Kapite 102

Te Hū ʼAliʼaliki Ki Selusalemi

ʼI TE ala uhu ake, ko te ʼahotapu ʼaho 9 ʼo Nisani, neʼe mavae ia Sesu ʼi Petania mo tana kau tisipulo; ʼonatou ʼolo ki Selusalemi ʼonatou fakalaka ʼi te moʼuga ʼo Oliveto. Neʼe vave pe tanatou fakaōvi atu ki Petefase, ʼaē ʼe tuʼu ʼi te faʼahi māʼoluga ʼaia. Neʼe ʼui age e Sesu ki ʼana tisipulo e toko lua:

“Koulua ʼolo ki te kolo ʼaē e koulua sisio kiai ʼi ʼokoulua muʼa, pea ʼe koulua maʼu atu aipe te asino fafine ʼe haʼi pea mo te asino veliveli; koulua vevete ia nāua ʼo taki mai kia te ʼau. Pea kapau ʼe ʼui atu e he tahi he meʼa, ʼe tonu anai ke koulua ʼui age: ‘ ʼE ʼaoga ia ki te ʼAliki.’ Pea ʼi te temi pe ʼaia ʼe ina tuku mai ai anai ia nāua.”

ʼI te kamata, neʼe mole mahino te ʼu tisipulo ko te ʼu fakatotonu ʼaia ʼe ʼi ai tonatou felogoi tahi mo te fakahoko ʼo te lea faka polofeta faka tohi-tapu, kae ki muli age neʼe nātou mahino ai leva kiai. Neʼe tala e te polofeta ko Sakalia ko te Hau ʼaē neʼe fakapapauʼi mai e te ʼAtua ʼe hū anai ki Selusalemi ʼo heka ʼi he asino, ʼio, “ ʼi he manu, ko he ʼuhi ʼo he asino fafine”. Neʼe ko te asino ʼaē neʼe heka ai ia Salomone ʼi tana ʼalu ʼaē ke fakanofo ko he hau.

Neʼe hū te ʼu tisipulo ki Petefase, ʼonatou toʼo te ʼuhiʼi asino pea mo tana faʼe, kae ko ʼihi ia nātou ʼaē neʼe tutuʼu ʼi ai, neʼe nātou ʼui age kia nātou: “Koteā te meʼa ʼaē ʼe koulua fai?” Pea, ʼi tanatou ʼiloʼi ʼaē ʼe ʼave te ʼu manu ki te ʼAliki, neʼe tuku e te ʼu tagata ʼaia ke ʼave e te ʼu tisipulo te ʼu manu kia Sesu. ʼOsi ʼaia pea ʼai e te ʼu tisipulo ʼonatou ʼu kofu tuʼa ki te asino fafine pea mo tona ʼuhi, kae ko te ʼuhiʼi asino ʼaē neʼe heka kiai ia Sesu.

ʼI te fakaōviōvi atu ʼa Sesu ki Selusalemi, neʼe ʼāsili te kaugamālie ʼo te hahaʼi. Tokolahi ia nātou neʼe nātou folahi ʼonatou kofu tuʼa ʼi te ala, ka ko ʼihi neʼe nātou tuʼusi te ʼu vaʼa ʼakau ʼo nātou toe folahi ʼi te ala. “Manuʼia ia Ia ʼaē ʼe haʼu, te Hau, ʼi te huafa ʼo Sehova! ko tanatou kalaga ʼaia. Tokalelei ʼi te lagi, pea kolōlia ʼi te ʼu potu māʼoluga ʼaupito!”

ʼI te hahaʼi, neʼe ʼi ai te kau Faliseo neʼe ʼiʼita ki te ʼu kalaga fakafiafia ʼaia pea ʼui maʼa nātou kia Sesu. “Faiako, pupulaʼi tau kau tisipulo”, ko tanatou ʼui age ʼaia. Kae neʼe tali age e Sesu kia nātou: “ ʼE ʼau tala atu kia koutou, kapau ʼe fakalogologo ia nātou ʼaenī, pea ʼe kalaga anai te ʼu maka.”

