Neʼe Nātou Fai Te Finegalo ʼo Te ʼAtua

ʼE Kalagaʼi Ia Sesu Ko He Mesia Pea Mo He Hau!

NEʼE punamaʼuli te tokolahi ʼo te kau Sutea, ʼi tanatou sio ki te hū ʼa te tokolahi ki Selusalemi ʼi te ʼaho 9 ʼo Nisani ʼo te taʼu 33 ʼo totatou temi. Logope la neʼe ko he agamāhani tanatou sio ki te hahaʼi ʼe hū ki te kolo ʼaia ʼi muʼa ʼo te Pāsikate, kae neʼe makehe te ʼu hahaʼi ʼaia. Ko te tagata ʼaē neʼe fakatokagaʼi tāfito, neʼe ko te tagata neʼe heka ʼi te ʼuhiʼi asino. Ko te tagata ʼaia neʼe ko Sesu Kilisito, pea ʼi ʼona muʼa neʼe folahi e te hahaʼi tonatou ʼu kofu pea mo te ʼu vaʼa pālema, ʼo nātou kalaga fēnei: “Hāofaki, ʼe mātou kole atu, te ʼAlo ʼo Tavite! ʼE manuʼia ia ia ʼaē ʼe haʼele mai ʼi te huafa ʼo Sehova! Hāofaki ia ia, ʼe mātou kole atu, ʼi ʼoluga ʼi te ʼu potu tauʼaluga!” ʼI tanatou sisio ki te hahaʼi ʼaia, tokolahi ia nātou ʼaē neʼe ʼi Selusalemi neʼe uga nātou e tonatou loto ke nātou ʼōmai ʼo kau ki te polosesio ʼaia.​—Mateo 21:​7-9; Soane 12:12, 13.

Lolotoga tona kalagaʼi fakavikiviki, neʼe ʼiloʼi e Sesu ʼe hoko anai te ʼu ʼahiʼahi kia te ia. ʼIo, ʼi he ʼu ʼaho pe e nima, pea matehi anai ia ia ʼi te kolo pe ʼaia! ʼIo, neʼe ʼiloʼi e Sesu ko Selusalemi neʼe ko he telituale ʼe fakafeagai, pea neʼe ina fakatuʼutuʼu tana hū fakahāhā ki te kolo ʼo ina manatuʼi te faʼahi ʼaia.

Kua Hoko Te Lea Faka Polofeta Neʼe Fakahā Ki Muʼa Atu

ʼI te taʼu 518 ʼi muʼa ʼo totatou temi, neʼe fakakikite e Sakalia te hū fakahāhā ʼa Sesu ki Selusalemi. Neʼe ina tohi fēnei: “Kalaga fakafiafia, Ê taʼahine ʼo Selusalemi. Koʼeni! Ko tou hau ʼe haʼu tonu kia te koe. ʼE faitotonu ia ia, ʼio, kua hāofaki; ʼe agavaivai, pea ʼe heka ʼi te asino, ʼio ʼi he manu ko te ʼuhi ʼo te asino fafine. . . . Pea ʼe palalau anai ki te ʼu puleʼaga ʼo ʼuhiga mo te tokalelei; pea ʼe mafola anai tana pule ʼi te potu ʼo te tai ʼo aʼu ki te tahi potu ʼo te tai pea mai te Liʼua ʼo aʼu ki te ʼu potu taupotu ʼo te kele.”​—Sakalia 9:9, 10.

Koia ko te hū ʼa Sesu ki Selusalemi ʼi te ʼaho 9 Nisani, neʼe ko te fakahoko ʼaia ʼo te lea faka polofeta ʼa te Tohi-Tapu. Neʼe mole ko he meʼa neʼe hoko fakapunamaʼuli kae neʼe kua fakatuʼutuʼu fakalelei. Ki muʼa atu, lolotoga tana nofo ʼi tuʼa atu ʼo Selusalemi, neʼe fakatotonu fēnei e Sesu ki tana ʼu tisipulo e toko lua: “Koulua ʼolo ki te kolo ʼaē e koulua sisio kiai ʼi ʼokoulua muʼa, pea e koulua maʼu atu aipe te asino fafine ʼe haʼi pea mo te asino veliveli; koulua vevete ia nāua ʼo taki mai kia te ʼau. Pea kapau ʼe ʼui atu e he tahi ia he meʼa kia koulua, ʼe tonu anai ke koulua ʼui: ‘ ʼE ʼaoga ia ki te ʼAliki.’ Pea ʼi te temi pe ʼaia ʼe ina tuku mai ai anai ia nāua.” (Mateo 21:​1-3) Kae he koʼe neʼe fia ʼalu ia Sesu ki Selusalemi ʼi he asino, pea koteā te faka ʼuhiga ʼo te tali ʼaē neʼe fai e te hahaʼi?

Ko He Logo ʼo ʼUhiga Mo Tona ʼUhiga Hau

ʼI te agamāhani ʼe maʼuhiga age takita sio ki he meʼa ʼi hakita logo kiai. Koia, ʼi ʼihi temi neʼe fakatotonu e Sehova ki tana ʼu polofeta ke nātou fai he ʼu meʼa moʼo fakamālohiʼi ia te ʼu logo faka polofeta ʼaē neʼe nātou tala. (1 Hau 11:29-​32; Selemia 27:​1-6; Esekiele 4:​1-​17) Ko te faʼahiga fai ʼaia, neʼe faka fealagia ai kia ia ʼaē ʼe loto fefeka, ke ina manatuʼi te meʼa ʼaē neʼe sio kiai. ʼO toe feiā aipe, neʼe fakahāhā e Sesu te logo mālohi ʼi tana heka ʼi he asino ʼo hū ki te kolo ʼo Selusalemi. ʼO feafeaʼi?

