Kapite 90

Te Falala Ki Te Toe Tuʼuake

KUA kaku mai ia Sesu ki Petania, ko he kolo ʼe teitei kilometa tolu tona mamaʼo mo Selusalemi. Kua hili kiai te ʼu kiʼi ʼaho talu te mate pea mo te ʼavaifo ʼaē ʼo Lasalo. Ko Maleta pea mo Malia, te ʼu tokolua ʼo Lasalo, e kei nā putu nei pe, pea neʼe tokolahi te hahaʼi neʼe ʼōmai ki tonā ʼapi moʼo fakafimālieʼi ia nāua.

Lolotoga te fetagihi ʼa te ʼu fafine ʼaia e lua ki te mate ʼo tonā tokolua, neʼe ʼalu he tahi ʼo fakahā kia Maleta ʼe lolotoga haʼu ia Sesu ʼi ala. Neʼe ʼalu fakavilivili atu aipe ʼo faka felāveʼi ki ai, kae hage neʼe mole ina fakahā ki tona tēhina. ʼI tana kaku atu kia Sesu, neʼe ʼui age e Maleta ki ai te meʼa ʼaē neʼe nā tautau palalau ki ai mo Malia lolotoga te ʼu ʼaho fakaʼosi ʼaia e fā: “Ka na neʼe ke ʼi henī la, neʼe mole mate toku tuagaʼane!”

Kae hā ʼaki mai ʼi te ʼu palalau ʼa Maleta ia tana falala ʼaē ʼe kei feala pe te fai e Sesu he faʼahiga meʼa ʼo ʼuhiga mo tona tokolua. Neʼe ina tala age: “ ʼE ʼau ʼiloʼi ko meʼa fuli pe ʼe ke kole anai ki te ʼAtua, ʼe foaki atu anai e te ʼAtua kia te koe.”

“Ko tou tuagaʼane ʼe toe tuʼuake anai”, ko te fakapapau age ʼaia ʼa Sesu.

ʼAki tana manatu ʼaē ʼe palalau age Sesu ki he toe tuʼuake ʼi te kele ki he temi ka haʼu, te toe tuʼuake ʼaia ʼe ʼamanaki kiai ia Apalahamo pea mo ʼihi ʼatu ʼu kaugana ʼa te ʼAtua, neʼe tali age e Maleta: “ ʼE ʼau ʼiloʼi ʼe toe tuʼuake anai ia ʼi te toe tuʼuake ʼi te ʼaho fakamuli.”

Kae, ʼi te tali ʼa Sesu neʼe ina fakahā age he falala ki he fakafimālie ʼi te temi pe ʼaia. Neʼe ina ʼui age: “Ko ʼau ko te toe tuʼuake pea mo te maʼuli.” Neʼe ina fakamanatuʼi age kia Maleta neʼe foaki age e Sehova kia ia te mālohi ki te mate: “Ko ʼaē ʼe tui kia te ʼau, tatau aipe peʼe mate, ʼe haʼu anai ia ki te maʼuli; pea ko ʼaē ʼe maʼuli pea mo tui kia te ʼau ʼe mole mate anai ia.”

Neʼe mole hā mai ʼi te ʼu palalau ʼa Sesu kia Maleta ko te kau agatonu ʼi tona temi ʼe mole nātou mamate anai. Ko te meʼa ia ʼaē neʼe ina fia fakahā age, ko ʼaē ʼe tui kia te ia ʼe feala anai ke ina maʼu te maʼuli heʼegata. Ko te tokolahi ʼo nātou ʼaē ʼe nātou maʼu anai te maʼuli heʼegata ʼe fakatuʼuake muʼa anai ia nātou ʼi te ʼaho fakamuli. Kae, ko ʼihi hahaʼi agatonu ʼe nātou maʼuʼuli anai ʼi te fakaʼosi ʼo te tuʼu ʼo te ʼu faʼahiga meʼa ʼaenī ʼi te kele; kia nātou ʼaia ʼe hoko moʼoni anai te ʼu palalau ʼaē ʼa Sesu. ʼE mole nātou mamate anai! ʼI te ʼosi ʼo te palalau fakatalakitupua ʼaia, neʼe fehuʼi age e Sesu kia Maleta: “ ʼE ke tui ki te meʼa ʼaia?”

“Ei, ʼAliki, ko tana tali age ʼaia; ʼe ʼau tui ko koe ko Kilisito, te ʼAlo ʼo te ʼAtua, Ia ia ʼaē ʼe haʼu ki te malamanei.”

Pea neʼe liliu fakavilivili ia Maleta ʼo pāuiʼi tona tēhina. Neʼe ina ʼui age kia ia tokotahi: “Kua ʼi henī te tagata Faiakonaki, pea ʼe ina pāuiʼi koe.” Pea neʼe mavae atu aipe ia Malia ʼi te ʼapi. ʼI te sio atu ʼa te hahaʼi ki tana ʼalu, neʼe nātou muliʼi ia ia, ʼo nātou mahalo ʼe ʼalu ia ki te falemaka fakamanatu.

ʼI tana kaku atu kia Sesu, neʼe fakatō ia Malia ki ʼona vaʼe mo tagi pea ina ʼui age: “ ʼAliki, ka na neʼe ke ʼi henī la, neʼe mole mate toku tuagaʼane!” Neʼe loloto te ʼofa ʼo Sesu ʼi tana sio ʼaē ki te tagi ʼa Malia pea mo te hahaʼi ʼaē ʼe muli mai ia ia. “Neʼe koutou tuku ia ia kifea?” ko tana fehuʼi age ʼaia.

“ ʼAliki, haʼu pea ke sio”, ko tanatou tali age ʼaia.

Neʼe toe tagi foki mo Sesu, koia neʼe ʼui ai e te kau Sutea: “Koutou sio muʼa ki te lahi ʼo tona ʼofa ʼaē ki ai!”

ʼE manatuʼi e ʼihi neʼe ko te ʼu māhina ki muʼa atu, ʼi te lafeti ʼo te ʼu Tapenakulo neʼe fakamālōlō e Sesu te tūpulaga neʼe kivi talu tona fānauʼi, pea neʼe nātou feʼuiʼaki: “Ko te tagata nei ʼaē neʼe ina avahi te ʼu mata ʼo te tagata kivi neʼe mole feala ʼapē koa ke ina fai he meʼa ke ʼaua naʼa mate te tagata nei?” Soane 5:21; 6:40; 9:1-7; 11:17-37.

▪ Neʼe kaku ia Sesu ki Petania ʼi te temi fea, pea neʼe koteā te meʼa neʼe hoko ʼi ai?

▪ Koteā te meʼa ʼaē neʼe feala ai ke tui ia Maleta ki te toe tuʼuake?

▪ Neʼe ʼiloga feafeaʼi te lahi ʼo te lotomamahi ʼo Sesu ʼi te mate ʼo Lasalo?