʼaia, kae ko ʼau, ʼe fehiʼa ia kia te ʼau, heʼe ʼau fakamoʼoni ʼo ʼuhiga mo ia ko tana ʼu gāue ʼe kovi.” Koia neʼe ina ʼui age ai ki tona ʼu tēhina: “Ko koutou, ke koutou hake ki te lafeti; ka ko ʼau, ʼe mole ʼau hake nei ki te lafeti ʼaia.”

Ko te lafeti ʼo te ʼu Tapenakulo e ʼaho fitu tona fualoa. Ko te valu ʼaho leva ʼe fakaʼiloga ʼaki te fakaʼosi fakamamalu ʼo te lafeti ʼaia. Ko te lafeti ʼaia, ʼaē ʼe ina fakaʼosi te taʼu ʼo te gāue kele, ʼe ko te temi ia ʼo te ʼu fakafiafia lahi pea mo te fakafetaʼi. ʼI te ʼosi ʼo te ʼu ʼaho ki te kua ʼolo ʼo te ʼu tēhina ʼo Sesu pea mo te tokolahi ʼo te kau fagona, neʼe ʼolo fakafūfū ia Sesu pea mo tana ʼu tisipulo, ʼo nātou fakamamaʼo ʼi te hahaʼi. Neʼe mole nātou ʼolo ʼi te ala ʼaē ʼe feʼaluʼaki māhani ai te hahaʼi ʼaē ʼe fālō ʼi Solotane, kae neʼe nātou ʼolo ʼi Samalia.

ʼI te maʼua ʼaē ke nātou tutuʼu ʼi he kolo samalitana, neʼe fekauʼi ai e Sesu te ʼu faifekau ke mumuʼa ia te ia ʼo teuteuʼi he nofoʼaga. Kae neʼe fakafisi te hahaʼi ʼe mole nātou fia fai he meʼa maʼa ia ʼi tanatou ʼiloʼi ʼaē ʼe ʼalu ia ki Selusalemi. ʼI tonā ʼiʼita, neʼe fehuʼi age e Soane pea mo Sake kia Sesu. “ ʼAliki, ʼe ke loto koa ke ma ʼui age ki te afi ke hifo ifo mai te lagi pea ke ina fakaʼauha ia nātou?” Neʼe ina fakatonutonuʼi ia nāua ʼuhi ko te taʼi manatu ʼaia, pea nātou ʼolo ai ki te tahi kolo.

ʼI te ala, neʼe fakaōvi age te sekelipa ʼo palalau kia Sesu: “Faiako, ʼe ʼau mulimuli anai ia te koe ʼi te potu fuli pe ʼe ke ʼalu kiai.”

“ ʼE maʼu te ʼu tafu ʼo te ʼu lenato pea mo te ʼu fātaʼi ʼo te ʼu manu lele ʼo te lagi, ko te tali age ʼaia ʼa Sesu, kae mole he potu ʼo te Foha ʼo te tagata ke ʼuluga ai tona ʼulu.” Neʼe ina fakamahino age ki te sekelipa ʼaia te ʼu faigataʼaʼia ʼe tau anai mo ia mokā ʼe liliu ia ko tana tisipulo. Pea ʼe hage ia ʼe ina fakahā ʼaki te ʼu palalau ʼaia, ko te tagata ʼaia ʼe lahi fau tona fialahi ke ina tali te faʼahiga maʼuli ʼaia.

Neʼe pāuiʼi e Sesu te tahi tagata: “Muli mai ia te ʼau.”

“Fakagafua mai muʼa ke ʼau ʼalu ʼo tanu taku tāmai”, ko tana tali age ʼaia.

“Tuku te kau mate ke nātou tanu tanatou ʼu mate, ko te ʼui age ʼaia ʼa Sesu, kae kia koe, ʼalu koe ʼo faka mafola te puleʼaga ʼo te ʼAtua.” Ko te tāmai ʼa te tagata ʼaia ʼe mahino ia neʼe mole heʼeki mate ia, ka na ʼau la neʼe mole taka tona foha ʼi te koga meʼa ʼaia, ʼo fakalogo kia Sesu. ʼE ʼiloga mai ia neʼe kole age e te tagata ʼaia kia Sesu he fakagafua ke talitali ki te mate ʼo tana tāmai. Neʼe mole heʼeki tokalelei ia ke ina tuku ki muʼa te Puleʼaga ʼo te ʼAtua ʼi tona maʼuli.

Ko Sesu, mo tana ʼu tisipulo, ʼe hoko atu tonatou fagona ki Selusalemi. Neʼe ʼui age e te tahi tagata ki ai: “ ʼE ʼau muliʼi anai koe, ʼAliki; kae fakagafua mai muʼa ke ʼau tauʼinē mo nātou ʼaē ʼo toku loto fale.”

Koʼeni te tali age ʼa Sesu: “Ko ʼaē kua fā tona nima ki te saliote pea toe sio ia ki te ʼu meʼa ʼaē kua ʼi muli ʼe mole ʼaoga ia ki te puleʼaga ʼo te ʼAtua.” ʼE moʼoni ia, ko nātou ʼaē ʼe fia liliu ko te ʼu tisipulo ʼa Sesu ʼe tonu ke haga tuʼumaʼu ʼonatou mata ki te gāue ʼo te Puleʼaga. Ohage pe ko he tagata gāue kele ʼe feala ke pikopiko tana laini mokā ʼe mole sio tuʼumaʼu ia ki muʼa, ko he tahi ʼe sio ki muli, ki te tuʼu ʼo te ʼu faʼahiga meʼa ʼaenī, ʼe faigafua tana fakatafa ʼi te ala ʼaē ʼe ʼalu ki te maʼuli heʼegata. Soane 7:2-10; Luka 9:51-62; Mateo 8:19-22.

▪ Ko ai te ʼu tēhina ʼo Sesu, pea koteā tanatou manatu ʼo ʼuhiga mo ia?

▪ He koʼe neʼe mole faʼa tali leleiʼi ia nātou e te kau Samalitana, pea koteā te meʼa ʼaē neʼe fia fai e Sake pea mo Soane?

▪ Koteā te ʼu felogoi e tolu ʼaē neʼe fai e Sesu ʼi te ala, pea neʼe feafeaʼi te fakatokaga ʼaē ʼa Kilisito ki te maʼuhiga ʼaē ʼo te maʼu ʼo he loto faka sakilifisio ʼi te gāue?