ʼI te ʼu temi faka Tohi-Tapu, neʼe fakaʼaogaʼi te asino ki he ʼu fakatuʼutuʼu maʼuhiga. Ohage la, ko Salomone ʼi tona fakanofo hau neʼe heka ia ʼi te “asino fafine.”a (1 Hau 1:​33-​40) Koia ko te hū ʼa Sesu ki Selusalemi ʼi he asino ko tona faka ʼuhiga, ʼe ina fakahā ia ia ʼe ko he hau. Ko te ʼu meʼa ʼaē neʼe fai e te hahaʼi, neʼe nātou fakamālohiʼi te logo ʼaia. ʼE mahino papau ia, ko te kūtuga ʼaia ʼaē neʼe hahaʼi tāfito ai te kau Kalilea, neʼe nātou folahi tonatou ʼu mutuʼi meʼa ʼi muʼa ʼo Sesu​—pea ko te meʼa ʼaia ʼe ina fakamanatuʼi te meʼa ʼaē neʼe fai e te hahaʼi ʼi te fakanofo hau ʼo Seu. (2 Hau 9:​13) Ko tanatou pāui ia Sesu ko “te ʼAlo ʼo Tavite,” neʼe nātou fakahā lelei ai ʼe tau mo ia ke ina maʼu te ʼuhiga pule. (Luka 1:​31-​33) Pea ko tanatou fakaʼaogaʼi ʼo te ʼu vaʼa pālema, neʼe nātou fakahā lelei ai ʼe nātou fakalogo ki tona ʼuhiga hau.​—Vakaʼi ia Fakahā 7:​9, 10.

Koia ko te polosesio ʼaia neʼe hū ki Selusalemi ʼi te ʼaho 9 ʼo Nisani, neʼe fakahā lelei ai ko Sesu te Mesia pea mo te Hau ʼaē neʼe fakanofo e te ʼAtua. ʼE mahino ia, neʼe mole fiafia te hahaʼi fuli ʼi tanatou sio ki te hū feiā ʼa Sesu ki te kolo. ʼI te manatu ʼa te kau Faliseo, neʼe mole tonu ke vikiʼi ia Sesu ohage he hau. ʼAki he loto ʼita neʼe nātou fehuʼi age: “Faiako, pupulaʼi tau kau tisipulo.” Neʼe tali age e Sesu: “ ʼE ʼau tala atu kia koutou, kapau ʼe fakalogologo ia nātou ʼaenī, pea ʼe kalaga anai te ʼu maka.” (Luka 19:39, 40) Ei, ko te Puleʼaga ʼo te ʼAtua neʼe ko te faʼahi tāfito ʼaia ʼaē neʼe faka mafola e Sesu. ʼAki he lototoʼa neʼe ina kalagaʼi te logo ʼaia tatau aipe pe neʼe tali e te hahaʼi peʼe kailoa.

Te Ako Maʼa Tatou

Neʼe tonu ke lototoʼa mālohi ia Sesu ʼi tana hū ki Selusalemi, ohage ko te faʼahiga hū ʼaē neʼe fakakikite e te polofeta ko Sakalia. Neʼe ina ʼiloʼi ko tana fai ia te faʼahi ʼaia neʼe fakatupu ʼita ki tona ʼu fili. ʼI muʼa ʼo tana hake ki Selo, neʼe fakatotonu e Sesu ki tana kau tisipulo ke nātou faka mafola te logo lelei ʼo te Puleʼaga ʼo te ʼAtua, pea ke nātou “fai ni ʼu tisipulo ʼi te hahaʼi ʼo te ʼu fenua fuli pe.” (Mateo 24: 14; 28:19, 20) Moʼo fakahoko te gāue ʼaia ʼe tonu foki ke tou lototoʼa. ʼE mole fiafia te hahaʼi fuli ʼi te fagono ki te logo ʼaia. Ko ʼihi ʼe mole nātou fia logo kiai, kae ko ʼihi ʼe nātou fakafeagai kiai. Ko ʼihi ʼu puleʼaga ʼe nātou fai te ʼu tuʼakoi ʼo ʼuhiga mo te gāue fai faka mafola peʼe nātou tapuʼi katoa te faʼahi ʼaia.

Kae, kua mahino ki te kau Fakamoʼoni ʼa Sehova, ʼe tonu ke faka mafola te logo lelei ʼo te Puleʼaga ʼo te ʼAtua ʼaē kua fakatuʼu, tatau aipe peʼe fakalogo te hahaʼi peʼe nātou fakafisi kiai. (Esekiele 2:7) ʼI te hoko atu ʼo tanatou fai te gāue ʼaia ʼaē ʼe ina hāofaki te maʼuli ʼo te hahaʼi, ʼe fakaloto mālohiʼi nātou e te fakapapau ʼaenī ʼa Sesu: “Koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”​—Mateo 28:⁠20.

[Nota ʼi te lalo pasina]