Kapite 74

Te ʼu Tokoni Kia Maleta Pea Mo Te ʼu Fakamahino ʼo ʼUhiga Mo Te Faikole

ʼI TE hoko atu ʼo tona minisitelio ʼi Sutea, neʼe hū ia Sesu ki te kolo ʼo Petania. Ko te koga meʼa ʼaia neʼe nonofo ai ia Maleta, mo Malia pea mo Lasalo, tonā tokolua. E lagi neʼe kua felāveʼi pe ia Sesu mo nātou ʼi ai lolotoga tona minisitelio, pea e lagi neʼe kua liliu ia ko he tahi ʼi tonatou ʼu kaumeʼa lelei. Kae ʼi te temi nei ʼe ʼalu ia ki te ʼapi ʼo Maleta pea neʼe fakatalitali leleiʼi ia ia.

Neʼe loto ia Maleta ke ina foaki te meʼa ʼaē ʼe lelei ʼo tona loto fale kia Sesu. ʼE ko he meʼa faka maʼuhiga ʼaupito ʼo kita, te tali ʼo te ʼaʼahi ʼa te Mesia ʼaē neʼe fakapapauʼi mai! Koia neʼe ina fakatuʼutuʼu ai ke ina teuteuʼi he meʼa kai ʼe lelei pea mo tokaga ki te ʼu faʼahiga meʼa ʼo tona loto fale ke tokalelei ia meʼa fuli lolotoga te nofo ai ʼa Sesu.

Kae, ko Malia tona tēhina, neʼe nofo ia ia tafa ʼo te ʼu vaʼe ʼo Sesu ʼo fagono ki ai. Fualoa siʼipe, pea ʼalu age ia Maleta pea ina ʼui age kia Sesu: “ ʼAliki, ʼe ke leleiʼia pe koa la koe te tuku e toku tēhina ke ʼau fai tokotahi te gāue? ʼUi age foki ki ai ke haʼu ʼo tokoni mai kia ʼau.”

Kae neʼe mole fia ʼui age ia Sesu he meʼa kia Malia. Neʼe ina ʼui age kia Maleta ʼe lahi fau tana hoha ki te ʼu meʼa fakamālama. “Maleta, Maleta, ko tana ʼui age ʼaia, ʼe ke tuʼania pea e lahi te ʼu meʼa ʼe ke feʼohoʼaki ai. Kae ʼe siʼisiʼipe te ʼu meʼa ʼe ʼaoga, peʼe ko he meʼa pe e tahi.” Neʼe ina fakahā ʼaki age ai ʼo ʼuhiga mo he kai ʼe mole ʼaoga ke fakaʼaogaʼi he temi loaloaga moʼo teuteuʼi ʼo he ʼu faʼahiga meʼa kai ke lahi. ʼE feʼauga pe ʼi niʼihi, peʼe ko he meʼa kai pe e tahi.

Ko te ʼu manatu ʼa Maleta ʼe lelei: neʼe ina fia fakahā tona lotoʼofa. Kae, ʼi tana tuʼania ʼo ʼuhiga mo te ʼu meʼa fakamālama, neʼe mole ina puke te faigamālie ʼaē ke akoʼi ia ia e te ʼAlo ʼo te ʼAtua totonu. Koia neʼe fakaʼosi fēnei ai te palalau ʼa Sesu: “Ko Malia, ia, neʼe ina fili te vahe ʼaē ʼe lelei, pea ʼe mole toʼo anai ia te ia.”

Ki muli age, ʼi ʼihi ʼatu faʼahi, neʼe fehuʼi age e te tisipulo kia Sesu: “ ʼAliki, ako mai kia mātou te faikole, ohage ko tona ako e Soane ki tana ʼu tisipulo.” ʼE mahino ko te tisipulo ʼaia neʼe mole lagi nofo mo nātou ʼi te taʼu katoa vaelua ki muʼa atu, ʼi te temi ʼaē neʼe fai age ai e Sesu te faʼifaʼitaki ʼo te faikole ʼi tana Akonaki ʼi te moʼuga. Neʼe toe fai age foki e Sesu te ʼu fakamahino ʼo ʼuhiga mo te faʼahiga fai ʼo te faikole, kae neʼe ina toe hoko atu ʼaki te lea fakatātā ʼe hā ʼaki ai te ʼaoga ʼaē ʼo te haga faikole.

