Kapite 92

Te Fagona Fakaʼosi ʼa Sesu Ki Selusalemi Pea Mo Te Fakamālōlō ʼo Te ʼu Kilia e Toko Hogofulu

NEʼE fakaiku noaʼi e Sesu te fonofono ʼa te Sanetualio ki tona maʼuli: he neʼe mavae ia ʼi Selusalemi ʼo ʼalu ki te potu tokelau-hahake, ki Efalaime, e lagi ko tona mamaʼo ko kilometa e 25. Neʼe nofo ai ia mo tana kau tisipulo, ʼo mamaʼo mai tona ʼu fili.

Kae, ko te Pāsikate ʼo te taʼu 33 kua fakaōvi mai, pea kua vave pe te toe ʼalu ʼa Sesu. Neʼe ʼalu ia ʼi Samalia pea hake ʼo aʼu ki Kalilea. Ko tana ʼalu fakamuli ʼaia ki te potu fenua ʼaia ʼi muʼa ʼo tona mate. ʼI Kalilea, neʼe lagi ʼalu ia Sesu pea mo tana kau tisipulo ʼo fakatahi mo ʼihi ʼe ʼolo ki Selusalemi ʼo kau ki te Pāsikate. Neʼe nātou ʼolo ʼi te ala ʼaē ʼe ʼalu ʼi Pele, ko te potu fenua ʼaia ʼe tuʼu ʼi te potu hahake ʼo Solotane.

ʼI te kamata ʼo tonatou fagona, ʼi te hū ʼa Sesu ki te kolo ʼo Samalia peʼe ko Kalilea, ko te ʼu tagata kilia e toko hogofulu neʼe ʼōmai ʼo fakafetaulaki mai kia ia. Ko te mahaki fakamataku ʼaia ʼe ina kaina mamalie te ʼu potu kehekehe ʼo te sino — te ʼu kauʼi tuhi, te ʼu kauʼi vaʼe, te ʼu taliga, te ihu pea mo te ʼu laugutu. Neʼe fēnei te fakatotonu e te Lao ʼa te ʼAtua ʼo ʼuhiga mo te kau kilia ke ʼaua naʼa maʼu e he tahi te mahaki ʼaia: “ ʼE tonu anai ke ina ʼuʼufi tona kava ʼi tona laugutu ʼoluga pea mo kalaga fēnei: ‘Heʼemaʼa, heʼemaʼa!’ Lolotoga te ʼu ʼaho fuli pe ʼaē ʼe ia te ia te mahaki ʼaia, ʼe heʼemaʼa anai ia. (...) ʼE tonu anai ke nofo ia ʼo mamaʼo mo te hahaʼi.”

Neʼe taupau e te ʼu tagata ʼaia e toko hogofulu te ʼu tapu ʼa te Lao ʼo ʼuhiga mo te kau kilia ʼonatou tutuʼu mamaʼo ia Sesu. Kae, neʼe nātou kalaga age ki ai ʼo fēnei: “Sesu, Faiako, ʼofa mai kia mātou!”

ʼI tana sio mamaʼo atu kia nātou, neʼe fakatotonu age e Sesu kia nātou: “Koutou ʼolo ʼo fakahā ia koutou ki te kau pelepitelo.” Neʼe ina ʼui age kia nātou te meʼa ʼaia koteʼuhi ʼe fakagafua e te Lao ʼa te ʼAtua ke tala e te kau pelepitelo ʼe maʼa te kau kilia ʼaē kua lelei tonatou mahaki, ʼo foaki age kia nātou te fakagafua ʼaē ke nātou toe maʼuʼuli fakatahi mo nātou ʼaē ʼe mole mahahaki.

Neʼe falala te ʼu kilia ʼaia e toko hogofulu ki te ʼu mālohi faka milakulo ʼo Sesu. Logope te mole heʼeki lelei ʼo nātou, ka neʼe nātou ʼolo fakavilivili atu aipe ki te kau pelepitelo. ʼI tanatou ʼolo ʼi ala, neʼe fakapale ai tanatou tui kia Sesu: neʼe nātou kamata sio pea mo logoʼi te ʼu fakaʼiloga ʼo te lelei ʼo tonatou mahaki!

Ko te toko hiva ʼo te kau kilia neʼe hoko atu pe tonatou fagona, kae ko te tokotahi ʼonatou, ko te Samalitana neʼe liliu mai ʼo kumi ia Sesu. Koteā te meʼa ʼaē neʼe ina uga ia ia ke toe liliu mai? Ko te loloto ʼaē ʼo tona loto fakafetaʼi ʼo ʼuhiga mo te meʼa ʼaē neʼe hoko kia te ia. Neʼe vikiviki ia ki te ʼAtua ʼo leʼolahi pea, ʼi tana maʼu ia Sesu, neʼe tō tuʼutuli ia ki ʼona vaʼe ʼo fakamālo ki ai.

Moʼo tali ki te faʼahi ʼaia neʼe tala age e Sesu: “Neʼe mole koa la ko te toko hogofulu ʼaē neʼe fakamaʼa? Pea kofea te toko hiva ʼaē? Neʼe mole ʼi ai koa he tahi age ʼi te tagata ʼaenī ʼo he tahi puleʼaga ke liliu mai ʼo faka kolōlia ki te ʼAtua?”

ʼOsi ʼaia pea ina ʼui age ki te tagata Samalitana: “Tuʼu ake ki ʼoluga pea ke ʼalu; ko tau tui neʼe ina fakamālōlō tou mahaki.”

ʼI te lau ʼo te fakamatala ʼo te fakamālōlō ʼo te kau kilia ʼaē e toko hogofulu ʼaē neʼe fai e Sesu, ʼe tonu ke tou tāʼofi fakamalotoloto te ako ʼaē ʼe tou maʼu mai tana fehuʼi ʼaē: “Pea e ʼifea te toko hiva ʼaē?” Ko te maʼuli galo ʼaē neʼe fakahā e te ʼu tagata ʼaia e toko hiva ʼe ko he hala ia ʼe mamafa. ʼAki te faʼifaʼitaki ʼo te tagata Samalitana, ʼe tou fakahā anai koa tatatou loto fakafetaʼi ʼo ʼuhiga mo te ʼu meʼa ʼaē ʼe tou maʼu mai te ʼAtua, ʼaē ʼe kau ai mo te fakapapau moʼoni ki te maʼuli heʼegata ʼi he malamanei foʼou pea mo faitotonu? Soane 11:54, 55; Luka 17:11-19; Levitike 13:16, 17, 45, 46; Fakahā 21:3, 4.

▪ Neʼe feafeaʼi te fakaiku noaʼi e Sesu te fonofono ʼaē neʼe fai ki tona maʼuli?

▪ Neʼe ʼalu leva ia Sesu ʼifea, pea neʼe ʼalu ia kifea?

▪ He koʼe ʼe tutuʼu mamaʼo te kau kilia, pea he koʼe neʼe ʼui age e Sesu ke nātou ʼolo ʼo fakahā ia nātou ki te kau pelepitelo?

▪ Koteā te ako ʼe tou maʼu mai te fakamatala ʼaia?