ʼI tana fakaōvi ʼaē ki Selusalemi, neʼe sio ia Sesu ki te kolo pea neʼe tagi ia kiai, ʼo ʼui maʼana: “Ka na pau la ia koe, ʼio ia koe, neʼe ke fakasiosio lelei ʼi te ʼaho nei ki te ʼu meʼa ʼo ʼuhiga mo te tokalelei— kae ʼi te temi nei, kua fufū ia ki ʼou mata.” Ohage ko tona fakahā leva ʼaenī e Sesu, ʼe tonu ke totogi e Selusalemi te totogi ʼo tana mole fia fakalogo:

“Ko tou ʼu fili [te kau Loma ʼaē ʼe lagiaki e te senelale ko Titus] ʼe nātou fakatuʼu anai ʼi ʼou tafaʼaki he ʼā ʼaki he ʼu pou kua fakamata, pea ʼe nātou apuipui anai koe, pea ʼe nātou ʼōposi anai koe mai te potu fuli pe, pea ʼe nātou laliki anai koe ki te kele, ia koe pea mo ʼau fānau ʼaē ʼi loto ia te koe; pea ʼe mole nātou tuku anai ia te koe he maka ʼe hili ʼi he tahi maka.” Ko te fakaʼauha ʼo Selusalemi ʼaē neʼe tala fakakikite e Sesu neʼe hoko ʼi te ʼosi kiai ʼo taʼu e 37 ki muli age, ʼi te taʼu 70.

Neʼe hoki ʼosi atu pe kiai te ʼu kiʼi vāhaʼa, e tokolahi ʼi te hahaʼi ʼaia neʼe nātou sisio ki te fakatuʼuake ʼo Lasalo e Sesu. ʼI te temi nei ʼe mole kei tuku tanatou talanoa ki te meʼa ʼaia ʼi ʼonatou tafaʼaki. Koia, ʼi te hū ʼa Sesu ki Selusalemi, kua gatutu te kolo katoa. “Ko ai koa?” Ko te feʼuiʼaki ʼaia ʼa te hahaʼi. Pea mole kei tuku te ʼui ʼa te hahaʼi: “Ko te polofeta ko Sesu, ʼaē mai Nasaleti ʼi Kalilea!” ʼI tanatou sisio ki te meʼa ʼaia, neʼe lāuga te kau Faliseo, koteʼuhi ʼe mole nātou lavaʼi ke nātou fai he meʼa; ohage ko tona ʼui e nātou totonu, “ko te hahaʼi kua muli ia te ia”.

Ohage ko te agamāhani mokā haʼu ki Selusalemi, ʼe ʼalu ia Sesu ʼo fai akonaki ʼi te fale lotu. ʼI te koga meʼa ʼaia, neʼe ʼōmai ai te ʼu kivi mo te ʼu ketu kia te ia, pea neʼe ina fakamālōlō ia nātou. ʼI te mamata ʼa te kau pelepitelo pule pea mo te kau sekelipa ki te ʼu meʼa fakatalakitupua ʼaē neʼe fai e Sesu pea mo te kalaga ʼa te tamaliki ʼi te fale lotu: “Hāofaki, ʼe mātou kole atu, te ʼAlo ʼo Tavite!” neʼe nātou ʼiʼita ai pea ʼui maʼa nātou kia te ia: “ ʼE ke logo ki te meʼa ʼaē ʼe nātou ʼui?”

“Ei, ko te tali age ʼaia ʼa Sesu. Neʼe mole heʼeki koutou lau koa la te meʼa ʼaenī: ‘Mai te gutu ʼo te kihiʼi tamaliki pea mo nātou ʼaē ʼe kei huhu, kua ke foaki ia te fakavikiviki’?”

Neʼe hoko atu te fai akonaki ʼa Sesu pea neʼe ina feʼāveʼaki tana sio ki te ʼu meʼa fuli ʼaē ʼi te fale lotu. ʼOsi ʼaia, ʼi te kua tuai, pea ʼalu ia, ʼo muliʼi e te toko hogofulu-ma-lua, pea neʼe ina toe fai te ʼu kilometa ʼaē e tolu ki Petania. Pea ko te faʼahi ʼaia ka nofo ai ʼi te po ʼo te ʼahotapu, lagi ʼi te ʼapi ʼo tona kaumeʼa ko Lasalo. Mateo 21:1-11, 14-17; Maleko 11:1-11; Luka 19:29-44; Soane 12:12-19; Sakalia 9:9.

▪ Ko te temi fea pea neʼe feafeaʼi te hū faka Hau ʼa Sesu ki Selusalemi?

▪ ʼE maʼuhiga koa ke fakavikiviki te hahaʼi kia Sesu?

▪ Koteā te meʼa neʼe logosino ia Sesu ʼi tana sio ʼaē ki Selusalemi pea ko te tala faka polofeta fea ʼaē neʼe ina fai?

▪ Koteā te meʼa neʼe hoko ʼi te hū ʼa Sesu ki te fale lotu?