“Ko ai ʼaē ia koutou, kapau ʼe ʼi ai hona kaumeʼa, ʼe ʼalu anai ki ai ʼi te māʼupō ʼo ʼui age: ‘Kau tagata, mai muʼa he ʼu foʼi pane e tolu, heʼe koʼeni toku kaumeʼa neʼe tau mai tona fagona kio ʼoku pea ʼe mole ʼau maʼu haku meʼa mo ʼona tali ʼaki?’ Pea, ʼe tali mai anai e ia ʼaē ʼi te loto fale: ‘Tuku tau fakakinakina mai kia te ʼau. Ko te matapā kua ʼosi kalaviʼi, pea kua ʼi te moeʼaga taku ʼu kiʼi tamaliki pea mo ʼau; ʼe mole kei ʼau faʼa tuʼu atu ʼo foaki atu he meʼa.’ ʼE ʼau tala atu kia koutou: tatau aipe peʼe mole tuʼu ake ʼo foaki age he meʼa kia te ia heʼe ko tona kaumeʼa, kae mahino papau ia ʼe tuʼu ake anai ia, koteʼuhi ko tana haga kole fakakinau pea ʼe ina foaki age anai ia meʼa fuli ʼe ʼaoga kia te ia.”

ʼAki te lea fakatātā ʼaia, neʼe mole fia fakahā e Sesu, ohage ko te kaumeʼa ʼi te hisitolia, ko Sehova ʼAtua ʼe mole ina faʼa tali te ʼu kole ʼaē ʼe fai age kia te ia. Kailoa, ko te meʼa ʼaē ʼe ina fia fakahā, kapau ko he ‘kaumeʼa’ logope tana mole lotolelei kae ʼe ina tali pe te ʼu kole fakakinau ʼaē ʼe fai age, e feafeaʼi age leva tona tali lelei e tatatou Tāmai fonu ʼi te ʼofa ʼaē ʼi selo! Neʼe hoko atu te palalau ʼa Sesu: “Koia ʼe ʼau tala atu ai kia koutou: Ke koutou haga kole, pea ʼe foaki atu anai kia koutou; ke koutou haga kumi, pea ʼe koutou maʼu anai; ke koutou haga fisifisi pea ʼe avahi atu anai kia koutou. Heʼe ko ʼaē ʼe ina kole ʼe foaki age kia te ia, ko ʼaē ʼe ina kumi ʼe ina maʼu, pea ko ʼaē ʼe ina fisifisi ʼe avahi age anai kia te ia.”

ʼOsi ʼaia pea fakaʼaogaʼi e Sesu te faʼifaʼitaki ʼo he tāmai fakamālama, agahala pea mo heʼe haohaoa: “ ʼIo, ko ai te tāmai ʼaē ia koutou, kapau ʼe kole age kia te ia ʼe tona foha he ika, pea ina ʼavage anai kia te ia he gata ka mole ko he ika? peʼe kapau, ʼe ina kole age kia te ia he fuaʼi moa, pea ina ʼavage anai kia te ia he sekolopio? Koia kapau ko koutou, logope takotou agakovi, ʼe koutou popoto ʼi te foaki ki ʼakotou ʼu fānau te ʼu meʼa ʼofa ʼe lelei, e feafeaʼi leva la te lahi ake ia ʼo te foaki e te Tāmai ʼaē ʼi selo te laumālie maʼoniʼoni kia nātou ʼaē ʼe nātou kole kia te ia!” ʼI fakaloto mālohi taulekaleka leva ke tou haga faikole ai! Luka 10:38 ki te 11:13.

▪ He koʼe neʼe kinakina feiā ia Maleta maʼa Sesu?

▪ Koteā te meʼa neʼe fai e Malia pea he koʼe neʼe ko ia ia ʼaē neʼe vikivikiʼi e Sesu ka mole ko Maleta?

▪ Koteā ʼaē neʼe ina uga ia Sesu ke ina toe fai age he ʼu fakamahino ʼo ʼuhiga mo te faikole?

▪ Neʼe fakahā feafeaʼi e Sesu te ʼaoga ʼaē ʼo te haga faikole?